ခွေးတကောင်နဲ့ လူတယောက်

၂၀၂၂ ထဲမှာ ထွက်ရှိခဲ့တဲ့ ဒီရုပ်ရှင်က ကြည့်ရသလောက် သိပ်ကြီး ရေပန်းမစားဘူး ထင်တာပဲ။ ရုပ်ရှင်က စစ်ပြန် တိုက်ပွဲဝင် ခွေးမလေးနဲ့ စစ်သည်ဟောင်းတယောက်အကြောင်းကို ပြုံးစရာလေးတွေနဲ့ ကြည်နူးဆို့နင့်ဖွယ် ရသကို ရောထွေးပြီးတင်ပြတဲ့ ဇာတ်လမ်းလို့ ပြောရမှာပေါ့။ လူသားနဲ့ တိရစ္ဆာန်တို့အကြားမှာ ချည်နှောင်တဲ့ မေတ္တာဖွဲ့ သံယောဇဉ်အခြေပြု ရုပ်ရှင်တွေကတော့ ရုပ်ရှင်ကြည့်ပရိသတ်တိုင်း မစိမ်းကြတော့ပါဘူး။ ဟိုးရှေးရှေးကတည်းက ရိုက်ပြလာကြတာပဲ။ ခွေးလိမ္မာ မျောက်လိမ္မာရုပ်ရှင်၊ ဂျပန်ဘက်ကပြတဲ့ ခွေးကလေး ဟချီကို ရုပ်ရှင်၊ စပီးဘာ့ခ်တို့ ရိုက်ပြတဲ့ War Horse တို့၊ နောက် Life Of Pi တို့လို ဖလင်တွေ၊ ပြင်သစ်ဘက်က သိမ်းငှက်တကောင်နဲ့ ကောင်ကလေးအကြားက သံယောဇဉ်ကိုပြတဲ့ Brothers Of The Wind (2015) လို ဖလင်တွေ၊ ၂၀၁၅ ခုနှစ်ထဲပဲ ထွက်တဲ့ စစ်တပ်သုံး ခွေးတကောင်အကြောင်း ရိုက်ပြတဲ့ Max တို့၊ နောက် The Call Of The Wild တို့လို ခွေးနဲ့လူကြားက သံယောဇဉ်၊ King Kong လို ရုပ်ရှင်တွေ၊ ဟိုးတနှစ်ကပဲ အင်ဒီးဆန်တဲ့ ဇာတ်ကြောင်းနဲ့ ထွက်ရှိခဲ့တဲ့ မြင်းတကောင်နဲ့ ကောင်လေးတယောက်ရဲ့ ချစ်ခြင်းမေတ္တာကိုပြတဲ့ Lean On Pete (2017) လို ရုပ်ရှင် စလို့ပေါ့။

မင်းသားရော ဒါရိုက်တာရောလုပ်တဲ့ Channing Tatum ရဲ့ ယခုရုပ်ရှင်မှာလည်း လူသားနဲ့ ခွေးကလေးအကြားက သံယောဇဉ်ကိုပြသတာ မှန်ပေမဲ့ အရင်ကြည့်ဖူးတဲ့ မေတ္တာဘွဲ့ရုပ်ရှင်တွေနဲ့ သိပ်မတူတဲ့ ထရော်မာတွေကို ဒီကားမှာမြင်ရတာ ကျေနပ်စရာကောင်းပါတယ်။ ထုံးစံအတိုင်းပေါ့။ ကိုယ်တွေဆီက ယူနီဖောင်း လူယုတ်မာတွေကတော့ စစ်ပြန်ပြန် မပြန်ပြန် လူထုအကြားမှာ ယူနီဖောင်းအားကိုးနဲ့ အနိုင်ကျင့်ပြီး နေရာကောင်းတွေ အတင်းခွထိုင်ခွင့် ရှိကြပေမဲ့ သူတို့ဆီမှာကျတော့ ကြောင်ပျောက်တဲ့စစ်သားက များတယ်။

စစ်ပြန်တွေအများစုမှာ လက်တွေ့ဘဝက အလုပ်ထဲမှာလည်း အဆင်မပြေကြဘူး။ အလုပ်မှာ အဆင်မပြေကြရတဲ့အထဲ မိသားစုနဲ့လည်း လမ်းခွဲထားရတော့ ပိုလို့ဆိုးဝါးတဲ့ အခြေအနေမျိုးတွေပေါ့။ စားသောက်ဆိုင်မှာပဲ အလုပ်လုပ်နေရတဲ့ ရိန်းဂျားစစ်ပြန်ကြီး ဂျက်ဆွန်က သူလိုချင်တဲ့အလုပ်က ဒီလိုအလုပ် မျိုးမဟုတ်။ အခြားအလုပ်တခုပြောင်းဖို့ ကြိုးစားနေပေမဲ့ အဆင်မပြေရှာဘူး။ တကယ်က အရာရာ အထီးကျန်ဆန်နေတဲ့ သူ့မှာ ဘဝအနေအထား ပြောင်းလဲနိုင်စေမယ့် အခြေအနေတခုကို လိုချင်နေတာပါ။ ဒါပေမဲ့ ဖြစ်မလာဘူး။ အဲဒီလိုကာလမှာပဲ သူနဲ့ တိုက်ဖော်တိုက်ဖက် ရိန်းဂျားဟောင်းတယောက် သေဆုံးသွားတယ်။ သေဆုံးသွားချိန်မှာ သူနဲ့အတူ တိုက်ပွဲဝင်ခဲ့တဲ့ ရိန်းဂျားစစ်သည် ခွေးမကလေး လူလူ ကျန်ရစ်ခဲ့တာပဲ။ အလုပ်သစ်အတွက် ထောက်ခံစာလိုတဲ့ ဂျက်ဆွန်မှာ ကပ္ပတိန်ဆီက ထောက်ခံစာရဖို့ အလုပ်တခုကို လက်ခံရတယ်။ အဲဒါကတော့ အာရီဇိုးနားပြည်နယ်မှာ အသုဘချမယ့် သူငယ်ချင်းရဲ့ ဈာပနအခမ်းအနားဆီကို နှုတ်ဆက်ခွင့်ရဖို့အတွက် ခွေးမလေး လူလူကို အချိန်မီ အရောက်ပို့ဆောင်ပေးရမှာ ဖြစ်တယ်။ သခင်မဲ့နေရှာတဲ့ လူလူဟာ တပ်တွင်းမှာလည်း ထိန်းကျောင်းလို့မရဘဲ ရန်လိုနေတဲ့ ခွေးတကောင်ဖြစ်တာမို့ ဂျက်ဆွန်အတွက်တော့ ဝေးသီခေါင်ဖျားတဲ့ခရီးမှာ ဒီခွေးကလေးနဲ့အတူ အချိန်မီ အရောက်သွားနိုင်ဖို့က စိန်ခေါ်မှုတခုလို ဖြစ်လာတယ်။

ရုပ်ရှင်ကြောင်းက အဲဒီမှာတင် စပေါ်လာတာပဲ။ အေရီဇိုးနားမရောက်မီအထိ သူတို့နှစ်ဦးသားရဲ့ လမ်းခရီးတလျှောက် ကသောင်းကနင်း ဖြစ်ရပုံတွေက ကြည့်ရင်း ပြုံးနေရတယ်။ လူဖြူတိုင်းပြည်များရဲ့ ဓလေ့အရ အတွဲရှာပြီး မြူးချင်ရင် ဘားတွေဘာတွေသွားပြီးပဲ အဆင်ပြေနိုင်မလား လိုက်ပြီး ဖွန်ကြောင်ရတော့ အလန်းလေး နှစ်ယောက်နဲ့ အဆင်ပြေခါနီးမှာပဲ လူလူကြောင့် လွတ်သွားရပုံတို့၊ အမြင်အာရုံချို့တဲ့တာမျိုး တခုခုချို့ယွင်းကြတဲ့ စစ်ပြန်ရိန်းဂျားတွေဆိုရင် အခမဲ့ ဝန်ဆောင်မှုပေးတဲ့ ဟိုတယ်ထဲကို ကိုယ့်ဆရာက မျက်မမြင်အယောင်ဆောင်ပြီး လူလူနဲ့ ဝင်နှပ်ဖို့ ကြိုးစားချိန်မှာပဲ အလိမ်တွေပေါ်ကုန်ပြီး ပြဿနာတွေ တက်ရတဲ့အခန်းတွေက အရမ်း ရယ်မောနေရတယ်။

တကယ်တော့ ဒီရုပ်ရှင်ကိုကြည့်ရင်း တဖြည်းဖြည်း နားလည်လာတာက သူနဲ့လူလူတို့ဟာ စစ်အနာတွေ သင့်နေကြတဲ့ ဘဝတူတွေပါ။ သူတို့မှာ လက်တွေ့လူ့လောကထဲက အကြင်နာတရားတွေ၊ နွေးထွေးပျော်ရွှင်မှုတွေကို ငံ့လင့်နေကြသူတွေ။ ခွေးမလေး လူလူရဲ့ ရန်လိုနေတဲ့အကြောင်းကလည်း ဒါကြောင့်ပဲ။ တိုက်ပွဲပျော် ခွေးကလေးမှာ စစ်ပွဲက ပြန်လာတဲ့အခါကျတော့လည်း တပ်ထဲမှာပဲ လေ့ကျင့်ရေးခွေးတကောင်အဖြစ် ရှင်သန်နေရတယ်။ ခုလို သခင်မဲ့သွားတော့ ပိုလို့ အခြေအနေဆိုးတာပေါ့။ လမ်းကြောင်းမှာ မိသားစုတစုအိမ်ကို ရောက်တော့ အမြဲ ရန်လိုပြဿနာရှာနေတဲ့ လူလူဟာ ညင်သာနူးညံ့တဲ့ သွင်ပြင် နဲ့ လိမ္မာနေတာကို အံ့အားသင့်စဖွယ် သူမြင်ရတယ်။ ဒါပေမဲ့လည်း ဂျေဆွန်ကိုယ်တိုင်မှာလည်း လူလူလိုပဲ လေလွင့်နေတဲ့ ခွေးတကောင်သာသာ ဘဝမျိုးဖြစ်နေတော့ ဒီခွေးကလေးကို သူ့ဘဝထဲကို ဆွဲထည့်နိုင်ဖို့ မလွယ်လှဘူး။

လူလူတို့လို ခွေးကလေးတွေက တိရစ္ဆာန်တွေထဲမှာ တုံ့ပြန်ခံစားမှုအာရုံ အရမ်းမြင့်မားတဲ့ သတ္တဝါတွေ။ သူ့ကိုစ က်ရုပ်တရုပ် ပရိုဂရမ်သွင်းခိုင်းသလို လိုရာပြောင်းလဲဖို့ မလွယ်လှဘူး။ အရေးကြီးဆုံးက မေတ္တာတရားနဲ့ နွေးထွေးမှုတွေကသာ သူ့ကို အရာရာပြောင်းလဲသွားအောင် ပြုလုပ်စေနိုင်တာ။ ဂျေဆွန်ဟာ သူနဲ့အတူ ခရီးရှည်ကြီးကို ဖြတ်သန်းရင်း ဒါ‌တွေကို နားလည်လာတယ်။

သနားစရာ လူလူကလေးမှာ သူ့လိုပဲ စစ်ရဲ့ကိုက်ခဲမှုတွေက စိတ်အတွင်းသားထဲအထိ လှိုက်စားနေတယ်ဆိုတာကို သိလာခဲ့ရတယ်။ အာရီဇိုးနားမရောက်ခင် ညဦးပိုင်းမှာပဲ မိုးတွေ ရုတ်တရက်သည်းလာတုန်း သူတို့ကားကလေးက လမ်းမှာတင် ပျက်သွားလို့ လူလူနဲ့အတူ နေစရာ ရှာတဲ့အချိန်မှာ ဂိုဒေါင်ပျက်ကြီးတလုံးကို သွားတွေ့တယ်။ အတွင်းထဲရောက်ချိန်မှာ ရုတ်တရက် မိုးတွေခြိမ်းလိုက်တော့ လူလူက မိုးထစ်ချုန်းသံကို တိုက်ပွဲအတွင်းက သေနတ်သံတွေလို့ ထင်မှတ်လိုက်တာထင်ပါရဲ့။ အငမ်းမရ ထိုးဟောင်တယ်။ ကယောက်ကယက်ဖြစ်နေတယ်။ မှန်တံခါးတွေနောက်မှာ မြင်နေရတဲ့ သည်းမှုန်ရီမှိုင်းနေတဲ့ ထက်ဝဠာ ကောင်းကင်ဝသုန်တခုလုံးက မိုးတွေ ဆက်တိုက် ထစ်ချုန်းနေချိန်မှာပဲ လူလူ့ကို အတင်းချော့နေရတယ်။ မိုးရေတွေ ရွှဲစိုနေတဲ့ သူ့အဝတ်အစားတွေကိုတောင် မလဲနိုင်ဘူး။ တုန်ရီ လှုပ်ခါနေတဲ့ ခွေးကလေးဘေးမှာ သူသာမရှိတော့ရင် လူလူရဲ့အခြေအနေက သွပ်သွပ်ခါရူးသွားမယ့် အခြေအနေမျိုးပဲ။

ဒါကြောင့် စစ်ပွဲတွေကနေ ရိုက်ခတ်လာတဲ့ ထရော်မာတွေက ဉာဏ်ရည်မြင့် လူသားတွေတင် မဆိုထားနဲ့။ အသိဉာဏ် တဆင့်မကနိမ့်တဲ့ ခွေးကလေးတွေကိုတောင် စစ်ပွဲထဲက ရက်စက်နာကျင်မှုတွေ၊ စက်ဆုပ်ဖွယ် ဖြစ်ရပ်တွေဟာ ကယောင်ချောက်ခြားနဲ့ ဘဝ‌တလျှောက်လုံး စိတ်အနာတွေပါသွားအောင် ဆွဲဖြဲပစ်နိုင်‌စေတယ်။

ဒီအတိုင်းပါပဲ။ စစ်မိစ္ဆာနတ်ဆိုးများရဲ့ အစွယ်ချွန်မြတွေဟာ လက်တွေ့ဖြစ်ပွားနေတဲ့ ကျနော်တို့ တတိုင်းပြည်လုံးက အပြစ်မဲ့လူသားတွေအပေါ်ကိုလည်း အသနားအညှာတာမရှိဘဲ ဆွဲဖြဲကိုက်ခဲနေတုန်းပါပဲ။ သူတို့စေလွှတ်ထားတဲ့ ကိုယ်ပွားတွေဟာ မိစ္ဆာနတ်ဆိုးတွေ ပီသစွာပဲ ဆက်လက် ယုတ်မာဖျက်ဆီးဖို့ အသင့်ဖြစ်နေကြတယ်။ ဆက်လက်ပြီးလည်း အရာရာကို ဖျက်ဆီးဖြိုချလျက် ရှိနေပါတယ်။ ဒါတွေကို ခါးသည်းစွာနဲ့ ထွေးပိုက်ရင်းပဲ လက်ရှိမျိုးဆက်ဟာ နောက်ထပ် ဒါမျိုးတွေ မကြုံတွေ့ရဖို့ အသက်တွေ ဘဝတွေ စတေးပြီး တော်လှန်တိုက်ခိုက်နေရပါတယ်။

ဒီအရာတွေ ပြီးသွားတဲ့အခါမှာ လူလူလို စစ်ဒဏ်သင့် သတ္တဝါတွေ၊ ဂျေဆွန်တို့လိုပဲ စစ်ကိုက်ခဲမှုကို ခံစားနေရတဲ့ လူသားတွေ အများကြီး ကျန်ခဲ့ကြရလိမ့်မယ်။ ဒီဒဏ်ရာတွေ ကုစားနိုင်ဖို့အတွက်က နောက်ဆုံးပေါ် ဆေးဝါးတွေ၊ နည်းပညာပစ္စည်းတွေနဲ့တော့ ရနိုင်မယ်မထင်ပါဘူး။

စစ်ကြောင့်ပြိုပျက်သွားတဲ့ မေတ္တာ‌တရားတွေ တဖန်ပြန်ပြီး ပေါ်ထွန်းလာရဖို့အတွက် လူသားချင်း အပြန်ပြန်အလှန်လှန် နွေးထွေးဖေးမမှုတွေ၊ ကိုယ်ချင်းစာတရားတွေ၊ ခွင့်လွှတ်မှုတွေနဲ့ပဲ ဒဏ်ရာတွေ ပျောက်ကင်းသက်သာအောင် ကုစားပေးနိုင်မှာဖြစ်ပါတယ်။ အမုန်းတွေ၊ နာကျင်ခံပြင်းမှုတွေနဲ့ ဆက်လက် တောက်လောင်နေဦးမယ် ဆိုရင်တော့ ဘယ်တော့မှ ပြီးဆုံးသွားမယ် မထင်ပါဘူး။

ခွေးကလေးလူလူကို လိမ္မာပျော့ပျောင်းအောင် လုပ်ဆောင် သွားနိုင်ခဲ့တဲ့ လေ့ကျင့်မှုကို ဂျေဆွန် ရှာဖွေတွေ့ရှိသွားတော့လည်း ဘာမှတော့ မဟုတ်ပါဘူး။ စစ်မှန်တဲ့ နွေးထွေးကြင်နာမှုဆိုတဲ့ အပြုအမူကလေးရယ်ပါ။ အဲဒီအရာက ပြောမယ်သာပြောတာ၊ တမင်လုပ်ယူလို့လည်း မရနိုင်ဘူးလေ။ ကိုယ်ချင်းစာတရားရှိဖို့နဲ့ နားလည်ခွင့်လွှတ်နိုင်စွမ်း ရှိစေတဲ့ ကနဦး စိတ်အခြေအနေ‌တွေကသာ ယင်းအရာတွေကို ဆက်လက် ပေါက်ဖွားလာစေအောင် စွမ်းဆောင်နိုင်တာမျိုး မဟုတ်လား။

ဆိုတော့ ကမ္ဘာကြီး ဆက်လက်ပြီး နေကောင်းကျန်းမာဖို့အတွက် မေတ္တာပျိုးပင်တွေ ပိုမိုရှင်သန်စေဖို့ နေရာတိုင်းမှာ လိုအပ်လျက်ရှိနေပါပြီ။ ခွေးကလေးလူလူလို မိုးခြိမ်းသံကြားတာနဲ့ ကျည်ဆန်ပေါက်ကွဲသံလို့ မထင်မိတော့ဖို့ မေတ္တာဆေးဝါးတွေ အဆောတလျင် ဖော်ထုတ်ဖို့ အရေးကြီးလှပါပြီ။ သို့ပေတဲ့လည်း ကျနော်တို့ လူသားရိပ်မြုံကြီးအဖို့က အမုန်းတရားကို အခြေခံတဲ့ ပြုမူဆက်ဆံမှုတွေအောက်ကိုပဲ ပြန်လည်ထိုးဆင်းဖို့ ပြင်ဆင်လာပြီ။ ရုပ်ဝတ္ထုတွေ တိုးတက်လာသလောက် စိတ်ပိုင်းဆိုင်ရာတွေဟာ အံ့အားသင့်ဖွယ် နိမ့်ကျ ထိုးဆင်းလာတာကို တွေ့လာရတယ်။ အသက်သွေးချောင်း စီးမယ့်အရေးကို ဦးတည်ဖို့ ရည်ရွယ်နေကြတယ်။ အဲဒီလိုဖြစ်မယ့်ကိစ္စကိုပဲ ရည်သန်ဖို့ တာစူနေကြတဲ့ ဆိုးယုတ်ကြတဲ့ လူပုဂ္ဂိုလ်တွေက အရေးပါတဲ့နေရာကို ရောက်ရှိလျက်သား ဖြစ်နေကြတယ်။ သူတို့တွေကို ကျနော်တို့ လူ့အဖွဲ့အစည်းကနေ အချိန်မီ တွန်းမချနိုင်ရင်တော့ ယခုရုပ်ရှင်ထဲက ခွေးမလေး လူလူလို ဘဝမျိုးတွေကို ထပ်မံပြီး ကြုံကြရဦးမှာပါပဲ။

ရုပ်ရှင်ရည်ညွှန်း – Dog Movie (2022)