ငြိမ်းချမ်းရေး ဟူသည်

“ငြိမ်းချမ်းရေး ဟူသည်”

အယ်ဒီတာ့စကား

” ငြိမ်းချမ်းရေးသည် — ပျားရည်ကဲ့သို့အစဉ် — တမာပင် သရက်ပင် — ဘာပင်ပဲ စွဲစွဲ — ချိုမြဲအရသာ — မစွန့်သည်သာပင်”

ကမ္ဘာ့ငြိမ်းချမ်းရေးညီလာခံအတွက် ဆရာမြို့မငြိမ်းရေးစပ်ခဲ့သော သီချင်းဖြစ်သည်။ငြိမ်းချမ်းရေးအဓိပ္ပါယ်များ လေးနက်ပေါ်လွင်လှသည်။

သို့သော် သမိုင်းဝင်ကျောင်းသားသမဂ္ဂအဆောက်အဦကို မိုင်းခွဲဖြိုဖျက်လိုက်ပြီး လက်နက်ဆို၍ အပ်တိုတစ်ချောင်းပင်မရှိသောကျောင်းသားများအား ဓားကိုဓားချင်း လှံကိုလှံချင်း ရင်ဆိုင်ဖြေရှင်းသွားမည်ဟု စိန်ခေါ်ခြိမ်းခြောက်စကားထွက်ပြောလိုက်ကတည်းက ဗိုလ်နေဝင်းစစ်တပ်၏ ဖက်ဆစ်သန္ဓေကို ဘီလူးအစွယ်ကဲ့သို့ ပြူးပြူးကြီးတွေ့မြင်ခဲ့ရသည်။ ပြည်တွင်းစစ်ရပ်စဲရေး၊ ငြိမ်းချမ်းရေး သဘောထားအမှန်နှင့် အကြမ်းဖက်စစ်တပ်၏ သရုပ်သကန်မှာ ကွဲပြားခြားနားခဲ့သည်။

” ရွံစရာမုန်းစရာ – စစ်ရန်မီးတားဆီးဖို့တွင် — အိုးကြီး အိုးငယ် – သယ်ဆောင်ကာယူငင် — လက်ခုပ်နဲ့ပဲဖြစ်စေ- ကိုယ်တိုင်ပါဝင် — ဖျန်းပက်ကြ – ကိုယ်စီ ညီညီပင် –ငြိမ်းချမ်းရေး- အေးမြသောရေစင် –“

ရန်မီးမပွားစေဖို့ ရေကိုလက်ခုပ်နဲ့ဖြစ်စေကိုယ်တိုင်ပါဝင်ဖျန်းပက်ကြဖို့ ရေးသားခဲ့သည်။

ယခု ထာဝရငြိမ်းချမ်းရေးတွေ လှိုင်လှိုင်‌ပြောနေသော စကစကတော့ မြို့တိုင်း ရွာတိုင်းကအိမ်တွေ၊လူတွေ၊ ဘုရားကျောင်းတွေပါ မီးပုံရှို့နေသည်။ အပြစ်မဲ့ ပြည်သူများနေထိုင်ရာ ရွာ၊ စာသင်ကျောင်းနှင့် စစ်ဘေးရှောင်စခန်းတွေကိုပါ စစ်ရေးပစ်မှတ်သဖွယ် ဗုံးကြဲတိုက်ခိုက်နေသည်။ ကလေးငယ်များ၊အဘိုးအဘွားများမကျန် အငြှိုးတကြီးနှင့် စစ်ထိုးသတ်ဖြတ်နေသည်။

သို့ပါလျက် ငြိမ်းချမ်းရေးပွဲစားများက စကစ၏ ဖြေလျော့မှုများကို အသားပေးဇန်းတင်၍ ခုခံတွန်းလှန်စစ်များရပ်ဆိုင်းပြီး နိုင်ငံရေးနည်းလမ်းများနှင့် အဖြေရှာကြဖို့ မျက်နှာပြောင်တိုက်ကာ ပြောဆိုနေကြသည်။ အလစ်အငိုက်မှာ အတုအယောင်ရွေးကောက်ပွဲလုပ်ပြီး နိုင်ငံရေးထွက်ပေါက်ရှာဖို့ပြင်ဆင်နေကြသည်။ စစ်အာဏာရှင်၏တရားမဝင်ရွေးကောက်ပွဲကို ပြည်သူများကလက်မခံ၊ ငြင်းဆန်လျက်ရှိသည်။ နိုင်ငံရေးအင်အားစုများ အားလုံးမပါဝင်သော၊ လွတ်လပ်၍ တရားမျှတမှုမရှိသော၊ အာဏာသိမ်းစစ်အုပ်စု၏ ရွေးကောက်ပွဲကို လက်မခံကြောင်း နိုင်ငံတကာကလည်း ကန့်ကွက်ပြောကြားထားပြီးဖြစ်သည်။

သူတို့၏ အတုအယောင်ရွေးကောက်ပွဲနှင့် အတုအယောင်ငြိမ်းချမ်းရေး သွေးဆောင်မှုများကို တိုင်းရင်းသားအားလုံးက နားလည်ထားပြီးဖြစ်သည်။AA အနေဖြင့်လည်း ဆေးဝါးနှင့် စားနပ်ရိက္ခာအဖြတ်တောက်ခံနေရသော ဒေသခံပြည်သူလူထု၏ အတိဒုက္ခကို ထောက်ထားပြီး စကစနှင့် လူသားချင်းစာနာမှု အပစ်ရပ်စဲရေး လုပ်ထားသည်ကို ကျန်တော်လှန်ရေး အင်အားစုများက သဘောပေါက်ထားကြသည်။ တလောကပင် NCA အဖွဲ့ ၇ဖွဲ့၏ အတူတစ်စုတည်း တွေ့ဆုံခွင့်ပြုရေး တောင်းဆိုမှုကို စကစက ငြင်းပယ်လိုက်ပြီဖြစ်ရာ စကစ၏ ဆိတ်ခေါင်းချိတ်၍ ခွေးသားရောင်းမည့် အကြံက ပို၍ပေါ်လွင်ထင်ရှား လာပေသည်။

စစ်အုပ်စု၏ယုတ်မာသော သပ်လျှိုသွေးခွဲ၊အချိန်ဆွဲ၊ လမ်းလွှဲမည့် ဗျူဟာများသည် တော်လှန်ရေး အင်အားစုများကြားတွင် မတိုးသာ၊ မရွေ့သာတော့ချေ။

ပွဲလန့်တုန်း ခင်းဖို့အကြံနှင့် PRဆိုသော အာဏာဖျာလိပ် ဦးထိပ်ရွက်လာသူများအား သိငြားစေအံ့။
ကိုယ့်တစ်ကိုယ်ရေ သက်သာရာရမှု၊ အာဏာအရိုးအရင်းကိုက်လိုမှုအတွက် ပြည်သူ့ဆန္ဒကိုကျောခိုင်ရင်ကား သင်တို့သမိုင်း ကွေးစေလိမ့်မည်။ သင်တို့သမိုင်း ရိုင်းစေလိမ့်မည်။

တာတိုခရီးမှ ခွန်အားကြီးသူတွေက အသာရတတ်သော်လည်း တာဝေးခရီးမှာတော့ စိတ်ဓာတ်အင်အားရင့်သန်သူတွေကသာ အောင်ပွဲခံစမြဲ ဖြစ်ပေသည်။ ထို့‌ကြောင့် ပြည်သူများ၊ လူငယ်များ၏ အလံမလှဲစတမ်း စိတ်ဓာတ်သည် မကြာမီအောင်ပွဲခံပါလိမ့်မည်။ ။