စစ်ကြီးပြီးရင် ဝက်သားဟင်းစားမယ်

“စစ်ကြီးပြီးရင် ဝက်သားဟင်းစားမယ်”

ဆာယာ​နွေ

ဝက်သားဟင်းကဘယ်တော့နူးမှာလဲ။ ဝက်သားဟင်းစားချင်လှပြီ။ ဝက်သားဟင်းစားချင်ရင် ဟင်းအိုးကိုမီးထိုးပေါ့။ လေမှုတ်ယပ်ခပ် မတ်တပ်ရပ်မနေနဲ့။ တကယ်လို့ဝက်သားဟင်းတွေမရှိတော့ရင် ဘယ်လိုလုပ်မလဲ၊ မစဥ်းစားဘူး။ ဝက်သားဟင်းစားချင်တယ်။ ဝက်သားဟင်းဟာ ပျင်းရိဖွယ်နေ့တွေအတွက် ပျော်ရွှင်စရာ ချက်ပြုတ်နည်းပဲ။ ဝက်သားဟင်းဆိုတာ အဆီတထပ် အသားတထပ် ဒုက္ခများခြင်းပဲ။ အထူးသဖြင့် စစ်ကြီးထဲမှာ အေးအေးလူလူ ဝက်သားဟင်းချက်နေရတာ အရသာပဲ။ အနောက်ဘက်တောင်ကုန်းကို အမြောက်နဲ့ထုရင် ဝက်သားဟင်းတွေရလာမယ်။ အရှေ့ဘက်လွင်ပြင်ကို တွားသွားကျားထိုးလိုက်ရင်ရော ဝက်သားဟင်းတွေရမှာလား။ ဟိုမှာကြည့် မျှစ်စို့တွေ ဝက်သားဟင်းယောင်ဆောင်ပြီး ငါတို့အိပ်မက်ထဲ ဝင်လာနေပြီ။ ကြွေးကြော်ကြ၊ ကျားထိုးတက်ကြ။ ရဲဘော်တို့ ဝက်သားဟင်းကောင်းကောင်းစားရမယ်လို့ ဘယ်စစ်တပ်ကမှ မမြှူဆွယ်ဘူး။ ဝက်သားဟင်းစားချင်သူတွေ စစ်ထဲမလိုက် ကြဘူး။ စစ်ထဲလိုက်ပြီးမှ ဝက်သားဟင်းစားရရင် ကံကောင်းတာပဲ။ အထူးသဖြင့် စစ်ဖြစ်နေတုန်း ဝက်သားဟင်း ထိုင်ချက်နေတာ အရသာပဲ။ ငရုတ်ဆုံကို တချက်ထုထောင်းလိုက်တိုင်း မော်တာကျည်တလုံး ကျပေါက်မယ်။ တရှဲရှဲမြည်နေတဲ့ ဆီပူအိုးထဲကို ပျက်ကျလာတာ ဝက်သားဟင်းတွေပဲ။ တဟုန်းဟုန်းတောက်နေတဲ့ မီးလျှံထဲ ပျော်ပျော်ရွှင်ရွှင်နူးအိလာတာ ဝက်သားဟင်းပဲ။ ဝက်သားဟင်း နူးနူးအိအိလေးရဖို့ အိမ်တွေဘယ်နှလုံး မီးတင်ရမှာလဲ။ အထောင် လား၊ အသောင်းလား။ သိန်းနဲ့ချီတဲ့ ပြေးနေသူတွေ။ ဟေး ဝက်သားဟင်း စားကြအုံးမလား။ ဝက်သားဟင်းစားချင်လား။ မီးကူထိုးပေးစမ်းပါ့။ ရုတ်တရက် မီးလျော့သွားတော့ သွေးစွန်းနေတဲ့ ယူနီဖောင်းတွေ မီးရှို့ပစ်လိုက်တယ်။ ဘာပဲဖြစ်ဖြစ် ဝက်သားဟင်းနူးနူးအိအိလေးရဖို့လိုတယ် မဟုတ်လား။ ရန်သူမျိုးငါးပါးဟာ ဝက်သားဟင်းမကြိုက်ကြဘူး။ အထူးသဖြင့် ငါချက်တဲ့ဝက်သားဟင်းပေါ့။ ငါတို့ချက်တဲ့ ဝက်သားဟင်းပေါ့။ ဟင်းတခွက်နဲ့လည်း မျက်ခွက်ကို ရိုက်ကြစတမ်းဆိုတဲ့ခေတ်ကြီးကို ဝက်သားဟင်းကျွေးချင်လိုက်တာ။ ချင်းနဲ့ကြက်သွန်ဖြူကို ရောထောင်း။ ငရုတ်သီးထောင်း။ တဒိုင်းဒိုင်းပဲ။ ဝက်သားဟင်းချက်နေကြတာ။ ပါးပါးလေး လှီးလိုက်။ ဆနွင်းထည့် နယ်လိုက်။ ဝက်သားဟင်းမရခင်တော့ စပ်ဖျဥ်းဖျဥ်းဖြစ်နေကြမှာပဲ။ မျက်ရည်တွေလည်း ကျနေမှာပဲ။ ဘာပဲဖြစ်ဖြစ် ဝက်သားဟင်းရဖို့ပဲမဟုတ်လား။ ဝက်သားဟင်းရဖို့ ဘယ်ကိုချီတက်ရမလဲဆိုတော့ အရောင်ဖျော့ဖျော့အသက်တွေဆီကိုတဲ့။ ဝက်သားဟင်းရဖို့ နင်းမိုင်းတွေကို ဖြတ်ခဲ့ရတယ်။ ငရုတ်ဆုံထဲကို ၆၀ မမကျည်ဆန်တွေ ကျကွဲနေတယ်။ ဆီပူအိုးထဲကို လေယာဥ်ပျံတွေ ပျက်ကျနေတယ်။ အိမ်တိုင်ပါချွတ်ပြီး မီးထိုးပေးထားတာပဲ။ ဝက်သားဟင်းနူးနူးလေးရတော့မှာပါ။ တွေ့လား မဆလာနံ့ကိုရလို့ တချို့အပစ်အခတ်ရပ်စဲချင်နေကြတာ။ ငါကအေးဆေးပဲ။ စစ်ကြီးထဲ ဝက်သားဟင်းတွေ အရသာရှိရှိချက်လို့။ ငါတို့က အေးဆေးပဲ။ ငါတို့က အခြောက်အလှန့်မရှိတဲ့ ဆက်ရက်ငှက်တကောင်ရဲ့ညနေခင်းလိုပဲ ဝက်သားဟင်းကိုငေးကြည့်လို့၊ ဝက်သားဟင်းဆီချီတက်လို့။ ။