@2025 - All Right Reserved. The Call Online Magazine
ကဗျာ

စစ်ကြီးပြီးအောင်တိုက်မှရတော့မယ်

by The Call
by The Call
‘စစ်ကြီးပြီးအောင်တိုက်မှရတော့မယ်’
◼️လင်းညိုရိပ်
လူငယ်တွေဟာ အချစ်ကို
ခေတ်နဲ့ယှဉ်ပြီး ဦးစားပေးလို့မရမှန်းသိတဲ့အခါ
အချစ်ဆိုတာကို ခဏမေ့ထားပြီး
သူတို့တွေ ဆုံးဖြတ်ချက်တစ်ခုချလိုက်တယ်
စစ်ကြီးပြီးအောင်တိုက်မှရတော့မယ်။
နောက်မျိုးဆက်တွေအတွက် အနာဂတ်ဆိုတာဟာ
စနစ်အပေါ်မှာပဲ မူတည်နေတော့
သူတို့အနာဂတ်ဆိုတာကို ခဏမေ့ထားပြီး
သူတို့တွေ ဆုံးဖြတ်ချက်တစ်ခုချလိုက်တယ်
စစ်ကြီးပြီးအောင်တိုက်မှရတော့မယ်။
လူငယ်တွေဟာ ပန်းသိပ်ကြိုက်တဲ့အမေအိုအတွက်
ပန်းကလေးတွေကို အရင်လိုအလွယ်တကူ
ခူးပေးလို့မရမှန်းသိတဲ့အခါ ဓားထက်ထက်သွေးပြီး
ဆုံးဖြတ်ချက်တစ်ခုချလိုက်တယ်
စစ်ကြီးပြီးအောင်တိုက်မှရတော့မယ်။
သံချေးကိုက်နေတဲ့ ယန္တရားအပျက်ကြီးကို
ပြင်လို့မရနိုင်မှန်းသိတဲ့အခါ လူငယ်တွေဟာ
ပိုကောင်းတဲ့အသစ်တစ်ခုနဲ့ အစားထိုးဖို့အတွက်
ဆုံးဖြတ်ချက်တစ်ခုချလိုက်တယ်
စစ်ကြီးပြီးအောင်တိုက်မှရတော့မယ်။
ကြွေလွင့်ခဲ့ရတဲ့ကြယ်တွေအတွက်
သူတို့ထမ်းဆောင်လို့မရတော့တဲ့ တာဝန်တွေကို
“ငါတို့ပခုံးပေါ်လွှဲပြောင်းယူရမယ်လို့” ခံယူထားကြတဲ့အခါ
အဲ့ဒီခံယူချက်အတွက်
ဆုံးဖြတ်ချက်တစ်ခုချလိုက်တယ်
စစ်ကြီးပြီးအောင်တိုက်မှရတော့မယ်။
မပြောမဆိုနဲ့ အိမ်ကထွက်လာတဲ့နောက်
အမေ့ကိုဖုန်းဆက်ပြီးပြောခဲ့တဲ့စကား
“အောင်ပွဲနဲ့အတူပြန်ခဲ့မယ်အမေ” ဆိုတဲ့
အဲ့ဒီသွေးထဲက ကတိအတွက်
ဆုံးဖြတ်ချက်တစ်ခုချလိုက်တယ်
စစ်ကြီးပြီးအောင်တိုက်မှရတော့မယ်။
လူငယ်တွေဟာ အိမ်အပြန်ခရီးအတွက်
သူတို့လမ်းကိုသူတို့ဖောက်
သူတို့သွေးကိုသူတို့သောက်လို့
ဆုံးဖြတ်ချက်တစ်ခုချလိုက်တယ်
စစ်ကြီးပြီးအောင်တိုက်မှရတော့မယ်။ ။
Recent Visitors: 6

"The Call - ခေါ်သံ" အွန်လိုင်းမဂ္ဂဇင်းသည် မြန်မာ့နွေဦးတော်လှန်ရေးဘက်တွင် အခိုင်အမာရပ်တည်သော မဂ္ဂဇင်းတခုဖြစ်သည်။ နွေဦးတော်လှန်ရေးကို အထောက်အပံ့ဖြစ်စေသော၊ နွေဦးတော်လှန်ရေးတွင် နည်းလမ်းအမျိုးမျိုး ပုံသဏ္ဌာန်အမျိုးမျိုးဖြင့် ပါဝင်လှုပ်ရှားနေကြသူအားလုံးအတွက် အတွေးသစ် အမြင်သစ်များရစေပြီး တော်လှန်ရေးလုပ်ငန်းများကို အထောက်အကူဖြစ်စေသော ကဏ္ဍပေါင်းစုံကို ရေးသား၊ တင်ဆက် ထုတ်လွှင့် ဖော်ပြသွားမည်ဖြစ်သည်။ စစ်ကောင်စီ ကျူးလွန်သော စစ်ရာဇဝတ်မှုများ၊ လူ့အခွင့်အရေး ချိုးဖောက်မှုများသာမက ပြည်သူတို့အ​ပေါ် ကျူးလွန်သည့် စစ်​ကောင်စီ၏ ရာဇဝတ်မှုတိုင်းအား ​ဖော်ထုတ်သွားမည် ဖြစ်သည်။

Related Posts

လရောင်မရင့်ခင် ကြွေနှင့်တဲ့ကြယ်

ဆင်ခြေဖုံးရပ်ကွက်ထဲက ငါ့သူငယ်ချင်း

မင်းကိုပေးခဲ့တဲ့ကတိ

နှင်းဝေတဲ့ကျောင်း

ဆူဆိုက်ဟွန်းန်

လမ်း

Leave a Comment

Save my name, email, and website in this browser for the next time I comment.