တရားရိပ်သာ

“တရားရိပ်သာ”

ရဲခေါင်မဲမောင်

ဒေါ်နွယ်နွယ်ဦးသည် အငြိမ်းစားဝန်ထမ်းတဦးဖြစ်ပြီး အိမ်ထောင်မပြုဘဲ တဦးတည်းနေထိုင်သည့် အပျိုကြီးလည်းဖြစ်သည်။ သူသည် အငြိမ်းစားမယူမီကတည်းကပင် လပြည့်လကွယ်ဥပုသ်ရက်များနှင့် ဝါတွင်းကာလများတွင် ဥပုသ်သီလစောင့်တည်ခြင်း တရားထိုင်ခြင်းများကို လေးလေးနက်နက် ပြုလုပ်ခဲ့သူတဦးဖြစ်သည်။ အငြိမ်းစားယူပြီးသွားသောအခါ သားရေးသမီးရေးကိစ္စများလည်း လုံးဝမရှိသောကြောင့် လွတ်လပ်သွားပြီးလျှင် ဘုရားတရားအလုပ် တခုတည်းကိုသာ တစိုက်မတ်မတ် ပြုလုပ်လာခဲ့သည်။

အိမ်မှာနေသည့်အချိန် မရှိသလောက်ဖြစ်လာကာ တရားစခန်းများ၌ပင် အချိန်ကုန်လာခဲ့သည်။ ကိုယ်တိုင် တရားစခန်းများသို့ လှည့်လည်သွားရောက် တရားထိုင်တတ်သလို ဓမ္မမိတ်ဆွေများက အဖော်စပ်လာခဲ့လျှင်လည်း မညည်းမညူ လိုက်ပါ တရားထိုင်လေ့ရှိပါသည်။ပြီးခဲ့သည့် သင်္ကြန်ရက်များကတော့ အဖော်မပါ တဦးတည်းဆိုသလို ဒေါ်နွယ်နွယ်ဦး တရားစခန်းဝင်ခဲ့ပါသည်။ တရားစခန်းကလေးသည် သစ်ရိပ်ဝါးရိပ်များအောက်မှာ တပါးကျောင်းဆောင်ကလေးများဖြင့် အေးချမ်းတိတ်ဆိတ်နေပါသည်။

တရားစခန်းဆိုသော်လည်း စည်းကမ်း တင်းတင်းကျပ်ကျပ်ကြီး မဟုတ်။ စိတ်ပင်ပင်ပန်းပန်း မရှိကြရလေအောင် သမမျှတသော အချိန်ပိုင်းကလေးများ သတ်မှတ်ထားသောကြောင့် တရားစခန်း ဝင်ရောက်လာကြသူများ ပေါ့ပေါ့ပါးပါးရှိကြသည်။

ဒေါ်နွယ်နွယ်ဦးသည် ညနေ ၅ နာရီ တရားဖြုတ်သောအခါ သူ၏ကျောင်းဆောင်ကလေးသို့ ပြန်လာခဲ့ပြီးနောက် ခေတ္တအနားယူကာ ရေချိုးရန်အတွက် ရေချိုးခန်းသို့လာခဲ့ပါသည်။ ကံကောင်းထောက်မစွာပင် ရေချိုးခန်းမှာ ရေချိုးသူ တယောက်မှမရှိ။ ထို့ကြောင့် သူသည် စိတ်အေးလက်အေး ရေချိုးနေလိုက်ပါသည်။ ကိုယ်ခန္ဓာကို ဆပ်ပြာတိုက်လိုက်သောအခါ ညာဖက်လက်သူကြွယ်မှာ ဝတ်ထားသည့် လက်စွပ်ကလေးမှာ ချောင်ပြီး ကျွတ်ထွက်လာသော ကြောင့် ချွတ်ယူလိုက်ပြီးလျှင် ဆပ်ပြာခွက်များတင်ရန် ပြုလုပ်ထားသော စင်ကလေးပေါ်သို့ တင်ထားလိုက်ပါသည်။ ရေမိုးချိုးပြီး ကျောင်းဆောင်ရှိရာသို့ သူပြန်လာခဲ့သည်။

အဝတ်အစား လဲပြီးချိန်ကျတော့မှပင် လက်စွပ်ကလေးကျန်ခဲ့သည်ကို သတိရသွားပြီး ကမန်းကတန်းပင် ရေချိုးခန်းရှိရာသို့ ဒေါ်နွယ်နွယ်ဦး ပြန်လာခဲ့ပါသည်။ လက်စွပ်ကလေးမှာ မိခင်ဖြစ်သူ၏ လက်စွပ်ကလေးဖြစ်ပြီး ကွယ်လွန်ခါနီးအချိန်မှာ သူ့ကိုမိခင်က ပေးသွားသောကြောင့် တန်ဖိုးထား မြတ်နိုးရသော လက်စွပ်ကလေးဖြစ်လေသည်။

ရေချိုးခန်းရောက်တော့ တံခါးပိတ်ထားပြီး တယောက်ယောက် ရေချိုးနေသည်ကိုတွေ့ရသဖြင့် အပြင်ဘက်မှာ သူစောင့်နေလိုက်သည်။ ရေချိုးပြီး၍ အမျိုးသမီးတယောက်ထွက်လာတော့ အကျိုးအကြောင်းပြောပြကာ မေးကြည့်မိပါသည်။ သို့သော် ထိုအမျိုးသမီးက သူ လာရောက် ရေချိုးနေချိန်အတွင်း မည်သည့်လက်စွပ်ကိုမျှ မတွေ့ပါဟု ပြောလေသည်။ ထိုတရားစခန်းမှာ ဒေါ်နွယ်နွယ်ဦးတယောက် တရားရခဲ့ပါသည်။