77
နောင်ရိုး(ကန့်ဘလူ)
‘တရားသောစစ် နိုင်ရမယ်’
နောင်ရိုး(ကန့်ဘလူ)အသစ်တွေကသာ
အဟောင်းဖြစ်သွားတာ
အဟောင်းတွေက
အသစ်ဖြစ်မလာဘူး
အနာဂတ်အသစ်ကို
အညစ်အပေမခံလိုတော့
မကောင်းတဲ့ အဟောင်းတွေကို
ငါတို့ ပြောင်းလဲပစ်ကြရမယ်
အကောင်းတွေ သစ်လာဖို့အတွက်
အသစ်တွေ ကောင်းလာဖို့အတွက် ။
ကျောင်းတံခါးတွေ ပိတ်
ထောင်တံခါးတွေ ဖွင့်
အာဏာရှင်လွှင့်တဲ့ ရွက်ဆိုတာ
ဘယ်ကမ်းကပ်ကပ် ဥပဒေမဲ့စမြဲ။
ငါတို့ခြေလှမ်းတွေ
နောက်တွန့်လို့မရဘူး
အသက်စွန့်သွားတာက
သူရဲကောင်းတွေ
ကောင်းမှုပြုပြီး အမျှဝေရုံနဲ့
သူတို့တတွေ ဘယ်ကျေနပ်မလဲ
လတ်ဆတ်တဲ့ ဖက်ဒရယ်ဒီမိုကရေစီ
သူတို့အတွက်
ငါတို့ရအောင် ယူရမည်
ငါတို့အတွက်
ငါတို့ရအောင် ယူရမည် ။
ဒီပွဲမှာ
မေတ္တာတေးသံ မချီရ
ဒီပွဲမှာ
ကရုဏာတေးသံ မသီရ
အာဏာရှင်ကို အာဏာရှင်အဖြစ်
တူညီခြင်းသီအိုရီနဲ့ ပြန်ပစ်ရမယ်။
သူတို့ယုတ်လို့
ကိုယ်ရိုင်းပြတာကို
ဘယ်သမိုင်းကမှ
လူဆိုးလို့ ကမ္ဗည်းမထိုးဘူး
သူတို့မယုတ်ခင်မှာ
ငါတို့ – – – – – ရိုးသားဖြူစင်ခဲ့ကြတယ်။
မီးကို ရေနဲ့သတ်လည်းသေတယ်
မီးကို ရေနွေးနဲ့ပက်လည်းသေတယ်
တရားရသလို တရားပြသလို
ဒီလိုစကားတွေနဲ့ လျှာ၀င်မရှည်နဲ့
မငြိမ်းချမ်းတဲ့နေရာကနေ
နိဗ္ဗာန်ရောက်ပါစေဆုတောင်းလည်း
ကြောက်စိတ်တွေနဲ့မို့
ပါးစပ်ညောင်းတာပဲ အဖက်တင်လိမ့်မယ်
အာဏာရှင်ဆိုတာက
မီးစတစ်ဖက် သေနတ်တစ်လက်နဲ့
ငါတို့ရေခွက်ကို
ခဏခဏ မှောက်မှောက်ချတယ်။
သူတို့မီးကို လိုက်လိုက်သတ်နေရတာနဲ့
ငါတို့ရေခွက်တောင် ငါတို့မသောက်ရ
ငါတို့အိမ်မှာတောင် ငါတို့မနေရ
ငါတို့မြေမှာတောင် ငါတို့မစိုက်ရ
ငါတို့သီးနှံတောင် ငါတို့မရိတ်ရ
ငါတို့စလောင်းတောင် ငါတို့ကြည့်မရ
ငါတို့ဖုန်းအတွင်း
ငါတို့ကြိုက်တဲ့သီချင်းတွေ မထည့်ရ
အကြောက်တရားတွေနဲ့အတူ
ငါတို့ရင်းနှီးထားရတာ တန်သလား
အာဏာရှင်ဆိုတာ
နိမိတ်ပြကဗျာလည်း ရန်မူတယ်
အမှန်ရေးသူလည်း ရန်သူသဖွယ်
သူတို့မှအမှန်လို့ တယူသန်တယ်။
ဟုတ်တယ် —
ဒါကြောင့်မို့
ဒီပွဲမှာ —-
ဘယ်သူ့ကိုမှ အယူခံမ၀င်ဘဲယှဉ်ပြိုင်မယ်
ဓမ္မတိုက်ပွဲ နိုင်ရမယ်။
Author
Have any thoughts?
Share your reaction or leave a quick response — we’d love to hear what you think!
-
0
-
0
-
0
-
0
-
0
-
0
