တော်လှန်ရေးဒီရေ

“တော်လှန်ရေးဒီရေ”

အော်စွန်းမိုင်

အခု အကောင်အထည်ဖော်ဖို့ လုံးပန်းနေကြတဲ့ စစ်မှုထမ်းဥပဒေဟာ အင်မတန်အကောက်ကြံတဲ့ ကြံစည်မှုဖြစ်သလို ခက်ခဲတင်းမာတဲ့ စိန်ခေါ်မှုလည်းဖြစ် နေတယ်။ ဒါကြောင့် အဲဒီမတော်မတရားမှုကို တုန့်ပြန်မယ့်လူငယ်တွေ သောင်းချီသိန်းချီ အုံကြွလာကြမယ်။ ကုဋေကုဋာနဲ့ချီပြီး ဆန့်ကျင်အုံကြွလာလိမ့်မယ်။ အဲဒီအချိန်အခါကျ မိုးသက်မုန်တိုင်းလို အလွန်မြန်ဆန် ပြင်းထန်မယ်။ ဘယ်လောက်ကြီးမားတဲ့ အင်အားဖြစ်ပစေ ဒီအရှိန်ကို တားဆီးနိုင်မှာမဟုတ်ဘူး။ လူငယ်တွေက အနှောင်အဖွဲ့မှန်သမျှ၊ ဖိနှိပ်ချုပ်ခြယ်မှုမှန်သမျှ၊ အတင်းအကြပ် စီမံလုပ်ကိုင်မှုမှန်သမျှကို ခုတ်ဖြတ်ချေမှုန်းပြီး လွတ်မြောက်ရေးလမ်းမကြီးဆီကို ချီတက်ကြလိမ့်မယ်။

လူငယ်တွေဟာ သူတို့ရဲ့သမိုင်းပေးတာဝန်ကို လုပ်ဆောင်ဖို့ ထလာကြပြီ။ နှစ်ပေါင်းများစွာ အုပ်စိုးခဲ့တဲ့ စစ်အာဏာရှင်စနစ်ကို တွန်းလှန်ပြီး အောင်မြင်မှုကို မကြာခင် ရရှိကြတော့မယ်။

လွန်ခဲ့တဲ့ ၃ နှစ်ကတည်းက လူငယ်တော်တော်များများ တော်လှန်ရေးအင်အားစုများရှိရာ အရပ်ဒေသများဆီ သွားရောက်ပြီး လက်နက်ကိုင်တိုက်ပွဲဝင်နေကြတယ်။ ကိုယ့်အရပ်ကိုယ့်ဒေသမှာပဲ လက်နက်ရှာဖွေကိုင်စွဲပြီး အကြမ်းဖက်စစ်ဝါဒီကို ခုခံတော်လှန်နေကြသူများလည်းရှိတယ်။ တဖြည်းဖြည်းနဲ့ တော်လှန်ရေးတပ်များ အင်အားစုစည်းကောင်းမွန်လာပြီး တော်လှန်စစ်ရေးများ ပြုလုပ်လာကြတယ်။ အောင်ပွဲများလည်း ရနေကြပြီ။

တိုင်းရင်းသားတော်လှန်ရေးအင်အားစုများက ၎င်းတို့ဝန်းကျင်နယ်မြေများကို တိုက်ခိုက်သိမ်းပိုက်ရယူနေကြပြီ။ နယ်မြေသိမ်းတိုက်ပွဲ၊ စခန်းသိမ်းတိုက်ပွဲသတင်းများကို ဆိုရှယ်မီဒီယာနဲ့ ရုပ်သံမီဒီယာများမှာ အဆက်မပြတ် ဖော်ပြနေကြတယ်။

စစ်အာဏာရှင်တို့က တရှုံးတည်းရှုံး၊ တဆုတ်တည်းဆုတ်ပြီး လက်နက်ချ အညံ့ခံနေကြတာ စခန်း အတော်များနေပြီ။ လက်နက်ခဲယမ်းမီးကျောက် အမြောက်အများ သိမ်းဆည်းရမိသလို စစ်သုံ့ပန်းတွေ၊ လက်နက်ချတွေလည်း အရှင်ရမိထားကြပြီ။

ဒီလိုအချိန်အခါ အခြေအနေမျိုးမှာ စစ်အာဏာရူးနဲ့ လက်အောက်ခံ စစ်ဝါဒီတွေ၊ သူတို့ရဲ့လက်ဝေခံ ကွန်ပရာဒိုတွေ၊ ဆိုးတူကောင်းဖက် စီးပွားရေးသမားတွေ၊ အုပ်ချုပ်ရေးယန္တရားက ထွေအုပ်တွေ၊ အဆင့်ဆင့် အုပ်ချုပ်ရေးမှူးတွေ၊ ရာအိမ်မှူးတွေဟာ မိုက်မိုက်ကန်းကန်း စစ်မှုထမ်းဥပဒေကို အသက်သွင်းဖော်ဆောင်ဖို့ လှုပ်ရှားနေကြတယ်။ သူတို့အုပ်ချုပ်မှု ရှိနေဆဲနေရာနဲ့ တော်လှန်ရေးငြိမ်သက်နေတဲ့ မြို့ရွာတွေမှာ အတင့်ရဲရဲနဲ့ လူစုနေတယ်။ တပ်သားသစ် စုဆောင်းရေး လုပ်ဆောင်နေကြတယ်။ တနိုင်ငံလုံးက မြို့ပြတွေ၊ ကျေးလက်တွေက မိသားစုဝင်တွေမှန်သမျှ ဒီစိန်ခေါ်မှုနဲ့ တည့်တည့်ကြီး ရင်ဆိုင်တိုးကြရပြီ။ ဒါကို ဘယ်လိုတုန့်ပြန်ကြမလဲ။

ခံစားမှုနဲ့ တုန်လှုပ်ကြောက်ရွံ့ စိုးရိမ်နေရုံနဲ့ မပြီးတော့ဘူး။ ဒီကိစ္စက ကိုယ့်အိမ်ဦးခန်းကို ပေါက်ဆိန်နဲ့ ပေါက်နေပြီ။ ငြိမ်လို့မဖြစ်တော့ဘူး။ ခေါင်းငုံ့ခါးစည်းခံနေလို့ မရတော့ဘူး။

တန်ပြန်ကြရမယ်။ တုန့်ပြန်ကြရမယ်။ တော်လှန်ကြရမယ်။ စောင့်ကြည့်လေ့လာနေရုံနဲ့ မပြီးတော့ဘူး။ ပြောင်းပစ်ရမယ်။ ပြောင်းလဲပစ်ရမယ်။ မှားမှန်းသိတဲ့ အမိန့်ဥပဒေတွေကို လိုက်လုပ်နေဖို့မလိုဘူး။ ကိုယ့်ခေါင်းနဲ့ကိုယ် ဆုံးဖြတ်ဖို့ပဲလိုတယ်။

တချို့နေရာတွေမှာ အုပ်ချုပ်ရေးမှူးတွေကို ဆန့်ကျင် လက်တုန့်ပြန်နေကြပြီ။ မခံမရပ်နိုင်တဲ့အဆုံး လက်နဲ့ရှင်းနေကြပြီ။ ခေါင်းရိုက်ခွဲနေကြပြီ။

ဒီ စစ်မှုထမ်းဥပဒေ ပြဿနာကို ဖြေရှင်းရင်းနဲ့ တော်လှန်ရေးရဲ့ ဒိဋ္ဌဓမ္မကျတဲ့ အခြေအနေကို ဆုပ်ကိုင်ကြရမယ်။

ဒီဥပဒေဆိုးကို တန်ပြန်ရုံတင်မကဘဲ အမျိုးသားတော်လှန်ရေးမှာ ပြည်သူတိုင်းလွတ်မြောက်ဖို့ ကိုယ့်ကြမ္မာ ကိုယ်ဖန်တီးနိုင်တဲ့ဘဝကို ရောက်ရှိဖို့ စစ်အာဏာရှင်စနစ်ကို အမြစ်ဖြုတ် ချေမှုန်းကြရမယ်။

စစ်မှုထမ်းရမယ်ဆိုတဲ့ လူငယ်တွေသာမက သူတို့ရဲ့မိဘဆွေမျိုး၊ အဝန်းအရံ ပတ်ဝန်းကျင်နေသူတို့အပါအဝင် ပြည်သူတရပ်လုံးက ဥပဒေဆိုးဆန့်ကျင်ရေးမှာ တခဲနက် ပါဝင် တိုက်ပွဲဝင်ကြရတော့မယ်။ တော်လှန်ရေးဒီရေက မြင့်သထက် မြင့်တက်လာနေပြီ။