နိုင်ငံတကာပြည်သူတို့အရေး အလေးထားကြ

ယနေ့ကာလသည် နိုင်ငံရေးအလှုပ်အခတ်များသောကာလဟု ဆိုနိုင်သည်။ တော်လှန်ရေးအင်အားစုများက မြို့သိမ်းစစ်ပွဲများအနိုင်ရလေ နိုင်ငံရေးခြေထိုးမှု၊ ရှုပ်ထွေးမှုများက ပိုများလေဟုပင်ဆိုရမည်။

ဩဂုတ်လ ၅ ရက်နေ့က မအလ မိန့်ခွန်းတွင်

တိုင်းရင်းသားလက်နက်ကိုင် အင်အားစုများ၏ နောက်ကွယ်၌ ပြည်ပနိုင်ငံအချို့၏ စစ်ရေးထောက်ပံ့ကူညီမှုများရှိနေကြောင်း စွပ်စွဲပြောဆိုမှုများပြုလုပ်ခဲ့သည်။ တပြိုင်နက်တည်းပင် ကြံ့ခိုင်ဖွံ့ဖြိုးရေးပါတီဥက္ကဌခင်ရီ၏ ရုရှထံမှ စစ်ရေးအကူအညီများပေးရန် တောင်းခံကြောင်းသတင်းကိုလည်း ရုရှသတင်းမီဒီယာများမှ ဖော်ပြလာသည်။

ထို့နောက် တရုတ်နိုင်ငံခြားရေးဝန်ကြီးဝမ်ယိ က အကြမ်းဖက်စစ်ခေါင်းဆောင် မအလနှင့် လာရောက်တွေ့ဆုံခဲ့အပြီး ၉ ကြိမ်မြောက် လန်ချန်း-မဲခေါင် နိုင်ငံခြားရေးရာဝန်ကြီးများအစည်းအဝေးသို့ တက်ရောက်၍ တရုတ်၊ လာအို၊ မြန်မာ၊ ထိုင်း အလွတ်သဘောတွေ့ဆုံရာ၌ တရုတ်က သူ၏ စည်း ၃ စည်းကို ချပြခဲ့သည်။

(၁) မြန်မာနိုင်ငံတွင်ပြည်တွင်းစစ်များဖြစ်လို့မရ။

(၂) အာဆီယံမိသားစုနှင့်ကင်းကွာ၍မရ။

(၃) ပြည်ပနိုင်ငံများပါဝင်စွက်ဖက်မှုမရှိစေရဖြစ်သည်။ ၄င်းနောက် တရုတ်နိုင်ငံသည် စကစနှင့်ဥဒဟိုဆက်သွယ်မှုခရီးများ စိပ်လာခဲ့သည်။

ဩဂုတ်လ ၂၉ ရက်နေ့တွင် ရှမ်း-မန်းစစ်ဆင်ရေးအတွက်အားပြုနေသော TNLA အား ဖိအားပေးသည့် တရုတ်၏ခြိမ်းခြောက်စာ ထွက်ပေါ်လာသည်။အတုလား အစစ်လားမကွဲပြား။ တာဝန်ခံမှု မရှိသောစာပင်ဖြစ်သည်။ မည်သို့ဖြစ်စေ မိမိကြမ္မာမိမိဖန်တီးခွင့်ရှိသောမြန်မာပြည်သူတို့က တရုတ်၏ဂုဏ်သိက္ခာမဲ့သော ပြည်တွင်းရေးဝင်ရောက်စွက်ဖက်မှုများကို ကန့်ကွက်ဆန့်ကျင်သွားကြမည်ဖြစ်သည်။ ယနေ့ ၎င်းတို့အားပေးပူးပေါင်းနေသော အကြမ်းဖက်စစ်တပ်သည် နိုင်ငံတော်နှင့်ပြည်သူအပေါ်သစ္စာဖောက်ဖျက်လျက် လူသားမျိုးနွယ်များအပေါ်ရက်စက်ယုတ်မာသောစစ်ရာဇဝတ်မှုများကိုအကြိမ်ကြိမ်အထပ်ထပ် ကျူးလွန်နေသည်ကို တရုတ်တို့သိပြီးဖြစ်သည်။ အမေရိကန်နှင့် အနောက်နိုင်ငံအင်အားစုများပါဝင်လာမှာကို အစိုးရိမ်လွန်၊ အကြောက်လွန်ကာ ၎င်းတို့ကိုယ်တိုင်က မြန်မာ့နိုင်ငံရေးကို ဝင်ရောက်စွက်ဖက်ရုံမက ဩဇာပေးရန်၊ ခြယ်လှယ်ရန် ကြိုးစားရာ‌ရောက်နေသည်ကို တရုတ်အစိုးရအနေဖြင့် သတိပြုသင့်သည်။

“ဖက်ဆစ်စစ်တပ်နဲ့ပေါင်းပြီး မြန်မာပြည်သူတွေကိုသတ်ဖြတ်တာချက်ချင်းရပ် “

China: Stop Killing Myanmar People by Supporting Fascist Criminals.

” တရုတ်-မြန်မာအနာဂတ်အတွက်

အဖိနှိပ်ခံပြည်သူများနဲ့အတူရပ်ပါ။”

ဟူသော မြန်မာပြည်သူများ၏ တုံ့ပြန်ကြွေးကြော်သံကိုလည်း တရုတ်တို့ ကြားသိပြီးဖြစ်ပေလိမ့်မည်။

စက်တင်ဘာလ ၂ ရက်နေ့က မအလသည် တိုင်းရင်းသားတော်လှန်ရေးအင်အားစုများဖြစ်သော AA အပါအဝင် MNDAA၊ TNLA တို့ကို အကြမ်းဖက်အဖြစ်သတ်မှတ်ကာ တိုက်ခိုက်‌ချေမှုန်းသွားမည်ဟု ကြေညာခဲ့သည်။

စကစ၏ ထိုကြေညာချက်ကပင် တရုတ်တင်သွင်းလာသော စည်း (၃) စည်းကို ချေဖျက်ပြီးဖြစ်နေသည်။ အပစ်အခတ်ရပ်စဲရေး ဟိုင်ဂင်သဘောတူညီချက်ကို ချိုးဖောက်ပြီးဖြစ်သည်။ အာဆီယံ၏ဘုံသဘောတူညီချက် (၅) ရပ်ကိုလည်း ငြင်းဆန်လိုက်ပြီးဖြစ်သည်။ အကြမ်းဖက်တိုက်ဖျက်ရေးဟူသောအကြောင်းပြချက်ဖြင့် ရုရှထံမှ စစ်ရေးအကူအညီတောင်းခံရန်အစီအမံများ ဆောင်ရွက်လာခြင်းဖြစ်သည်။

အမျိုးသားညီညွတ်ရေးအစိုးရ ( NUG )၏ စက်တင်ဘာလ ၃ ရက်နေ့ ထုတ်ပြန်ကြေညာချက်တွင် MNDAA , TNLA , AA စသည့် မြောက်ပိုင်းညီနောင် ၃ ဖွဲ့သည် အများပြည်သူအသက်အိုးအိမ်စည်းစိမ်ကို ကာကွယ်စောင့်ရှောက်ပြီး ဖက်ဒရယ်ဒီမိုကရေစီရေးတိုက်ပွဲဝင်နေသော တော်လှန်ရေးအဖွဲ့အစည်းများဖြစ်သည်။ မတရားအသင်းနှင့် အကြမ်းဖက်အုပ်စုအဖြစ် ကြေညာခြင်းခံထားရသည့် အကြမ်းဖက်အာဏာသိမ်းစကစကဖွဲ့စည်းသော “အကြမ်းဖက်မှုတိုက်ဖျက်ရေးဗဟိုအဖွဲ့ ” ၏ ကြေညာချက်သည် တရားမဝင်ကြောင်းနှင့် ယင်းကြေညာချက်ထုတ်ပြန်သော “အကြမ်းဖက်တိုက်ဖျက်ရေးဗဟိုအဖွဲ့”သည်သာ အကြမ်းဖက်အုပ်စုဖြစ်ပြီး ယင်းအဖွဲ့ဥက္ကဌနှင့်အဖွဲ့ဝင်များကိုလည်း အကြမ်းဖက်သမားများအဖြစ် သတ်မှတ်လိုက်ကြောင်းကို NUG အစိုးရ၊ အကြမ်းဖက်မှုတိုက်ဖျက်ရေးဗဟိုအဖွဲ့က ကြေညာခဲ့သည်။

ထို့ပြင် အကြမ်းဖက်စစ်အုပ်စုသည် မြန်မာနိုင်ငံအားအလုံးစုံပျက်သုဉ်းရေးကို ဦးတည်လုပ်ဆောင်နေသော အဖွဲ့အစည်းဖြစ်ခြင်း၊ အမျိုးသားလုံခြုံရေးနှင့်ကာကွယ်ရေးကို ပျက်စီးထိခိုက်စေသောအဖွဲ့အစည်းဖြစ်ခြင်းတို့ကြောင့် စကစကို နိုင်ငံတော်နှင့် ပြည်သူလူထု၏ရန်သူ (Enemy of the State)အဖြစ် NUG က စက်တင်ဘာ ၅ ရက်နေ့တွင် ကြေညာခဲ့သည်။

ကောင်းကင်တွင် ပျံသန်းနေသောလေယာဉ်အား ဖိနပ်နှင့်ပစ်ပေါက်ရန် ချိန်ရွယ်နေသော ကလေးငယ်၏နာကျင်မှု စိတ်ဒဏ်ရာကို တရုတ်ခေါင်းဆောင်တို့ မှန်းဆနိုင်လိမ့်မည်ထင်သည်။ သို့ဖြစ်ရာ တရုတ်အစိုးရသည် နိုင်ငံတော်နှင့်ပြည်သူလူထု၏ရန်သူ (Enemy of the State) ဖြစ်သော၊ အရပ်သားပြည်သူများရှိရာ ဈေးများ၊ စာသင်ကျောင်းများ၊ ဆေးရုံဆေးခန်းနှင့် စစ်ဘေးရှောင်စခန်းများကို ဗုံးကြဲတိုက်ခိုက်ကာ၊ စစ်ရာဇဝတ်မှုများ နေ့စဉ် ကျူးလွန်နေသော၊ တိုင်းပြည်ကို ကုန်းကောက်စရာမကျန်တော့အောင်မီးလောင်တိုက်သွင်းနေသော အကြမ်းဖက်စစ်အုပ်စုကို ဆက်လက်ကျောထောက်နောက်ခံပြုနေဦးမည်ဆိုလျှင် မြန်မာပြည်သူတို့၏ အော့နှလုံးနာမှု၊ ဆန့်ကျင်မှုများနှင့် တရုတ် ရင်ဆိုင်ရလိမ့်မည်။ ကမ္ဘာ့နိုင်ငံများအလယ်တွင် အကြမ်းဖက်စစ်ရာဇဝတ်ကောင်နှင့်တွဲလျက် အရှက်ရပေလိမ့်မည်။

တကယ်တော့ မြန်မာနိုင်ငံရှိ တရုတ်၏ရင်းနှီးမြှုပ်နှံမှု အကျိုးစီးပွားနှင့် တရုတ်အမျိုးသားများကို မအလအနေဖြင့် အကာကွယ်မပေးနိုင်သည့်အပြင် သူကိုယ်တိုင်က နိုင်ငံအနှံ့ရှိ မြို့ပြ၊ ကျေးရွာများကို အငြှိုးတကြီးဖြင့် ဗုံးကြဲဖျက်ဆီးနေခြင်းဖြစ်သည်။ တော်လှန်ရေးတပ်ဖွဲ့တွေကသိမ်းပိုက်ထားသည့် မြို့တွေပုံမှန်မလည်ပတ်နိုင်အောင် လူနေအိမ်နဲ့ အရပ်ဘက်ဆိုင်ရာအဆောက်အဦးများကို လိုအပ်သလို တိုက်ခိုက်သွားမည်ဟု မအလ က ပြောင်ပြောင်တင်းတင်း ကြေညာခဲ့သည့်အတိုင်း နေ့ညမပြတ် လေယာဥ်ဖြင့် ဗုံးကြဲပစ်ခတ်လျက်ရှိရာ တပတ်အတွင်း သေဆုံးသူ ၁၀၀ ခန့်အထိ မြင့်တက်လာသည်။

၅၇ ကြိမ်မြောက် ကုလသမဂ္ဂ လူ့အခွင့်အရေးကောင်စီ၊ ပုံမှန်အစည်းအဝေးဖွင့်ပွဲနေ့က ကုလသမဂ္ဂ လူ့အခွင့်အရေးကောင်စီ၏ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးရေးအဖွဲ့(IIMM) အဖွဲ့ခေါင်းဆောင် Mr. Nicholas Koumijian က မြန်မာစစ်ခေါင်းဆောင်တွေကို နိုင်ငံတကာတရားရုံးတွေကနေ ဖမ်းဝရမ်းထုတ်သည့်အခါ ကုလသမဂ္ဂအဖွဲ့ဝင်နိုင်ငံများက ပူးပေါင်းပါဝင်၊အကူအညီပေးကြဖို့ ဖွင့်ဟပြောကြားလိုက်ပြီဖြစ်သည်။ ကုလသမဂ္ဂလုံခြုံရေးကောင်စီ တံခါးပိတ်အစည်းအဝေးနေ့လိုမျိုး၊ ကုလလူ့အခွင့်အရေးအစည်းအဝေးလို နေ့ရက်မျိုးကိုတောင်မရှောင် အရပ်သားပြည်သူများ၊ စစ်ရှောင်စခန်းများ၊ စာသင်ကျောင်းများ၊ ဘာသာရေးအ​ဆောက်အအုံများ၊ ဆေးရုံများကို ရက်ရက်စက်စက်ဗုံးကြဲပစ်ခတ်နေသော စကစကို အရေးယူအပစ်ပေးနိုင်ရေးအတွက် ယခုကျင်းပမည့်ကုလသမဂ္ဂအထွေထွေညီလာခံကြီးက ဆွေးနွေးကြတော့မည်ဖြစ်သည်။စကစအဖို့ စစ်ရေး၊ နိုင်ငံရေး၊ သံတမန်ရေးများတွင် အဖက်ဖက်က ရှုံးနိမ့်နေပြီဖြစ်သည်။

ရေနံနှင့် သဘာဝဓာတ်ငွေ့ပိုက်လိုင်းများအပါအဝင်တရုတ်စီမံကိန်းလုပ်ငန်းများသည် တော်လှန်ရေးအင်အားစုများ၏ ထိန်းချုပ်မှုအောက်သို့ ရောက်ရှိနေ‌ပေပြီ။ တရုတ်နှင့်နိုင်ငံခြားရင်းနှီးမြှုပ်နှံမှုများ၏ လုံခြုံမှုကို EROs များနှင့် NUG တို့က ကာကွယ်စောင့်ရှောက်မှု တာဝန်ယူထားသည်။ ထို့ကြောင့်ပင် စက်တင်ဘာ ၄ ရက်နေ့တွင် ဘင်္ဂလားဒေ့ခ်ျ နိုင်ငံခြားရေးရာအကြံပေး မစ္စတာတူဟစ်ဟော့စိန်ကလည်းကောင်း၊ စက်တင်ဘာ ၆ ရက်နေ့တွင် အိန္ဒိယနိုင်ငံ၊ မီဇိုရမ်ပြည်နယ် ဝန်ကြီးချုပ်ကလည်းကောင်း ရက္ခိုင့်တပ်တော် AA တို့နှင့် တွေ့ဆုံဆွေးနွေးသွားမည်ဟု ထုတ်ဖော်ပြောဆိုခဲ့သည်။

စင်စစ် တရုတ်အနေဖြင့် မြန်မာပြည်သူတရပ်လုံးကတွန်းလှန်တိုက်ပွဲဝင်နေသော၊ ကမ္ဘာ့နိုင်ငံများကဝိုင်းပယ်ထားသော အကြမ်းဖက် စစ်ရာဇဝတ်ကောင်ဘက်က မရပ်ဘဲ၊ အကြမ်းဖက်အဖိနှိပ်ခံ မြန်မာပြည်သူတို့ဘက် မျက်နှာမူလာမည်ဆိုလျှင်တော့ အနာဂတ်ကမ္ဘာတွင် တရုတ်၏လှပသောကမ္ပည်းကို ရေးထိုးနိုင်ပေလိမ့်မည်။ တရုတ်အနေဖြင့် NLD အစိုးရနှင့်ရော၊ လူထုခေါင်းဆောင် ဒေါ်အောင်ဆန်းစုကြည်နှင့်ရော ဆက်ဆံရေးကောင်းများရှိပြီး နှစ်နိုင်ငံတိုးတက်ရေးလုပ်ငန်းများ လုပ်ဆောင်နိုင်ခဲ့သည်ကိုသတိရသင့်သည်။

ယခုအခါ အကြမ်းဖက်စကစသည် နိုင်ငံ၏ ၃ပုံ ၁ပုံမျှသာ ထိန်းချုပ်နိုင်တော့သည်ဖြစ်ရာ ၎င်းတို့မက်လုံးပေးနေသော၂၀၂၅ ရွေးကောက်ပွဲသည်လည်း ဘယ်တော့မှ ဖြစ်လာလိမ့်မည်မဟုတ်ပါ။ ယင်းတို့ထိန်းချုပ်ရာ မြို့ရွာများတွင်လည်း စစ်မှုထမ်းဥပဒေဖြင့် အဓမ္မဖမ်းဆီးစုဆောင်းခြင်း၊အသက် ၃၅ နှစ်မှ အသက် ၆၅ နှစ်အထိကို သေနတ်ကိုင် ပြည်သူ့လုံခြုံရေးအဖွဲ့ဟု ဆိုကာ အဓမ္မခေါ်ယူဖွဲ့စည်းနေခြင်းတို့ကြောင့် ပြည်သူများထွက်ပြေးတိမ်းရှောင်နေကြရာ သန်းခေါင်စာရင်းအမှန်ကောက်ယူရန်ပင် မလွယ်ကူပေ။ ထိုစာရင်းများကိုလည်း သူတို့ရွေးကောက်ပွဲအိပ်မက်တွင် ခိုင်မာမဲအဖြစ် ထည့်သွင်းရေတွက်ရန် ကြံစီ စိတ်ကူးနေသလားပင် မပြောတတ်ပေ။

၂၀၀၈ ဖွဲ့စည်းပုံအောက်က အားလုံးပါဝင်တဲ့ရွေးကောက်ပွဲကျင်းပဖို့ တရုတ်၏တိုက်တွန်းချက်နှင့်ပတ်သက်၍ ဧရာဝတီသတင်းဌာနနှင့်တွေ့ဆုံခန်းတွင် NUG ကာကွယ်ရေးဝန်ကြီး ဦးရည်မွန် က အခုလို ပြောကြားခဲ့သည်။

“စစ်ခေါင်းဆောင်တစုဟာ သူတို့တလျှောက်လုံးကိုးကွယ်ခဲ့တဲ့ ၂၀၀၈ ဖွဲ့စည်းပုံကို သူတို့ကိုယ်တိုင်ပဲချိုးဖောက်ပြီးတော့ အဓမ္မအာဏာသိမ်းခဲ့တယ်။အာဏာသိမ်းခဲ့တဲ့နေ့ကစလို့ ပြည်သူတွေပေါ်မှာလည်း နေ့စဉ်အကြမ်းဖက်ဖမ်းဆီး၊ သတ်ဖြတ်၊ မီးရှို့၊ ဗုံးကြဲပေါ့။ အဲဒီတော့ ဒီလိုအကြမ်းဖက်အာဏာသိမ်းတရားမဝင်တဲ့အဖွဲ့က လုပ်မယ့်ရွေးကောက်ပွဲက ကျနော်တို့ဘာများမျှော်လင့်လို့ရမလဲ။ ပြည်သူထောက်ခံတဲ့ခေါင်းဆောင်တွေဆိုတာကလည်း အားလုံးထောင်ထဲအကျဉ်းချခံထားရတဲ့အချိန်ပေါ့။ အဲတော့ ဒီလိုရွေးကောက်ပွဲမျိုးကတော့ ဘယ်လိုအမျိုးသားပြန်လည်သင့်မြတ်ရေးမျိုးကိုမှ မရနိုင်ဘူးဆိုတာကိုလဲ နိုင်ငံတကာကာ ရှင်းရှင်းလင်းလင်းနားလည်စေလိုပါတယ်ဗျ။ရွေးကောက်ပွဲအကြောင်းပြောမယ်ဆိုရင် မြန်မာပြည်မှာ ၂၀၂၀ ရွေးကောက်ပွဲရဲ့ ရလဒ်ဆိုတာ လတ်လတ်ဆတ်ဆတ်ကြီးရှိပါသေးတယ်။ စစ်တပ်က အလိုမတူတိုင်းသာ ရွေးကောက်ပွဲအသစ်အသစ်လုပ်နေရမယ်ဆိုရင် တိုင်းပြည်လဲ ရာဇဝင်ရိုင်းဖို့ပဲရှိပါတယ်။”

ထို့ပြင် မြန်မာပြည်သူလူထုအသံကို ကမ္ဘာ့ကုလသမဂ္ဂတွင် အခါအခွင့်သင့်တိုင်း ရဲဝံ့ပြတ်သားစွာ အသံထုတ်ပြောကြားနေသော ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်သံအမတ်ကြီး ဦးကျော်မိုးထွန်းကလည်း “မြန်မာပြည်သူများသည် စစ်တပ်က ကျင်းပမည်ဟုကြွေးကြော်လျက်ရှိသော မည်သည့်ရွေးကောက်ပွဲမဆို လွတ်လပ်၊မျှတ၍ အားလုံးပါဝင်သည့် ရွေးကောက်ပွဲတရပ်ဖြစ်မည်ဟု မယူဆကြောင်း၊ ပြဿနာအတွက် အဖြေတခုအဖြစ်လည်း မရှုမြင်ကြောင်း၊ ပြည်သူများခံစားနေရသည့်ဒုက္ခဆိုးများ ပိုမိုများပြား၍ ပိုမိုရှည်ကြာစေမည်သာဖြစ်ကြောင်း၊ ထို့ကြောင့် နိုင်ငံတကာအသိုင်းအဝိုင်းနေဖြင့် စစ်တပ်အား တိုက်ရိုက်ဖြစ်စေ၊ သွယ်ဝိုက်၍ဖြစ်စေ၊ စစ်တပ်က စီစဉ်လျက်ရှိသည်ဟုဆိုသော မည်သည့်ရွေးကောက်ပွဲကိုမျှ ထောက်ခံပံ့ပိုးခြင်း အလျင်းမပြုကြရန် တိုက်တွန်းပါကြောင်း ပြောကြားခဲ့သည်။

တနေ့က မြန်မာနိုင်ငံဆိုင်ရာ တရုတ်သံရုံးပြောခွင့်ရပုဂ္ဂိုလ်၏ သဘောထားထုတ်ပြန်ချက်တွင် ပြည်တွင်းရေးအား ဝင်ရောက်မစွက်ဖက်ခြင်းကို ခိုင်မာစွာကိုင်စွဲထား၍ မြန်မာပြည်သူကပိုင်၍မြန်မာပြည်သူက ဦးဆောင်သော ငြိမ်းချမ်းရေးလုပ်ငန်းစဉ်ကိုလိုက်နာပါသည်ဟူသောစကားအတိုင်း တရုတ်အစိုးရအနေဖြင့် တိကျစွာလိုက်နာစေလိုသည်။ပြည်ပအင်အားစုက မြန်မာနိုင်ငံပြည်တွင်းရေးကိုဝင်ရောက်စွက်ဖက်မှုအားဆန့်ကျင်ပါသည် ဆိုသည့်အတိုင်း တရုတ်နိုင်ငံ၏မည်သည့်စွက်ဖက်မှု၊ မည်သည့် ဩဇာပေးမှုကိုမျှ မြန်မာပြည်သူများကလက်ခံမည်မဟုတ်ပါ။ အကြမ်းဖက် စစ်ရာဇဝတ်ကောင်အား ဖေးမ၍ အသာစီးရစေရန် ဖော်ဆောင်ပြီး တော်လှန်ပြည်သူများ၊ တိုင်းရင်းသားအင်အားစုများကို ချည့်နဲ့၊ ရှုံးနိမ့်သွားစေရန် ကြံစည်ကြိုးပမ်းမှုများကို လက်ခံလိမ့်မည်မဟုတ်ပေ။ တရုတ်နိုင်ငံ၏ မြန်မာနိုင်ငံအပေါ်ထားရှိသော ချစ်ကြည်ရေးမူဝါဒသည် မြန်မာပြည်သူတရပ်လုံးကို မျက်နှာမူပါသည်ဟူသော ကတိစကားအတိုင်းရပ်တည်သွားလျှင်မြန်မာပြည်သူများ၏ချစ်ခင်မှု၊ လေးစားယုံကြည်မှုကို တရုတ်အစိုးရရှိမည်ဖြစ်ပြီး တရုတ်-မြန်မာ နှစ်နိုင်ငံ၏ အနာဂတ် ပိုမိုပြည့်စုံလှပလာမည်ဖြစ်ပေသည်။

မည်သည့်နိုင်ငံတွင်မဆို ပြည်သူသာ အဓိက၊ ပြည်သူသာ အခရာဖြစ်သည်။ ပြည်သူလက်မခံလျှင် မည်မျှပင် အကြမ်းဖက်ပါစေ၊ မည်မျှပင် မီးရှို့ဖျက်ဆီး၊ မည်မျှပင် ဗုံးကြဲပစ်ခတ် သတ်ဖြတ်ပါစေ၊ အုပ်ချုပ်၍မရစေနိုင်ကြောင်းကို မြန်မာပြည်သူတို့က သတ္တိပြခဲ့ပြီဖြစ်သည်။

နိုင်တကာအစိုးရများအနေဖြင့် နိုင်ငံတကာပြည်သူများအရေးကို အလေးဂရုပြုဖို့လိုအပ်ပါသည်။ တရုတ်အစိုးရအနေဖြင့် မိမိတို့ပြည်သူ့ဆန္ဒကိုအလေးထားလိုက်နာရသလို မြန်မာပြည်သူတို့၏ဆန္ဒကိုလည်း လေးစားလိုက်နာရန်လိုအပ်ကြောင်း ထပ်လောင်းတိုက်တွန်းလိုက်ပါသည်