“နိုင်ငံတော်သစ်”
■ အော်စွန်းမိုင်
လွတ်လပ်တဲ့နိုင်ငံတော်သစ် ထူထောင်ကြရမယ်။ နိုင်ငံတော်သစ်မှာ လှပစိမ်းလန်းတဲ့ တောအုပ်တွေပါဝင်မယ်။ အေးစိမ့်ခဲထက်နေတဲ့ ရေခဲတောင်တွေရှိမယ်။ တသွင်သွင် စီးမြဲစီးနေတဲ့ မြစ်ကြီးတွေလည်း ရှိနေမယ်။ အရောင်အသွေးစုံလှတဲ့ လွင်ပြင်ကျယ်ကြီးတွေနဲ့ ရှုခင်းတွေလှပနေမယ်။
နိုင်ငံတော်သစ်မှာ အလံတော်အသစ် ရေးခြယ်ရမယ်။ နိုင်ငံတော်သစ် တံဆိပ်သစ် ခပ်နှိပ်ရမယ်။ လွတ်လပ်တဲ့လူမျိုးများ နိုင်ငံတော်သစ် ဖွဲ့စည်းတည်ထောင်ကြတဲ့အခါ အမျိုးသားအလံ၊ အမျိုးသားတံဆိပ်ဆိုတာ ရှိစမြဲပဲ။
နိုင်ငံတော်သစ်နယ်နိမိတ်ထဲမှာ အုပ်ဆိုင်းညိုမှိုင်းတဲ့ တောင်တန်းတွေ၊ ရှည်လျားသွယ်တန်းတဲ့ ရိုးမတွေ၊ မြစ်တွေ၊ ချောင်းတွေ၊ အင်းအိုင်တွေနဲ့ ခမ်းနားတဲ့ရေတံခွန်တွေ ပါဝင်နေမှာဖြစ်သလို ရှည်လျားလှတဲ့ ပင်လယ်ကမ်းရိုးတန်းတွေ၊ သာယာပြန့်ပြောတဲ့ ကမ်းခြေတွေရှိနေမယ်။
နိုင်ငံတော်သစ်မှာ ဖွဲ့စည်းပုံအခြေခံဥပဒေသစ်ရှိမယ်။ အဲဒီဥပဒေသစ်အရ လွှတ်တော်၊ သမ္မတ၊ ဝန်ကြီးချုပ်၊ ဝန်ကြီးအဖွဲ့ စတဲ့ နိုင်ငံတော်သစ် အဆောင်အယောင်တွေ ရှိမယ်။ ရုံးသုံးဘာသာစကားကိုလည်း သတ်မှတ်ပြဋ္ဌာန်းထားမယ်။
နိုင်ငံတော်သစ်မှာ စိုက်ပျိုးရေးအတွက် မြေတွေ လယ်ယာကိုင်းကျွန်းတွေ ပါဝင်မယ်။ လူမျိုးစုတွေ၊ ဌာနေတိုင်းရင်းသားတွေရဲ့ နယ်မြေ၊ ပိုင်နက်သတ်မှတ်ချက်တွေ ရှိမယ်။ ယဉ်ကျေးမှု၊ စာပေနဲ့ ဓလေ့ထုံးတမ်းစဉ်လာတွေ အစဉ်အလာအတိုင်း တည်မြဲနေမယ်။
နိုင်ငံတော်သစ်မှာ လူမျိုးများရဲ့ ကိုယ်ပိုင်ပြဋ္ဌာန်းခွင့်မူကို အခြေခံပြီး မိမိလူမျိုးများရဲ့ အနေအထားကိုလိုက်ပြီး တီထွင် ဖန်တီး ဖွဲ့စည်းနိုင်ခွင့်ရှိရမယ်။ လူမျိုးအသီးသီးက မိမိတို့ရဲ့ ဘာသာစကား၊ ယဉ်ကျေးမှု၊ စီးပွားရေး၊ နေထိုင်ရာဒေသအလိုက် မိမိတို့အကျိုးစီးပွားနဲ့ကိုက်ညီတဲ့ ပုံသဏ္ဌာန်ကို ဖန်တီးကြရမယ်။
နိုင်ငံတော်သစ်မှာ သပ်ရပ်တဲ့မြို့ပြတွေ၊ ဆိတ်ငြိမ်တဲ့ ကျေးလက်တောရွာတွေ၊ ခေတ်မီတဲ့ ဗိသုကာလက်ရာတွေ၊ အဆင့်အတန်းမြင့်တဲ့ လူထုစင်တာတွေရှိရမယ်။ ပီပြင်တဲ့ အနုပညာပြခန်းတွေ ဖွဲ့စည်းထားရမှာဖြစ်သလို ကြီးမားဝံ့ထည်တဲ့ မြူစီယံခေါ် ပြတိုက်ကြီးတွေ ဆောက်လုပ်ပြသကြရမယ်။
နိုင်ငံတော်သစ်မှာ တပ်မတော်အသစ် ဖွဲ့စည်းထားရမယ်။ တပ်မတော်သစ်မှာ လူမျိုးစုတပ်တွေစုဝေးပြီး တပ်ပေါင်းစုဖွဲ့တည်ရမယ်။ ဖက်ဒရယ်ဒီမိုကရေစီနိုင်ငံတော်သစ်ကို ကာကွယ်ရမယ့်တာဝန်ကို ထမ်းဆောင်ရမယ်။ ပြည်သူလူထုရဲ့လုံခြုံရေးကို စောင့်ရှောက်ထိန်းသိမ်းရမယ်။ ဒီမိုကရေစီကိုကာကွယ်တဲ့ တပ်မတော်သစ်ဖြစ်ရမယ်။
နိုင်ငံတော်သစ်မှာ ရှေးဟောင်းအမွေအနှစ်တွေကို ထိန်းသိမ်းရမယ်။ ဘာသာရေးအဆောက်အဦတွေ၊ လူမျိုးနွယ်အလိုက်ကိုင်စွဲကြတဲ့ လက်နက်ကိရိယာ တန်ဆာပလာ၊ အသုံးအဆောင်တွေကို ဆက်လက်ဖွံ့ဖြိုးအောင် ဆောင်ရွက်ကြရမယ်။
နိုင်ငံတော်သစ်ဟာ ပြည်နယ်များ၊ ညီညွတ်စည်းလုံးစွာ၊ လူဦးရေအရ၊ လူမျိုးစုအရ၊ နယ်မြေအကျယ်အပြောအရ အကြီးအငယ်ခွဲခြားမှုမရှိဘဲ တန်းတူညီမျှတဲ့အခြေခံနဲ့ စုပေါင်းဖွဲ့စည်းထားတဲ့ ပြည်ထောင်စုဖြစ်ရမယ်။
နိုင်ငံတော်သစ်မှာ လူသားအရင်းအမြစ်တွေ ဖွံ့ဖြိုးတိုးတက်ပြီး သဘာဝသယံဇာတအရင်းအမြစ်တွေ ရေရှည်တည်တံ့ခိုင်မြဲအောင် စီမံခန့်ခွဲရမယ်။ မျက်မှောက်ကာလ ထွန်းကားနေတဲ့ နည်းပညာ တက္ကနော်လော်ဂျီတွေ သုံးစွဲကြရမှာဖြစ်သလို သတင်းအချက်အလက်နည်းပညာ “Information Technology” ကိုလည်း ထိထိရောက်ရောက် အသုံးပြုကြရမယ်။ လွတ်လပ်စွာ ထုတ်ဖော် ရေးသား ပြောဆို ဆိုတဲ့ ဒီမိုကရေစီရဲ့အနှစ်သာရတခုကိုလည်း ခိုင်မာစွဲမြဲအောင် ဆောင်ရွက်ထားရမယ်။
နိုင်ငံတော်ရဲ့မူလသဘောက ပြည်သူလူထုရဲ့ ကောင်းကျိုးချမ်းသာရေး၊ ငြိမ်းချမ်းသာယာရေးအတွက် ဖွဲ့စည်းပေါ်ပေါက်လာတာမို့ နိုင်ငံတော်သစ်မှာလည်း အဲဒီ မူလတရားကိုယ်ကို တိကျမြဲမြံစွာ အကောင်အထည်ဖော်ဆောင် ကျင့်သုံးနိုင်ရမယ်။
Be the first to comment