‘နောက်ဆုံးပွဲ (ဝါ) ယနေ့မနက်ဖြန် ကြည့်ရှူရန်သင့်တဲ့အစီအစဥ်’
ပန်းတော်ဆက်ကင်မရာက ခြင်္သေ့ကိုတလှည့်
ကျွဲ အုပ်ကိုတလှည့် ရိုက်ပြတယ်
ကျွဲအုပ် ဟာ ….
အန္တရာယ်ကို မသိခင် သူ့စားကျက်မှာသူ…
စားသူစား ၊ကစားသူကစား
မေထုံမှီဝဲ ၊ရေစုန် မှာ တနေကုန်
အေးအေးလူလူ ရေစိမ်မြဲ
ကင်မရာက ကျွဲအုပ်ကိုတစ်လှည့်
ချောင်းမြောင်းနေတဲ့
ခြင်္သေ့ကို တလှည့်ရိုက်ပြတယ်…။
ကျွဲအုပ်ဟာ ရုတ်တရက် ဆိုသလို
ခြင်္သေ့ကို တွေ့လိုက်ရချိန်
လဲသူလဲ
ကွဲသူကွဲ
ကျွဲအုပ်ဟာ ကစဥ့်ကလျား
ကျွဲအုပ်ဟာ ဦးဂျိုကိုမေ့လို့
ထွက်ပြေးတယ်….။
ကျွဲတွေဟာ နေ့စဥ်ထွက်ပြေးတယ်….။
သူတို့ထဲက တစ်ကောင်ကို မမိမချင်း
ထွက်ပြေးတယ်….။
ကျွဲအုပ်ဟာ သူတို့ထဲက
တစ်ကောင်ကောင်ကို မိသွား တာနဲ့ ချက်ခြင်း အပြေးရပ်တယ်….။
သူတို့..အပြေးရပ်ပုံက ထူးထူးဆန်းဆန်း
ဘယ်ဘက်ခြေလှမ်း မလှမ်းခင်
ကျွဲအုပ်ထဲက တစ်ကောင်ကောင်ကိုမိပြီဆိုတာနဲ့….
ညာဘက်ခြေလှမ်းဟာ ဆက်မပြေးတော့ပဲ…
သူတို့ မပြေးခဲ့ရသလိုမျိုး အပြေးကိုချက်ခြင်း ရပ်လိုက်ကြတယ်….။
ယခုပြေးခဲ့မှုဟာ သူတို့နဲ့မဆိုင်ကြောင်း သေချာမှုမျိုးနဲ့
ချက်ချင်း အပြေးရပ်လိုက်တယ်…..။
နေ့စဥ်ပုံမှန်
သူတို့အပြေးရပ်ကြတယ်….။
ဒီလိုနဲ့ နေ့စဥ်နေတိုင်း
ကျွဲအုပ်ထဲက အပြေးမသန်လို့ကျန်ခဲ့သူ (ဒါမှမဟုတ်)
ဝ ဝခဲခဲ ကျွဲတစ်ကောင်ဟာ…
ခြင်္သေ့ရဲ့ညစာဖြစ်မြဲ….။
တစ်ခုသော အစီအစဥ်တစ်ခုမှာတော့
ကျွဲတစ်ကောင်ဟာ ထွက်ပေါက်ပိတ်
ခြင်္သေ့တွေအများကြီးအဝိုင်းခံလိုက်ရတယ်….။
ကျွဲဟာ မလွတ်မြောက်တော့တဲ့နောက်ဆုံး
တအဲအဲ အာခေါင်ခြစ်အော်
အကူအညီတောင်းရှာတယ်
ဒါပေမယ့်….
တစ်စုံတစ်ကောင်မှ ရောက်မလာ….
ကျွဲဟာခြင်္သေ့တွေရဲ့စတင်တိုက်ခိုက်ခြင်း ခံလိုက်ရချိန်
နာကျင်သွားဟန်
အကြောက်တရားအစား ဒေါသထွက်သွားခြင်းလား
ဒါမှမဟုတ် အဖြေကိုသေသေချာချာ သိလိုက်မှုလား မပြောတတ်
ကူရာမဲ့တဲ့အခါ
ကိုယ်တိုင်ကယ်တင် ရှင်သာဆိုသလို
သူ့ဦးချိုကို သတိရသွားပုံ ရသွားတာလား
(ငါသေသေချာချာမသိ)
ကျွဲဟာ စတင် တန်ပြန်တိုက်ခိုက်တယ်….။
အသက်ကို အသက်နဲ့လဲတဲ့ပွဲ
ရေကုန်ရေးခမ်း
ကျွဲကိုတစ်လှည့်
ခြင်္သေ့အုပ်ကို တလှည့် ကင်မရာ ကရိုက်ပြတယ်…
ငါက အသက်ရှူဘို့တောင် တဒင်္ဂ မေ့လျှော့
သဲထိပ်ရင်ဖို…..။
ကျွဲက ခတ်ပြီ
ကြောက်ကျွဲဟာ ခတ်ခဲ့ပြီ…။
သူစတင် တိုက်ခိုက်ချိန်မှာ ထုံးစံအတိုင်း တစ်ကောင်ကောင်ကို မိသွားလို့ အပြေးရပ်လိုက်ကြတဲ့ ကျွဲတွေဟာ
ဒီအသက်လုပွဲကို ပထမ ရပ်ကြည့်နေတယ်….
တဖြည်းဖြည်း
တဖြည်းဖြည်း နှာမှုတ်လာတယ်
တဖြည်းဖြည်း ရှေ့တလှမ်း လှမ်းတက်တယ်…။
တဖြည်းဖြည်း တစ်ကောင်စ နှစ်ကောင်စ…
တဖြည်းဖြည်း ကျွဲအုပ်ဟာ ဦးဂျိုတွေကို သတိရသွားပုံပေါ်ရဲ့
ခြင်္သေ့တွေကို ပြန်လိုက်တယ်
ခြင်္သေ့တွေသွေးရူးသွေးတမ်း
ပေါင်ပြတ်သူပေါင်ပြတ်
အူပွင့်သူ အူပွင့်
လဲသူလဲ
သေသူသေ…..
ခြင်္သေ့တွေရဲ့ ပြေးခန်းက….ကင်မရာတဆုံး ဖုံလုံးကြီးတွေ လိမ့်လို့…..။
ကျွဲအုပ်ဟာ ဦးဂျိုကို သတိရသွားသလိုပေါ့….
ငါတို့ကအားနည်းသူတွေပါ….။
ထွက်ပြေးလို့ မလွတ်မြောက်တော့အခါ…..
အရာရာရင်ဆိုင်လိုက်ကြရုံပါပဲ….။
Be the first to comment