ပြန်လည်ထူထောင်တည်ဆောက်ရေး စီမံကိန်း

“ပြန်လည်ထူထောင်တည်ဆောက်ရေး စီမံကိန်း”

■ အော်စွန်းမိုင်

မြန်မာနိုင်ငံ မကြာမီ လုံးဝ ကိုယ်ပိုင်အုပ်ချုပ်ရေး ကျင့်သုံးနိုင်တဲ့နိုင်ငံအဖြစ် ပေါ်ပေါက်လာတော့မှာဖြစ်ပါတယ်။ မြန်မာနိုင်ငံ ဖက်ဒရယ်ဒီမိုကရေစီပြည်ထောင်စုအဖြစ် ပေါ်ထွန်းလာတဲ့အချိန်အခါမှာ ကိုယ်ပိုင်အုပ်ချုပ်ရေး တာဝန်ဝတ္တရားများကို နိုင်ငံသားများကိုယ်တိုင် မိမိတို့ဖာသာ ဖြည့်စည်းနိုင်ကြရမှာပဲဖြစ်တယ်။ မြန်မာနိုင်ငံ နိုင်ငံရေးအရ တိုးတက်လာအောင် ကြိုးပမ်းကြရမှာ ကျွန်ုပ်တို့ရဲ့ မပြောင်းလဲသော၊ ထာဝရတည်မြဲနေသော ရည်ရွယ်ချက်ဖြစ်တယ်။

မြန်မာနိုင်ငံ လုံးဝ ကိုယ်ပိုင်အုပ်ချုပ်ရေး တိုးတက်မှုဖြစ်စဉ်မှာ ရန်သူစစ်မိစ္ဆာများက အချိန်ကြာမြင့်စွာ သိမ်းပိုက်အုပ်စိုးထားခြင်း၊ တိုင်းပြည်အနှံ့ တိုက်ပွဲများ ပြင်းပြင်းထန်ထန်ဖြစ်ပွားခဲ့ခြင်း၊ အာဏာရူးတို့ အုပ်ချုပ်စဉ်တွင် မြန်မာပြည်မှာ ရုပ်ဝတ္ထုပစ္စည်း အကြီးအကျယ် ပျက်စီးဆုံးရှုံးခဲ့ရုံသာမက တိုင်းပြည်ရဲ့ စီးပွားရေးနဲ့ လူမှုရေးဘဝများ အခြေခံအုတ်မြစ်ပါ အစိတ်စိတ် အမွှာမွှာ ယိုယွင်းပျက်စီးခဲ့ခြင်း စတာတွေကြောင့် ကျွန်ုပ်တို့ရဲ့ ရည်ရွယ်ချက်မှာ ဆုံ့ဆိုင်းကြန့်ကြာရပေတယ်။ နိုင်ငံရေးအဆောက်အအုံဆိုတာက အဆိုပါ အခြေခံအုတ်မြစ်များအပေါ် စွဲတည်ရမြဲဖြစ်တာမို့ ယင်းအခြေခံအုတ်မြစ်များ တဖန်ပြန်လည် တည်မြဲခိုင်မာအောင် တည်ဆောက် ထူထောင်ကြရမှာဖြစ်တယ်။

ပြန်လည်ထူထောင်ရေးကာလမှာ၊ အခြေအနေ တည်ငြိမ် နေသားတကျဖြစ်အောင် ပြန်လည်ဖွဲ့စည်းရာမှာ အဆောက်အဦ၊ အဆက်အသွယ်၊ လူ့အသုံးအဆောင်ပစ္စည်းများ ပြန်လည်ကောင်းမွန်ရေး၊ လမ်းပန်းအသွားအလာကောင်းမွန်ရေး၊ တိုင်းပြည်ရဲ့အသက်သွေးကြောဖြစ်တဲ့ လယ်ယာစိုက်ပျိုးရေးနဲ့ အခြား လိုအပ်အသုံးဝင်တဲ့ စက်မှုလက်မှုလုပ်ငန်းများ ပြန်လည်ထူထောင်ရေးတို့ကို ရင်ဆိုင်ဖြေရှင်းရန် အရေးကြီးသော၊ ကြီးလေးသော အလုပ်တာဝန်ကြီးတရပ်ကို ထမ်းဆောင်ကြရမှာဖြစ်တယ်။ ရွှေ့ပြောင်း ပြန့်ကျဲ နေထိုင်ခဲ့ကြရတဲ့ ပြည်သူလူထုအဝန်းကိုလည်း မူလဒေသရပ်ရွာ ကိုယ့်နေရာမှာ ပြန်လည်နေထိုင်ပြီး အသက်မွေးဝမ်းကျောင်းပြုနိုင်ရန် ကြိုးပမ်းလုပ်ဆောင်ရမှာဖြစ်တယ်။

အထက်ပါကိစ္စရပ်များဟာ ဒီမိုကရေစီဖက်ဒရယ်ပြည်ထောင်စု အုပ်ချုပ်ရေးစနစ်နဲ့ပတ်သက်ပြီး လိုအပ်ချက်များဖြစ်တယ်။ အဲဒီလိုအပ်ချက်များကို လိုက် လျောဆောင်ရွက်နိုင်မှသာ အုပ်ချုပ်ရေး ဖွဲ့စည်းတည်ထောင်နိုင်မှာဖြစ်ပါတယ်။

မြန်မာနိုင်ငံမှာ ယခုကဲ့သို့ ပျက်စီးယိုယွင်းနေတဲ့ အခြေအနေမှာ လုပ်ငန်းတာဝန်များအတွက် ဘဏ္ဍာငွေအင်အား လိုအပ်မှာ အမှန်ပါပဲ။ ပြန်လည်ထူထောင် ရေးအတွက် ကမ္ဘာ့ကုလသမဂ္ဂနဲ့ လက်အောက်ခံအဖွဲ့အစည်းများက အဓိကပြု အကူအညီပေးရမှာဖြစ်တယ်။ ဒါ့အပြင် မြန်မာနိုင်ငံသားအားလုံးရဲ့ အားတက်သရော ပူးပေါင်းဆောင်ရွက်မှုလည်း လိုအပ်မှာဖြစ်တဲ့အတွက် မြန်မာနိုင်ငံသားများ အတတ်နိုင်ဆုံး ပူးပေါင်းဆောင်ရွက်ကြရမှာဖြစ်ပါတယ်။ ဒါမှသာလျှင် ပြတ်လပ်ရပ်တန့်နေတဲ့ နိုင်ငံတော်အခြေခံအုတ်မြစ်များ ပြန်လည်တည်ဆောက်ရာမှာ ပိုမိုလျင်မြန်စွာ အကောင်အထည်ပေါ်လာမှာဖြစ်တယ်။

အရေးကြီးသော နိုင်ငံရေးအစီအစဉ်များ ပြုလုပ်နိုင်အောင် အဆိုပါအုတ်မြစ်များကို လုံလုံလောက်လောက် ပြန်လည်တည်ဆောက် ထူထောင်၍ မပြီးဆုံးမီကာလအတွင်း ယာယီအစိုးရတရပ်ကို ဖွဲ့စည်းထားရမှာဖြစ်တယ်။ ဖက်ဒရယ်ဒီမိုကရေစီပြည်ထောင်စု ဖွဲ့စည်းနိုင်တဲ့အချိန်အခါအထိ ယာယီအစိုးရ တာဝန် ရှိတယ်။ နိုင်ငံတော်မှာ သမားရိုးကျ တိုင်းပြည်အုပ်ချုပ်ရေး ဖက်ဒရယ်ဥပဒေ နည်းလမ်းများအရ အစိုးရအဖွဲ့အစည်းတရပ် ထူထောင်နိုင်တဲ့ကာလအထိ သက်တမ်းရှိပါတယ်။ အဲဒီ အရေးအရာ ကိစ္စအဝဝကို ဖြေရှင်းကြရာမှာ နိုင်ငံသူနိုင်ငံသားများရဲ့ အကူအညီကို ရယူကြရမယ်။

အုပ်ချုပ်မှုနဲ့ ဥပဒေပြုမှုတို့ကို နှီးနှောဖလှယ်ကြရာမှာ ညှိနှိုင်းတိုင်ပင်ကြရာမှာ အခွင့်အရေးများ တိတိကျကျရှိကြရမှာဖြစ်တယ်။ ပြည်လည်ထူထောင်ရေးကာလ အုပ်ချုပ်ရေးဖြစ်စဉ် အတောအတွင်း နိုင်ငံတော်အခြေအနေ ကောင်းမွန်လာတာနဲ့တပြိုက်နက် နိုင်ငံအုပ်ရေးတိုးတက်မှု ဒုတိယအဆင့် ဖက်ဒရယ်ဒီမိုကရေစီပြည်ထောင်စု အုပ်ချုပ်ရေးအတွက် ရှေ့ဦး လုပ်ဆောင်ဖွယ်ရာ ရှိတာများကို စီစဉ်ပြီး အကောင်အထည် ဖော်ဆောင်ကြရမယ်။ စီမံချက်များ ရှေ့ကိုတိုးတက် ဆောင်ရွက်သွားနိုင်ဖို့ နိုင်ငံတော်ဘဏ္ဍာရေးဟာ ကိုယ့်အားကိုယ်ကိုးနိုင်တဲ့ အခြေအနေအထိ တိုးတက်ထွန်းကားသွားရမှာဖြစ်တယ်။

မြန်မာပြည်သူလူထုအချင်းချင်း လိုလေသေးမရှိ သဘောတူ ညီညွတ်ကြပြီးတဲ့နောက် အုပ်ချုပ်ရေးဖြစ်စဉ်များ နေသားတကျဖြစ်ပြီးတဲ့နောက် အခြားအစီအစဉ်များလည်း ပြီးပြည့်စုံသည်နှင့်တပြိုင်နက် မြန်မာနိုင်ငံဟာ ဖက်ဒရယ်ဒီမိုကရေစီနိုင်ငံအဖြစ် မားမားမတ်မတ် ဝင့်ဝင့်ထည်ထည် ရပ်တည်လာတော့မှာဖြစ်တယ်။