မင်းတို့မှာဘယ်သူမှ မရှိတော့ဘူးဟေ့ …

“မင်းတို့မှာဘယ်သူမှ မရှိတော့ဘူးဟေ့ …”

အယ်ဒီတာ့စကား

ပြီးခဲ့သည့်ရက်ပိုင်းအတွင်း မြန်မာ့အရေးနှင့်ပတ်သက်၍ နိုင်ငံတကာဘက်ကလာသည့် ဖြစ်ထွန်းမှုများမှာ “ငါတို့မှာ ငါတို့ပဲရှိတယ်” ဟု အစဉ်တစိုက် ကြွေးကျော်ရင်း မည်သူ့ကိုမျှ မျှော်မကြည့်ဘဲ ရုန်းကန် တိုက်ပွဲဝင်လာသည့် မြန်မာလူထုအတွက် အိုအေစစ်အတွင်းမှ ရေကြည်တပေါက်မျှဟုဆိုသော် လွန်အံ့မထင်။

အမေရိကန် အမျိုးသားလုံခြုံရေး လုပ်ပိုင်ခွင့်ဆိုင်ရာ အက်ဥပဒေ (NDAA) တွင် ထည့်သွင်းပြဌာန်းခဲ့သည့် Burma Act ဟူသော မြန်မာ့အရေး အက်ဥပဒေထဲတွင် နွေဦးတော်လှန်ရေးကို တနည်းတဖုံ အထောက်အပံ့ပြုမည့်အချက်များ ပါဝင်လာခဲ့သည်။

တရားမဝင် အာဏာသိမ်း စစ်ကောင်စီက အကြမ်းဖက်အဖွဲ့များဟု သူခိုး လူစွပ် ကြေညာထားသည့်အဖွဲ့များကို အမေရိကန် ကွန်ဂရက်လွှတ်တော်က အမည်နာမနှင့်တကွ အတိအလင်း ထည့်သွင်းဖော်ပြလိုက်သည်သာမက ကူညီထောက်ပံ့ရေးဆိုင်ရာ ပြဌာန်းချက်များပါ ဥပဒေထဲတွင် ပါဝင်လာသည်မှာ အကြမ်းဖက် စစ်ကောင်စီအတွက် ‘အင့်ခနဲ’ မြည်သွားစေမည့် အရှိုက်ကို ထိုးနှက်ချက်ပင်ဖြစ်သည်။

အမေရိကန်အထက်လွှတ်တော်က NDAA ကို အတည်ပြုအပြီး ရက်ပိုင်းအတွင်းမှာပင် ကုလသမဂ္ဂ လုံခြုံရေးကောင်စီ၌ မြန်မာ့အရေးနှင့် ပတ်သက်၍ တခါဖူးမျှမရှိခဲ့ဖူးသော အခြေအနေတရပ် ဖြစ်ထွန်းလာပြန်သည်။

ကုလသမဂ္ဂ လုံခြုံရေးကောင်စီ အမြဲတမ်းအဖွဲ့ဝင် (၅) နိုင်ငံထဲမှ မည်သည့်နိုင်ငံကမျှ ဗီတိုအာဏာသုံး၍ ပယ်ချခြင်း မရှိခဲ့သော၊ အလှည့်ကျအဖွဲ့ဝင် ၁၀ နိုင်ငံထဲတွင် ၉ နိုင်ငံက ထောက်ခံပြီး အိမ်နီးခြင်း အိန္ဒိယ တနိုင်ငံထဲက မဲမပေးဘဲ ကြားနေခဲ့သော ကန့်ကွက်သူမရှိ ဆုံးဖြတ်ချက်တရပ် အံ့မခန်း ထွက်ပေါ်လာသည်။

အသေးစိတ်ဆိုရလျှင် အမြဲတမ်းအဖွဲ့ဝင် ငါးနိုင်ငံထဲမှ တရုတ်နှင့် ရုရှားတို့က မဲမပေးဘဲ ကြားနေခဲ့ပြီး ကျန် သုံးနိုင်ငံဖြစ်သည့် အမေရိကန်၊ ဗြိတိန်၊ ပြင်သစ်တို့က ထောက်ခံမဲပေးခဲ့သည်။ အလှည့်ကျအဖွဲ့ဝင် ၁၀ နိုင်ငံထဲမှ ၉ နိုင်ငံက ထောက်ခံမဲပေးခဲ့ပြီး အိန္ဒိယ တနိုင်ငံထဲကသာ မဲမပေးဘဲ ကြားနေခဲ့သည်။ အပေါင်း ၁၂၊ ဟိုဒီမရောက် ၃ ဟု ဆိုရပေမည်။

တရုတ်နှင့် ရုရှားသည် မြန်မာ့အရေး သမိုင်းတလျှောက် မြန်မာနိုင်ငံမှ အာဏာရှင်စစ်တပ်ကို အားပေးအားမြှောက်ပြုပြီး နိုင်ငံတကာမျက်နှာစာတွင် ခလုတ်မထိ ဆူးမငြိစေရန် အာခံတွင်းထဲ ငုံထားပေးခဲ့သည့် နိုင်ငံများဖြစ်သည်။ ယခုတကြိမ်တွင်မူ မြန်မာနိုင်ငံမှ အာဏာရှင်စစ်တပ်ကို ထိုနှစ်နိုင်ငံက အာခံတွင်းထဲမှ အန်ချ ထွေးထုတ်ပစ်ခဲ့လေပြီ။ မြန်မာ အာဏာရှင်စစ်တပ်ဘက်တွင် မည်သူမျှ မရှိတော့ပေ။

ဤဖြစ်ထွန်းတိုးတက်မှုသည်ကား NDAA က အရှိုက်ကို ထိုးလိုက်သဖြင့် အင့်ခနဲမြည်ပြီး ဗိုက်ကို လက်ဖြင့်အုပ်ရင်း ဦးခေါင်းစိုက်ကျလာသည့် အကြမ်းဖက်စစ်ကောင်စီ၏ ဦးခေါင်းကို ဒူးခေါင်းဖြင့် ပင့်တိုက်လိုက်သောကြောင့် ခွပ်ခနဲမြည်ရင်း နောက်ပြန်လဲကျသွားစေသော ထိုးနှက်ချက်ပင်၊ မြန်မာလူထု လက်ခုပ်လက်ဝါးတီး၍ အားရ ကျေနပ်ဖွယ် ပြုံးပြုံးကြီး အောင်ပွဲခံထိုက်သော အောင်မြင်မှုပင်။

အကြမ်းဖက်စစ်ကောင်စီ နောက်ထပ် ဘယ်နှချီ ဆက်ပြီး တောင့်ခံနိုင်ဦးမည်နည်း။

နွေဦးတော်လှန်ရေး လူထုဘက်တွင်မူ ငါတို့မှာ ငါတို့ချည်းပဲမဟုတ်၊ ထိုထိုသော နိုင်ငံတကာမိတ်ဆွေများလည်း ရှိနေသေးသည်ဆိုသည်ကို အခိုင်အမာ တွေ့လိုက်ရပေသည်။ မြန်မာလူထု၏ ရဲရင့် ပြတ်သား စွန့်စား စွန့်လွှတ်မှုများကို နိုင်ငံတကာမိတ်ဆွေများ လျစ်လျူရှုခြင်းငှာ မစွမ်းသာတော့ပေ။

မြန်မာ့နွေဦးတော်လှန်ရေး၏ မကြာမြင့်တော့သော အောင်ပွဲအတွက် အပြည့်အဝ ဂုဏ်ပြုခံထိုက်သည်မှာ ချစ်လှစွာသော မြန်မာလူထုပင် ဖြစ်သည်။

အခြားတဘက်တွင်ကား ဤတော်လှန်ရေး အောင်မြင်ရန် နှောင့်နှေးကြန့်ကြာခြင်းမှန်သမျှအတွက် တော်လှန်ရေး၏ တပ်ဦးနေရာကို ပေးထားသော တနည်းအားဖြင့် တပ်ဦးနေရာ ယူထားသော၊ လူထုအမည်နာမအောက်တွင် တော်လှန်ရေးကို စီမံခန့်ခွဲနေသောသူများတွင်သာ အလုံးစုံ တာဝန်ရှိမည်ဖြစ်ကြောင်း ‘The Call’ က တင်ကြို၍ ကြေညာမောင်း ခတ်လိုက်ပေသည်။

မြန်မာလူထု တာဝန်ကျေသည် …
ဆက်၍လည်း တာဝန်ကျေနေဦးမည်သာဖြစ်သည် … ။