မနက်ခင်းအတွေး

ခရီးသွားရတာ ကောင်းတယ်။ စိတ်ကိုလန်းဆန်းစေတယ်။ အလုပ်မှာ အိမ်မှာ ယုတ်လျော့ကျဆင်းနေတဲ့စိတ်ခွန်အားတွေကို ပြန်လည်ဖြည့်တင်းပေးတယ်။ ချစ်သူလင်မယားတွေဆိုလည်း ချစ်ခင်ကြင်နာမှုတွေ ပိုပြီးစိမ်းလန်းစိုပြေလာစေတယ်။ အတွေ့အကြုံသစ်တွေ အတွေးအမြင်သစ်တွေလည်း ရလာနိုင်တယ်ပေါ့လေ။ ဒါကြောင့် တချို့က ခရီးသွားရတာကို နှစ်သက်စွဲလန်းနေတတ်ကြတယ်။ လေးစားရတဲ့ စာရေးဆရာကြီးတဦးဆို နှစ်တိုင်းခရီးထွက်တယ်။ ပြန်လာတိုင်းလည်း ခရီးသွားဆောင်းပါးရှည်ကြီးတွေကို ဓာတ်ပုံတွေ ဝေဝေဆာဆာနဲ့ ရေးလေ့ရှိတယ်။ ဆရာ့ဆောင်းပါးကိုဖတ်ရင်း ငါလည်း အသက်ကြီးရင် အဲဒီလို ပုံမှန်ခရီးထွက်နိုင်အောင် ကြိုးစားမယ်လို့ အားကျစိတ်ကူးဖူးခဲ့ပါတယ်။

နိုင်ငံရေးမုန်တိုင်းထဲလည်းရောက်ရော သွားလိုက်ရတဲ့ခရီးတွေ အိမ်ကိုမပြန်နိုင်တော့ဘူး။ ဒါပေမဲ့ စိတ်ကူးထဲက အပန်းဖြေခရီးမျိုးတွေတော့ မဟုတ်ဘူးပေါ့။ နေ့ခင်းတောတိုးအိပ် ညဘက်မှရှေ့ကခြေသံနောက် အပြေးလိုက်ရတဲ့ခရီးတွေ၊ ကုန်ကားခေါင်မိုးပေါ်မှာ ပက်လက်လိုက်သွားရတဲ့ခရီးတွေ၊ ဘုရားဖူးလိုလိုနဲ့ ကားရှေ့ခန်းကနေ အတည်ပေါက်ရုပ်ဖမ်းပြီး ရင်တထိတ်ထိတ်နဲ့ ဇွတ်တိုးခဲ့ရတဲ့ခရီးတွေ။ ပတ်ဝန်းကျင်အလှအပတွေလည်း မခံစားနိုင်။ ဒါပေမဲ့ လူတွေရဲ့ အရိပ်အကဲနဲ့ မျက်နှာတွေကိုတော့ တချက်မှမလွတ်အောင် ဖတ်ရှုခဲ့ရတာပေါ့။ နည်းနည်းလေးလွဲသွားတာနဲ့ ခရီးလမ်းကြောင်းက ခေါက်ချိုးပြောင်းသွားနိုင်တယ်မဟုတ်လား။

အခုတော့ အဲဒီလှပပြီး ရှုမောမဆုံးတဲ့တိုင်းပြည်ကြီးရဲ့ အရှေ့အနောက်တောင်မြောက် အလယ်ထက်အောက်မချန် တော်လှန်စစ်မီးတွေတောက်လောင်လို့။ အကြမ်းဖက်စစ်ဝါဒကို ဒီမြေပေါ်က အပြီးအပိုင်ပပျောက်သွားအောင် သံဓိဌာန်ချထားတဲ့ ပြည်သူတရပ်လုံးရဲ့ လွတ်မြောက်ရေး ခရီးလမ်းကြီးကို ဘယ်သူမှ ပိတ်ပင်တားဆီးလို့မရတော့ဘူး။

သိန်းဖေမြင့်ရဲ့ အရှေ့မြောက်တိုင်းတခွင်တို့၊ မြသန်းတင့်ရဲ့ လွမ်းမောဖွယ်ကမ္ဘောဇရဲ့ နှင်းယွန်းဟေမန်ရက်များ တို့ကြောင့် ခရီးသွားစာပေကို စွဲလန်းနှစ်ခြိုက်ခဲ့ရတယ်။ ဒီစစ်ပွဲကြီးပြီးတဲ့အခါ ကိုယ့်ဆန္ဒအရ ပေါင်းစည်းထားတဲ့၊ လုံးဝလွတ်လပ်တဲ့နယ်မြေဒေသများ အကျိုးတူ အတူရပ်တည်ကြမယ့် ဖက်ဒရယ်လမ်းမကြီးတွေပေါ်မှာ ခရီးတွေ အပြန်အလှန်သွားကြမယ်။ ဒေသပေါင်းစုံက လူပေါင်းစုံရဲ့ ခရီးသွားအတွေ့အကြုံတွေကို အပြန်အလှန်မျှဝေကြမယ်။ ခရီးသွားစာပေတွေကတဆင့် အမြင်တွေအတွေးတွေ ချစ်ခြင်းမေတ္တာတွေ ပိုမိုကျယ်ပြန့်နက်ရှိုင်းလာစေရမယ်။ အားလုံးအတူလျှောက်ခဲ့ကြတဲ့ တော်လှန်ရေးခရီးဆိုတာကြီးကလည်း ကြမ်းတမ်းခက်ခဲသလောက် ရသစုံရောပြွမ်းနေတဲ့ ရှုခင်းပန်းချီကားချပ်ကြီးတခုပဲမဟုတ်လား။

ဘဝအားလုံး အသစ်ကပြန်စကြမယ်ဆိုတာ ဘယ်လောက်ရင်ခုန်စရာကောင်းသလဲ။