မနက်ခင်းအတွေး

ဝိသေသတိုင်းဆိုတဲ့အမည်ဟာ ဗိုလ်ချုပ်အောင်ဆန်း စပေးခဲ့တဲ့နာမည်ခင်ဗျ။ ကျနော်တို့ချင်းတောင်မှာ ထူးခြားချက်တွေအများကြီးရှိတယ်။

ချင်းဝိသေသတိုင်းထဲမှာ ဘယ်နယ်တွေကို ထည့်ရင်ကောင်းမလဲလို့ ဦးဝမ္မသူးမောင်းနဲ့ ဗိုလ်ချုပ်ဆွေးနွေးကြတော့ ဗိုလ်ချုပ်က “ကိုင်း ချင်းတွင်းနဲ့ ဧရာဝတီအနောက်ဘက်က နယ်တွေပါ ချင်းဝိသေသတိုင်းထဲထည့်လိုက်ရင် ပိုရှင်းသွားမယ်ထင်တယ်” လို့ပြောသတဲ့။ ဒီလိုပြောတာကတော့ ယောချောင်းတို့ စေတုတ္တရာတို့ကို ချင်းဝိသေသတိုင်းထဲ ထည့်ထိုက်မထည့်ထိုက် ဆွေးနွေးကြရင်းကပြောလိုက်ခြင်း ဖြစ်တယ်။ ဒီတော့ ဦးဝမ္မသူးမောင်းက ” ဟာဗိုလ်ချုပ်၊ ဒီလိုတော့ မထည့်လိုက်ပါနဲ့၊ ကျနော်တို့ လက်မခံနိုင်ဘူး။ ချင်းတွင်းနဲ့ ဧရာဝတီအနောက်ဘက်က နယ်တွေအားလုံး ချင်းဝိသေသတိုင်းထဲ ထည့်လိုက်ရင် ကျနော်တို့ချင်းတွေဟာ စာရေးတောင်ဖြစ်ကြမှာမဟုတ်တော့ဘူး။” လို့ ပြန်ပြောတယ်ဆိုပဲ။

ဒီပြဿနာကို အငြင်းပွားဖို့ပြောတာ မဟုတ်ပါဘူး။ ဗိုလ်ချုပ်အောင်ဆန်း နဲ့ ဦးဝမ္မသူးမောင်း တို့ရဲ့ စေတနာကို သိစေချင်လို့ပါ။

ပြီးတော့ ဦးဝမ္မသူးမောင်း ပြောတဲ့စကားထဲမှာ အမြော်အမြင်ကြီးမှုတစ်ခုကို တွေ့တယ်။ ဝိသေသထူးတဲ့ အခြေအနေတူတဲ့ ကျနော်တို့ ချင်းလူမျိုးအုပ်စုတွေကို သီးသန့်ဝိသေသတိုင်းထဲ အတူထားပြီး စီမံအုပ်ချုပ်သွားခြင်းဟာ တိုးတက်ဖွံ့ဖြိုးမှုအတွက် ပိုကောင်းတယ်။ ဝိသေသဖြစ်တဲ့အချက်တွေကို ဂရုစိုက်ပြီး ဝိသေသဖြစ်တဲ့နည်းတွေနဲ့ လုပ်သွားကြဖို့အရေးကြီးတယ်ဗျ။

(သိန်းဖေမြင့်)

ဝိသေသတိုင်း သမိုင်းအစ စာအုပ်မှ