မျှော်လင့်ခြင်းတွေကို တလျော့သုံးထောင်နဲ့ ဈေးစစ်လို့ ရလိုရငြား

ဟင်….ခနဲ လွတ်ကျသွားတဲ့ မနက်ဖြန်တွေ ၊ ကျသွားခြင်းထဲမှာ ကန်စွန်းရွက် ငါးရာမီလီဂရမ် ၊ မှို ငါးဆယ် မိုက်ခရို ဂရမ်နဲ့ ၊ အကြံဉာဏ်လိုဟန် ညနေခင်းတချို့ ။

ယာဥ်စီးခကို ဗုံးထဲ ထည့်ခြင်းဖြင့် မိမိဂုဏ်ကိုမြှင့်တင်ပါ ။ ကောက်သွားတဲ့ ဒုက္ခသစ်သားချောင်းနဲ့ လိုက်လျောညီထွေအောင် လှုပ်ရမ်းနေရတဲ့ ဂစ်တာကြိုးတွေအလား ။ အာရုံခံစားမှုကောင်းတဲ့ ကြောင်မွေးတွေ မပါတာပဲ ဖြစ်တည်နေခြင်းကို ကျေးဇူးတင်မိတယ် ။ လေမရှိ ၊ ဂွေရှိတယ်ကွာဆိုတဲ့ ညနေခင်းတွေ ဖန်တစ်ရာထပ်နေပြီ ၊ ဘယ်နေရောင်မှ ကျန်းမာရေးကို အထောက်အကူမပြုတော့ဘူး ၊အိုဇုန်းလွှာ စုတ်ပြတ်သက်သွားတာကြာပြီလေ ။ ဒါလီနွေဆိုပြီးဝော့ာလည်း မတမ်းတချင် ၊ မနက်ဖြန်ရဲ့လမ်းများ လည်း အသားမာတက်နေခဲ့တာကြာပြီလား ၊ ခြောက်ခမ်းသွားတဲ့အိပ်မက်မြစ် ကိုပဲ RC တစ်တောင့်နဲ့ အော်ဆိုလိုက်ပေါ့ ။ မှန်ပြောင်းကနေ 360 ဒီဂရီ လှည့်အကြည့် အိပ်မက်ဖိနပ်ကြိုးပြတ်တော့တာပဲ ၊ ထိုးထွက်လာတဲ့ အစာအိမ်ရဲ့အချက်ပြခေါင်းလောင်းသံ တညံညံ ။ အငမ်းမရစားတိုင်း လည်ချောင်းထဲနင် နေတာက ပေါက်စီဖန်တီးခဲ့တဲ့ ကျူးကော့လျန်ရဲ့ အပြစ် ၊ ဖန်ခွက်ထဲက အုန်းဆံမှုန့်ဖျော်ရည်ကို အားငယ်မျက်၀န်းတွေနဲ့အတူ မော့မော့သောက်နေခြင်းက ဖြေသိမ့်မှုတစ်ခုထက်မပိုဘူး ။ ကိုယ့်နည်းကိုယ့်ဟန် ၊ ကိုယ့်ဖိနပ်သဲကြိုးလေးမှာလည်း ကတ္တီပါသားမကျန် ၊ အရောင်တလွင့်လွင့်ဖြစ်နေတာက သံလျက်ပဲလေ ။ ရှာ စားရမှာလား ၊ လျှာ စားရမှာလား ၊ အရိုးတောင်မရှောင်နိုင် ၊ ကြာကြာလည်းဝါးခွင့်မရတဲ့ သွားတွေ ။ သွားပါများတိုင်းလည်း ခရီးမရောက် ၊ ရှေ့ကိုဘယ်လောက်ရည်မှန်းရည်မှန်း ဘဲဥပုံ အစာအိမ်ကို ပတ်နေရတာနဲ့ တာထွက်အမှတ်ကိုပြန်ဖြတ်ရ ။ အံစာကနေ ကံဆိုးနံပါတ်အထွက် ၊ ထောင်ကျစေ ထောင်သို့တိုက်ရိုက်သွားပါတဲ့ ။ နံပါတ်တူအံစာက မြို့၀င်ဂိတ်မှာကားပိတ်နေလို့ အလှည့်ကျော်ခံနေရတာ အာဏာရှင် ဘယ်နှစ်ဆက်လောက်ရှိနေပြီလဲ ။ အိပ်မက်နဲ့ မျှော်လင့်ချက် အ၀င်အထွက်ရှိသည် ၊ ကျေးဇူးပြု၍ ဘ၀ရှေ့ အာဏာရှင် ပိတ်မရပ်ပါနဲ့ ။

ဇန်နဝါရီ၊ ၂၀၂၂