ယောနယ်မှာ မိန်းမရခဲ့သည်

သတင်းထောက်လုပ်ခဲ့တဲ့ ၁၀ နှစ်ကျော် သက်တမ်းထဲမှာ သတင်းသွားယူရင်းနဲ့ မိန်းမရတဲ့အဖြစ် ကြုံရမယ်လို့ ဘ၀မှာ တခါမှ မတွေးမိခဲ့ဘူး။ ကျနော့်ဖုန်းရဲ့ ကွန်တက်လစ်ထဲမှာ ချစ်ဇနီး မီမီဆိုတဲ့ နံပါတ်တခုဟာ အခုချိန်ထိ ရှိနေတုန်းပဲ။ အဲ့ဒီအကြောင်း အဖြစ်အပျက်တွေကို မိတ်ဆွေတွေကို ပြန်ပြောပြတဲ့ အခါတိုင်းလည်း သဘောကျ ပြုံးဖြစ်တယ်။ ဘာလို့လဲဆို “မီမီ” ဆိုတဲ့ ကျနော်ရခဲ့တဲ့ မိန်းမကို ဖြူသလား မည်းသလားဆိုတာတောင် မသိသလို အပြင်မှာ မတွေ့ဖူးခဲ့ပါဘူး။ ဒါပေမဲ့ အဲ့ဒီတခေါက်မှာတော့ ကျနော် မိန်းမရခဲ့ပါတယ်။

ကျနော့်အတွက် ယောခရီးစဉ်ဟာ အသွားမှာ ရင်ခုန်ခဲ့ရသလောက် အပြန်လမ်းခရီးဟာ ထိတ်လန့်စရာ ကောင်းခဲ့ပြီး ကြောက်ရွံမိတယ်ဆိုတာ ဝန်ခံရမှာပဲ။ တောထဲက ပြန်အဆင်း အနီးဆုံးရွာကိုရောက်တော့ ခရီးစဉ်လမ်းကြောင်းကို လိုက်ကူပေးတဲ့ နယ်ခံအကိုက လာပြောတယ်။

“ညီလေးရေ အဆင်းကတော့ အလာတုန်းကလို မလွယ်ဘူး၊ နှစ်ဘက်စလုံးရဲ့ အစစ်အဆေးကြား အခြေအနေ အတော်ဆိုးနေပြီ။ ဒီအတိုင်းဆို မလွယ်လောက်ဘူးလို့ ပြောလာတယ်။” ဆိုပြီး ပြောပါလေကော။ ဒီတခေါက်ကြုံတဲ့ ကားကို လွတ်သွားရင် နောက်တခါ လမ်းကြောင်း အဆင်ပြေလောက်မယ့်ကားက ဘယ်အချိန်မှ ပြန်ရမလဲဆိုတာ လိုက်ကူပေးတဲ့ သူတွေကလည်း အာမ မခံနိုင်ဘူး၊ အခု ချိတ်ဆက်လုပ်တဲ့ ကားဆရာကလည်း အစစ်အဆေးတွေ အရမ်းကြမ်းလာလို့ သူလည်း ဒီတခေါက်ပြီးရင် ကားဆွဲရပ်တော့မယ်လို့ ပြောတယ်။

ကျနော့်ဘက်မှာ အခြေအနေတွေက အများကြီး ရွေးချယ် စဉ်းစားစရာ မရှိဘူး။ ကိုယ်တိုင်လည်း တခုခုကို စိုးရိမ်နေခဲ့တယ်။ အဲ့လိုဆိုတော့ လိုက်ကူပေးတဲ့ နယ်ခံအကိုကို “အကို့မှာကော ဘယ်လိုစဉ်းစားချက်မျိုး ရှိလဲ” လို့ မေးလိုက်မိတယ်။ ဇာတ်လမ်းကတော့ အဲဒီကနေ စတာပဲ။

ကျနော့်ခရီးစဉ်ကို ကူညီပေးတဲ့ အကိုက ဂန့်ဂေါ်နယ်သား၊ အဲ့နယ်တကြောကို နှံ့နှံ့စပ်စပ်ရှိပြီး လူချစ်လူခင်လည်းပေါတယ်၊ သူ့ကိုဆို ရွာတွေထဲကသူတွေက ခင်မင် ယုံကြည်ကြတယ်။ တချို့ဟာတွေက သူပြောရင် ပြီးတယ်။

အဲဒီလိုဆိုတော့ အဲဒီအကိုကနေ “ငါ့ညီရာ မင်း ငါတို့ရွာက ကောင်မလေးတယောက်ကို မိန်းမ တော်လိုက်ပါလား” ဆိုပြီး ပြောပါလေကော။ အကို့ဟာက ဘယ်လိုပုံစံမျိုးကြီးလဲဆိုတော့ –

“ဒီလိုကွာတဲ့၊ ရွာက ငါနဲ့ ဆွေမျိုးမကင်းတဲ့ ညီမလေးတယောက်ရှိတယ်၊ သူက အရင်က ရန်ကုန်မှာနေတာ၊ အခုတော့ သူက ရွာကိုပြန်ရောက်နေပြီ၊ ညီက ရန်ကုန်က သူ့ယောကျ်ားပုံစံ ဟန်ဆောင်ပြီး ယောက္ခမ အတော်နေမကောင်းနေလို့ ရန်ကုန်ကနေ ရွာကိုလာကြည့်ပြီး ပြန်တဲ့ပုံစံမျိုးပေါ့၊ အခု ရွာမှာ ကောင်မလေးအမေကလည်း အတော်နေမကောင်းဖြစ်နေတယ်၊ ကောင်မလေးနဲ့ မိသားစုကိုတော့ အကျိုးအကြောင်း သူပြောထားပေးမယ်၊ အဲ့တော့ ညီက ကောင်မလေးရဲ့ အဖေနဲ့ အမေရဲ့နာမည်တွေကို အလွတ်မှတ်သွား၊ လမ်းမှာ စစ်လို့ရှိရင် ဒီရွာက ဘယ်သူရဲ့သမီး မီမီရဲ့ ယောကျ်ားပါ၊ ဘယ်သူ့ရဲ့ သမက်ပါလို့ဆိုပြီး ပြောလိုက်၊ အဲဒီကြရင် စစ်တဲ့အဖွဲ့တွေက ဒီရွာက ဘယ်သူရဲ့သမီးလို့ ပြောရင် အဆင်ပြေလောက်တယ်။ ဆိုပြီး သူ့စဉ်းစားချက်ကို ပြောပြတယ်။

ကျနော့်ဘက်မှာလည်း အချိန်အများကြီး မရ၊ အခြားစဉ်းစားချက်လည်း မရှိတာနဲ့ သူပြောတဲ့ ယောကျ်ားဟန်ဆောင် လုပ်မယ်လို့ပဲ ဆုံးဖြတ်လိုက်တော့တယ်။

အဲ့ဒါနဲ့ နယ်ခံအကိုက ဖုန်းနံပါတ်တခုပေးပြီး လိုင်းရတဲ့နေရာကနေ မီမီဆိုတဲ့ ကောင်မလေးဆီ ဖုန်းဆက်ခိုင်းတယ်၊ ကျနော်က ဘယ်သူ ဘယ်ဝါ ဘာအလုပ်လုပ်တယ် ဆိုတာကို ပွင့်ပွင့်လင်းလင်းပဲ ပြောပြလိုက်တယ်။ တကယ်လို့ တဘက်က စစ်လို့ လိုအပ်ရင် ဖုန်းတွေဘာတွေ ခေါ်မယ်ဆိုလည်း ကျနော့်ကို ယောကျ်ားလို ဟန်ဆောင်ပြောပေးဖို့ အရင်ဆုံး ကြိုတင် ဇာတ်တိုက်ရတယ်။

ကောင်မလေးကလည်း စိတ်ချပါ၊ ချိတ်ပေးတဲ့ အကိုရဲ့ မိတ်ဆွေဆိုရင်တော့ သူယုံကြည်ပါတယ်၊ ကူညီပေးပါ့မယ်ဆိုပြီး ပြောတယ်။ အဲ့လိုနဲ့ ဖုန်းထဲကနေပဲ ဘယ်ရွာက ဘယ်သူရဲ့ မိန်းမ၊ ဘယ်သူတွေရဲ့ သားမက်ဆိုပြီး မိန်းမ ရပါလေကော။ ဒီလိုနဲ့ ကျနော့်ဖုန်းထဲမှာ ချစ်ဇနီး မီမီ ဆိုတဲ့ ကွန်တက်တခု ရခဲ့တယ်။

မြေပြင်အခြေအနေအရ နှစ်ဘက် အစစ်အဆေးတွေကြားထဲက သတင်းထောက်တယောက်အနေနဲ့ ဒီဒေသကို လာခဲ့တယ်ဆိုတာ ကျနော့်အနေနဲ့ အသိခံလို့မရဘူး။ လိုက်ကူညီပေးတဲ့ သူတွေကလည်း မသိစေလိုကြဘူး။ သာမန် ခရီးသွား ဟန်ဆောင်ပုံစံအနေနဲ့ကလည်း ကျနော့်ပုံစံနဲ့က အဆင်မပြေဘူး။ အလာတုန်းက ကားစပယ်ယာ ပုံစံမျိုးတောင် မျက်မှန်သမား ကျနော့်ကို အသေအချာ စစ်ဆေးကြတယ်။ သူတို့နယ်ဘက်က မဟုတ်ဘူးဆိုတာ မှတ်ပုံတင်နဲ့ လူပုံစံ ကို မြင်ကတည်းက နှစ်ဘက်အဖွဲ့အစည်းက သိတယ်။ ဒီအခြေအနေကြားထဲမှာ စစ်ဆေးရေးဂိတ်တွေတိုင်း ကျနော် ဟာ ဘယ်ရွာက မီမီရဲ့ ယောကျ်ားပါ၊ ဘယ်သူတွေရဲ့ သားမက်ပါ၊ မယုံရင် အဲဒီရွာက သူတို့ကို မေးကြည့်လို့ရပါတယ် ဆိုတဲ့အဖြေနဲ့ပဲ ကျနော်ရဲ့ ယောအပြန်ခရီးကို ကျော်ဖြတ်ခဲ့ရတယ်။

ဒီစာဟာ အဲဒီအချိန်တုံးက ကျနော့်ကို အစစအရာရာ ကူညီပေးခဲ့ကြတဲ့သူတွေကို အမှတ်တရအနေနဲ့ ရေးတာပါ။

တချို့သော အဖြစ်အပျက် အခြေအနေတွေဟာ လူတွေအတွက်တော့ ဘာမှမဟုတ်ပေမဲ့ ဒီအဖြစ်အပျက်ဟာ ကျနော့်အတွက်တော့ မမေ့နိုင်စရာ အမှတ်တရတခုပဲ။ အဲ့ဒါကြောင့် အခုထိ ကျနော်ဟာ ချစ်ဇနီး မီမီဆိုတဲ့ ကွန်တက် လေးကို သိမ်းထားခဲ့မိတာ။ တခါတလေ စာမျက်နှာတွေပေါ်မရောက်ခဲ့တဲ့ သတင်းတွေရဲ့နောက်ကွယ်က အဖြစ်အပျက် ဇာတ်လမ်းတွေဟာ ငိုအားထက် ရယ်အားသန်ခဲ့တဲ့ကိစ္စတွေ အများကြီး ရှိခဲ့ပါတယ်။