ရဲဘော်သုံးကျိပ်နှင့် ဗမာ့လွတ်လပ်ရေးတပ်မတော်စစ်ကြောင်းများ

“စာအုပ်တန်းမှာလမ်းလျှောက်ခြင်း”

စာအုပ်အမည်။ ရဲဘော်သုံးကျိပ်နှင့် ဗမာ့လွတ်လပ်ရေးတပ်မတော်စစ်ကြောင်းများ
(စစ်နှင့်နိုင်ငံရေးသမိုင်းကျမ်း)
ရေးသူ။ သုတေသနရဲဘော်
မျက်နှာဖုံး။ ဦးသောင်းလွင် (လက်ရှိစစ်အကြမ်းဖက်ခေါင်းဆောင်၏ဖခင်ဟု ယူဆရ)
ကြီးကြပ်စီစဉ်သူ။ ဦးရဲမြင့် (အငြိမ်းစားဒု – ဗိုလ်မှူးကြီး)။ ရဲဘော်ရာကျော်ထုတ်ဝေရေး
ပုံနှိပ်မှတ်တမ်း။ ၁၉၇၅ – ခု မတ်လထုတ်
ပထမအကြိမ်
စောင်ရေ (၃၀၀၀)
ရဲဘော်ရာကျော်ထုတ်ဝေရေး
နိုင်ငံရေးဆိုင်ရာ ခွင့်ပြုချက်အမှတ် (၀၆၈၀)

■ ထုတ်ဝေသူ၏အမှာစာ
“စာအုပ်ထုတ်ရသည့် ရည်ရွယ်ချက်မှာ အောက်ပါအတိုင်းဖြစ်ပါသည်။
(က) လွတ်လပ်ရေးဖခင်ကြီး ဗိုလ်ချုပ်အောင်ဆန်းပါ ရဲဘော်သုံးကျိပ်တို့ တဦးချင်း မည်သို့မည်ပုံ စစ်သားများစုဆောင်းခဲ့ကြပြီးလျှင် မည်သို့ချီ စစ်ဆင်ခဲ့ကြ၍ မည်သို့ စခန်းသိမ်း တပ်ဖျက်ခဲ့ကြရသည်ကို မှတ်တမ်းတင်ရန်။
(ခ) မြန်မာနိုင်ငံ၌ မြန်မာများ၏ မျက်မှောက်ခေတ် ဗမာ့တပ်မတော် ပေါ်ပေါက်လာရပုံနှင့် ဖက်ဆစ်တော်လှန်ရေးမျိုးစေ့ ဖြစ်ပေါ်လာရပုံများကို မှတ်တမ်းတခုရှိနေစေရန်။
(ဂ) ဗမာ့လွတ်လပ်ရေးတပ်မတော် (ဘီအိုင်အေ) ကာလတွင် လွတ်လပ်ရေးကြိုးပမ်းသူများ၏ ဆောင်ရွက်ချက်များကို မှတ်တမ်းတခုအဖြစ် ရှိနေစေရန်။
(ဃ) ဗမာ့လွတ်လပ်ရေးကြိုးပမ်းမှုတွင် ကိုယ်တိုင်ကိုယ်ကျပါဝင်ခဲ့သူများအတွက် ယင်းမှတ်တမ်းကို သားစဉ်မြေးဆက် အမှတ်တရ ဖတ်နိုင်ကြရေးအတွက် စာအုပ်စင်၌ သိမ်းဆည်းထားနိုင်စေရန်။”
+ + + + + + + +

“စာအုပ်ကိုဖွင့်၍ကြည့်ရှုပြီးလျှင်ပင် ကျွန်တော်တို့၏ ပွဲဦးထွက် စာအုပ်သည် စီးပွားရေးတခုတည်း ဦးမတည်ကြောင်း ထင်ရှားပါမည်။ စက္ကူမရောင်း၊ စာကိုသာရောင်းထားပါသည်။ (ပြည်သူ့ရွှေဖြင့် ဝယ်ထားရသော စက္ကူကို တာဝန်သိစွာဖြင့် ချွေတာခြင်းပင်ဖြစ်ပါသည်) သို့ကြောင့် စက္ကူနေရာလပ်ကို စစ်ကြောင်း အပြောင်းအလဲတွင်ပင်လျှင် မချန်လှပ်ခဲ့ပါ။
ထုတ်ဝေသူမှာလည်း တပ်မတော်ခေတ်အဆက်ဆက် နှစ်ပေါင်း (၃၀) နီးပါးမျှ တာဝန်ထမ်းဆောင်ခဲ့သူတဦး ဖြစ်သည်နှင့်အညီ စာရေးသူမှာလည်း တချိန်က ထုတ်ဝေသူနှင့်အတူ ဂျပန်ခေတ် စစ်တက္ကသိုလ်၌ ဗိုလ်သင်တန်းစတုတ္ထပတ်တွင် အတူတကွ စစ်သင်တန်း တက်ရောက်ခဲ့ကြသူများဖြစ်ကြ၍ ရဲဘော်ရဲဘက်၊ တနည်းအားဖြင့် သေဖော်သေဖက်များသာ ဖြစ်ကြပါသည်။
သို့ကြောင့်လည်း စိတ်တူကိုယ်တူ စုပေါင်းညှိနှိုင်းလုပ်ဆောင်ခဲ့ရာ၌ လွယ်ကူခဲ့ကြရပါသည်။
ဤစာအုပ်ဖြစ်မြောက်ရေးအတွက် ကူညီကြသည့် ကျွန်တော်၏စာပုံနှိပ်စက် လုပ်သားရဲဘော်များအားလည်းကောင်း၊ အခြား (၇) ရက် သားသမီးအပေါင်းအားလည်းကောင်း အထူးကျေးဇူးတင်ရှိပါသည်။”
ရဲမြင့် (လက်ထောက်)။
ပုံနှိပ်ထုတ်ဝေသူ
၁၉၇၅ – ခု၊ ဖေဖော်ဝါရီလ (၂၅) ရက်

■ မာတိကာ
အကြောင်းအရာပေါင်း အမှတ်စဉ် (၁) မှ (၃၆) အထိ ဖော်ပြထားပြီး စာမျက်နှာပေါင်း (၂၂၁) မျက်နှာအထိ ရှိသည်။ စာမျက်နှာ (၂၂၂) မှ ( ၃၃၅) မျက်နှာအထိတွင်မူ ပူးတွဲချက်များစာရင်းအဖြစ် အကြောင်းအရာပေါင်း အမှတ်စဉ် (၁) မှ (၂၈) အထိ ပါရှိသည်။
နောက်ဆက်တွဲအဖြစ် မြေပုံမာတိကာ (၁၄) ချပ်နှင့် စစ်ကြောင်းပြမြေပုံ (၁၂) ချပ် ပါဝင်သည်။

■ ပါမောက္ခ ဦးတင်အုန်း၏အမှာစာ
သုတေသနရဲဘော် ရေးသားပြုစုသော “ရဲဘော်သုံးကျိပ်နှင့် ဗမာ့လွတ်လပ်ရေးတပ်မတော်စစ်ကြောင်းများ” သမိုင်းသည် ဘီအိုင်အေခေါ် ဗမာ့လွတ်လပ်ရေးတပ် မြန်မာပြည်သို့ဝင်လာပုံကို အသေးစိတ်ရေးသားထားခြင်းနှင့် တပ်မတော်၏တော်လှန်ရေးအစဉ်အလာကို ပေါ်လွင်စွာ ဖော်ပြခြင်းကြောင့် ယခင်ရေးသားပြီး စစ်သမိုင်းများထက် ထူးခြားသည်။ ရဲဘော်သုံးကျိပ်ဦးဆောင်ပြီး ဝင်လာပုံ စစ်သမိုင်းများရှိခဲ့သည်။ သို့သော်လည်း တိုက်ပွဲနှင့် စစ်ရေးစစ်ရာများကို သာမန်မျှသာ ရေးသားကြသည်။ သုတေသနရဲဘော်၏သမိုင်းတွင်သာ စစ်ကြောင်းအလိုက်၊ တပ်ဖွဲ့အလိုက် ဝင်လာပုံကို ခရီးလမ်း မြေပုံ စာရင်းအင်းအပြည့်အစုံနှင့် ဖော်ပြထားသဖြင့် မြန်မာ့စစ်သမိုင်းကို လေ့လာလိုသူနှင့် သုတေသနပြုလိုသူများအတွက် များစွာအထောက်အကူရနိုင်ပါသည်။
ရဲဘော်သုံးကျိပ် ဟိုင်နန်ကျွန်းသို့ သွားရခြင်း၏ နောက်ခံ နိုင်ငံရေးအခြေအနေများမှအစ ဗြိတိသျှတို့ကို တော်လှန်တိုက်ခိုက်ပြီး နောက်ဆုံး အောင်မြင်သောအခါ ဘီအိုင်အေ အုပ်ချုပ်ရေးအဖွဲ့များ ရန်ကုန်မြို့နှင့် မြို့နယ်အသီးသီးတွင် ဖွဲ့စည်းသည်အထိ ရေးသားထားသဖြင့် တပ်မတော်သည် ဖွဲ့စည်းသည်မှအစ တိုင်းပြည်တာဝန်ကို စွန့်စွန့်စားစားထမ်းဆောင်ခဲ့ခြင်းကို ပေါ်လွင်စေသည်။ နယ်ချဲ့ဆန့်ကျင်ရေးအတွက်သာမက လူမှုတော်လှန်ရေးအတွက်ပါ ဦးဆောင်ကြိုးပမ်းသည့် အမျိုးသားအင်အားစုကြီးဖြစ်ခြင်းကို ထင်ရှားစေပါသည်။
နိဒါန်းအရ ၁၉၆၄ မှ ၁၉၇၂ အထိ (၈) နှစ်တိုင်တိုင် သုတေသနပြုစု၍ အပတ်တကုတ် ရေးသားထားသော ကျမ်းဖြစ်၍ မျက်မှောက်ခေတ် မြန်မာ့သမိုင်းလေ့လာသူများအတွက် များစွာအထောက်အကူပြုမည့် စစ်သမိုင်းကျမ်းဖြစ်ပါသည်။
– ၁၀၊ ၂၊ ၁၉၇၅

မှတ်ချက်။ (လူမှုတော်လှန်ရေးအတွက်ပါ ဦးဆောင်ကြိုးပမ်းသည့် အမျိုးသားအင်အားစုကြီး) ဆိုသည့် စစ်တပ်အပေါ် အကဲဖြတ်ချက်က မြန်မာ့နိုင်ငံရေးသမိုင်း ယခုအခြေအနေသို့ဆိုက်ရောက်အောင် ပို့ဆောင်ခဲ့သည်ဟု ဆိုနိုင်သည်။