လူထုဝမ်းမြောက်ရမည့်နှစ်သစ်ဖြစ်ရန် အစွမ်းကုန် အားထုတ်ကြရမည်

“လူထုဝမ်းမြောက်ရမည့်နှစ်သစ်ဖြစ်ရန် အစွမ်းကုန် အားထုတ်ကြရမည်”

■ အယ်ဒီတာ့စကား

၂၀၂၃ နှစ်သစ် ကူးပြောင်းလေပြီ။ မြန်မာလူထုအတွက်မူကား နှစ်သစ်ကူးခြင်း မကူးခြင်းထက် တော်လှန်ရေး မည်မျှ ရွေ့ခြင်း မရွေ့ခြင်းကသာ ပို၍ အခရာကျမည်ဟု The Call က မှတ်ယူသည်။

နှစ်သစ်ကူးနေ့တွင် တွေ့ရသည့် မိန့်ခွန်းများ၊ နှစ်သစ်ကူးသဝဏ်လွှာများအပြင် အမျိုးသားညီညွတ်ရေး အတိုင်ပင်ခံကောင်စီ (NUCC) နှင့် အမျိုးသားညီညွတ်ရေးအစိုးရ (NUG) တို့၏ ပူးတွဲ ထုတ်ပြန်ကြေညာချက်၊ ညီနောင်မဟာမိတ်သုံးဖွဲ့၏ ထုတ်ပြန်ကြေညာချက်တို့က တော်လှန်ရေး မည်မျှရွေ့နေသည်၊ ရှေ့ခရီး မည်သို့ရှိမည်ဆိုသည်ကို ထင်ဟပ်နေပေသည်။

NUG ယာယီသမ္မတကြီး ဒူဝါလရှီးလ၏ “အကြမ်းဖက်စစ်အုပ်စုဟာ ပြည်သူလူထုနဲ့ တော်လှန်ရေးအင်အားစုများ ခြေကုန်လက်ပန်းကျလာမယ့်အချိန်ကို စောင့်နေတာမို့ ကျနော်တို့အားလုံး တော်လှန်ရေးအရှိန်အဟုန်ကို မြှင့်တင်ပြီး ဆက်လက်ကြိုးစားလုပ်ဆောင်ရမှာဖြစ်ပါတယ်” ဆိုသည့် သတိပေး နှိုးဆော်စကား …

ဝန်ကြီးချုပ် မန်းဝင်းခိုင်သန်း၏ “… ၂၀၂၃ ခုနှစ်ဟာ အရေးပါတဲ့ အချိုးအကွေ့ကာလ ဖြစ်တာနဲ့အညီ ယခုထက်ပိုပြီး သန္နိဋ္ဌာန် ခိုင်ခိုင်မာမာနဲ့ စည်းရုံးစွာ တိုက်ပွဲဝင်ကြမယ်ဆိုရင် ကျနော်တို့အောင်ပွဲက မဝေးတော့ပြီဆိုတာ သေချာနေပါပြီ” ဆိုသည့် တိုက်တွန်း အာမခံစကား …

ကချင်လွတ်လပ်ရေးအဖွဲ့ချုပ် (KIO) ဥက္ကဋ္ဌ ဗိုလ်ချုပ်ကြီးအင်ဘန်လ၏ “အကြမ်းဖက်စစ်ကောင်စီဟာ တိုင်းရင်းသားတော်လှန်ရေးအဖွဲ့အစည်းတွေရဲ့ ရန်သူသာမဟုတ်ဘဲ ပြည်သူတရပ်လုံးရဲ့ ရန်သူဖြစ်တာကြောင့် ရန်သူကိုရန်သူလို ပြတ်ပြတ်သားသားသတ်မှတ်ပြီး ချေမှုန်းသွားမယ်” ဆိုသည့် ပြတ်သားသည့် တိုက်ပွဲခေါ်သံ …

ကရင်နီအမျိုးသားတိုးတက်ရေးပါတီ (KNPP) ဥက္ကဋ္ဌ ခူဦးရယ်၏ “… အားနည်းချက်များကို ဆင်ခြင် သုံးသပ် ပြုပြင် ထိန်းကျောင်းရင်း အားသာချက်များဖြင့် အတူတကွ ပေါင်းစပ်ရင်း ခွန်အားသစ်လောင်းလျက် မိမိတို့ လိုလားတောင့်တသည့် ဖက်ဒရယ်ဒီမိုကရေစီပြည်ထောင်စုကြီး ပီပြင်စွာ အမြန်ဆုံး ပုံဖော်နိုင်ရေးအတွက် ပန်းတိုင်အရောက် အတူတကွ ဆက်လက် လျှောက်လှမ်းကြပါစို့ဟု” ဆိုသည့် နှစ်သစ်အခါသမယ နှုတ်ခွန်းဆက်စကား …

ကာကွယ်ရေးဝန်ကြီး ဦးရည်မွန်၏ “တော်လှန်ရေးမှာ အကြမ်းဖက်စစ်ကောင်စီကို ချေမှူန်းအနိုင်ယူနိုင်တဲ့ လုံလောက်တဲ့အင်အားရှိပြီးဖြစ်လို့ ၂၀၂၃ ခုနှစ်ဟာ တော်လှန်ရေးအဆုံးအဖြတ် ရယူရမယ့်နှစ်ဖြစ်တယ်” ဆိုသည့် တပ်လှန့်စကား …

“စည်းလုံးညီညွတ်မှုအား၊ စုစည်းညီညွတ်စွာဖြင့် ဟန်ချက်ညီ လုပ်ဆောင်နိုင်မှသာ စစ်အာဏာရှင်စနစ်ကို အမြစ်ဖြုတ်နိုင်မည်ဖြစ်သောကြောင့် ယနေ့ကျရောက်သော နှစ်သစ်ကူးနေ့မှစ၍ ယခင်ထက် အင်တိုက်အားတိုက် ကြိုးပမ်းလုပ်ဆောင်သွားကြရန်” ဟူသည့် MNDAA ၊ PSLF/TNLA နှင့် ULA/AA ညီနောင်မဟာမိတ် ၃ ဖွဲ့၏ တိုက်တွန်းစကား …

“NUCC နှင့် NUG တွင်ပါဝင်သော တော်လှန်ရေးအင်အားစုများက စုပေါင်းခေါင်းဆောင်မှု၊ စုပေါင်းတာဝန်ယူမှု၊ ခိုင်မာသော ကတိကဝတ်ပြုမှုများဖြင့် တညီတညွတ်တည်း လက်တွဲ ပူးပေါင်း အကောင်အထည်ဖော် ဆောင်ရွက်ကြရန်” ဟူသည့် NUCC နှင့် NUG တို့၏ ပူးတွဲထုတ်ပြန်ချက်ပါ သန္နိဋ္ဌာန်စကား …

…. စသည် စသည်တို့ကား တော်လှန်ရေးအင်အားစုအသီးသီး၏ ရပ်တည်ချက်အသီးသီးကို လှစ်ပြနေရုံသာမက ဘုံပန်းတိုင်အတွက် ဘုံရန်သူကိုအမြစ်ဖြတ်၍ လူထုအတွက် အောင်ပန်းဆွတ်ခူးပေးရေးတွင် တသံထဲညီနေကြောင်း ပြသလိုက်ခြင်းလည်းဖြစ်သည်။

ဤစကားများနောက်တွင် လက်တွေ့ အကောင်အထည်ဖော်ဆောင်မှုများ လိုက်ပါပြီး ညီညွတ်ရေးဆိုင်ရာ၊ မဟာဗျူဟာဆိုင်ရာ၊ ကျနစွာ ပေါင်းစပ်လုပ်ဆောင်နိုင်မှုဆိုင်ရာ စသည်တို့အပေါ် မြန်မာလူထုကြီးတရပ်လုံး၏ စိုးရိမ် ပူပန် ကြောင့်ကျမှုများကို ဖယ်ရှားကာ တချီထဲ ရုန်းကြပါဟု The Call က အလေးအနက် တိုက်တွန်းလိုက်ရပေသည်။