သူမတူအကျဉ်းသား (အခန်း၁၂)

■ အခန်း (၁၂)
သံတိုင်နောက်ကွယ်ရောက် အစိုးရ
++++++++++++++++++++++

နေပြည်တော် အချုပ်ထောင်မှာ ကျနော်ဟာ မြန်မာနိုင်ငံက အထင်ရှားဆုံး နိုင်ငံရေး အကျဥ်းသားတွေနဲ့အတူ ထောင်ကျခဲ့ပါတယ်။ ပြောရရင် မြန်မာပြည် လူထုအစိုးရရဲ့ ခေါင်းဆောင်ပိုင်း အားလုံးနီးပါးဟာ နေပြည်တော်အချုပ်ထောင်ကို ရောက်ခဲ့ရတယ်။ အစိုးရအဖွဲ့ဝင်တချို့ကတော့ သူတို့ မဖမ်းဆီးခင်မှာ တိမ်းရှောင်နိုင်ခဲ့တယ်။ တချို့ကိုတော့ မဖမ်းဘူး။ အများစုကတော့ နေပြည်တော် အချုပ်ထောင်မှာပါ။
.
သူတို့တွေဟာ ဘယ်သူ၊ ဘယ်ရာထူး ဆိုတာ မှတ်တမ်းတင်ထားဖို့ တာဝန်ရှိတယ်လို့ ကျနော် ခံစားရတယ်။ သူတို့တွေက ဘယ်သူတွေလဲ။ ကျနော် နေပြည်တော် အကျဥ်းထောင်မှာ ရှိနေစဥ် အောက်ဖော်ပြပါပုဂ္ဂိုလ်များလည်း အတူဖမ်းဆီးခံခဲ့ရပါတယ်။
.
ဒေါ်အောင်ဆန်းစုကြည် – နိုင်ငံတော်၏ အတိုင်ပင်ခံပုဂ္ဂိုလ်၊ နိုင်ငံခြားရေးဝန်ကြီး
ဦးဝင်းထိန် – အမျိုးသားဒီမိုကရေစီ အဖွဲ့ချုပ် အလုပ်အမှုဆောင်အဖွဲ့ဝင်၊ ပါတီ၏အကြီးအကဲ
ဦးကျော်တင့်ဆွေ – နိုင်ငံတော်အတိုင်ပင်ခံရုံးဝန်ကြီး
ဦးစိုးဝင်း – စီမံကိန်း၊ ဘဏ္ဍာရေးနှင့် စက်မှု ဝန်ကြီး (၂၀၁၈မှ)
ဦးကျော်ဝင်း – စီမံကိန်းနှင့်ဘဏ္ဍာရေးဝန်ကြီး (၂၀၁၆-၂၀၁၈)
ဦးဝင်စတန် ဆက်အောင် – စီမံကိန်း၊ ဘဏ္ဍာရေးနှင့် စက်မှု ဒုတိယဝန်ကြီး
ဦးဘိုဘိုငယ် – မြန်မာနိုင်ငံတော်ဗဟိုဘဏ်ဒုတိယဥက္ကဋ္ဌ
ဦးသောင်းထွန်း – ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး
ဦးမင်းသူ – ပြည်ထောင်စုအစိုးရအဖွဲ့ရုံးဝန်ကြီး
ဦးဝင်းခိုင် – လျှပ်စစ်နှင့်စွမ်းအင်ဝန်ကြီး
ဦးအုန်းဝင်း – သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီး
ဦးမျိုးအောင် – နေပြည်တော်ကောင်စီ ဥက္ကဋ္ဌ၊ နေပြည်တော် မြို့တော်ဝန်
ဦးကျော်ဌေးဦး – ရုက္ခဗေဒပညာရှင်၊ ဒီမိုကရေစီရေး လှုပ်ရှားသူ၊ အမေရိကန်နိုင်ငံသား
.
ဘာလို့ သူတို့တတွေ ဒီလို အဖမ်းခံခဲ့ရသလဲ။ အဖြေကတော့ ရှင်းပါတယ်။ သူတို့အများစုက အာဏာ အသိမ်းခံလိုက်ရတဲ့ လူထုအစိုးရမှာ ထိပ်တန်းတာဝန်တွေ ယူထားကြလို့ပါ။ ဒီအချက်ကိုတော့ သူတို့ကို စွဲဆိုထားတဲ့ အမှုသွားအမှုလာကို ကြည့်ရင်ပဲ သိသာပါတယ်။ သူတို့အားလုံးရဲ့ နောက်ထပ် တူညီချက်တခုက သူတို့တွေဟာ နိုင်ငံတကာနဲ့ ဆက်ဆံရေး ကောင်းမွန်သူတွေဖြစ်ပြီး မြန်မာပြည် အပြင်ဘက်မှာလည်း လေးစားခံရသူတွေ ဖြစ်ပါတယ်။ ဒီအချက်ဟာလည်း အာဏာသိမ်း ဗိုလ်ချုပ်တွေအတွက် အမြင်မကြည်စရာ၊ မနာလိုစရာပါ။
.
.
.
ဦးဝင်းထိန်နဲ့ အတူနေခဲ့ရတဲ့ကာလမှာ ကျနော့်အတွက် မမေ့နိုင်တဲ့ ဆက်ဆံရေးတွေ ရှိခဲ့ပါတယ်။ သူက အစားအသောက်၊ အဝတ်အထည်နဲ့ စောင်အသစ်တွေ ကျနော့်ကို ရက်ရက်ရောရော ပေးခဲ့တယ်။ ဦးဝင်းထိန်က ရုပ်ရှင်ကားဟောင်းတွေနဲ့ ပတ်သက်လာရင် တကယ့်ကို စွယ်စုံကျမ်းကြီး တဆူပါ။ သူမသိတဲ့ ရုပ်ရှင်ကားဟောင်း မရှိသလောက်ပဲ။ ကျနော်တို့ နှစ်ယောက်ပေါင်းပြီး တခြားသူတွေကို နှိပ်စက်သလိုတောင် ဖြစ်တယ်။ နေ့တိုင်းနီးပါး သူနဲ့ ကျနော် ရုပ်ရှင်သီချင်းအဟောင်းတွေကို အသံကျယ်ကျယ်နဲ့ လေချွန်လိုက်၊ ညည်းလိုက် လုပ်နေတတ်တယ်။
.

ဦးဝင်းထိန်အနေနဲ့ ဒါဟာ ပထမဆုံးအကြိမ် နိုင်ငံရေးအကျဥ်းသား ဖြစ်ခဲ့တာတော့ မဟုတ်ပါဘူး။ သူဟာ စစ်အစိုးရအဆက်ဆက် လက်အောက်မှာ ထောင် အနှစ်၂၀ နီးပါး ကျခဲ့ပါတယ်။ ဒါပေမဲ့ သူ့သတ္တိ၊ အရည်အသွေးတွေကတော့ မှေးမှိန် မသွားခဲ့ပါဘူး။ တရားရုံးမှာ သူ့ကို တရားစွဲတဲ့ အစိုးရရှေ့နေတွေနဲ့ တရားသူကြီးတွေကို သတ္တိရှိကြဖို့၊ အမှန်တရားနဲ့ ဥပဒေအပေါ် သစ္စာရှိကြဖို့ တရားဟောခဲ့သေးတယ်။ ဒါပေမဲ့လည်း သူကို သတ္တိကြောင်စွာ၊ တရားမဲ့စွာနဲ့ ‘နိုင်ငံတော် အကြည်ညို ပျက်စေမှု’နဲ့ ထောင် အနှစ်၂၀ ချခဲ့ပါတယ်။ (ထောင်ဒဏ်သုံးနှစ်သာ ချနိုင်တဲ့ ဥပဒေကို ထောင်ဒဏ်အနှစ် ၂၀ လို့ ပြင်ပြီး ချတာပါ။)
.
.
ဦးဝင်းထိန် ကျနော်တို့နဲ့ အတူရှိစဥ်က ကျနော်တို့ကို အသင်းအဖွဲ့တွေ ဖွဲ့စေတယ်။ အဖွဲ့တဖွဲ့က ညနေပိုင်း အကျဥ်းခန်းတွေ ဖွင့်တဲ့အခါ လူစုပြီး ‘နေ့လယ်စာအပြီး ဆွေးနွေးပွဲ’ ခေါင်းစဥ်နဲ့ ဆွေးနွေးကြတယ်။ အရိပ်ရတဲ့ ရေနုတ်မြောင်းဘေး ဝိုင်းထိုင်ကြပြီး အာပေါင်အာရင်းသန်သန် ဆွေးနွေး၊ ငြင်းခုံ၊ ကန့်ကွက်တာတွေ လုပ်ကြတယ်။ အကြောင်းအရာ အစုံပါပဲ။ လေးနက်တဲ့အရာတွေ ပါသလို ပေါ့ပေါ့ပါးပါး ကိစ္စတွေလည်း ပါတယ်။ ဘာသာရေးကနေ ဘောလုံးပွဲအထိပေါ့။ ဘာမဆို ဆွေးနွေးလို့ရတယ်။
.
တခါတလေမှာ အဲဒီဆွေးနွေးပွဲတွေကနေ ပညာပေး အစီအစဥ်အထိ ဖြစ်သွားတတ်တယ်။ ကျနော်နဲ့ ဝင်စတန်က စီးပွားရေးပညာတွေကို ပြန်ပြီး ပို့ချပေးတယ်။ ကျနော်တို့က ‘သံဆူးကြိုးတက္ကသိုလ်’ (Barbed-Wire University) လို့ ခေါ်လိုက်တယ်။ အိမ်သူ ‘ဟာ’ ပို့လိုက်တဲ့ စာအုပ်တွေ၊ ဆောင်းပါးတွေကို အခြေခံပြီး စီးပွားရေးပညာရဲ့ နောက်ဆုံးပေါ် သီအိုရီတွေ၊ လက်တွေ့ဖြစ်ပေါ်နေမှုတွေကို ပြန်ပြောပြတယ်။ ခေတ်သစ် ငွေကြေးသီအိုရီတွေ၊ Bitcoin လို ဒစ်ဂျစ်တယ်ငွေကြေးတွေအကြောင်း၊ ဒီငွေကြေးတွေက မြန်မာပြည်ကို ဘယ်လို သက်ရောက်လာနိုင်မယ်၊ ကျနော်တို့ဆိုရင် ဘယ်လို လုပ်မယ် စသဖြင့်ပေါ့။ လူတိုင်း စိတ်ဝင်စားတဲ့ အကြောင်းအရာတွေ မဟုတ်ပေမဲ့ ကျနော်တို့ နှစ်ယောက်အတွက်တော့ ဒီလို သင်ကြားပြရတာဟာ စိတ်ပိုင်းဆိုင်ရာ၊ အသိပညာပိုင်းဆိုင်ရာ နှလုံးသား အာဟာရတွေပါ။ ကျနော်တို့ရဲ့ သံဆူးကြိုးတက္ကသိုလ်မှာ အကုန်သင်ပါတယ်။ ဒဿနိကဗေဒ၊ သမိုင်း၊ နိုင်ငံရေး၊ (ဦးမင်းသူပါရင်) လေယာဥ်မောင်းအတတ် စသဖြင့် အစုံပါတယ်။ ဘာသာရေးတောင် သင်ကြားဆွေးနွေးကြတယ်။ ကျနော်နဲ့ ဝင်စတန် အမြင်အရတော့ ဒီဘာသာရပ်တွေထဲမှာ စီးပွားရေးပညာကတော့ အမြဲတမ်း ထိပ်ဆုံးမှာ ရှိတယ်။
.
.
ကျနော်လည်း ဦးဝင်းထိန်၊ ကျော်ဌေးဦးနဲ့ တခြားသူတွေကို အတုယူပြီး တခါတလေမှာ လူတွေကို ပျော်အောင်လုပ်ဖို့ ကြိုးစားခဲ့တယ်။ တညနေမှာ ကျနော်တို့ ဆွေးနွေးကြရင်းနဲ့ ကျနော်က အခုထောင်ထဲက အဖြစ်အပျက်တွေ အားလုံးကို တနေ့မှာ စာအုပ်ရေးမယ် လို့ ပြောလိုက်တယ်။
.
“သမိုင်းက သက်သေတည်မှာပါ။ ကျနော် စာအုပ်ရေးပြီးရင် တနေ့ရုပ်ရှင်လည်း ဖြစ်ချင်ဖြစ်လာမှာ။ ဒီတော့ အခု တခါတည်း မေးထားမယ်။ ကိုယ့်နေရာမှာ ဘယ်မင်းသားကို သရုပ်ဆောင် စေချင်သလဲ ပြောကြပါ”လို့ ခပ်တည်တည်နဲ့ ပြောလိုက်တယ်။
.
ညင်ညင်သာသာနဲ့ ရယ်စရာပြောတတ်တဲ့ ဦးစိုးဝင်းက သူ့အသက် ၈၅ နှစ်နဲ့ လိုက်မယ့် ရောဘတ်ရက်ဒ်ဖို့ဒ် (Robert Redford) လို့ ဖြေတယ်။ ဝင်စတန်ကတော့ ဂျော့ဂျ်ကလူနီ(George Clooney)၊ ကျော်ဌေးဦး ကတော့ ဂျက်ကီချန်း လို့ အသီးသီး ဖြေကြတယ်။ ကျနော်ကတော့ ကျနော့်နေရာမှာ ဘရက်ပစ် (Brad Pitt) ကို သရုပ်ဆောင်စေချင်တယ် လို့ ဆိုလိုက်တယ်။ “ရုပ်ချင်းမဆင်ပေမဲ့ အသက်ကတော့ မတိမ်းမယိမ်းပါ။ ဟောလိဝုဒ်ကတော့ သဘောတူပါ့မလား မသိ။ သူ့အစား ဒန်နီဒဗီတို (Danny DeVito) ကို အစားထိုးချင် ထိုးမှာ”လို့ ဟာသဖောက်လိုက်တယ်။ ပျော်စရာ အချိန်လေးတခုပေါ့။
.
.
ကျနော်တို့ နိုင်ငံရေးအကျဥ်းသားတွေက စိတ်ဓာတ်ခိုင်မာကြတယ်၊ သတ္တိရှိကြတယ်။ ကိုယ့်ကို ဖမ်းထားတဲ့သူတွေကို စိန်ခေါ်ရဲကြတယ်။ ကျနော်တို့က ‘အကျဥ်းထောင်လက်စွဲ’ စာအုပ်ကို ပေးဖတ်ဖို့ အကြိမ်ကြိမ် တောင်းဆိုခဲ့ကြတယ်။ ဒီစာအုပ်က ကိုလိုနီခေတ်တုန်းက စာအုပ်ကို ပြန်မှီရေးထားတာ။ အဲဒီထဲမှာ အကျဥ်းသားတွေရဲ့ ရပိုင်ခွင့်၊ လုပ်ပိုင်ခွင့်တွေ ပါတယ်။ သူတို့ အပြစ်ကို သူတို့သိတဲ့ ထောင်အာဏာပိုင်တွေက ကျနော်တို့တောင်းတဲ့ စာအုပ်ကို မပေးခဲ့ပါဘူး။ အရေးဆိုမှု ရှုံးခဲ့ပေမဲ့ စိတ်ဓာတ်ရေးရာအရတော့ ကျနော်တို့ နိုင်ပါတယ်။ “မြန်မာပြည် ထောင်တွေ ထဲမှာ လူမှန် နေရာမှန် မရှိဘူး”ဆိုတဲ့ စကားက ကျနော် အကြိုက်ဆုံး စကားတခုပါပဲ။ ကိုယ်တိုင် မျက်မြင်သက်သေအဖြစ် မြင်ခဲ့ရတော့ ဒီစကားကို ကိုယ့်ဘာသာ အကြိမ်ကြိမ် ပြန်ပြောနေမိတယ်။
.
.
၂၀၂၂ ဇူလိုင်မှာ ဒေါ်စုဟာ ကျနော်တို့ရှိရာ နေပြည်တော် အကျဥ်းထောင်ကို ရောက်လာပါတယ်။ သူ့ကို ဒီမှာ ရှိတဲ့ နိုင်ငံရေးအကျဥ်းသားတိုင်းရဲ့‘အမှုတွဲ’အဖြစ် သတ်မှတ်ထားတာကိုး။ သူ့ကို ဒီကိုခေါ်လာခြင်းဟာ ကျနော်တို့ရဲ့ အမှုတွေကို ဒီထက်မြန်မြန် စစ်သွားတော့မယ် ဆိုတဲ့ သဘောပါ။
.
ဒီမတိုင်ခင်က ဒေါ်စုကို နေပြည်တော်အပြင်က စစ်တပ်ဝင်းတခုထဲမှာ ချုပ်ထားခဲ့တယ်။ နေပြည်တော်ထောင်မှာတော့ ကျနော်တို့ ဝင်းနဲ့ မီတာ ၁၀၀ အကွာမှာရှိတဲ့ တဲတလုံးမှာ ထားတယ်။ ‘တဲ’ ဆိုတာထက် ‘လူစီးသင်္ဘောတွေပေါ်က အခန်းငယ်’ ပုံစံဆိုရင် ပိုမှန်မယ်။ သူ့နေရာကို တခြားအကျဥ်းထောင်နေရာတွေနဲ့ ခွဲပြီး တံတိုင်းခတ်ထားတယ်။ အဆောက်အအုံငယ် တခုထဲမှာ နေစရာဆိုလို့ ဧည့်ခန်းနဲ့ ရေချိုးခန်းအိမ်သာပဲ ပါတယ်။ အတော်ကြီးတဲ့ ပြတင်းပေါက်တွေ တပ်ထားပြီး လိုက်ကာတော့ တပ်မပေးဘူး။ တီဗွီ အစရှိတဲ့ ဖျော်ဖြေရေးပစ္စည်းတွေ မရှိဘူး။ ဒေါ်စုအခန်းကို အဲကွန်းတပ်ပေးမယ်လို့ ထောင်မှူးက ကမ်းလှမ်းပေမယ့် တခြား အကျဥ်းခန်းတွေမှာ တပ်ထားမှ သူလည်း တပ်မယ် ဆိုတာနဲ့ သူလည်း ကျနော်တို့လို နေလိုက်ရတယ်။
.
.
သူ့ကို ကျနော်တို့ မမြင်ရအောင် ထောင်အာဏာပိုင်တွေက အတတ်နိုင်ဆုံး ကြိုးစားပါတယ်။ သူ တရားရုံးကြားနာချိန်တွေ ဆိုရင် နေပြည်တော် အချုပ်ထောင်တခုလုံး အပြင်ပေးမထွက်ပါဘူး။ အခန်းထဲမှာ ပိတ်ထားခံရတယ်။ အပြင်က မမြင်ရအောင် မှန်စတစ်ကာ ကပ်ထားတဲ့ ကားနက်ကြီးနဲ့ သူ့တဲကနေ တရားရုံးအထိ ခေါ်သွားလေ့ရှိတယ်။ အဲဒါမျိုးက တပတ်ကို လေးရက် အလုပ်ခံရတယ်။
.
ထောင်အာဏာပိုင်တွေက ဘယ်လိုပဲ ဖုံးဖိထားပါစေ။ နိုင်ငံရေးအကျဥ်းသားတွေ၊ အထူးသဖြင့် လူငယ်တွေက နောက်ဆုံးမှာ ဒေါ်စု ဒီရောက်နေတယ် ဆိုတာကို သိသွားတယ်။ တညမှာ ပင်မထောင်ဘက်ကနေ အမျိုးသားဒီမိုကရေစီအဖွဲ့ချုပ်ရဲ့ သီချင်းဟောင်းတပုဒ်ကို ကျယ်ကျယ်လောင်လောင် ဝိုင်းဆိုပါတော့တယ်။ သူတို့တွေအားလုံး အရိုက်အနှက် ခံလိုက်ရတယ်။ နောက်တကြိမ်မှာတော့ အကျဥ်းသားတစုက အသစ်ဆောက်ထားတဲ့ တရားရုံးရှေ့ကို ဖြတ်အသွားမှာ “အမေစု ကျန်းမာပါစေ”လို့ ရင်ခေါင်းသံတွေနဲ့ ဝိုင်းအော်ကြတယ်။ သူတို့တွေလည်း ပြင်းပြင်းထန်ထန် အရိုက်ခံရပြီး နိုင်ငံတော်ပုန်ကန်မှုနဲ့ အမှု ထပ်တိုးတယ်။ နောက်မှ အဲဒီအမှုကို ပြန်ရုပ်သိမ်းသွားတယ်။
.
.
လူငယ်နိုင်ငံရေးသမားတွေဟာ သူတို့ခွန်အား ရှိသမျှသုံးပြီး ထောင်တွင်းသပိတ်တွေ လုပ်ခဲ့ကြပါတယ်။ အဲဒီအထဲက တခုကတော့ ‘အသံတိတ်သပိတ်’ ပါ။ ဒါက ရိုးရှင်းပေမဲ့ အကြံကောင်းတယ် လို့ ပြောရမယ်။ အကျဥ်းသားတွေ တရက်လုံး စကားမပြောဘဲ တိတ်တိတ်နေကြတယ်။ ပတ်ဝန်းကျင်မှာ ဘာပဲ ဖြစ်နေပါစေ၊ ဘယ်သူ အမိန့် လာပေးပါစေ၊ ဘယ်မေးခွန်း လာမေးမေး စကားမပြောကြဘူး။ အင်အားကြီးပြီး ထိရောက်လှတဲ့ ခံစစ်တခုပါ။ ၂၀၂၁ ဒီဇင်ဘာမှာ လုပ်ခဲ့ကြတုန်းက ထောင်စောင့်တွေ အတော် ဒေါသထွက်ခဲ့ကြတယ်။ နောက်ပိုင်းမှာလည်း အကြိမ်ကြိမ် လုပ်ခဲ့ကြပါတယ်။
.
.
______________________________
ဘာသာပြန် – ​အောင်မိုး ( A K Moe )