သူမတူအကျဉ်းသား (အခန်း၁၅)

■ အခန်း (၁၅)
မတရားစီရင်သောနေ့
++++++++++++++

အမှုဟာ ရပ်လိုက်စစ်လိုက်နဲ့ နောက်ဆုံးမှာတော့ ပြီးဆုံးဖို့ ဖြစ်လာပါတယ်။ ၂၀၂၂ ခုနှစ် သြဂုတ်လကုန် စက်တင်ဘာလထဲ အရောက်မှာတော့ အမှုပြီးဖို့ ရက်သတ္တပတ် အနည်းငယ်သာ လိုတော့တယ် ဆိုတာ သေချာလာပါတော့တယ်။
.
အမှုစစ်ဆေးနေတဲ့ ကာလတလျှောက်လုံးမှာ ကျနော့်အမှုအတွက် ကိုယ်တိုင် ခုခံလျှောက်လဲခွင့် မပေးခဲ့ပါဘူး။ နောက်ဆုံးအပတ်ရောက်တဲ့ အချိန်မှာတော့ အဲဒီလို လျှောက်လဲချက် တင်ခွင့်ပေးပါတယ်။ လျှောက်လဲချိန် သုံးမိနစ်ကြီးများတောင် ရမယ်တဲ့။
.
၁၃ လမှာ သုံးမိနစ်၊ စက္ကန့်ပေါင်း ၁၈၀။ အဲဒီအချိန်လေး အတွင်းမှာ ကိုယ်ပြောချင်တာ၊ ငြင်းချင်တာကို ရအောင် ပြောရငြင်းရမှာ။ တစက္ကန့်တောင် မဖြုန်းချင်လို့ ကျနော်ဟာ ကိုယ်ပြောချင်တာတွေ ချရေးပြီး အလွတ် ကျက်ထားလိုက်တယ်။
.
တရားခွင်မှာတော့ တရားသူကြီးက ကျနော့်ကို မတ်တတ်ရပ်ခိုင်းပြီး ကျမ်းကျိန်စေတယ်။ ကျမ်းကျိန်လို့သာ ဆိုပါတယ်၊ ဘာမှတော့ မပေးဘူး။ သမ္မာကျမ်းစာလည်း မပေးဘူး၊ သူများတွေလို ဗုဒ္ဓကျမ်းစာထုပ်လည်း မပေးဘူး။ သူတို့က ကျနော့်ကို ကျမ်းစာကိုင်ပြီး မကျိန်လည်း အမှန်တွေပြောမယ်လို့ ယုံလို့လား။ ဒါမှမဟုတ် “ဒီ နိုင်ငံခြားသား မိစ္ဆာကောင်၊ နိုင်ငံတော်ရဲ့ ရန်သူ၊ သူ ဘာပဲပြောပြော အလိမ်တွေပဲ၊ မထူးပါဘူး” လို့ ထင်လို့လား။
.
ဒါပေမဲ့ ကျနော့်မှာ ‘အပြစ်မရှိဘူး’ ဆိုတာ ပြောမှတော့ ဖြစ်မယ်။
ကျနော့်ကို ဝက်ခြံကနေ ထွက်ပြီး တရားခွင်အလယ်မှာ ရပ်ခိုင်းတယ်။
“ရှောင်တာနယ်၊ ခင်ဗျားမှာ ပြောစရာရှိလား”
“ရှိပါတယ်။”
“ဒါဆိုရင် ပြောပါ”
.
အဲဒီတော့ ကျနော်လည်း စပြောပါတော့တယ်။
“ကျနော်ဟာ မြန်မာနိုင်ငံသား မဟုတ်သလို မြန်မာနိုင်ငံတော်အစိုးရရဲ့ တရားဝင်ခန့်အပ်ထားတဲ့ ဝန်ထမ်းလည်း မဟုတ်ပါဘူး။ ဒါကြောင့်မို့လို့ လျှို့ဝှက်ချက် အက်ဥပဒေဟာ ကျနော်အပေါ် သက်ရောက်မှု မရှိပါဘူး။ တကယ်လို့ သက်ရောက်ခဲ့ရင်တောင် ကျနော်ဟာ မြန်မာနိုင်ငံရဲ့ ဥပဒေကို ဘယ်တော့မှ ချိုးဖောက်မှာ မဟုတ်ပါဘူး။ ကျနော် မြန်မာနိုင်ငံကို လာခဲ့တာဟာ မြန်မာပြည် ပြုပြင်ပြောင်းလဲရေးအတွက် ကူညီဖို့ပါ။ ကျနော် လုပ်ခဲ့သမျှဟာ မြန်မာလူထု အကျိုးစီးပွားအတွက်ချည်းပါ။ ကျနော့်ဘဝရဲ့ ပညာရှင်သက်တမ်းတလျှောက်လုံးကို မြန်မာနိုင်ငံအတွက် ရင်းနှီးမြှုပ်နှံခဲ့ပါတယ်။ တလျှောက်လုံးလည်း တိုးပြီး ချစ်လာခဲ့ရတဲ့ နိုင်ငံပါ။ ဒီနိုင်ငံအတွက် အလုပ်လုပ်လာတာ အနှစ် ၃၀ ရှိ….”
.
အဲဒီလောက်ပဲ ပြောခွင့်ရလိုက်ပါတယ်။ သုံးမိနစ်တောင် မပြည့်လိုက်ပါဘူး။ တရားသူကြီး ဦးဝင်းတင့်က စိတ်ရှုပ်သလို၊ စိတ်မဝင်စားသလိုနဲ့ ကျနော့်စကားကို ဖြတ်ချလိုက်ပါတယ်။
.
“ဟုတ်ပါပြီ၊ ဟုတ်ပါပြီ။ ထိုင်ပါ။”လို့ ဗမာလို ပြောပါတယ်။
.
.
.
ဒါပေမဲ့ ကိစ္စတော့ မရှိပါဘူး။ ကျနော့်ရှေ့နေတွေက အဆုံးသတ်လျှောက်လဲချက်ကို အနှစ်ချုပ်ပြီး တရားရုံးကို စာနဲ့ တင်ခွင့်ရလိုက်တယ်။ ဒီလျှောက်လဲချက်မှာ မြန်မာနိုင်ငံ လျှို့ဝှက်ချက် အက်ဥပဒေအရ ကျနော့်မှာ ဘာကြောင့်အပြစ်မရှိရသလဲ ဆိုတာကို အချက်အလက်တွေနဲ့ ချေပထားပါတယ်။ ကျနော်က တရားခွင်ထဲကို ဘာစာရွက်စာတမ်းမှ ယူသွားခွင့်မရှိတော့ အဲဒီ အဆုံးသတ် လျှောက်လဲချက်ကိုလည်း အလွတ်ကျက်ထားခဲ့တယ်။
.
အဲဒီ လျှောက်လဲချက် အနှစ်ချုပ်မှာ

၁။ ။ ပါမောက္ခ တာနယ်သည် ‘မြန်မာနိုင်ငံသား တဦး’ မဟုတ်သကဲ့သို့ ‘အစိုးရ ခန့်အပ်ထားသော ဝန်ထမ်း’ လည်း မဟုတ်ပါ။ ထို့ကြောင့် လျှို့ဝှက်ချက် အက်ဥပဒေသည် သူ့အပေါ်တွင် မသက်ရောက်ပါ။

၂။ ။ ပါမောက္ခ တာနယ် အနေဖြင့် ‘လက်ခံရရှိသည်၊ ဆက်သွယ်ပေးပို့သည်’ ဆိုသော စာရွက်စာတမ်းများသည် မြန်မာနိုင်ငံအကျိုးစီးပွားကို ထိခိုက်စေနိုင်သည် ဆိုသော အချက်ကို တရားလိုဘက်မှ အခိုင်အမာ တင်ပြနိုင်ခဲ့ခြင်း မရှိပါ။

၃။ ။ ပါမောက္ခ တာနယ်၏ အီလက်ထရောနစ်ပစ္စည်းများမှ တွေ့ရှိရသော စာရွက်စာတမ်းများသည် မြန်မာနိုင်ငံ တည်ဆဲဥပဒေအရ အမှန်တကယ် ‘လျှို့ဝှက်ချက်’ သို့မဟုတ် ‘လျှို့ဝှက်ချက် အဖြစ် ကာကွယ်ထားရမည့်’ စာရွက်စာတမ်း ဖြစ်သည်ဟု တရားလိုဘက်မှ အခိုင်အမာ တင်ပြနိုင်ခဲ့ခြင်း မရှိပါ။

၄။ ။ ပါမောက္ခ တာနယ်၏ အီလက်ထရောနစ်ပစ္စည်းများမှ တွေ့ရှိသော စာရွက်စာတမ်းများသည် မြန်မာနိုင်ငံ၏ ရန်သူအား တိုက်ရိုက်ဖြစ်စေ၊ သွယ်ဝိုက်၍ဖြစ်စေ ‘အသုံးဝင်စေမည်ဟု တွက်ချင့်ထားသော သို့မဟုတ် အသုံးဝင်တန်ရာသော’ စာရွက်စာတမ်းများ ဖြစ်သည်ဟု တရားလိုဘက်မှ အခိုင်အမာ တင်ပြနိုင်ခဲ့ခြင်း မရှိပါ။ ထို့အပြင် မြန်မာနိုင်ငံတွင် ‘ရန်သူ’ လည်း မရှိပါ။ (နောက်ဆုံးအချက်ကတော့ အာဏာသိမ်းခေါင်းဆောင် မင်းအောင်လှိုင်ရဲ့ အင်တာဗျူးကို ပြန်ထောက်ထားတာပါ။ သူက မြန်မာပြည်မှာ ရန်သူမရှိဘူးလို့ အင်တာဗျူးထဲမှာ ဖြေခဲ့ပါတယ်။ ဒီတချက်တည်းနဲ့ အမှုက ပွဲသိမ်းနိုင်ပါတယ်။)

၅။ ။ ပါမောက္ခ တာနယ်၏ အီလက်ထရောနစ်ပစ္စည်းများတွင် တွေ့ရှိရသော စာရွက်စာတမ်းများသည် တရားဝင် ခွင့်ပြုချက် အရ လက်ခံရရှိထားသော သို့မဟုတ် ဆက်သွယ်ပေးပို့ခဲ့သော စာရွက်စာတမ်းများ ဖြစ်သည်။ တရားလိုဘက်မှ လျှို့ဝှက်ချက် အက်ဥပဒေ ပုဒ်မ ၃ (၂)တွင် ရှင်းလင်းစွာ ဖော်ပြထားသော “တရားဥပဒေနှင့်အညီ အပ်နှင်းထားသည့် အခွင့်အာဏာအရ ဆောင်ရွက်သူက စာရွက်စာတမ်းများကို တရားဝင် ဆက်သွယ်ပေးပို့ခြင်းသည် နိုင်ငံတော်၏လုံခြုံရေး သို့မဟုတ် အကျိုးစီးပွားကို ထိခိုက်စေသည်ဟု မသတ်မှတ်သင့်” ဆိုသည့် အချက်ကို လျစ်လျူရှုထားခဲ့သည်။

သို့ဖြစ်ပါ၍ ပါမောက္ခ တာနယ်သည် လျှို့ဝှက်ချက် အက်ဥပဒေတွင် အကျုံးဝင်သူ မဟုတ်ပါ။ ထိုဥပဒေကိုလည်း ဖောက်ဖျက်ခဲ့သူ မဟုတ်ပါ။ အထက်ပါ အချက်အလက်များကြောင့် ပါမောက္ခ တာနယ်ကို ထိုဥပဒေ ချိုးဖောက်သည်ဟု မသတ်မှတ်သင့်ဘဲ ၎င်း၏နေရပ် သြစတြေးလျနိုင်ငံသို့ အမြန်ဆုံး ပြန်ခွင့်ပြုသင့်ပါသည်။
.
လူဝင်မှုကြီးကြပ်ရေး အမှုနဲ့ ပတ်သက်ပြီးတော့လည်း အခုလို ရိုးရိုးရှင်းရှင်း လျှောက်လဲခဲ့ပါတယ်။
.
.
ကျနော်တို့တင်ပြခဲ့တာတွေ အားလုံး ကောင်းမွန် ပြည့်စုံလှပါတယ်။ တရားဥပဒေ စိုးမိုးပြီး မျှတမှုရှိတဲ့ ဘယ်ကမ္ဘာ့နိုင်ငံက ခုံရုံးမှာမဆို ဒီလိုသာ တင်ပြနိုင်ခဲ့ရင် “ဤအမှုမှ တရားသေ လွှတ်စေ” လို့ ဆုံးဖြတ်မှာပါ။ ဒါပေမဲ့ မြန်မာနိုင်ငံက အဲဒီလို နိုင်ငံထဲမှာ မပါဘူး။ တရားသူကြီး အမိန့်ချဖို့ ကျနော်တို့ကို နောက်တကြိမ် ရုံးချိန်း ထပ်ပေးပါတယ်။ အမိန့်ချတာကို ကြားနာဖို့ နှစ်ပတ်စောင့် ရတယ်။ ဘာလို့လဲဆိုတာတော့ မသိရဘူး။ အမိန့်ချဖို့ ပေးလိုက်တဲ့ စာအိတ်နောက်က အာဏာသိမ်း စစ်ကောင်စီ ဗိုလ်ချုပ်တွေရဲ့ လက်ရေးဆိုးဆိုးကို ဖတ်နိုင်ဖို့ အချိန် ဘယ်လောက်ယူရမလဲ။
.
ကျနော် နေပြည်တော်ထောင်ကို အလွန်မုန်းပါတယ်။ ကျနော့်အကျဥ်းခန်းကိုလည်း မုန်းတယ်။ ဒါတောင် စိတ်ထဲမှာ လွမ်းချင်သလိုလို ဖြစ်လာတယ်။ အဲဒီလို ပြောရတာ ကဗျာဆန်ပါတယ်။ ဒါပေမဲ့ ကျနော် အဲဒီထောင်ကို နည်းနည်းလေးမှ မလွမ်းခဲ့ပါဘူး။ ကျနော် နေပြည်တော်ထောင်ကနေ အမြန်ဆုံး ထွက်ချင်ခဲ့ပါတယ်။
.
အထုပ်တွေ ပြင်ခိုင်းတော့ ပြင်ထားလိုက်တယ်။ နောက်နေ့ မနက် (၂၀၂၂ ခုနှစ် စက်တင်ဘာလ ၂၉ ရက် ကြာသာပတေးနေ့)မှာ ရှင်းပြောင်နေတဲ့ အကျဥ်းခန်းထဲကနေ တရားရုံးကို သွားဖို့ လာခေါ်တာကို စောင့်နေလိုက်ပါတယ်။ အဲဒီအချိန်မှာ ကျနော်တို့ ခံစားရတဲ့ ခံစားချက်မျိုးကို လူတိုင်း အနည်းနဲ့အများတော့ ခံစားဖူးကြမှာပါ။ ကျနော်လည်း ဒီလို အဖြစ်မျိုးကို တခါမှ မကြုံဖူးပါဘူး။ စာမေးပွဲ အခန်းထိပ်မှာ စောင့်နေရတဲ့ ကျောင်းသားတွေ ရဲ့ ခံစားမှုမျိုးနဲ့ တူတယ်။ ရင်တုန်တယ်၊ ပေါက်ကရ ပြောကြတယ်၊ ဘာဖြစ်လာမယ်ဆိုတာကို စိတ်မသက်မသာနဲ့ ဟောကိန်းတွေ ထုတ်ကြတယ်ပေါ့။
.
နောက်ဆုံးတော့ တရားသူကြီးက စီရင်ချက် ချလိုက်ပါတယ်။

ကျနော့်ကိုအရင် မတ်တပ်ရပ်ခိုင်းတယ်။ ပြီးတော့ ဒေါ်စုနဲ့ တခြားအမှုတွဲတွေကိုလည်း မတ်တပ်ရပ်ခိုင်းပါတယ်။

တရားသူကြီး ဦးဝင်းတင့်က စကားစပြောပါတယ်။ ပြောလိုက်တာများဗျာ။ ကရားရေလွှတ် တတွတ်တွတ်ဆိုသလို အရှိန်အဟုန်နဲ့ကို ပြောချလိုက်တာပါ။ နှစ်မိနစ်လောက် ကြာတော့ ပြီးသွားတယ်။ ကျနော်တို့ကို ခေါင်းညိတ်ပြ ပြီးတော့ ထထွက်သွားပါတယ်။
.
“ဒါပဲလား”လို့ တွေးပြီး ဘေးက ဝင်စတန်ကို “ဘာဖြစ်သွားလဲ”လို့ မေးလိုက်မိတယ်။ အမြဲတမ်း ယုံကြည်ရတဲ့ ဝင်စတန်က ကျနော့်ကို စီရင်ချက်အကြောင်း ပြောပြတယ်။ ကျနော်တို့အားလုံး ပြစ်မှုထင်ရှားတဲ့အတွက် အမြင့်ဆုံး အပြစ်ဒဏ် ပေးလိုက်တယ်။ အလုပ်ကြမ်းနဲ့ ထောင်ဒဏ် သုံးနှစ်စီတဲ့။
.
နောက်တော့ စီရင်ချက် ရေးထားတဲ့စာကို ကျနော် ဖတ်ရတယ်။ ဘာလို့ ပြစ်မှုထင်ရှားတယ် ဆိုတဲ့ အကြောင်းအရင်းလည်း ပါတယ်။ ကျနော့်ရဲ့ အဓိကချေပချက်က “ကျနော်ဟာ နိုင်ငံခြားသား ဖြစ်လို့ လျှို့ဝှက်ချက် အက်ဥပဒေနဲ့ အကျုံးမဝင်ဘူး” ဆိုတာပါ။ ဒီ ချေပချက်အပေါ် သူ့ရဲ့ ဆုံးဖြတ်ချက်က

“တရားဥပဒေ တည်ဆောက်ရာတွင် ဥပဒေစာအုပ်ပါ ရေးသားထားချက်များကိုသာ ကြည့်ပြီး ဆုံးဖြတ်ရန်မသင့်ပါ။ တရားဥပဒေ၏ အနှစ်သာရကို ကြည့်ပြီး ဆုံးဖြတ်ရမည် ဖြစ်သည်။ ထို့ကြောင့် မစ္စတာ ရှောင်ရေမွန်တာနယ် (Sean Ramon Turnell) ၏ တင်ပြချက်ကို လက်မခံနိုင်ပါ။”
.
‘တရားဥပဒေ၏ အနှစ်သာရ’ လို့ ရေးရဲတာကိုက အတော့်ကို မျက်နှာပြောင်လှပါတယ်။ အထူးသဖြင့် မတရား အာဏာသိမ်းထားတဲ့ စစ်အုပ်စုရဲ့ တရားသူကြီးတယောက် အနေနဲ့ပေါ့။
.
အဲဒီလို ကျနော့်ရဲ့ ချေပချက်ကို ငြင်းဆိုပြီးတဲ့နောက် တရားလိုဘက်က တင်သွင်းတဲ့ အချက်အလက်တွေကိုတော့ လက်ခံလိုက်တယ်။ ကျနော့်အမှုတွဲတွေကလည်း ကျနော့်ကို သူလျှိုလုပ်မှုမှာ ကူညီခဲ့တယ်ပေါ့။ သူရဲ့ အမှုစီရင်ချက် အပြည့်အစုံက ဒီလိုပါ။
.
“တရားခံ မစ္စတာ ရှောင် ရေမွန် တာနယ် (အဖ မစ္စတာ ရေမွန် ပီတာ တာနယ်၏ သား) သည် မြန်မာနိုင်ငံတော် လျှို့ဝှက်ချက် အက်ဥပဒေ ပုဒ်မ ၃(၁)(ဂ) အရ ပြစ်မှုထင်ရှားကြောင်း တွေ့ရှိရသဖြင့် အလုပ်ကြမ်းနှင့် ထောင်ဒဏ် သုံးနှစ် ကျခံစေ။”
.
“တရားခံ ဒေါ်အောင်ဆန်းစုကြည် (အဖ ဦးအောင်ဆန်း၏ သမီး)၊ ဦးကျော်ဝင်း (အဖ ဦးပြာကြီး၏ သား)၊ ဦးစိုးဝင်း (အဖ ဦးတင်မောင်၏ သား)၊ ဦးဆက်အောင် (အဖ ဦးဆက်မောင်၏ သား) တို့သည် မြန်မာနိုင်ငံတော် လျှို့ဝှက်ချက် အက်ဥပဒေ ပုဒ်မ၃(၁)(င)/၉ အရ ပြစ်မှုထင်ရှားကြောင်း တွေ့ရှိရသဖြင့် အလုပ်ကြမ်းနှင့် ထောင်ဒဏ် သုံးနှစ်စီ ကျခံစေ။”
.
ကျနော်တို့ရဲ့ ထောင်ဒဏ်တွေထဲက ကျခံပြီးဖြစ်တဲ့ အချုပ်ရက်တွေကို လျှော့ရက်အဖြစ် သတ်မှတ်ပေးတယ်။ ဒေါ်စုကိုတော့ သူ့ကို ချပြီးသား မယုံကြည်နိုင်ဖွယ် ထောင်ဒဏ် အနှစ် ၂၀အပေါ် သုံးနှစ်ထပ်တိုးတယ်။ သူ့ကိုတော့ လျှော့ရက် မပေးပါဘူး။ (သူ့ရဲ့ ထောင်ဒဏ် စုစုပေါင်းဟာ နောက်ဆုံးမှာ ၃၃ နှစ်အထိ ဖြစ်လာပါလိမ့်မယ်။)

လူဝင်မှုကြီးကြပ်ရေး အမှုအတွက်လည်း ကျနော့်ကို အလုပ်ကြမ်းနဲ့ ထောင်ဒဏ် သုံးနှစ် ချခံရပါတယ်။ အဲဒီအတွက်တော့ လျှော့ရက် ထပ်မရပါဘူး။ ဒါပေမဲ့ အမှုနှစ်ခုပေါင်းအတွက် ထောင်ဒဏ်တွေကို တပြိုင်နက်တည်း ကျခံရမယ် တဲ့။
.
ကျနော့် အီလက်ထရောနစ်ပစ္စည်းတွေကို နိုင်ငံတော်က တရားဝင် သိမ်းယူလိုက်တယ်လို့ ဆိုပါတယ်။ ကျနော်ရဲ့ ‘တော်ဝင်ရေတပ်’ စာအုပ် (အဲဒါကလည်း သက်သေပါတဲ့) အပါအဝင် တခြား ပိုင်ဆိုင်မှုပစ္စည်းတွေကိုတော့ ‘ဖျက်ဆီးစေ” လို့ အမိန့်ချလိုက်ပါတယ် ခင်ဗျား။
_________________________________
ဘာသာပြန် – ​အောင်မိုး ( A K Moe )