သူမတူအကျဉ်းသား အခန်း(၃)

“… အခြေခံအကျဆုံးအချက်ကို ပြောရရင် ဒီမိုကရေစီကြောင့် ရလာတဲ့ စီးပွားရေး အကျိုးကျေးဇူး​တွေကို အသိအမှတ်ပြုဖို့ပါပဲ။ မြန်မာပြည်မှာ ဒီမိုကရေစီ ဘာလို့ ရှိသင့်သလဲဆိုတာ အထူးတလည် ပြောဖို့ မလိုပါဘူး။ သမိုင်း တလျှောက်လုံးမှာ ဒီမိုကရေစီကာလကသာ မြန်မာနိုင်ငံရဲ့ စီးပွားရေး အဖွံ့ဖြိုးဆုံး၊ မောင်းနှင်အား အကောင်းဆုံးကာလ ဆိုတာ ဘယ်သူမှ မငြင်းနိုင်ပါဘူး။

လူတဦးချင်းရဲ့ အခွင့်အရေး၊ လွတ်လပ်ခွင့်၊ ဒီမိုကရေစီတို့ အခြေခံထားတဲ့ စနစ်။ ဒီစနစ်က ရလာတဲ့ အသီးအပွင့်တွေကြောင့် လူတိုင်းမှာ ရွေးချယ်ခွင့်နဲ့ အခွင့်အရေးတွေ တိုးပွားလာစေတယ်။ အစိုးရ ဝန်ဆောင်ပေးမှုတွေကို လိုအပ်ချက်နဲ့အညီ တိုးမြင့်လာစေတယ်။ ခေတ်မီ နည်းပညာတွေကို ဦးစားပေးလာစေတယ်။ ပြဿနာ အမြောက်အမြားအတွက် အဖြေပေါင်းများစွာကို ရလာစေတယ်။ အတိုပြောရရင် ဒီမိုကရေစီ၊ ရပိုင်ခွင့်များ အလေးထားမှု၊ တရားမျှတတဲ့ ဥပဒေ စည်းမျဥ်းတွေကသာ မြန်မာပြည်ကို ဆင်းရဲတွင်းကနေ ဖြတ်ကျော်မောင်းနှံပေးနိုင်မဲ့ ယာဥ်တွေ။ မြန်မာပြည်သူပြည်သား အားလုံးနဲ့ ထိုက်တန်တဲ့ ငြိမ်းချမ်း၊ တိုးတက်ပြီး ညီမျှတဲ့ နိုင်ငံတခုကို ရောက်အောင်ပို့ပေးမဲ့ ယာဥ်တွေပါပဲ။…”
.
[ မြန်မာ့စီးပွားရေး ခိုင်မာရေး နှင့် ပြုပြင်ပြောင်းလဲရေး စီမံချက် (MERRP) တွင် ရှောင်တာနယ် ၏ ပါဝင်ရေးသားမှုမှ ကောက်နုတ်ချက် ]
.
.
■ အခန်း(၃)
ဘာလို့ဒီလိုဖြစ်လာခဲ့သလဲ။
++++++++++
… လူထုအစိုးရရဲ့ စီးပွားရေး ပြုပြင်ပြောင်းလဲမှုများကို အဘက်ဘက်ကနေ ဝိုင်းတားဆီးကြတာလည်း ကြုံရတယ်။ အထူးသဖြင့် စီးပွားရေး ဆိုင်ရာ ပွင့်လင်းမြင်သာလာမှာ၊ ပြိုင်ဆိုင်ခွင့်တွေ ပွင့်သွားမှာကို ကြောက်ကြတဲ့ အုပ်စုတွေကပါ။ မြန်မာပြည်မှာ “ခရိုနီ” လို့ခေါ်တဲ့ အထူးအခွင့်အရေးရ လုပ်ငန်းရှင်ကြီးတွေ ရှိတယ်။ ဒါပေမဲ့ သူတို့ထက် ပြုပြင်ပြောင်းလဲမှုကို ပိုကြောက်ပြီး အမြဲ ဆန့်ကျင်နေ ကတော့ စစ်တပ်အုပ်စုပါ။
.
စစ်တပ်ဟာ လူထုအစိုးရ တလျှောက်လုံးမှာ ပြုပြင်ပြောင်းလဲရေး လုပ်ငန်းတွေကို အမြဲလိုလို အဟန့်အတား လုပ်ခဲ့တယ်။ အထူးသဖြင့် စီးပွားရေး ပွင့်လင်းလာမှာကို မလိုလားဘူး။ ၂၀၀၈ ဖွဲ့စည်းပုံအရ သူတို့ဟာ အထူးစီးပွားရေး လုပ်ပိုင်ခွင့်တွေ ရရှိထားပြီး ကာကွယ်ရေးဝန်ကြီးဌာန နဲ့ ပြည်ထဲရေး ဝန်ကြီးဌာနကို ချုပ်ကိုင်ထားတယ်။ တချိန်ထဲမှာပဲ မြန်မာ့ဦးပိုင်လီမိတက်နဲ့ မြန်မာ့စီးပွားရေး ကော်ပိုရေးရှင်းဆိုတဲ့ ကြီးမားလှတဲ့ စစ်တပ်ပိုင် လုပ်ငန်း နှစ်ခုလည်း ရှိတယ်။ ဒီလုပ်ငန်းနှစ်ခုကနေ မြန်မာပြည်ရဲ့ စီးပွားရေးလုပ်ငန်းများစွာကို လက်ဝါးကြီး အုပ်ထားတယ်။
.
စစ်တပ်က သူတို့ရဲ့ ဘက်ဂျက်ကို သူတို့ဘာသာ သတ်မှတ်တယ်။ သူတို့ အသုံးစရိတ်ဟာ တခြား ပညာရေး၊ ကျန်းမာရေး၊ လမ်းပန်းဆက်သွယ်ရေး၊ လျှပ်စစ်ရရှိရေး စတဲ့ အခြေခံအဆောက်အအုံများ ရဲ့ အသုံးစရိတ်ထက် အများကြီးပိုတယ်။ မြန်မာပြည်ကို ပြည်ပရန်မှ ကာကွယ်ဖို့ ဆိုပြီး ဘတ်ဂျက်တွေ အလွန်အကျွံသုံးပေမဲ့ တကယ်တမ်းမှာတော့ ပြည်ပရန် ဆိုတာလည်း ပြောပလောက်အောင် မရှိပါ။ ဒီလို စစ်ရေးစရိတ်တွေ အများကြီး သုံးခဲ့တော့ မြန်မာနိုင်ငံရဲ့ အထွေထွေ အသုံးစရိတ်ဟာ အမြဲလိုငွေတွေ ပြလာတယ်။ ဒီလိုဖြစ်လာတိုင်းမှာ အာဏာရှင် အစိုးရအဆက်ဆက်ဟာ ငွေစက္ကူတွေကို ရိုက်ထုတ်ပြီး ဖြည့်ဆည်းခဲ့တယ်။ ကျနော်ကတော့ ဒါကို မြန်မာပြည် စီးပွားရေးစနစ်ရဲ့ “မူလရင်းမြစ် ဒုစရိုက်အစစ်” လို့ နာမည်ပေးထားတယ်။
.
.
မြန်မာပြည်မှာ ကျနော် လုပ်ရတဲ့အလုပ်က အတော်ကျယ်ပြန့်သလို ပြောင်းသာလွှဲသာလည်း ရှိပါတယ်။ ဒေါ်စုရဲ့ တခုတည်းသော တောင်းဆိုချက်က “သူကြားချင်တာတွေပဲ ခန့်မှန်းပြီး မပြောဖို့နဲ့ ကျနော် နားလည်တဲ့ အခြေအနေကို အမြဲတမ်း အမှန်အတိုင်း ပြောပြဖို့”ပါ။ ဒေါ်စုရဲ့ စီးပွားရေးပညာက ကျနော့်လောက် မဟုတ်ဘူးဆိုရင်တောင် အတော်ကြီး အဆင့်မြင့်ပါတယ်။ လွတ်လွတ်လပ်လပ်လည်း တွေးနိုင်စွမ်းရှိတယ်။ သူရဲ့ အားသာချက်က သူဟာ မြန်မာပြည်မှာ ဘာတွေက အလုပ်ဖြစ်နိုင်တယ်၊ ဘာတွေက အလုပ်မဖြစ်နိုင်ဘူးဆိုတာကို သိနေတာပါပဲ။
.
ကျနော့်ရဲ့ နေ့စဥ်လုပ်ငန်းဆောင်တာတွေက အတော်ပဲ များပြားတယ်။ ဒေါ်စုနဲ့ နှစ်ပတ်ကို တခါလောက် ပုံမှန် အစည်းအဝေး လုပ်ဖြစ်တယ်။ ပြဿနာတွေ ပေါ်‌လာလို့ အရေးပေါ် အစည်းအဝေးတွေ လုပ်ရင်လည်း သွားတက်ရတယ်။ ပုံမှန်အစည်းအဝေးတွေကတော့ သူနေတဲ့ နေပြည်တော်က အိမ်မှာ လုပ်တာ များပါတယ်။ သူက နိုင်ငံတော် အကြံပေးပုဂ္ဂိုလ် ရာထူးအပြင် နိုင်ငံခြားရေးဝန်ကြီး ရာထူးကိုပါ တပြိုင်တည်း ယူထားရတဲ့သူပါ။ ဒီအစည်းအဝေးတွေမှာ သူရော ကျနော်ပါ ဆွေးနွေးစရာတွေကို စာရင်းနဲ့ လုပ်ပြီး စနစ်တကျ ဆွေးနွေးကြတယ်။ အဲဒါတွေ ဆွေးနွေးပြီးရင်တော့ နိုင်ငံတကာအရေးတွေ၊ ကမ္ဘာ့စီးပွားရေးရေစီးကြောင်း ဘယ်ဘက်ကို ဦးတည်နေတယ် ဆိုတာတွေအကြောင်း ပြောကြတယ်။ တခြား အကြံပေးလိုတာတွေ ရှိရင်လည်း သူ့ဆီကို ပို့ပေးထားခိုင်းတယ်။
.
ဒီအစည်းအဝေးတွေ အပြီးမှာတော့ မြန်မာစာနဲ့ တည်ခင်းဧည့်ခံလေ့ ရှိတယ်။ သူက မြန်မာ အစားအစာ ကို မြန်မာပြည်ရဲ့ နောက်ဆုံး ထုတ်ကုန်တခုအဖြစ် ကမ္ဘာကို ဖြန့်ချင်တဲ့ ဆန္ဒရှိတယ်။ ဒီတော့ မြန်မာ စားသောက်ကုန်လုပ်ငန်းရှင်တွေ ရဲ့ စမ်းသပ်ချက်ပြုတ်ထားသမျှကို ကျနော့်ကို ချကျွေးလေ့ ရှိတယ်။ ကျနော်ကလည်း နိုင်ငံတကာပရိသတ် အစမ်းသပ်ခံအဖြစ် ကျေကျေနပ်နပ်ကြီး ကျွေးသမျှ စားတာပါပဲ။
.
တခြား ဌာနဆိုင်ရာ ဝန်ကြီးတွေ၊ အရာရှိတွေ၊ နိုင်ငံတကာ သံတမန်တွေ၊ လုပ်ငန်းရှင်တွေ၊ ဖွံဖြိုးမှု ဆိုင်ရာ ပညာရှင်တွေနဲ့လည်း တွေ့ဆုံရတဲ့ အစည်းအဝေးအကြိမ်တွေ များလာတယ်။ ဒါပေမဲ့ ဒါတွေက အကောင်းလက္ခဏာတွေပါ။ အထူးသဖြင့် ဒီချုပ်အစိုးရ သက်တမ်းအစ နှစ်တွေမှာ နိုင်ငံတကာက လုပ်ငန်းသစ် တိုးချဲ့ဖို့ ရှာနေသူတွေအတွက်တော့ မြန်မာပြည်က မလာမဖြစ် လာကြရတဲ့ နေရာတခု ဖြစ်ခဲ့ပါတယ်။ ကျနော့်အနေနဲ့ ဒီအစည်းအဝေးတွေမှာ ပါရုံတင် ဆိုပေမဲ့ အခုလို ပါဝင်ခဲ့ရတာကိုပဲ ဂုဏ်ယူနေမိတယ်။ ကျနော်တို့ဟာ ကောင်းမွန်တဲ့၊ သစ်ဆန်းတဲ့၊ ထူးခြားတဲ့ အရာတွေကို ဖန်တီးနေကြတယ် ဆိုတဲ့ ခံစားမှုမျိုးပေါ့။ အာရှတိုက်ရဲ့ နောက်ဆုံးနဲ့ အကောင်းဆုံး အာရှကျား တကောင်ဖြစ်ဖို့ သေချာနေတယ် ဆိုတဲ့ ခံစားမှုမျိုး။
.
.
.
၂၀၁၆ ခုနှစ် ကျနော်ပါဝင်ခဲ့တဲ့ အစိုးရမှာ လုပ်စရာတွေ တောင်လိုယာလို ပုံနေသလို သူတို့အပေါ် လူထုရဲ့ မျှော်လင့်ချက်ကလည်း လုပ်နိုင်တာထက် ပိုပါတယ်။ မျှော်လင့်တဲ့အတိုင်း ဖြစ်မလာတော့လည်း စိတ်ပျက်ဝေဖန်ခြင်းကို ခံခဲ့ကြရတယ်။ သို့သော် ဒီချုပ်အစိုးရလက်ထက် စီးပွားရေး မျက်နှာစာမှာတော့ အစိုးရဟာ အရေးကြီးတဲ့ မူဝါဒတွေ၊ စနစ်ကျတဲ့ အင်စတီကျူးရှင်းတွေ၊ လုပ်ငန်းဖော်ဆောင်ရေး ကော်မတီတွေကို အသေအချာ ဖွဲ့စည်းချမှတ်နိုင်ခဲ့တယ်။ တချိန်တည်းမှာပဲ ဒီမိုကရေစီဟာ တိုင်းပြည်ဖွံ့ဖြိုးတိုးတက်ရေးအတွက် စိတ်ချရတဲ့ လက်တစုံ ပါ ဆိုတာကို အလုပ်နဲ့ သက်သေပြနိုင်ခဲ့တယ်။
.
ဒီလို သက်သေပြနိုင်ခဲ့တယ် ဆိုတာကလည်း ပြည်တွင်းက မြန်မာနိုင်ငံသား ပညာရှင်တွေရဲ့ အထူး အင်အားစိုက်ထုတ်မှုတွေကြောင့်ပါ။ အထူးသဖြင့် မြန်မာ့စီးပွားရေး တိုက်စစ်မှူးတွေ ဖြစ်တဲ့ ဦးဝင်စတန်ဆက်အောင် (စီမံကိန်းနှင့် ဘဏ္ဍာရေး ဒုဝန်ကြီး) နဲ့ ဦးဘိုဘိုငယ် (မြန်မာနိုင်ငံ ဗဟိုဘဏ် ဒုတိယဥက္ကဋ္ဌ) တို့ရဲ့ အမျှော်အမြင်ရှိမှု၊ အရည်အသွေးနဲ့ စီးပွားရေးဆိုင်ရာ အမြင်တွေ ကြောင့်ပါ။
.
.
.
အမျိုးသားဒီမိုကရေစီအဖွဲ့ချုပ် အစိုးရဟာ သူတို့ရဲ့ လူကြိုက်များလောက်ပြီး ကောင်းမွန်တဲ့ လုပ်ဆောင်ချက်တွေကို ကျယ်ကျယ်ပြန့်ပြန့် လူသိအောင် မပြောနိုင်ဘူး။ ဒီအချက်ဟာ သူတို့ရဲ့ အားနည်းချက်လို့ ဆိုရမယ်။ “ပြောကားပြော၏၊ မလုပ်” ဆိုတာမျိုးထက် “လုပ်ကားလုပ်၏၊ မပြော” ဆိုတာမျိုး ဖြစ်ခဲ့ပါတယ်။
.
.
.
သူတို့အာဏာသိမ်းတဲ့ တနင်္လာနေ့ မနက်မှာ ကျနော်က ရန်ကုန်မှာ ရှိနေခဲ့တယ်။ အဲဒီနေ့ မတိုင်ခင်က ကျနော်ဟာ နေပြည်တော်ကို သွားဖို့ ရှိတယ်။ ဒါပေမဲ့ ဒေါ်စုနဲ့ သူ့ရုံးရဲ့ အကြံပေးချက်အရ နေပြည်တော်ကို သွားဖို့ ရက်အနည်းငယ် နောက်ဆုတ်ထားလိုက်တယ်။ ကျနော် ခန့်မှန်းမိသလောက် ဒေါ်စုတို့ အနေနဲ့လည်း အာဏာသိမ်းခံရလိမ့်မယ်လို့ မထင်ထားခဲ့ပါဘူး။ ဒါပေမဲ့ “နေပြည်တော်အသွားလမ်းပေါ်မှာ ခပ်ဆိုးဆိုး စစ်သားတွေက အမေစုနဲ့ နီးစပ်သူဆိုရင် အနှောင့်အယှက် ပေးနိုင်တယ်” လို့ ဒေါ်စုရဲ့ ရုံးအဖွဲ့ဝင်တယောက်က ကျနော့်ကို ပြောတယ်။
.
ကျနော်လည်း စစ်တပ်နဲ့ ရင်းနှီးတဲ့ မြန်မာမိတ်ဆွေ တချို့ကို ချက်ချင်းဆက်သွယ်ပြီး တီးခေါက်ကြည့်ခဲ့တယ်။ နေပြည်တော်မှာ စစ်သားအင်အားတွေ ထူးထူးခြားခြား များနေတဲ့အကြောင်း မေးကြည့်တော့ လွတ်တော်ဖွင့်ပွဲအတွက် လုံခြုံရေး တာဝန်ယူထားတာ ဖြစ်ကြောင်း၊ ဘာမှ စိုးရိမ်စရာ မရှိဘူးလို့ ဖြေကြတယ်။
.
.
_____________________________

ဘာသာပြန် – ​အောင်မိုး ( A K Moe )