သူမတူအကျဉ်းသား (အခန်း၅)

■ အခန်း(၅)
မိတ်ဆွေများ၊ ကယ်တင်ရှင်များ နှင့် သံတိုင်များ၏ အခြားတဘက်
+++++++++++

ကျနော် တိုက် ၄ ထဲကို ဝင်လာတာ မြင်လိုက်တော့ အကျဥ်းသားတွေက ပြေးလာပြီး နွေးနွေးထွေးထွေး ကြိုဆိုကြတယ်။ ဘေးမှာ ပါလာတဲ့ ထောင်ဝန်ထမ်းတွေကိုတောင် ဂရုမစိုက်ကြဘူး။ သူတို့ကလည်း အလိုက်တသိ နောက်ဆုတ် ပေးလိုက်ပါတယ်။ သူတို့ကိစ္စ ပြီးပြီလေ။ ကျနော့်ကို ဝိုင်းအုံလာတဲ့ လူအုပ်ထဲက ဒေါ်စုပုံပါတဲ့ လိမ္မော်ရောင် တီရှပ်တထည် ကို ဝတ်ထားတဲ့ လူငယ်တဦး ထွက်လာတယ်။
.
“ရှောင်။ ဆရာ စိတ်မပူနဲ့တော့။ လုံခြုံသွားပြီ။ ကျနော်တို့ ရှိတယ်။”
.
သူ့စကားတွေက ကျနော့် ရင်ထဲ အေးသွားစေတယ်။ သူနာမည်က “ပိုင်ရဲသူ” လို့ ခေါ်တယ်။ အသက် ၂၀ ကျော်လေးပဲ ရှိဦးမယ်။ သြချလောက်တဲ့ လူငယ်တယောက်ပါ။ ဒေါ်စုက အားထားရတဲ့ ဒီချုပ်ပါတီဝင် လူငယ် ခေါင်းဆောင် တယောက်လည်း ဖြစ်တယ်။ ရန်ကုန်သား ပိုင်ရဲသူ က စစ်အာဏာသိမ်းမှုကို ဆန့်ကျင်တဲ့အနေနဲ့ ငြိမ်းချမ်းစွာ ဆန္ဒပြဖို့ လူစုပြီး စီစဥ်ခဲ့တယ်။ အဲဒီအတွက်ကြောင့် ခပ်စောစောပဲ အဖမ်းခံရပြီး ၅၀၅ နဲ့ ထောင်ဒဏ် အပြစ်ပေးခံလိုက်ရတယ်။ သူအပြုံးနဲ့ စကားတွေကို နားထောင်ပြီး ဒီလူငယ်ဟာ အနိုင်မခံအရှုံးမပေး စိတ်ဓာတ်ရှိပြီး ပျော်ပျော်နေတတ်တဲ့ လူငယ် တယောက်လို့ ကျနော်က ကောက်ချက်ချလိုက်တယ်။
.
.
.
ကျနော့် မိတ်ဆွေသစ်တွေထဲမှာ လူတယောက်က ပထမတော့ ခပ်ခွာခွာနေတယ်။ နောက်တော့ သူလည်း ကျနော်နဲ့ ရင်းနှီးလာပါတယ်။ သူဟာ ကျနော် အင်းစိန်ထောင်မှာ နေခဲ့သမျှ ကာလတွေမှာ ကျနော့်အပေါ် အစောင့်ရှောက်ဆုံး သူတယောက် ဖြစ်လာပါတယ်။ သူနာမည်က “ခင်မောင်ဆွေ”။ အသက် ၄၀ ဝန်းကျင် ရှိပြီး လူက ပုသယောင် ရှိတယ်။ ခန္ဓာကိုယ် ခပ်တောင့်‌တောင့်နဲ့ ဗလလည်း ကောင်းတယ်။ သူ့ဘာသာ ကျန်းမာအောင် နေတတ်ပုံ ရတယ်။ ကိုခင်မောင်ဆွေရဲ့ ထူးခြားတဲ့ အမှတ်အသားကတော့ သူ့ရဲ့ မုတ်ဆိတ်ပါ။ သူက မွတ်စလင်ဘာသာဝင်တဦး ဖြစ်တယ်။ သူကလည်း ဒီအချက်ကြောင့် သူ့ဘဝ တလျှောက်လုံး ခွဲခြားအဆက်ဆံ ခံရတာတွေကို ပြောပြတတ်တယ်။ အထူးသဖြင့် ထောင်ဝန်ထမ်းတွေ သူ့အပေါ် ကြည့်တဲ့ သံသယ အကြည့်တွေကိုပါ။ ဘယ်လို ဖြစ်ပါစေ၊ သူ့အပေါ်မှာတော့ ဘဝတူ နိုင်ငံရေးအကျဥ်းသားတွေကတော့ အဲလို မဆက်ဆံခဲ့ကြပါဘူး။ ကျနော် အပါအဝင် အားလုံးက သူ ခေါ်စေချင်အတိုင်း “ယာကွတ်” လို့ပဲ ခေါ်ခဲ့ကြတယ်။ ယာကွတ်အတွက် ဘာသာတရားဟာ သူရဲ့ ကိုယ်ပိုင် အမှတ်အသား၊ ကိုယ့်ကျင့်သီလ၊ တော်လှန်ရေး စိတ်ဓာတ်ရဲ့ အခြေခံ အကြောင်းတရားတွေပါ။
.
ကျနော့် အခန်းကို ဝိုင်းရှင်းနေတဲ့ အထဲမှာ ယာကွတ်က သူများတွေ မလုပ်ချင်ဆုံး အလုပ်ကို လုပ်ပါတော့တယ်။ ရေးပြလို့ မကောင်းလောက်အောင် ညစ်ပတ်နေတဲ့ ဆောင့်ကြောင့်ထိုင် အိမ်သာကို အသေအချာ ဆေးနေတော့တယ်။ ဒီအိမ်သာ ကြည့်ရတာ စပြီးတပ်ဆင်ကတည်းက တခါမှ ဆေးခဲ့ပုံ မရပါဘူး။ နှစ်တရာလောက်တောင် ရှိမလားပဲ။
.
“မလုပ်ပါနဲ့၊ မလုပ်ပါနဲ့။ ကျနော့် ဘာသာ လုပ်ပါ့မယ်။ ခင်ဗျား လုပ်ပေးဖို့ မလိုပါဘူး။ ကျနော်လည်း ခင်ဗျားတို့နဲ့ အတူတူပါပဲ။ ဘာအခွင့်အရေးမှ ပို မလိုချင်ပါဘူး။ မလုပ်ပါနဲ့ဗျာ။ ကျနော်တို့ အားလုံး အတူတူပါပဲ” လို့ ကျနော်က သူ့ကို ပြောလိုက်တယ်။
.
ဒါပေမဲ့ ဒီလူက ခေါင်းမာတယ်။ ကျနော် ပြောတာလည်း နားမထောင်ဘူး။ သူရဲ့ ရက်ရောပြီး ကူညီတတ်တဲ့ စိတ်က သူ့ရင်ထဲက လာတယ်။ သူ့ဘာသာရေး၊ နိုင်ငံရေး ခံယူချက်တွေကလည်း ဒီအတိုင်းပဲ။
.
“ခင်ဗျားကို ကူညီတာဟာ အမေစုကို ကူညီတာ၊ ကျနော့်နိုင်ငံကို ကူညီတာနဲ့ အတူတူပဲ။ ဒီလိုလုပ်ပေးနေတာဟာ အလ္လာအရှင်မြတ်ရဲ့ အလိုတော်ကို ဖြည့်ဆည်းပေးနေတာလို့ ကျနော် ယုံကြည်တယ်” လို့ ပြန်ပြောတယ်။ သူ့အပြောကြောင့် ကျနော်လည်း မငြင်းသာခဲ့ပါဘူး။ မေ့ပျောက်ဖို့ ခက်တဲ့ သူ့ရဲ့ စိတ်ထားတွေထဲက တခုပါ။
.
.
.
မီဒီယာတွေရဲ့ သတင်းတွေဟာ ဖမ်းထားတဲ့ နိုင်ငံထက် အဖမ်းခံရသူ ဇာတိနိုင်ငံအပေါ်မှာ အကျိုးသက်ရောက်မှု ပိုရှိတယ်။ ဖမ်းထားတဲ့ နိုင်ငံတွေ ကတော့ လူထုအမြင်ကိုလည်း ဂရုစိုက်လှတာ မဟုတ်ပါဘူး။ အာဏာသိမ်း စစ်ကောင်စီက အဲလို ဂရုမစိုက်တတ်တဲ့ အုပ်စုထဲမှာပါတယ်။ သြစတေးလျ အစိုးရကတော့ ဒီမိုကရေစီ အစိုးရပီပီ သူတို့ရဲ့ နိုင်ငံသားတွေ အဝေးတနေရာမှာ ဒုက္ခရောက်နေတာကို ကြည့်မနေနိုင်ဘူးပေါ့။
.
ကျနော်ကလည်း ကံကောင်းစွာပဲ အဲလို နိုင်ငံသား တယောက် ဖြစ်နေခဲ့ပါတယ်။
.
.
______________________________
ဘာသာပြန် – ​အောင်မိုး ( A K Moe )