အဆုံးသတ်တိုက်ပွဲဆီသို့

အဆုံးသတ်တိုက်ပွဲဆီသို့

■ အယ်ဒီတာ့စကား

စာမျက်နှာများကို တရွက်ချင်းတရွက်ချင်း လှန်လှောဖတ်ရှုခဲ့သည်။ တချို့ကို တခြားသူများက ရေးသားထားတာဖြစ်ပြီး တချို့သည် ကျွန်ုပ်တို့ကိုယ်တိုင်ရေးထိုးထားသော ကမ္ပည်းများဖြစ်သည်။

အခြေအနေဆိုးတွင် ရပ်တံ့နေမလား၊ အပိတ်အဆို့များကို တိုးထွက်မလားဆိုသည်မှာ ကျွန်ုပ်တို့၏ ကိုယ်ပိုင်အဆုံးအဖြတ်သာဖြစ်သည်။ ပြည်သူများ၊တော်လှန်ရေးအင်အားစုများကြားတွင် တစ်သံတည်းညီ တစ်ချီတည်းရုန်း၂၀၂၃ ဆိုသော ကြွေးကြော်သံ လှိုင်လှိုင်ကြီး ထွက်ပေါ်လာသည်။၂၀၂၃ သည် တော်လှန်ရေးအတွက် အဆုံးအဖြတ်ပေးမည့်နှစ်ဖြစ်သည်။ အမှန်တကယ်လည်း မင်္ဂလာသတင်းကောင်းများနှင့် ကူးပြောင်းလာသော နှစ်သစ်ဖြစ်နေသည်။

စစ်အုပ်စုအပေါ် နိုင်ငံတကာဖိအားများ တအိအိပြိုကျနေခြင်းသည် ပြည်သူလူထု၏ မရပ်မနားမြင့်တက်လာသော ခုခံတွန်းလှန်စစ်ကြောင့်ပင်ဖြစ်သည်။ဖက်ဆစ်စစ်တပ်အမြစ်ဖြတ် ဟူသော ပြည်သူလူထု၏ ဇွဲစိတ်သန်မှုကို ကမ္ဘာက ​စောင့်ကြည့်ကာ အားပေးထောက်ခံလာပြီဖြစ်သည်။ အာဆီယံအလှည့်ကျဥက္ကဌ ဖြစ်သော အင်ဒိုနီးရှားနိုင်ငံကလည်း မြန်မာ့အရေး ဖြေရှင်းဆောင်ရွက်ရာတွင် သက်ဆိုင်သူအားလုံးနှင့် တွေ့ဆုံဆွေးနွေးသွားမည်ဟု ဖိအားပေးပြောဆိုခဲ့သည်။ ထို့ပြင် Justice For Myanmar အဖွဲ့က ထိုင်းနိုင်ငံတွင် ဖမ်းဆီးခဲ့သော ငွေကြေးခဝါချမှု၊ မူးယစ်ဆေးဝါးရောင်းဝယ်မှုတွင် အကြမ်းဖက်စစ်ခေါင်းဆောင် မအလ၏ သားနှင့်သမီး ပါဝင်နေကြောင်းကို အထောက်အထားသက်သေများနှင့်တကွ ဖော်ထုတ်နိုင်ခဲ့သည်။ ထိုင်းအစိုးရအနေဖြင့် မူးယစ်ဆေးဝါးရောင်းဝယ်မှုတွင်ပါဝင်ပတ်သက်နေသူများကို ဆက်လက်အရေးယူသွားရန် အာဆီယံပါလီမန်များ လူ့အခွင့်အရေးအဖွဲ့ ( APHR) က တိုက်တွန်းထားသည်။ နှစ်ကူးသည်နှင့် စစ်အုပ်စု၏ ဘက်စုံကျဆုံးနေမှုများကို မြင်တွေ့နေရပြီဖြစ်သည်။

ထို့ကြောင့်လည်း စစ်အုပ်စုက အတုအယောင်ရွေးကောက်ပွဲဖြင့် ထွက်ပေါက်ရှာပြီး သူ့အာဏာသက်ဆိုးရှည်ရန် ကြိုးစားနေခြင်းဖြစ်သည်။ ပြည်သူများက ထိုအတုအယောင်ရွေးကောက်ပွဲကိုတားဆီး ဆန့်ကျင်လျက်ရှိသည်။ နိုင်ငံတကာအဖွဲ့အစည်းများကလည်း လက်မခံကြောင်း ကန့်ကွက်လျက်ရှိသည်။ သို့ရာတွင် ကျင်းပပြီးစီးခဲ့သောရွေးကောက်ပွဲများတွင် ပြည်သူလူထုထံမှ တမဲမျှ မရရှိခဲ့သော ပါတီအချို့က PR ဆိုသော ဖျာကိုခင်းလျက် စစ်အုပ်စု၏ အာဏာလက်ဝေခံလုပ်ရန် ကြံစီနေကြသည်။ ထို့ကြောင့် အကြမ်းဖက်စစ်အုပ်စုနှင့် ပူးပေါင်းသူ မည်သူ့ကိုမဆို အကြမ်းဖက်ဟုသတ်မှတ်ကာ ပြည်သူ၏အားဖြင့် ချေမှုန်းသွားရမည်သာဖြစ်သည်။ ပြည်သူလူထုသွေးမြေကျခဲ့ရမှု၊ ပြာပုံဘဝရောက်ခဲ့ရမှုကို စာနာထောက်ထားခြင်း မရှိသော အာဏာအချောင်သမားများကို ကျွန်ုပ်တို့ ညီညီညွတ်ညွတ် တိုက်ဖျက်ပစ်ရမည်ဖြစ်သည်။

တော်လှန်ရေးဘယ်တော့ပြီးမလဲ မေးလာသူများကို သင်ကိုယ်တိုင်ပါဝင်လျှင် ပိုမြန်ပါလိမ့်မယ် ဟူသောအဖြေစကားကဲ့သို့ တော်လှန်ရေးတွင် ကျရာထောင့်မှ အားလုံးပါဝင်ကြဖို့လိုပါသည်။

” စစ်ခွေးနိဂုံး ၂၀၂၃ ” ဖြစ်စေမည့် အောင်ပွဲအသစ်အသစ်များကို မျှော်ကူးလျက် နွေဦးတော်လှန်ရေးမော်ကွန်းသစ်ကို သင်တို့ ကျွန်ုပ်တို့ကိုယ်တိုင် ပါဝင်ရေးထိုးကြပါစို့ ဟု
ဖိတ်ခေါ်လိုက်ပါသည်။