“စာအုပ်တန်းမှာလမ်းလျှောက်ခြင်း”
စာအုပ်အမည်။ အမျိုးသားအာဇာနည်ခေါင်းဆောင်ကြီး သခင်မြ
စာရေးသူ။ သခင်ချစ်မောင် (ဝိဓူရ)
မျက်နှာဖုံးပန်းချီ/ဒီဇိုင်း။ အောင်နိုင်မောင်/အံ့ဘွယ်ဇင်
ပုံနှိပ်မှတ်တမ်း။ ၂၀၁၁ ခုနှစ်၊ အောက်တိုဘာ
ဒုတိယအကြိမ်
အုပ်ရေ ၅၀၀
ထုတ်ဝေ။ အားမာန်သစ်စာပေ
အမှတ် (၁၄၃)၊ မြန်မာ့ဂုဏ်ရည်လမ်း၊ ကန်တော်ကလေး၊ ရန်ကုန်မြို့
■ အဖွင့်
“ကျေးဇူးဆပ်ခြင်း”
ကျွန်ုပ်၏ နိုင်ငံရေး၊ ပုဂ္ဂိုလ်ရေး ကျေးဇူးရှင်ကြီး အာဇာနည်ခေါင်းဆောင်ကြီး သခင်မြ၏ ဂုဏ်ကျေးဇူးများအတွက် ကျွန်ုပ်နှင့် ကျွန်ုပ်၏ တိုင်းပြည်၏ကိုယ်စား ဤအထ္ထုပ္ပတ္တိကျမ်းဖြင့် ပူဇော်ကန်တော့လိုက်ပါသည်။
■ အာဇာနည်ခေါင်းဆောင်ကြီး သခင်မြ၏ အတ္ထုပ္ပတ္တိကျမ်း မာတိကာ
ပထမပိုင်း – သားကလေးမောင်မြရွှေ
ဒုတိယပိုင်း – တက္ကသိုလ်ကျောင်းသားဘဝနှင့် ပထမဆုံးကျောင်းသားသမဂ္ဂ
တတိယပိုင်း – ရန်ကုန်ကောလိပ် သပိတ်မှောက်ခေါင်းဆောင်ဘဝ
စတုတ္ထပိုင်း – ကိုမြ၏ အိမ်ထောင်သည်ဘဝ
ပဥ္စမပိုင်း – ခေတ်သစ်လူငယ်များ တစ်ခေတ်ဆန်းချိန်
ဆဌမပိုင်း – နိုင်ငံကျော်အမျိုးသားခေါင်းဆောင်ကြိးတဦးအဖြစ်သို့ ရောက်ရှိလာခြင်း
သတ္တမပိုင်း – ဗြိတိသျှနယ်ချဲ့ဆန့်ကျင်ရေး၊ လက်နက်ကိုင်မြေအောက်တော်လှန်ရေးနှင့် ခေါင်းဆောင်ကြီးသခင်မြ၏အခန်းကဏ္ဍ
အဌမပိုင်း – ဂျပန်ဖက်ဆစ်တို့၏သိမ်းပိုက်ထားသောကာလ ခေါင်းဆောင်ကြီးသခင်မြ၏ လှုပ်ရှားမှုများ
နဝမ်ပိုင်း – မြန်မာပြည်ဖက်ဆစ်တော်လှန်ရေးကြီးနှင့် ခေါင်းဆောင်ကြီးသခင်မြ၏ အခန်းကဏ္ဍ
ဒဿမပိုင်း – နောက်ဆုံးအဆင့် အမျိုးသားလွတ်လပ်ရေးတိုက်ပွဲကြီးနှင့် ခေါင်းဆောင်ကြီးသခင်မြ၏ အခန်းကဏ္ဍ
နောက်ဆက်တွဲများ –
(က) သူ၏ဇနီး၊ ရဲဘော်၊ မိတ်ဆွေနှင့် ဆွေမျိုးများ၏ အမှတ်တရတမ်းတချက်များ
(ခ) သူဩ နိုင်ငံရေးစာပေများနှင့် မိန့်ခွန်းများ
(ဂ) သူ့ဘဝသက္ကရာဇ်စဉ်
(ဃ) သူ၏လက်ရေး၊ သူ၏ဇာတာ၊ သူဩလက္ခဏာပုံစံနှင့် သူ၏ ရှင်သာမဏေဘွဲ့များ
(င) ဤကျမ်းပြုရာတွင် ကူညီကြသော ပုဂ္ဂိုလ်များစာရင်း
(စ) ကိုးကားသော စာအုပ်များစာရင်း
(စာမျက်နှာပေါင်း ၄၇၉ မျက်နှာတိတိ ပါရှိသည်။ မှတ်တမ်းဓာတ်ပုံပေါင်း ၃၁ ပုံတိတိ ပါရှိသည်)
– ရခိုင်အမျိုးသားခေါင်းဆောင်ကြီး ဦးအောင်ဇံဝေ၏ သတိရတမ်းတသဝဏ်လွှာ
– သခင်ခင်အောင်(သာယာဝတီ) တို့ဗမာအစည်းအရုံးဌာနချုပ် အလုပ်အမှုဆောင်ဟောင်း၏ တည်းဖြတ်အမှာ
■ စာမြည်း
ကျနော်သည် အာဇာနည်ခေါင်းဆောင်ကြီးသခင်မြ၏ အတ္ထုပ္ပတ္တိကျမ်းကို ရေးသားပြုစုရန် ၁၉၅၀ ခုနှစ်ကပင် စတင်အကြံပြုခဲ့ပါသည်။ ထိုသို့ အကြံပြုခဲ့မိပုံအဆက်အစပ်မှာလည်း တမျိုးအားဖြင့် ထူးခြားလေသည်ဟု ဆိုနိုင်ပါသည်။ ၁၉၄၉ ခုနှစ်တွင် ရန်ကုန်မြို့ ကုန်သည်လမ်းပေါ်ရှိ ပြည်သူ့စာပေတိုက်နှင့် ပြည်သူ့စာပေကော်မတီကို ဦီးဗဆွေ(တည်မြဲ)၊ ဗိုလ်မှူးအောင်(ပြည်သူ့ရဲဘော်)၊ သခင်လွင်၊ သခင်ကျော်စိန်၊ ဒဂုန်ဦးလှဖေစသည့် ရဲဘော်ကြီးများနှင့်အတူ ဖွဲ့စည်းလုပ်ဆောင်စဉ်က နာမည်ကျော် အမေရိကန်စာရေးဆရာကြီးနှစ်ဦးဖြစ်သော အဲ(လ)ဘတ်အီခန်နှင့် မိုက်ကယ်ဆာရာတို့ရေးသား၍ ကမ္ဘာသို့ အကြိမ်ပေါင်းများစွာ ရိုက်နှိပ်ထုတ်ဝေဖြန့်ချိခဲ့သော (Great Conspiracy) ခေါ် လုပ်ကြံမှုကြီးစာအုပ်ကို ဖတ်ရှုခဲ့ရပါသည်။ ဖတ်ဖူးသူတိုင်း အထူးပင် ဝန်ခံချီးကျုးရသော ကမ္ဘာ့နိုင်ငံရေးသည်းထိတ်ရင်ဖို အဖြစ်မှန်ဇာတ်လမ်းစုံ သမိုင်းစာအုပ်ကြီးတအုပ်ဖြစ်ပါသည်။ အတွင်းရေး စာချုပ်စာတမ်း သက်သေခံအထောက်အထားများဖြင့်လည်း ခိုင်လုံပြည့်နှက်လှသော သမိုင်းကျမ်းလည်းဖြစ်ပေသည်။
–
သို့ဖြင့် အဆိုပါ နာမည်ကျော် အမေရိကန်စာရေးဆရာကြီးနှစ်ဦး ရေးသားခဲ့သော လုပ်ကြံမှုကြီးခေါ်စာအုပ်ကို ၁၉၅၁ခုနှစ်တွင် မြန်မာဘာသာပြန်ဆိုခဲ့ပါသည်။ ထိုဘာသာပြန်ကို သက်ဆိုင်ရာစာအုပ်တိုက်များက နှစ်ကြိမ်တိုင်တိုင် ရိုက်နှိပ်ဖြန့်ချိခဲ့ကြပါသည်။ ထိုစာအုပ်တွင် “နယ်ချဲ့လက်ပါးစေများ၏ လုပ်ကြံခြင်းကိုခံသွားရသော ကျွန်ုပ်၏ နိုင်ငံရေး ဆရာသခင် ကျေးဇူးရှင် ခေါင်းဆောင်ကြီးသခင်မြအား ရည်စူး၍” ဟူ၍ ကမ္ပည်းထိုးခဲ့ပါသည်။
–
အနှစ်နှစ်အလလမှ ကြံရွယ်ခဲ့သော ခေါင်းဆောင်ကြီးသခင်မြ၏ အထ္တုပ္ပတ္တိကျမ်းကို လွန်ခဲ့သောနှစ် ၁၉၇၇၊ ဩဂုတ်လ ၁ရက်နေ့မှစ၍သာ အမှတ်တရ စတင်ရေးသားနိုင်ပါတော့သည်။ ၁၉၇၈ ခုနှစ် ဧပြီလ ၂၄ရက်နေ့၊ ညနေ ၃နာရီ၌မူ အပိုင်းကြီးပေါင်း ၁၀ ပိုင်း၊ အခန်းပေါင်း ၃၀ ပါဝင်သော မူလစာကိုယ်ကို အကြမ်းအားဖြင့် အပြီးသတ်ခဲ့သည်။ ရှစ်လနှင့် နှစ်ဆယ့်လေးရက်တိတိ ရေးသားခဲ့ရပါသည်။ ထို့နောက် နောက်ဆက်တွဲများကို ဆက်လက်ပြုစုခြင်း၊ အမှာရေးသားခြင်း၊ အချောကိုင်ခြင်းများကို ဆက်လက်ဆောင်ရွက်ကာ ၁၉၇၈ ခုနှစ် မေလ ၃၀ ရက်နေ့တွင်မူ လုံးဝအပြီးသတ်ခဲ့ပါသည်။
–
အမှန်အားဖြင့် ခေါင်းဆောင်ကြီးသခင်မြကွယ်လွန်ပြီးနောက် နှစ်ပေါင်း ၃၀ နှင့် ၁၂ ရက်ကြာမှ သူ၏အထ္တုပ္ပတ္တိကို စတင်ရေးသားနိုင်ခြင်းဖြစ်ရာ ကျန်ရစ်သူ တာဝန်ရှိသူ ရဲဘော်များ၊ တပည့်များအနက်မှ ကျနော်သည်လည်း ထိုတာဝန်ကို ပျက်ကွက်ခဲ့သည်ဖြစ်ရာ ဤနေရာ၌ ကျနော့်အတွက် အလေးအနက်ဝန်ချတောင်းပန်လိုက်ပါသည်။ ဤသို့သော တာဝန်ပျက်ကွက်မှုအပြစ်အတွက် ပို၍ခံစားရအောင် ကွယ်လွန်သူရဲဘော်ကြီး ဦးသိန်းဖေမြင့်ကလည်း ကျနော့်အား နိမိတ်ပြသွားခဲ့ပါသေးသည်။
သူ မကွယ်လွန်ခင် သုံးလခန့်၊ တခုသောနံနက်ခင်းတွင် ဦးသိန်းဖေမြင့်သည် လမ်းလျှောက်ထွက်လာရင်း ကျနော့်အိမ်သို့ ဝင်လာခဲ့ပါသည်။
“သခင်ချစ်မောင်၊ ခင်ဗျားမလည်း ဘယ်မှသွားတာလာတာမတွေ့ရဘဲ တနေ့တနေ့ ဘာတွေများလုပ်နေသလဲဗျာ”
“ကျနော်အခု ခေါင်းဆောင်ကြီးသခင်မြရဲ့ အထ္တုပ္ပတ္တိကျမ်းကို ပြုစုနေပါတယ်”
“ဒီစာအုပ် ထွက်သင့်တာ ကြာပြီဗျာ၊ တော်တော်တောင် နောက်ကျနေပြီ။ ဒါပေမဲ့ ထွက်ထိုက်တဲ့စာအုပ် ထွက်လာရင် ဘယ်အချိန်ထွက်ထွက် ကောင်းတာပါပဲ”
“ဒီစာအုပ်ကို ရေးသားဖို့ အထိုက်တန်ဆုံးလူ၊ တာဝန်အရှိဆုံးလူကတော့ ခင်ဗျားပဲလို့ ကျနော်တော့ ထင်တာပဲ”
ဦးသိန်းဖေမြင့်၏ ဤနောက်ဆုံးစကားတခွန်းသည် ကျနော့်အား အားပေးချီးမြှောက်သည့်သဘောဖြစ်သော်လည်း တာဝန်ပျက်ခဲ့၍ လိပ်ပြာမသန့်ဖြစ်နေသော ကျနော့်အား ချီးပင့်ရာမရောက်၊ ကြီးလေးစွာ အပြစ်တင်ရာရောက်နေ၍ ကျနော့်အဖို့တွင် များစွာစိတ်မကောင်းဖြစ်ခဲ့ရကြောင်း ဤနေရာ၌ မှတ်တမ်းတင်ပါရစေ။
–
ဤအထ္ထုပ္ပတ္တိကျမ်းကို အဘယ်ပုံစံမျိုး၊ အဘယ်အနှစ်သာရမျိုးနှင့် ရေးရမည်နည်းဟု ပြဿနာဖြစ်ပါသည်။ ဂိုဏ်းဂဏပါတီမရွေး ရဲဘော်ကြီးများထံမှ အကြံဉာဏ်များ တောင်းယူခဲ့ပါသည်။ သဘောထားနှင့် အချက်အလက်များ ကူညီမစပါရန် စာဖြင့်ပေဖြင့် ရေးသားပန်ကြားခဲ့ပါသည်။
နောက်ဆုံး စုစည်းအနည်ထိုင်လာသည်မှာ “နိုင်ငံသမိုင်းကို အခြေခံ၊ ပုဂ္ဂိုလ်၏ နိုင်ငံရေးလှုပ်ရှားမှုကြီးကို အနှစ်သာရထား” ဟူ၍ ဖြစ်ပါသည်။
–
နိုင်ငံရေးခေါင်းဆောင်ကြီးများသည် မိုးကျရွှေကိုယ်များမဟုတ်ကြ (ဝါ) မိုးပေါ်ကကျ၊ မြေထဲကထွက်လာသည့် ပုဂ္ဂိုလ်များ မဟုတ်ကြ။ ရုပ်ဝတ္ထုအခြေခံ သမိုင်းရေးသဘောတရားအတိုင်း လူ့သမိုင်း၊ နိုင်ငံသမိုင်း၏ လူမှုရေးတိုးတက်ဖြစ်ပေါ်လာမှု နိယာမဥပဒေများအတိုင်း သမိုင်းလမ်းကြောင်းအတွင်းမှ ဖော်ထုတ်မွေးဖွားပေးလိုက်သော သက်ရှိသမိုင်းပစ္စည်းများသာဖြစ်ပေသည်။ နိုင်ငံသမိုင်းလမ်းကြောင်းနှင့် သီးခြားကင်းလွတ် ထွက်ပေါ်လာကြသူများ မဟုတ်ကြ၊ နိုင်ငံသမိုင်းလမ်းကြောင်းက “မိခင်”ဖြစ်ပြီး နိုင်ငံခေါင်းဆောင်က “သား”ဖြစ်ပြီးလျှင် အမိနှင့်သားတို့ အပြန်အလှန်ကျေးဇူးပြုကြပြီး သမိုင်းသစ်ကို ဆက်၍ ဆက်၍ ရေးသားထူထောင်သွားကြခင်းသာဖြစ်လေသည်။
Be the first to comment