အားလုံး ဝိုင်းဝန်းတည်ဆောက်ကြရမယ့် ပရော်ဖက်ရှင်နယ် တပ်မတော်

ဒီရက်ပိုင်းမှာ လက်နက်ခဲယမ်း မလုံလောက်လို့၊ စစ်ဆင်ရေးနယ်မြေတခုကနေ တခုကို မရွှေ့ပြောင်းနိုင်လို့ စသဖြင့် အကြောင်းပြချက်တွေနဲ့ NUG MOD ရဲ့ ကွပ်ကဲမှုအောက်ကနေ PDF တပ်တွေ နုတ်ထွက်နေတာကို တွေ့ရမှာပါ။

နွေဦးတော်လှန်ရေးကာလမှာမှ ပေါ်ပေါက်လာတဲ့ PDF လို့ခေါ်တဲ့ ပြည်သူ့ကာကွယ်ရေးတပ်မတော်ဟာ ဖက်ဒရယ် ဒီမိုကရေစီအရေး၊ အာဏာရှင် ပြုတ် ကျရေးအတွက် နယ်မြေဒေသမရွေး တိုက်ပွဲဝင်နိုင်တယ်ဆိုတာကို မဟာမိတ် EAOs တွေရဲ့ စစ်ရေးအောင်ပွဲတွေမှာ ပါဝင်နေတာကို ကြည့်ခြင်းအားဖြင့် သိနိုင်ပါတယ်။ နောက်ထူးခြားချက်တခုက PDF တပ်မတော်ဆိုတာ အမာခံ လူတစုကနေ စတင်ဖွဲ့စည်းပြီး အခြေခံကျကျ စုဖွဲ့လေ့ကျင့်ထားတဲ့ တပ်တခု မဟုတ်နေပါဘူး။

တနိုင်ငံလုံးက ငြိမ်းချမ်းစွာ ဆန္ဒပြနေတဲ့ ကျောင်းသားလူငယ်တွေနဲ့ ပြည်သူလူထု တရပ်လုံးကနေပြီးတော့မှ စစ်အာဏာရှင်ရဲ့ လက်နက်အားကိုး အနိုင် ကျင့်မှုတွေကို သည်းမခံနိုင်တော့တဲ့အဆုံး ရရာလက်နက် ဆွဲကိုင်ပြီး တော်လှန်တိုက်ခိုက်ကြတာ ဖြစ်ပါတယ်။

ကောင်းတဲ့အချက်က တနိုင်ငံလုံးမှာ စစ်မျက်နှာပေါင်းများစွာကို ဖွင့်ထားနိုင်ပြီး မြေပြန့် မြန်မာလူမျိုးတွေ အများစုနေထိုင်တဲ့ စစ်ကိုင်း၊ မကွေး၊ မန္တလေး၊ ပဲခူး၊ နေပြည်တော် စတာတွေမှာ တိုက်ပွဲဖော်ဆောင်နိုင်နေတာ ဖြစ်ပါတယ်။ အားနည်းချက်ကတော့ နေရာဒေသပေါင်းစုံက ရှိနှင့်ပြီးသား အစုအဖွဲ့တွေကို မိမိကွပ်ကဲမှုအောက် ထည့်သွင်းလိုက်ရတဲ့ NUG/MOD ဟာ တပ်ရင်းပေါင်းများစွာကို အခြေခံ စားနပ်ရိက္ခာဖြည့်ပေးဖို့ ဝေးစွ စစ်ရေးအခြေအနေပေါ်မူတည်ပြီး လက်နက်ခဲယမ်းတပ်ဆင်ဖို့ကို အတော်လေး ခက်ခက်ခဲခဲ ရုန်းကန်နေရတာကို တွေ့ပါတယ်။

ဒါပေမယ့် NUG ဟာ တော်လှန်ရေးအစိုးရဖြစ်တယ်၊ ဒီလိုခက်ခဲမှုတွေ ရှိတယ်၊ အချိန်တန်ရင်တော့ ဖြည့်ဆည်းပေးနိုင်မှာပါ စတဲ့ မျှော်လင့်ချက်တွေနဲ့ ဒီလိုအချက်တွေကို နားလည်ပြီးတော့မှ အဆင်ပြေအောင် ကြိုးစားရုန်းကန်နေရတဲ့ တပ်ရင်းတပ်ဖွဲ့အများစုကိုလည်း မေ့ပစ်လို့ မရသေးပါဘူး။

မြန်မာပြည်မှာ သခင်သန်းထွန်းတို့ ဗကပ ကွန်မြူနစ်တွေ ပဲခူးရိုးမမှာ ကျဆုံးပြီးနောက်ပိုင်း မြေပြန့်ဒေသမှာ စစ်ပွဲတွေ မရှိတော့ပေမယ့် နွေဦး တော်လှန် ရေးကျမှပဲ စစ်ပွဲတွေ ပြန်လည်ပေါ်ပေါက်လာတာ ဖြစ်ပါတယ်။ တချိန်တုန်းက ပဲခူးရိုးမကို ဖြတ်လေးဖြတ်နဲ့ လယ်သမားဦးကြီးတွေကို နားပေါက်အောင်စည်းရုံးပြီး ဗကပကို တိုက်ထုတ်ခဲ့တဲ့ မြန်မာစစ်တပ်ဟာ သူတို့ရဲ့ အဓိကတပ်သားထွက်ရှိရာ မြေပြန့်ဒေသတွေကို မြေလှန်စနစ်နဲ့ မီးတင်ရှို့နေတာကြောင့် နဂိုက ကြားနေလူတန်းစားတွေ၊ စစ်တပ်ကို ထောက်ခံခဲ့ဖူးတဲ့လူတွေပါ စစ်ကောင်စီကို ပြန်တိုက်မယ်ဆိုပြီး တော်လှန်ရေးတပ်တွေထဲ ဝင်လာကုန်ကြတာ တော်တော်များပါတယ်။

NUG/MOD မှာ တပ်ရင်းပေါင်း (၃၀၀) ကျော် ရှိတယ်လို့ ဆိုပါတယ်။ မဟာမိတ် EAOs တွေ ကွပ်ကဲနေတဲ့ စစ်ဒေသတွေကရော၊ စစ်ရုံးချုပ် တိုက်ရိုက် ကွပ်ကဲမှုအောက်ကနေရော အမှန်တိုင်းပြောရရင် တပ်ရင်းအားလုံးကို မထိန်းချုပ်နိုင်ပါဘူး။ ထိန်းချုပ်ကွပ်ကဲနိုင်တဲ့ တပ်တွေ ရှိကောင်း ရှိနိုင်ပေမယ့် တပ်ရင်းအားလုံးကို စုစည်းနိုင်မယ့် အမိန့်ပေးကွပ်ကဲမှု စနစ်ကြီးတခု ပေါ်ပေါက်လာဖို့တော့ အချိန်ယူရပါအုံးမယ်။

အချို့ တပ်ရင်းတွေအနေနဲ့ ဝန်ကြီးဌာနကို စာရင်းတင်ထားသလို မြေပြင်မှာရော အဲဒီအင်အား တကယ်ရှိနေသလားလို့ပါ၊ ဒါကလည်း အရေးကြီးပါတယ်။ ဒီလိုအချက်တွေကို အဓိက မစစ်ဆေးနိုင်ဘူးဆိုရင် ရက် (၅၀) ကနေ (၉၀) အထိ ကြာတတ်တဲ့ ထောက်ပံ့စရိတ်ဟာ အဲ့သည်လိုအဖွဲ့တွေဆီ ရောက်နေဦးမယ်ဆိုရင် ရှေ့တန်းမှာ ခက်ခက်ခဲခဲ ရပ်တည်နေရတဲ့၊ တနည်းအားဖြင့် မိမိတို့ တပ်ရင်းအခြေစိုက်ရာ ဒေသမဟုတ်ဘဲ ရပ်ဝေးမှာ စစ်ဆင်ရေးဝင်နေရတဲ့ တပ်ရင်းတွေအတွက် ထိခိုက်နစ်နာနိုင်ပါတယ်။ ဖြစ်သင့်တာက ခရိုင်တခုမှာ တပ်ရင်းပေါင်း (၄၀) လောက် ရှိနေရမယ့်အစား စနစ်တကျ လက်နက်ခဲယမ်း တပ်ဆင်ထားပြီး အုပ်ချုပ်ထောက်ပံ့မှုကောင်းတဲ့ စစ်ပုံကျတဲ့ အထူးစစ်ကြောင်း (၅) ကြောင်းစီလောက် ခွဲပြီး တိုက်ရင်ကို စစ်ကောင်စီ တော်တော် အထိနာမှာပါ။ (ဒါက ပုဂ္ဂလိကအမြင်ပါ)

တပ်ရင်းတွေကို ကွပ်ကဲဖို့ဆိုတာ အဓိကလိုတာက အုပ်ချုပ်ထောက်ပံ့မှုပါ၊ နောက်တခုက စစ်တိုက်ဖို့အတွက် စစ်ရေးစွမ်းရည် ကောင်းမွန်တဲ့ စစ်ခေါင်းဆောင်တွေပါ၊ ဒီနေရာမှာ PDF တွေရဲ့ စစ်ရေးကဏ္ဍအတွက် စစ်ရေးဝါရင့်ပြီးသား EAOs တွေကနေပြီးတော့မှ တာဝန်ယူထားတယ်လို့ နားလည်ထားနိုင် ပါတယ်။ ဒါကလည်း အချိန်တခုအထိတော့ လက်ခံလို့ ရကောင်းရနိုင်ပေမယ့် PDF တွေထဲကနေပြီးတော့မှ စိတ်ဓာတ်၊ စည်းကမ်း ကောင်းမွန်တဲ့ စစ်ခေါင်းဆောင်ငယ်တွေ မွေးထုတ်ရပါမယ်။

ဒီခေါင်းဆောင်ငယ်တွေကနေပြီးတော့မှ အရပ်သားအစိုးရ အုပ်ချုပ်မှုကို လက်ခံလိုက်နာမယ့် အနာဂတ် ဖက်ဒရယ် တပ်မတော်အတွက် အမြုတေ စစ်ဘက်ဆိုင်ရာ ခေါင်းဆောင်တွေအထိ အဆင့်ဆင့် တက်လှမ်းသွားရမှာ ဖြစ်ပါတယ်။ တဖြည်းဖြည်းနဲ့ PDF ထဲကနေပြီးတော့မှ ဒုရင်းမှူး၊ တပ်ရင်းမှူးကနေစလို့ ခရိုင်ကွပ်အထိပါ ထပ်တိုး တာဝန်ယူလာနိုင်တာကို တွေ့လာရတာလည်း အားတက်စရာပါ။

အစောပိုင်းမှာ မဟာမိတ် EAOs တွေအနေနဲ့ PDF ဖြစ်လာမယ့် လူငယ်တွေကို စစ်ရေးဆိုင်ရာ ကိစ္စရပ်များကို ကောင်းမွန်စွာ လေ့ကျင့် သင်ကြားပေးနိုင်ခဲ့ပေမယ့် စစ်တပ်တခုအတွက် အရေးကြီးဆုံး မေးခွန်းတွေဖြစ်တဲ့ ငါတို့ ဘာအတွက် တိုက်ရသလဲ၊ ငါတို့ရဲ့ စံတန်ဖိုးတွေဟာ ဘာတွေဖြစ်သလဲ စတဲ့ နိုင်ငံရေး ခံယူချက်တွေကိုကျတော့ NUG/MOD ကနေပြီးတော့မှ ဗဟိုချုပ်ကိုင်မှုကနေ စနစ်တကျ ထည့်သွင်းနိုင်မှု အားနည်းခဲ့တယ်လို့ ဆိုရမယ်။ ဒါပေမယ့် ဒီကွက်လပ်တွေကို သက်ဆိုင်ရာ တပ်ရင်းတပ်ဖွဲ့ ခေါင်းဆောင်တွေ မြေပြင် နိုင်ငံရေးရပ်ဝန်းတွေကနေပြီးတော့မှ အတိုင်းအတာတခုအထိ တည့်မတ် အောင် လမ်းညွှန် ထိန်းကျောင်းပေးနိုင်ခဲ့တယ်လို့ ယူဆရမှာ ဖြစ်ပါတယ်။

ဒီလို ဖြစ်မှလည်း ကျနော်တို့ နားလည်ထားတဲ့ ပြည်သူကို တကယ်ချစ်မြတ်နိုးစိတ်နဲ့ ပြည်သူ့အတွက် စွန့်လွှတ်စွန့်စားမယ့်၊ ပြည်သူကို ကာကွယ်စောင့် ရှောက်မယ့်၊ ပြည်သူကို ဘယ်တော့မှ သေနတ်ပြောင်း ပြန်မလှည့်မယ့် ပြည်သူချစ်တဲ့ ပြည်သူ့ကာကွယ်ရေး တပ်မတော်သားတွေ ဖြစ်လာမယ်လို့ နားလည်ထားပါတယ်။

လက်နက်အားနဲ့ ဘာမဆို ငါတို့လုပ်နိုင်တယ်ဆိုတဲ့ အတွေးပေါ်လာတိုင်းမှာ ဒီမိုကရေစီအရေးအတွက် ငါတို့တိုက်နေရတဲ့ စစ်ကောင်စီဟာ တိုင်းပြည်ကို လက်နက်အားကိုးနဲ့ နှစ်ပေါင်း (၇၀) ကျော် ဓားမိုးပြီး မတရား အုပ်ချုပ်နေတယ်ဆိုတာ သတိရပေးပါ။

စစ်တပ်တခုမှာ အရေးကြီးဆုံးဖြစ်တဲ့ COC နှစ်ရပ် – Code of Conduct နဲ့ Chain of Command ကိုလည်း တပ်သားတိုင်း နားလည်သဘောပေါက်နေရမှာ ဖြစ်ပါတယ်။ ကျင့်ဝတ်ကောင်းမှ အမိန့်နာခံမှုကောင်းတဲ့ တပ်သားကောင်းတွေ ဖြစ်လာမှာပါ။

ဒီနေရာမှာ ရဲဘော်တွေကိုပဲ စစ်ပုံကျနေစေရုံ၊ စည်းကမ်းလိုက်နာစေရုံနဲ့ မရပါဘူး။ ရဲဘော်တွေကို ကွပ်ကဲအုပ်ချုပ်မယ့် အရာရှိအဆင့်ဆင့် (တပ်ခွဲမှူးကနေအထက်) ကလည်း စည်းကမ်းရှိပြီး စံပြဖြစ်အောင်၊ အစဉ်မပြတ် လေ့လာသင်ယူနေရမှာဖြစ်သလို အောက်လက်ငယ်သားတွေကိုလည်း ဗြူရိုကရက်ဆန်ဆန် အထက်အောက် ပုံစံထက်၊ မိမိ ရဲဘော်ရဲဘက် ဆွေးမျိုးရင်းချာကဲ့သို့ တန်ဖိုးထားရပါမယ်။ ရဲဘော်တွေရဲ့ အခြေခံလိုအပ်ချက်တွေကို အကုန် မဖြည့်ဆည်းပေးနိုင်ရင်တောင်မှ ပစ်ထားတယ်ဆိုတဲ့ ခံစားချက်မရအောင် အတတ်နိုင်ဆုံး ကြိုးစားပေးရပါမယ်။

ဒီလို အခြေခံအချက်တွေက စလို့ အဆင့်ဆင့် စနစ်တကျ တည်ဆောက်နိုင်မှပဲ ကျနော်တို့လိုချင်တဲ့ ပရော်ဖက်ရှင်နယ် တပ်မတော်၊ တနည်းအားဖြင့် နိုင်ငံရေးနဲ့ အုပ်ချုပ်ရေးတွေမှာ ဝင်မရှုပ်တဲ့ တိုင်းပြည်ရဲ့ ကာကွယ်ရေးကဏ္ဍကိုသာ ဦးတည်ဆောင်ရွက်မယ့် တပ်မတော်တခုအဖြစ် ပုံပေါ်လာမှာဖြစ်ကြောင်း တင်ပြလိုက်ရပါတယ်။