Prayers For Bobby (2009)

ချစ်သား ဘော်ဘီ … အခုနေ ဘာများ လုပ်နေသလဲကွယ်။ ပိုလန်နိုင်ငံဆီ သားရဲ့ စိတ်အခြေအနေကို ကုတဲ့သဘောနဲ့ ခဏအပန်းဖြေသွားတာ အဆင်များပြေရဲ့လား။ ပိုလန်က သားရဲ့ညီမဝမ်းကွဲကရော သားအပေါ် ကောင်းကောင်းမွန် မွန် ဆက်ဆံရဲ့လား။ မေမေကတော့ သားရဲ့အခြေအနေ ကောင်းမွန်လာတာကိုပဲ မြင်ချင်တယ်ကွယ်။ သားဆီက သတင်းကောင်းကြားရဖို့ မေမေ စောင့်မျှော်နေမယ်ကွယ်။ ဒီလိုမှမဟုတ်ဘဲ သားသဘောအတိုင်း လုပ်ချင်ရာတွေတော့ လုပ်မနေလောက်ပါဘူးနော်။ ကျေးဇူးပြုပြီး မလုပ်လိုက်ပါနဲ့နော် သား။ ဒါဟာ သားကို မေမေချစ်လို့။ သားကို မေမေနဲ့ အရမ်း နီးနီးစပ်စပ် နေစေချင်လို့။ သားကို မေမေ့ရင်ခွင်ထဲ ထွေးပိုက်ထားချင်လို့။ သားသာ မေမေမသိအောင် လုပ်ချင်ရာတွေလုပ်နေရင် မေမေနဲ့သား အဝေးကြီး ဝေးသွားလိမ့်မယ်ကွယ်။ အို ဘုရားသခင်။ နိမိတ်မကောင်းလိုက်တာ။ စက်ချုပ်ရင်း သားအကြောင်းတွေးနေတဲ့ မေမေ့လက်ကို အပ်စူးသွားပြီသား။

*****

ချစ်သား ဘော်ဘီ … သားရဲ့ ဒိုင်ယာရီစာအုပ်လေးကို မေမေ ဖတ်ခွင့်ရခဲ့တယ်ကွယ်။ ဒီဒိုင်ယာရီစာအုပ်လေးဟာ တနေ့တုန်းဆီက သားရဲ့အဖွားမွေးနေ့မှာ သားရဲ့အမက အဖွားအတွက် မွေးနေ့လက်ဆောင်ပေးခဲ့တဲ့ စာအုပ်လေးမဟုတ်လား။ အဖွားက မလိုချင်ဘူးပြောလို့ သားရဲ့အမက စေတနာကို အသိအမှတ် မပြုရကောင်းလားဆိုပြီး စိတ်ကွက်သွားခဲ့သေးတယ်လေ။ အဖွားလို အသက်အရွယ် ကြီးရင့်နေသူအတွက်တော့ ဒိုင်ယာရီစာအုပ်လေးက လိုအပ်ချင်မှ လိုအပ်မပေါ့။ သားက သားအမ ကျေနပ်အောင် တပတ်အတွင်း အပြည့်ရေးပါ့မယ်လို့ ကတိပေးလိုက်လို့ သားပိုင်ဆိုင် ခွင့် ရသွားခဲ့တယ်လေ။ ဒိုင်ယာရီစာအုပ်လေးဟာ သားအတွက် သိပ်လိုအပ်ခဲ့မယ်လို့ မေမေတောင် မတွေးမိဘူးကွယ်။ သားကို တမ်းတစိတ်နဲ့ သားရဲ့အခန်းထဲ ဝင်မိရင်းက သားစာအုပ်လေးကို တွေ့ခဲ့ရတာပါ။ အို သားရင်ထဲက ခံစားချက်တွေက နင့်နဲလှချေလား။ ထို့အတူပဲ သားခံစားချက်တွေကို သိလိုက်ရတော့ မေမေ့ရင်ထဲလည်း နင့်နင့်နဲနဲခံစားရတယ်ကွယ်။

ချစ်သား ဘော်ဘီ … သားရေးတဲ့ စာသားလေးက …

“ရေအောက်ထဲက သဲမှုန်လေးတွေလို ကျနော့်ဘဝလေးဟာလည်း နစ်မြုပ်နေခဲ့တယ်” တဲ့။ အဲဒီစာသားလေး တကြောင်းနဲ့တင် မေမေ့ရင်တွေ အစိပ်စိပ်အမြွှာမြွှာ ကွဲကြေရပါတယ်။ အမေဖြစ်ပြီး သားရဲ့ခံစားချက်ကို မရိပ်မိရကောင်းလားဆိုပြီး မေမေ့ကိုယ်မေမေ အပြစ်တင်မိတယ်။ မိခင်တိုင်းဟာ ကိုယ့်သားသမီး ပျော်ရွှင်တာကိုပဲ မြင်လိုပါတယ်သား။

“ကျနော်လေ ကျောက်ဆောင်တွေအောက်မှာ တွားသွားပြီး တသက်လုံး အိပ်ပျော်နေပါရစေလို့ အကြိမ်ကြိမ် ဆုတောင်းနေမိတယ်”

အဲဒီစကားသာ မေမေ့ရှေ့မှာ သားကိုယ်တိုင်ပြောခဲ့ရင် သားကို မေမေ ရိုက်နှက်မိမလားပဲ။ ဒီစကားဟာ ဘယ်လိုမှ မပြောသင့်တဲ့စကားလေ။ သားကို မေမေမွေးထားတာက ကျန်းမာ လူလားမြောက်စွာ ပျော်ပျော်ရွှင်ရွှင် အသက်ရှင် နေထိုင်သွားဖို့ပါသား။

“ဘယ်သူကမှ ကျနော့်ကို နားလည်မပေးကြဘူး။ အိမ်ကလူတွေအကုန်လုံး တယောက်မှ ကျနော့်ဘက်က ရပ်တည်မပေးကြဘူး။ အိမ်ကလူတွေကသာ နားလည်မပေးတာ ဘုရားသခင်ကတော့ ကျနော့်ကို နားလည်စွာနဲ့ သနားတဲ့ မျက် လုံးတွေနဲ့ ကြည့်နေမယ်လို့ ကျနော်ယုံကြည်တယ်။ ကျနော်က ယောက်ျားမဟုတ်ဘူးဆိုတာ သူများတွေကို မသိစေချင်ဘူး။ သူတို့တွေ အရမ်း အရှက်ရစေလိမ့်မယ်။ သူငယ်ချင်းတွေက ကျနော့်ကို မုန်းကြလိမ့်မယ်။ ကျနော်က ကျနော့်မိသားစုကို ခေါင်းမော့ ရင်ကော့စေချင်တာပါ။ သူတို့က ဂေးတွေကို ရွံမုန်းတယ်လို့ပြောကြတယ်။ သူတို့တင်မကဘူး။ ဘုရားသခင်ကလည်း မုန်းတယ်တဲ့”

အို ချစ်သား ဘော်ဘီ။ အဲဒီလို ဖြစ်သွားခဲ့သလားကွယ်။ တကယ်ကလေ မေမေတို့က သားကောင်းဖို့အတွက်လို့ ထင်ခဲ့မိတာပါ။ ဒါဟာ တအိမ်သားလုံးက သားကို သိပ်ချစ်လို့ပါကွယ်။ အို ဒီစာကိုရေးထားတဲ့ သားရဲ့ရက်စွဲကို ကြည့်ပါဦး။ သားရဲ့ နောက်ဆုံးရက်နဲ့ အဝေးကြီး ဝေးကွာလိုက်တာ။ ဒါဖြင့် သားဟာ သားအကြောင်း အစောကြီးကတည်းက ရိပ်မိနေခဲ့တာပေါ့။ အဲဒီအချိန်တွေအတွင်းမှာ သား ဘယ်လောက် စိတ်ဆင်းရဲခဲ့ရမလဲ။ သူများတွေ သိသွားမှာစိုးလို့ ဖုံးဖုံးဖိဖိနေခဲ့ရတာ ဘယ်လောက် ပင်ပန်းလိုက်ခဲ့မလဲ။ သားကိုယ်သား ဘယ်လိုများ သိခဲ့ပါလိမ့်။ မေမေ သိချင်စမ်းပါဘိ။ သား ပထမဆုံး စိတ်ဝင်စားခဲ့တဲ့ယောက်ျားဟာ၊ သားကို ဂေးတယောက်ပါလို့ သားကိုယ်သား ရိပ်မိသိရှိစေခဲ့တဲ့ ယောက်ျားဟာ ဘယ်သူများပါလိမ့်ကွယ်။ ကျောင်းတက်ရင်းများ တွေ့ခဲ့လေသလား။ ဒါမှမဟုတ် မေမေမသိအောင် ဘုရားကျောင်းသွားမယ်ဆင်ခြေနဲ့ ဂေးကလပ်တွေထဲ ဝင်နေတုန်းက တွေ့ခဲ့လေသလား။ အို ဒါဖြင့် သားက ယောက်ျားချင်း နမ်းခဲ့မှာပေါ့။ မေမေ့သားဟာ သိပ်ချောသိပ်လှတဲ့ ကောင်လေးလေ။ သားကိုချစ်တဲ့၊ နမ်းတဲ့ဂေးတွေလည်း ပလူပျံနေမှာပါပဲ။ မေမေသိတာပေါ့။

ချစ်သားဘော်ဘီ … သားအကြောင်းကို သားအကိုဆီက ကြားသိခဲ့ရတယ်။ မေမေ့ကို အရင်ဆုံး ရင်မဖွင့်နိုင်ဘဲ အကို့ဆီကို အရင်ဆုံး ရင်ဖွင့်ရလောက်အောင် မေမေ့ကို သား သိပ်ကြောက်နေခဲ့မှာပေါ့နော်။ သားကြီးဆီက သားအကြောင်းကို ကြားကြားချင်း မေမေ ရူးမတတ် ခံစားခဲ့ရပါတယ်ကွယ်။ မေမေ့ကို အတ္တကြီးတယ်ဆိုချင်ဆို မေမေ လုံးဝ လက်မခံနိုင်ဘူး သား။ သားကို မေမေမွေးထားတာက ယောက်ျားစစ်စစ်တယောက်အဖြစ်နဲ့ အသက်ရှင်ရပ်တည်တာကိုပဲ မြင်ချင်တာပါ။ ပြီးတော့ ဘုရားသခင်ကပါ လိင်တူချစ်တာကို မနှစ်မြို့ဘူးလို့ ကျမ်းစာလည်း ရေးမှတ်ထားခဲ့သေးတယ်လေ။ လိင်တူချစ်တာ အပြစ်ပါတဲ့။ ဘုရားသခင်က သားကိုအပြစ်ပေးတာ မေမေမမြင်ရက်ဘူး။ သားကို ဘုရားသခင်ပေးမယ့် အပြစ်ကနေ လွတ်မြောက်စေချင်တယ်။ လွတ်မြောက်ဖို့အတွက် မိခင်တယောက်အနေနဲ့ လုပ်သင့်လုပ်ထိုက်တာကို မေမေလုပ်ရမှာပဲသား။ ဒါ့ကြောင့် မေမေပြတ်သားစွာ ပြောခဲ့တယ်။ “မေမေတို့ မိသားစုထဲမှာ ဂေးမရှိဘူး” လို့ပေါ့။ ဒါကို အတ္တကြီးတယ်ဆိုချင်ဆို မေမေ့ရဲ့ စေတနာအတ္တပါကွယ်။ သားကတော့ သိပ်ဝမ်းနည်းသွားခဲ့မှာပေါ့နော်။ ဆောရီးနော် သား။ မေမေ့စေတနာကို တနေ့ သားနားလည်လာမှာပါ။ ဒါပေမယ့် သား​လေးရယ် …

ချစ်သား ဘော်ဘီ … “မေမေတို့မိသားစုမှာ ဂေးမရှိဘူး။ ဂေးတွေကို မုန်းတယ်။ ဘုရားသခင်ကလည်း မုန်းတယ်တဲ့။ အဲလိုပြောတဲ့အချိန်ဆို ကျနော် အရမ်းကြောက်တယ်။ ဘာလို့ဆို ကျနော့်အကြောင်းတွေ လူတိုင်းက ပြောနေကြလို့။ အပြောခံရတာ ကျနော် သိပ်ရှက်တာပဲ။ မျက်နှာမဖော်ဝံ့ဘူး။ မခံစားနိုင်ဘူး။ မခံစားနိုင်တော့တဲ့အဆုံး ကျနော်မကောင်းတာကို မလုပ်ချင်ပါဘူး။ ဒါပေမယ့် …” တဲ့။ သားရေးလိုက်တဲ့ စာသား။ အို သားသိပ်မိုက်ပါလား။ မေမေ့စေတနာအတ္တတွေကိုမှ မရိပ်မိဘဲ မကောင်းတာကို မလုပ်ချင်ဘူးလို့ပြောတဲ့ သားရဲ့စကားက သိပ်ကို ပျော့ညံ့ပါလားကွယ်။ မေမေ ဗိုက်အနာခံပြီး မွေးပေးထားတာမှမထောက် သား ပြောရက်လိုက်တာ။ သားအကြောင်း လူတွေက ပြောကြမှာပေါ့ကွယ်။ သားရဲ့ ကျောင်းနေဖက်တွေကလည်း သားကို အ​ြေ-ာက် လို့ တီးတိုးလှောင်ကြသလို ”အ​ြေ- ာက် လို့ လူကြားထဲလည်း လှောင်ပြောင်ကြသေးသတဲ့။ ကလပ်ထဲမှာရောပေါ့။ သားကြီးဆီက မေမေကြားခဲ့ရတာပါ။ သား ရှက်နေမှာပေါ့နော်။ အရှက်မဲ့တဲ့လုပ်ရပ်ကို သားကလုပ်တော့ ရှက်ရမှာပေါ့။ သားသူငယ်ချင်းတွေမှ မဟုတ်ဘူး။ မေမေ့သူငယ်ချင်းတွေကလည်း လှောင်ပြောင်ကြသေးတယ်ကွယ်။ မေမေ့သားက ​ြေ-ာက် နေသတဲ့။ ယောက်ျားဖြစ်ပြီး ယောက်ျားတွေကို စိတ်ဝင်စားနေသတဲ့။ သားရဲ့ ဝတ်ပုံစားပုံကလည်း နွဲ့ဖတ်ဖတ်နိုင်လိုက်တာတဲ့။ လမ်းလျှောက်ပုံ ခါးထောက်ပုံတွေကလည်း တကယ့်မိန်းမကြီးအတိုင်းပဲတဲ့။ မေမေ့ရှေ့မှာ မပြောကြပေမယ့် သူတို့မျက်ဝန်းတွေကြည့်ရုံနဲ့ မေမေသိနေပါတယ်။ ဒါ့ကြောင့် သားကို မေမေ့သူငယ်ချင်းတွေရှေ့မှာ ဒါဟာ ငါ့သားဆိုပြီး ဂုဏ်ယူဝံ့ကြွားပြီး မပြောရက်တော့ဘူး။ မေမေ သိပ်ရှက်တယ်သား။ သားလုပ်ရပ်ကြောင့် သားလည်း အရှက်ရသလို မေမေပါ အရှက်ရတယ်ကွယ်။ သားက ယောက်ျားလိုမှမနေဘဲ။ ယောက်ျားက ယောက်ျားလိုနေစမ်းပါကွယ်။ ယောက်ျားက မိန်းကလေးကိုကြိုက်ရမယ်၊ မိန်းကလေးက ယောက်ျားကိုကြိုက်ရမယ်၊ ဒါက သဘာဝလေ သား။ သားက ခေတ်ပညာတတ်တယောက်ပဲ၊ ဒါလောက်လေးတောင် ကိုယ့်ကိုယ်ကို မတွေးတတ်ဘူးလား။

ချစ်သား ဘော်ဘီ … သားက သားပြောတဲ့အတိုင်း မကောင်းမှုကို တကယ်လုပ်သွားခဲ့တာပဲနော်။ သားသတင်းကိုကြားကြားချင်း မေမေ့ကမ္ဘာကြီး ပြိုပျက်သွားသလိုပါကွယ်။ သားကသာ မေမေ့စေတနာတွေကို နားမလည်တာ မေမေ့သူငယ်ချင်းတွေကတော့ မေမေ့ခံစားချက်ကို ရိပ်မိကြတယ်ကွယ်။ သားသတင်းကို ကြားကြားချင်း ရူးမတတ်ဖြစ်နေတဲ့ မေမေ့ကို လုပ်ချင်ရာတွေ လုပ်မိမှာစိုးလို့ အခန်းထဲမှာ လှောင်ပိတ်ထားခဲ့ကြတယ်။ သူတို့နားလည်တာရဲ့ မြူတမှုန်စာလောက် သားနားလည်ခဲ့ရင် သိပ်ကောင်းမှာပဲ။ အခုတော့ ဘာတတ်နိုင်တော့မလဲကွယ်။ သားကဖြင့် မေမေနဲ့ အဝေးတကာ့အဝေးကြီးမှာ ရောက်သွားခဲ့ပြီလေ။ ခုချိန်ဆို ဘုရားသခင်က သားကို ဒဏ်များခတ်နေပြီလား။ မေမေ့ရင်တွေ နာလိုက်တာ။ သားက မကောင်းမှုကို ရွေးချယ်မှတော့၊ မေမေ့စေတနာတွေကိုလည်း နာမလည်မှတော့ ဘုရားသခင်ရဲ့ ဒဏ်ခတ်ခြင်းကို ခံရပြီပေါ့။

ချစ်သား ဘော်ဘီ … သားအတွက် ဝတ်ပြုဆုတောင်းနေ့က ပိုလန်က သားရဲ့ညီမရယ် သားရဲ့ချစ်သူရယ် လာကြသလေ။ မေမေလေ နောင်တအကြီးအကျယ်ရတယ်။ သားရဲ့စကားကို မေမေ အယုံကြီး ယုံခဲ့မိတယ်။ သားက ပိုလန် သွားပြီး သားရဲ့စိတ်ကို ပြုပြင်ရင်း အပန်းဖြေသွားမယ်ဆိုလို့ သားကို မျှော်လင့်ချက်အပြည့်နဲ့ မေမေလွှတ်လိုက်မိတာ။ သား ညီမဝမ်းကွဲရဲ့ စကားကိုလည်း မေမေ မယုံလိုက်သင့်ဘူး။ ကောင်မက ပိုလန်မှာ ခဏနေရင် သားရဲ့စိတ်အတွက် အထောက်အကူဖြစ်မှာ အသေအချာပဲတဲ့။ ကောင်မက သားရဲ့စိတ်ကို အထောက်အကူဖြစ်အောင် လုပ်ပေးမယ့်အစား ပိုပိုပြီးဆိုးအောင် လုပ်ပေးခဲ့တယ်မလား။ ဘုရားကျောင်းလည်း မသွားဘူးတဲ့။ ဂေးတွေပဲရှိတဲ့ကလပ်ထဲ လိုက်ပို့သတဲ့။ သူ့ရဲ့ဂေးသူငယ်ချင်းနဲ့ သားကို မိတ်ဆက်သတဲ့။ သားနဲ့အဲဒီကောင် ချစ်သူတွေဖြစ်သွားသတဲ့။ ချစ်သူရဲ့မိဘတွေက သူတို့သား ဂေးဖြစ်နေတာကို နားလည်လက်ခံပေးသတဲ့။ သားသမီးကို ဘယ်လိုမွေးထားတဲ့ မိဘတွေလည်းမသိပါဘူး။ စိတ်ပျက်ဖို့ကောင်းလိုက်တာ။ သားရဲ့မိဘတွေက သား ဂေးဖြစ်နေတာကို လက်မခံလို့ သူတို့သားနဲ့ သားကို သဘောမတူနိုင်ဘူးဆိုလားပဲ။ ပိုလန်ကညီမက မေမေ့ကို ပြောပြခဲ့သလေ။ ဒါဟာ အန်တီ့ရဲ့ အတ္တတွေကြောင့်ဖြစ်ရတာတဲ့။ တော်တော်ဆိုးတဲ့ကောင်မပဲ။ သူ့အပြစ်သူမမြင်ဘဲ မေမေ့ကို လာအပြစ်တင်နေတယ်။ ဟိုကောင်ကလည်း တော်တော်ပွေရှုပ်မဲ့ပုံပဲ။ မျက်နှာကြည့်ရတာနဲ့ သိသာလိုက်တာ။ သားရဲ့နောက်ဆုံးနေ့မှာ သူ့ကို မတတ်သာလို့ လက်ဆွဲနှုတ်ဆက်ခဲ့ရပေမယ့် မေမေ ရွံရှာလိုက်တာ။ ချက်ချင်း ဆပ်ပြာနဲ့ မေမေ့လက်ကို ဆေးလိုက်ရတယ်။ သူတို့တွေဟာ သားကို သေစေတဲ့သူတွေလေ။ သူတို့ကို မေမေ အရမ်းမသတီတာဘဲ။

အို ချစ်သား ဘော်ဘီ … အဲဒီနေ့လေးကို သားဒိုင်ယာရီထဲ ရေးမှတ်ထားတာပဲနော်။

“မေလ ၃၀ ရက်နေ့၊ အသားကင်လုပ်စားတဲ့နေ့လေး သိပ်ပျော်စရာကောင်းတယ်။ မေမေ့အပြုံးတွေဟာ ချိုမြနေတယ်။ ကျနော့်စကားတခွန်းကြောင့် မေမေဟာပြုံးတယ်။ မေမေဟာ ဒေါသထွက်ချင်ပေမယ့် ပြုံးပြလိုက်တာလေ။ အဲဒီအချိန် မိုးကုပ်စက်ဝိုင်းပေါ်မှာ ဘုရားသခင်ဟာ ကျနော့်ကို သနားတဲ့ပုံစံနဲ့ ကြည့်နေလိမ့်မယ်ဆိုတာ ကျနော်ကတော့ ကျိန်းသေယုံကြည်တယ်။ ဒါပေမယ့်လည်း ဘုရားသခင်ဟာ ကျနော့်ကို ကူညီနိုင်မှာမဟုတ်ဘူး။ ဘာလို့ဆို ကျနော်ဟာ အမှန်တရားထက် မိုက်မဲမှုကို ရွေးချယ်လိုက်လို့ပဲ”

အို ချစ်သား ဘော်ဘီ … သားဟာ အဆုံးထိကို ကိုယ်ယုံကြည်ရာအတွက် အသက်စွန့်သွားသလိုပါလားကွယ်။ သားပြောသလို ဘုရားသခင်ဟာ သားကို သနားတဲ့စိတ်နဲ့ ကြည့်ကောင်း ကြည့်နေနိုင်ပါတယ်။ ဘာလို့ဆို သားဟာ မိုက်မဲမှုကို ရွေးချယ်ခဲ့တယ်ဆိုပေမယ့် သားရဲ့စိတ်က အဖြူထည်လေးဆိုတာ မေမေသိနေသလို ဘုရားသခင်ဟာလည်း သိနေမှာပါပဲ။ ဘုရားသခင်ရယ် မေမေရယ်ဟာ သားရဲ့ စိတ်ကလေးကို ပြုပြင်မပေးနိုင်ခဲ့လို့ပေါ့။ ဘယ်လိုနတ်ဆိုးကများ မေမေ့သား အဖြူထည်လေးရဲ့စိတ်ထဲ ဒီလိုစိတ်ရိုင်းတွေ ထည့်သွင်းသွားခဲ့ပါလိမ့်။

ချစ်သားဘော်ဘီ … ဘုန်းတော်ကြီးနှစ်ပါးကလည်း ပြောတယ်။ ဂေးလေးတွေဟာ ဘုရားကျောင်းလိုပါပဲတဲ့။ ဒါက ဂေးလေးတွေဟာ ဘုရားကျောင်းလိုပဲ သန့်စင်မွန်မြတ်တယ်ဆိုတဲ့ သဘောပဲပေါ့။ ဟုတ်တာပေါ့။ သားဟာ စိတ်ထားမွန်မြတ်သူဆိုတာ မေမေသိထားတယ်လေ။ ပြီးတော့ ဘုရားသခင်ရဲ့ ကျမ်းစာထဲမှာ မေမေ မှတ်သားဖူးတာရှိတယ်။ “မသန့်စင်မှုတွေကို မီးကန်ထဲ ပစ်ချလို့ရတယ်” တဲ့။ သားကတော့ မကောင်းမှုတွေကို ကျူးလွန်ခဲ့ပြီးပြီမဟုတ်လား။ မကောင်းမှုကို မဆေးကြောဘဲ သားကထွက်သွားတော့ သားအပြစ်တွေ ခံရတော့မယ်။ သားအတွက် မေမေမကြည့်ရက်ဘူး။ သားကို အပြစ်ကလွတ်အောင် မေမေ ဘယ်လိုရှာကြံရမလဲ။ မေမေ စာများများဖတ်ပြီး လေ့လာရမယ်။ တိုက် ဆိုင်စွာပဲ စာအုပ်ကြားထဲက လိပ်စာကတ်လေးတခုက မေမေ့လေ့လာမှုအတွက် အထောက်အကူတခု ဖြစ်စေခဲ့တယ်။

ချစ်သား ဘော်ဘီ … သားကောင်းဖို့အတွက် လိပ်စာထဲကအတိုင်း မေမေ အရောက်သွားခဲ့တယ်။ ဝိုး အဲဒီမှာ သားနဲ့အမူအရာတူတဲ့ ကောင်လေးတွေ အများကြီးပဲ။ ဒါဖြင့် ဂေးလေးတွေချည်းပဲပေါ့။ မေမေ့အသိ ဘုန်းတော်ကြီးတပါးကိုတွေ့လိုက်ရတော့ မေမေသိချင်တာကို အငမ်းမရ မေးလိုက်မိတယ်။

“ကျမ်းစာထဲမှာ လိင်တူချစ်တာကို သေဏ်အထိ အပြစ်ပေးလို့ရတယ်တဲ့။ အဲဒါကို ဘုန်းတော်ကြီးယုံလားဟင်”

“တခြား အဓိပ္ပါယ်ဖွင့်ဆိုချက်တွေလည်း ရှိပါသေးတယ်” တဲ့။ ဘုန်းတော်ကြီးက မေမေ့အမေးကိုမဖြေဘဲ မေမေဖြေသာစေမယ့်စကားကို ပြောလိုက်တော့ မေမေ ဝမ်းသာချင်ပေမယ့် ဝမ်းမသာရဲသေးဘူး။

“ကျမသားက လိင်တူ စိတ်ဝင်စားတယ်။ မကြာသေးခင်ကပဲ သူ့ကိုယ်သူ သတ်သေသွားခဲ့ပြီ။ အဲဒါ သားကို အပြစ်ကလွတ်အောင် ကျမ ဘယ်လိုလုပ်ရပါ့မလဲ။ အခုလောက်ဆို ကျမသား ဘယ်လိုဖြစ်နေမလဲ ကျမ သိပ်သိချင်တယ်။ ကျမသားနာမည်က ဘော်ဘီပါ” လို့ ဆိုလိုက်တော့ သားကို ဘုန်းတော်ကြီးက သိသတဲ့။ သားလည်း ဘုရားကျောင်းကို လာနေကျဆိုပဲ။ အို မေမေ့သားလေးက လိမ္မာလိုက်တာ။ ဒါဖြင့် သားကိုယ်သား အပြစ်ကလွတ်အောင် ကြိုးစားခဲ့သေးတာပေါ့နော်။

“ကျမ သိပါရစေ။ လိင်တူစိတ်ဝင်စားတာက အပြစ်ကနေ ခွင့်လွှတ်လို့မရလောက်အောင် အပြစ်ကြီးသလားဟင်”

မေမေ ဖတ်မှတ်လေ့လာခဲ့တဲ့ စာပိုဒ်တွေကို မေမေ ရွတ်ပြလိုက်တယ်။

“တခြားစာပိုဒ်တခုမှာတော့ ယောက်ျားတယောက်ဟာ တခြားယောက်ျားတယောက်နဲ့ အတူနေရင် မနှစ်သက်စရာဖြစ်တယ်တဲ့။ အဲဒါ သေဒဏ်ပေးလို့ရတယ်လို့ ဆိုမထားဘူးနော်။ အဲဒီတော့ ကျမရဲ့ဘော်ဘီလည်း …”

“ကိုယ်တော်ရဲ့စာပိုဒ်မှာကျတော့ လက်ထပ်တဲ့နေ့မှာ မိန်းကလေးတယောက်ဟာ အပျိုမဟုတ်တော့ဘူးဆိုရင် သူ့မိဘအိမ်ကနေ အပြင်ခေါ်ထုတ်ပြီး ကျောက်ခဲနဲ့ ထုသတ်လို့ရသတဲ့ …”

အို ကြောက်စရာပါလား။ ဒါဟာ အပြစ်ကျူးလွန်းပြီးတဲ့ သားကိုလည်း အပြစ်ပေးလို့ ရတယ်ဆိုတဲ့သဘောပေါ့။ သားကို မေမေ ဘယ်လို ကယ်တင်ရမလဲကွယ်။

“ဒါဖြင့် ဒီမှာရောက်နေတဲ့ ဂေးတွေကို ဘယ်လို နှစ်သိမ့်ပေးမလဲဟင်။ ဘုရားသခင်ဟာ မြင့်မြတ်ပါတယ်။ ကျေးဇူးပြုပြီး အပြစ်ကလွတ်အောင် ကယ်တင်ပေးပါလား။ ကျမသားအပါအဝင် ဒီကဂေးတွေ အားလုံးကိုရောပေါ့”

***

ချစ်သား ဘော်ဘီ … ဘုန်းတော်ကြီးပြောတဲ့စာပိုဒ်ကို မေမေ ရှာတွေ့ခဲ့တယ်။ ဒါတွေ အပူတပြင်းလေ့လာနေတဲ့ မေမေ့ကို သားဖေဖေကတောင် ဆူသေးတယ်။ “မင်းသာ အစောကြီးကတည်းက နားလည်ပေးခဲ့ရင် ငါ့သားလည်း ဆုံးရှုံးရမှာမဟုတ်ဘူး။ မင်း ဒီလိုတွေ ဆက်လုပ်နေတော့ရော ငါ့သားက အသက်ပြန်ရှင်လာမှာမို့လား” တဲ့။ ဒေါသတကြီးနဲ့ပါပဲ။ သားဖေဖေဟာ ဘာကြောင့် မေမေ့ကို အော်ရသလဲကွယ်။ မေမေဟာ သားကောင်းဖို့အတွက် လုပ်နေတာ သူမသိရှာဘူးလား။ ဘာကြောင့် မေမေ့စေတနာကို နည်းနည်းလေးတောင် အသိအမှတ်မပြုကြတာလဲ။ မေမေ တကယ် ဝမ်းနည်းမိတယ်ကွယ်။

ချစ်သား ဘော်ဘီ … ဘုန်းတော်ကြီးပြောတဲ့ စာပိုဒ်တွေဟာ သိပ်ကို လေးနက် ရှုပ်ထွေးလှတာပဲ။ မေမေ ဘုန်းတော်ကြီးကိုပြေးတွေ့ပြီး စာပိုဒ်ကအကြောင်းတွေ အပြင်းအထန် ဆွေးနွေးလေ့လာကြတယ်။ မေမေတို့ လိုချင်တဲ့ အဖြေ မရခဲ့ကြဘူး။ ဒါ့ကြောင့် ဝမ်းနည်းစွာ ဆိုလိုက်မိတယ်။ သားဟာ ဘုရားသခင်ရဲ့ချစ်ခြင်းကို မရနိုင်တော့ဘူးလို့ပေါ့။ ရှိုက်ကြီးတငင်ငိုနေတဲ့ မေမေ့ကို ဘုန်းတော်ကြီးက နေရာတခုထံ သွားလေ့လာဖို့ ညွန်းလိုက်ပြန်သေးတယ်။

ချစ်သား ဘော်ဘီ … ဘုန်းတော်ကြီးညွှန်ပြရာဆီ မေမေ ရောက်ခဲ့သေးတယ်ကွယ်။ အဲဒီမှာ လိင်တူချစ်သူတို့ရဲ့မိဘတွေ အများကြီးမှ အများကြီးပါပဲ။ မိဘတွေဟာ သူတို့ သားသမီးတို့ရဲ့အကြောင်း ရင်ဖွင့်ပြောပြနေကြတယ်။ မေမေကတော့ တိတ်တဆိတ်လေး နားထောင်နေတာပေါ့။ သူတို့သားလေးဟာလည်း လိင်တူချစ်သတဲ့။ ဒါကို စိတ်ရောဂါတခုခုလို့ထင်ပြီး စိတ်ပညာဆရာဝန်နဲ့ ပြသမိသေးသတဲ့။ ဆရာဝန်ဟာ နာကျင်ပြင်းထန်တဲ့ကုထုံးနဲ့ ကုသတယ်။ သားကလေး နာကျင်နေတာကို ကျနော်မကြည့်ရက်ဘူး။ ဒါ့ကြောင့် ဒီကုထုံးဟာ ရူးသွပ်တဲ့ကုထုံးလို့ ထင်မြင်မိသတဲ့။ အို တယောက်တပေါက်ပါပဲ။ အဲဒီအချိန် မေမေ့အသိ ဘုန်းတော်ကြီး ရောက်လာတယ်။ ဘုန်းတော်ကြီးကပြောတယ်။ ကျမ်းစာထဲက အစဉ်အလာကို လက်မခံဘူးတဲ့။ လိင်တူချစ်တာကို အပြစ်တခုလို့ မခံယူဘူးတဲ့။ လိင်တူလက်ထပ်ခွင့် ဥပဒေပြဌာန်းဖို့ ကောင်စီကို တင်ပြထားသတဲ့။ မဲအနိုင်ရဖို့ မျှော်လင့်မိပါသတဲ့။ ဘုန်းတော်ကြီးကတောင် ဒီလိုပြောပုံထောက်ရင် လိင်တူချစ်ခြင်းဟာ အပြစ်မရှိဘူးဆိုတာ မေမေ လက်ခံရတော့မလား ချစ်သားရေ။ ဒါဖြင့် မေမေ တကိုယ်ကောင်းဆန်ခဲ့သပေါ့။ အသိခေါက်ခက် အဝင်နက်ခဲ့သပေါ့နော်။ မေမေ့ရဲ့ ဗဟုသုတအားနည်းမှုကြောင့် မေမေ့သားကို ဆုံးရှုံးလိုက်ရသလိုပါလား ချစ်သားရေ။

ချစ်သား ဘော်ဘီ … မေမေ့အမှားကို မေမေကိုယ်တိုင် သိလိုက်ရတဲ့အခိုက်မှာ မေမေ့ကိုယ်မေမေ နာကျည်းစိတ်နဲ့ နေ့နေ့ညည ငိုနေခဲ့မိတယ်။ သားအတွက်လို့ ထင်ခဲ့မိတဲ့ မေမေ့လုပ်ရပ်တွေအကုန်လုံးကို ဖျက်ဆီးပစ်လိုက်တယ်။ မေမေနားလည်လိုက်ပါပြီ။ သားတို့လို ဂေးတွေဟာ မတူကွဲပြားနေတာလေးပါ။ မေမေ့မှာ ဒီလို မတူကွဲပြားနေတဲ့ သားလေးတယောက်ရှိတာကို မေမေ ဝမ်းသာသင့်ခဲ့တာ။ လူ့လောကမှာ လိင်ကွဲကိုချစ်တဲ့ ယောက်ျားနဲ့မိန်းမတွေရှိသလို လိင်တူကိုပဲချစ်တဲ့ ယောက်ျားတွေနဲ့ မိန်းမတွေလည်း ရှိတယ်ဆိုတာ မေမေ နားလည်လိုက်ပါပြီ။ ဒါဟာ သဘာဝဆိုတာကိုလည်း မေမေ လက်ခံလိုက်ပါပြီ။ ပြီးတော့ ဘုရားသခင်ဟာလည်း မကူညီရတဲ့အကြောင်း၊ သားကိုယ်သားလည်း အပြစ်ကနေလွတ်အောင် မကြိုးစားတဲ့အကြောင်း မေမေ သိလိုက်ပါပြီ။ ဘာလို့ဆို သားဟာ လုံးဝမမှားလို့ပေါ့။ တကယ်မှားခဲ့တာက မေမေပဲလေ။ မေမေ့သားကို မေမေသတ်လိုက်တာ။ တကယ်တမ်း ဘုရားသခင်က ဒဏ်ခတ်သင့်သူဟာ မေမေပါပဲ။ ဒါများ ဘုရားသခင်က ဘာကြောင့် မေမေ့ကို ခွင့်လွှတ်ထားရသလဲ။ သားကလည်း မေမေ့ကို ဘာကြောင့် ခွင့်လွှတ်ရသလဲ။ မေမေ့ကို တခါလောက်ဖြစ်ဖြစ် နာကျည်းစိတ်နဲ့ ကျိန်ဆဲလိုက်ပါဦးလား။

ချစ်သား ဘော်ဘီ … ဘုန်းတော်ကြီးရဲ့ မဲခွဲကောင်စီကိစ္စမှာ မေမေကိုယ်တိုင် အားပေးပါဝင်ခဲ့တယ်။ လက်မခံသူတွေ အများကြီးပါပဲ။ မေမေ့လို အသိခေါက်ခက် အဝင်နက်သူတွေပေါ့။ မေမေ အပြစ်မတင်ရက်ပါဘူး။ ကံဆိုးစွာပဲ မဲရှုံးခဲ့တယ် သား။ ဒါပေမယ့် မေမေ လက်မလျှော့ဘူး။ သားတို့လိုလူစားတွေအတွက် အားလုံးရှေ့မှာ မေမေကိုယ်တိုင် မားမားမတ်မတ် တိုက်ပွဲဝင်ပစ်လိုက်တယ်။ မေမေပြောတဲ့စကားကို သား ကြားနိုင်မယ်ဆိုရင် နားထောင်လိုက်ပါသား။

“လိင်တူချစ်တာ အပြစ်တခုပါ။ လိင်တူချစ်ရင် ငရဲမှာ အကြာကြီးခံရမယ့် အပြစ်ပါ။ ဒီအပြစ်ကို မခံယူချင်ဘူးဆိုရင် သူတို့ကိုယ်ထဲက မကောင်းဆိုးဝါးကို ဖယ်ထုတ်ပစ်ရမယ်။ လိင်တူချစ်ဖို့ မကောင်းဆိုးဝါးရဲ့ ဖျားယောင်းသွေးဆောင် မခံရရင် ပုံမှန်လူတယောက် ပြန်ဖြစ်နိုင်ပါတယ်။ ပုံမှန်လူတယောက်ဖြစ်ဖို့ ဖျားယောင်းသွေးဆောင်ခံရခြင်းမှ ကင်းလွတ်အောင် ကြိုးစားရမယ်။ ဒါဟာ ကျမသား ဘော်ဘီကို ပြောပြခဲ့တဲ့စကားတွေပါ။ ကျမသားဟာ လိင်တူချစ်တတ်သူပါလို့ ကျမကို ဝန်ခံခဲ့တဲ့အချိန်ကပေါ့။ သူဟာ လိင်တူချစ်သူဆိုတာ သိလိုက်ရတော့ ကျမရဲ့ကမ္ဘာကြီး ပြိုကွဲသွားသလိုပါပဲ။ ကျမ လုပ်နိုင်သမျှ လုပ်ခဲ့တယ်။ ကျမသားကို အဲဒီအဖြစ်က ကင်းလွတ်နိုင်အောင်ပေါ့။ လွန်ခဲ့တဲ့ (၈) လတုန်းက ကျမသားဟာ သူ့ကိုယ်သူ သတ်သေသွားခဲ့တယ်။ တံတားကြီးပေါ်ကနေ ခုန်ချပြီး (၁၈) ဘီး ကားကြီးအောက် ဝင်သွားတယ်။ ကျမကိုယ်ကျမ အရမ်းစိတ်နာမိတယ်။ ကျမမှာ လိင်တူနဲ့ပတ်သက်တဲ့ ဗဟုသုတ မရှိခဲ့လို့ပေါ့။ ကျမသာ လိင်တူနဲ့ပတ်သက်တဲ့ ဗဟုသုတတွေရှိခဲ့ရင် ကျမသားကို အားပေးမိမှာ။ အဲလိုဆို ကျမသားကိုလည်း အဆုံးရှုံးခံရမှာမဟုတ်ဘူး။ နို့မို့ဆို ကျမ ဒီနေရာမှာ နောင်တတွေနဲ့ ရပ်နေရမှာမဟုတ်ဘူး။ ကျမ လုံးဝယုံကြည်တယ်။ ဘုရားသခင်ဟာ ကျမသားကို အပြစ်ပေးမှာ မဟုတ်ဘူးဆိုတာ။ မွန်မြတ်တဲ့ဘုရားသခင်ဟာ ကျမသားကို စောင့်ရှောက်လိမ့်မယ်ဆိုတာ။ ဘော်ဘီသေရတာဟာ မိဘတွေရဲ့ လျစ်လျူရှုခံရမှုနဲ့ အ​ြေ-ာက် ဆိုတဲ့ လှောင်ပြောင်ခံရမှုတွေကို ကြောက်လို့ပါ။ သူဟာ စာရေးဆရာ ဖြစ်ချင်ခဲ့သူလေးပါ။ သူ့အိပ်မက်လေးတွေဟာ ဖြစ်ခွင့်မရတော့ဘူး။ လျစ်လျူရှုခံရမှုတွေနဲ့ လှောင်ပြောင်ခံရမှုတွေဟာ လူသတ်လက်နက်သဖွယ် ဖြစ်စေခဲ့လို့ သူ့ဘဝလေးဟာ အဆုံးသတ်သွားခဲ့ပါပြီ။ ဒါ့ကြောင့် ကျမပြောချင်တာက ရှင်တို့တတွေ လိင်တူချစ်သူတွေကို မလှောင်ပြောင်ခင်၊ မဝေဖန်ခင်မှာ သေချာစဉ်းစားကြပါ။ သူတို့လေးတွေဟာ နားထောင်နေကြပါတယ်။

ချစ်သား ဘော်ဘီ … နားထောင်နေတယ် မဟုတ်လားကွယ်။ မေမေ့စကားသံအဆုံးမှာ လက်ခုပ်သံတွေ ညံသွားခဲ့တယ်ကွယ်။ မေမေ့စကားကို သား ကြားနိုင်မယ်ဆိုရင် မေမေ့အတွက် ဂုဏ်ယူနေမယ်မဟုတ်လား သား။

ချစ်သား ဘော်ဘီ … မေမေတို့မြို့မှာ လိင်တူချစ်သူတို့ရဲ့ လမ်းလျှောက်ပွဲတော်ကြီး ကျင်းပကြတယ်ကွယ်။ မေမေတို့တမိသားလုံး လိုက်ပါအားပေးခဲ့တယ်။ လမ်းပေါ်မှာ သက်တံရောင်အလံတွေ တလူလူလွင့်နေလိုက်တာ။ လိင်တူချစ် သူများစွာလည်း ပျော်လို့ ရွှင်လို့ ကခုန်လို့ပေါ့။ ချစ်သားကိုလည်း မြင်စေချင်စမ်းပါဘိ။ တကယ်ဆိုရင် ဒီလိုပွဲတော်မှာ သားပါ လိုက်ပါအားပေးရမှာ။ မေမေ့ရဲ့ တောင့်တတဲ့စိတ်ကြောင့်လားပဲ။ ပွဲတော်မှာ သားကို မေမေရှာတွေ့ခဲ့တယ်။ သူကလေးကို မေမေ ပွေ့ဖက်နမ်းရှုံ့လိုက်မိတယ်။ ဒါပေမယ့် မေမေ လက်ခံနိုင်ပါတယ်။ မေမေ့သားဟာ ကောင်းကင်ဘုံမှာ စံမြန်းနေခဲ့ပြီလေ။

ချစ်သား ဘော်ဘီ … မေမေ ကတိပေးပါတယ်။ သားတို့လိုလူစားတွေရဲ့ ဘဝလေးကို ထာဝစဉ်အေးချမ်းအောင် မေမေအစွမ်းကုန် ကြိုးစားပေးမှာပါ။ မေမေ့သား သေဆုံးခဲ့ရတာ အလဟဿ မဖြစ်စေရဘူး။

****

သည်ဇာတ်လမ်းလေးဟာ ဖြစ်ရပ်မှန်ဇာတ်လမ်းလေး ဖြစ်ပါတယ်။ ၁၉၉၅ ဒီဇင်ဘာ ၆ ရက်နေ့မှာ ဘော်ဘီ၏ မိခင် မေရီဂရပ်ဖစ်က US လွှတ်တော်ရဲ့ အဖွဲ့ဝင်တွေရှေ့မှာ သက်သေလိုက်ပေးခဲ့တယ်။ သူမရဲ့ လိင်တူချစ်သူတို့၏ အခွင့် အရေးအတွက် အားသွန်ခွန်စိုက် ကြိုးပမ်းမှုတွေကြောင့် လူ့အခွင့်အရေးဆိုင်ရာ တိုက်ပွဲတွေအတွက် အဓိက တွန်းအားအဖြစ် သတ်မှတ်ခံခဲ့ရပါတယ်။

သည်လိုအဖြစ်အပျက်မျိုး မြန်မာနိုင်ငံမှာလည်း ရှိခဲ့ပါတယ်။ ပခုက္ကူက လိင်တူချစ်တဲ့ မောင်ကျော်ဇင်ဝင်းဆိုသူမှာ မိဘတွေရဲ့ လက်မခံမှုကြောင့် ကိုယ့်ကိုယ်ကို သတ်သေသွားခဲ့ပါတယ်။ ထို့အတူ ရန်ကုန်က ကောင်လေးတယောက် ဟာလည်း လုပ်ဖော်ကိုင်ဖက်တွေရဲ့ အွန်လိုင်းပေါ်ကနေ လှောင်ပြောင်မှုကြောင့် ကိုယ့်ကိုယ်ကို သတ်သေသွားခဲ့ပါတယ်။ ဒါ့ကြောင့် ဒီဇာတ်လမ်းထဲက မိခင် မယ်ရီဂရပ်ဖစ်က “လိင်တူချစ်သူလေးတွေကို မလှောင်ပြောင်ခင် မဝေဖန်ခင်မှာ လူသတ်လက်နက် ဖြစ်သွားစေနိုင်လို့ သေချာစဉ်းစားပါ။ သူတို့လေးတွေဟာ နားထောင်နေကြပါတယ်” လို့ ဘာကြောင့် ပြောရတယ်ဆိုတာ သိကြရောပေါ့။ ဒါ့ကြောင့် လိင်တူချစ်သူတို့ရဲ့ မိဘတွေနဲ့ လိင်တူမုန်းတီးသူတွေ ဗဟုသုတရစေရန် ကြည့်သင့်တဲ့ ရုပ်ရှင်ကားလေးတကားဖြစ်ကြောင်း ညွှန်းလိုက်ရပါတယ်။

Diretor: Russell Mulcahy

Starring: Sigourney Weaver; Henry Czerny; Ryan Kelley

Written: Katie Ford (teleplay).

Budget: $ 23 million

Release date: June 30 1995 (United Kingdom); August 25 1995 (United states)