“စစ်ရေးစစ်ရာ တလတာ”
■ နောင်လူသစ်
– ဇန်နဝါရီလ (၁) ရက်နေ့မှ ဇန်နဝါရီလ (၃၁) ရက်နေ့အထိ –
☆ ၂၀၂၅ ခုနှစ်၊ ဇန်နဝါရီလ (၁) ရက်နေ့မှ ဇန်နဝါရီလ (၃၁) ရက်နေ့အထိ တလတာအတွင်း မြန်မာနိုင်ငံတဝန်း စစ်ကောင်စီနှင့် တော်လှန်ရေးအင်အားစုများကြား လက်နက်ကိုင်တိုက်ပွဲ ကြီးငယ်ပေါင်း (၂၅၈) ကြိမ်ထက်မနည်း ဖြစ်ပွားခဲ့သည်။
☆ တလတာအတွင်း စစ်ကောင်စီက အရပ်သားပစ်မှတ်များကို လေကြောင်းတိုက်ခိုက်မှု၊ လက်နက်ကြီးဖြင့် ပစ်ခတ်မှု (၈၆) ကြိမ်ထက်မနည်း ရှိခဲ့သည်။
☆ တလတာအတွင်း စစ်ကောင်စီ၏ လေကြောင်းတိုက်ခိုက်မှု၊ လက်နက်ကြီးဖြင့် တိုက်ခိုက်မှုများကြောင့် အရပ်သားပြည်သူ (၁၅၄ )ဦးထက်မနည်း သေဆုံးခဲ့ရသည်။
☆ တလတာအတွင်း နိုင်ငံတဝန်းရှိ ပြည်နယ်နှင့် တိုင်းဒေသ (၁၄) ခုတွင် တိုက်ပွဲများဖြစ်ပွားခဲ့ပြီး မြို့နယ်အားဖြင့် (၈၀) မြို့နယ် အထိရှိသည်။
☆ တလတာအတွင်း စစ်ကောင်စီတပ်စခန်း (၁၉) ခုထက်မနည်းကို တော်လှန်ရေးအင်အားစုများက သိမ်းပိုက်နိုင်ခဲ့သည်။ ကချင်ပြည်နယ်တွင် မံစီမြို့ကို KIA က သိမ်းပိုက်နိုင်ခဲ့သည်။
☆ တနင်္သာရီတိုင်းအတွင်းရှိ တနင်္သာရီ၊ ရေဖြူမြို့နယ်များတွင် တိုက်ပွဲများပြင်းထန်နေပြီး စစ်ကောင်စီတပ်သားများ သေဆုံးထိခိုက်မှု များပြားကြောင်း သတင်းမီဒီယာများတွင် ဖေါ်ပြကြသည်။
☆ ကချင်ပြည်နယ်တွင် KIA ပူးပေါင်းတပ်များက ဗန်းမော်မြို့သိမ်းတိုက်ပွဲကို ဆက်လက်ဖေါ်ဆောင်နေပြီး တိုက်ပွဲများ ပြင်းထန်လျက်ရှိသည်။ ကချင်ပြည် နယ် ဗန်းမော်မြို့ရှိ အမှတ် (၇၀၀၆) သံချပ်ကာတပ်ရင်းနှင့် ဗန်းမော်မြို့လေဆိပ်ကို သိမ်းပိုက်ပြီး မြို့၏ နေရာအများအပြားကို KIA ပူးပေါင်းတပ်များက ထိန်းချုပ်ထားနိုင်သည်။ စစ်ကောင်စီကလည်း ဗန်းမော်မြို့ကို လက်မလွှတ်ရရေး လေကြောင်းတိုက်ခိုက်မှုများဖြင့် အပြင်းအထန် ခုခံလျက်ရှိသည်။
☆ ရခိုင်ပြည်နယ် အမ်းမြို့နှင့် ထိစပ်နေသည့် မကွေးတိုင်းအတွင်း၌လည်း တိုက်ပွဲများ ဖြစ်ပွားခဲ့ပြီး အမ်းမြို့မှ ထွက်ပြေးလာသည့် စစ်ကောင်စီတပ်သားများနှင့် တော်လှန်ရေးအင်အားစုများကြား မကွေးတိုင်း ငဖဲမြို့နယ်အတွင်း၌ ထိတွေ့တိုက်ပွဲများ ဖြစ်ပွားခဲ့သည်။
☆ ရခိုင်ပြည်နယ်နှင့် ထိစပ်နေသည့် ဧရာ၀တီတိုင်းအတွင်းရှိ ရွှေသောင်ယံ၊ ငသိုင်းချောင်း ကျေးရွာများ၌ တိုက်ပွဲများဖြစ်ပွားလာခဲ့ပြီး ရခိုင်ပြည်နယ်နှင့် ထိစပ်နေသည့် ပဲခူးတိုင်းအတွင်း မြို့နယ်များ၌လည်း တိုက်ပွဲများ ပြင်းထန်ခဲ့သည်ကို တွေ့ရသည်။
☆ စစ်ကိုင်းတိုင်းနှင့် မကွေးတိုင်းအတွင်းရှိ ကျေးရွာများကို စစ်ကောင်စီက စစ်ကြောင်းထိုးဝင်ရောက်မှုများ၊ နေအိမ်များကို မီးရှို့ဖျက်ဆီးမှုများ တိုးမြှင့်လုပ် ဆောင်လာသည်ကိုတွေ့ရသည်။
☆ စစ်ကိုင်း၊ မကွေး၊ မန္တလေး၊ ပဲခူးတိုင်းတို့တွင် တိုက်ပွဲပေါင်း (၁၁၅) ကြိမ်ထက်မနည်း ဖြစ်ပွားခဲ့သည်။
☆ သတင်းထုတ်ပြန်မှုများအရ တပတ်တာအတွင်း နိုင်ငံတဝန်း တော်လှန်ရေးအင်အားစုများ၏ တိုက်ခိုက်မှုကြောင့် စစ်ကောင်စီတပ်သား ထိခိုက်ကျဆုံးမှု (၃၈၄) ဦးထက်မနည်း ရှိခဲ့သည်။ တော်လှန်ရေးအင်အားစုများဘက်က (၂၃) ဦးထက်မနည်း သေဆုံးခဲ့သည်။
● ဖော်ပြပါ အချက်အလက်များသည် သတင်းမီဒီယာ (၁၀) ခုမှ သတင်းများကို အခြေခံ ကောက်ယူထားခြင်းဖြစ်သည်။ တိုက်ပွဲနှင့် ထိခိုက်ကျဆုံး အရေအတွက်မှာ ဖော်ပြထားသည်ထက် ပိုမို များပြားနိုင်သည်။
● စက်ဝိုင်း အရွယ်အစားသည် တိုက်ပွဲအရေအတွက်ကို ညွှန်းသည်။ စက်ဝိုင်းအရွယ်ကြီးသည်နှင့်အမျှ တိုက်ပွဲအရေအတွက် ပိုများသည်ဟု ဆိုလိုရင်းဖြစ်သည်။
Be the first to comment