The Paradise of Thorns (2024)

လိင်တူချစ်သူတိုင်းအတွက်တော့ လိင်တူလက်ထပ်ခွင့် မရသေးသရွေ့ ဘယ်အချိန်၊ ဘယ်ကာလမှာမဆို တိုက်ပွဲဝင်ကာလပါပဲ။ ဥပမာ လိင်တူချစ်သူတယောက်က ကိုဗစ်ကာလအချိန်၊ တိုင်းပြည် စစ်ဖြစ်နေသည့်အချိန်မျိုးမှာ LGBTIQ လောကကြီးအကြောင်း ဝါဒဖြန့်နေသည့်အတွက် အထူအပါး နားမလည်ရကောင်းလားဆိုပြီး၊ အရေးထဲ သည် ဂေးတကောင်က တမျိုးဆိုပြီး ဘုတော တောနိုင်ပါသည်။ တကယ်တော့ ကိုဗစ် ကပ်ရောဂါကြီး ပျောက်ဆုံးဖို့အတွက်ကော၊ စစ်ပွဲကြီး အောင်နိုင်ဖို့အတွက်ကော ကြိုးစားနေသူတွေထဲမှာ LGBTIQ တွေလည်း ပါဝင်နေသည့် အတွက် LGBTIQ တွေကိုလည်း အခွင့်အရေး ပေးစေချင်သည့်အကြောင်း၊ အသိအမှတ်ပြုပါ ဆိုသည့်အကြောင်း ဆော်သြနေခြင်းပါပဲ။ LGBTIQ တွေဟာ အားကြိုးမာန်တက် ပါဝင်နေခဲ့ပါလျက် အသိအမှတ်ပြု မခံရသည့်အခါ၊ အခွင့်အရေး မပေးသည့်အခါ မမျှတသ​ဖြင့် ယူကျုံးမရ ဖြစ်ရတတ်သည်။ လောကကြီးက မမျှတလျှင် ဘယ်သောအခါမှ မလှပနိုင်ပေ။

The Paradise of Thorns (2024) ဆိုသည့် ထိုင်းရုပ်ရှင်ထဲမှာ အိုက်ဆက်နှင့် ထုန်ခန်ဆိုသည့် လိင်တူချစ်သော အမျိုးသားနှစ်ယောက်အကြောင်းကို ရှုစားနိုင်ပါသည်။ ထို ရုပ်ရှင်ထဲတွင် လိင်တူချစ်သူများ လိုချင်သော အခွင့်အရေးများ တရားဝင် မရရှိခဲ့သည့်အတွက် မလှမပဖြစ်ခဲ့ရသော ဖြစ်ရပ်များစွာကို မြင်တွေ့ရပေလိမ့်မည်။ သည့်အပြင် ထိုင်းနိုင်ငံတွင်လည်း မြန်မာနိုင်ငံမှာကဲ့သို့ လိင်တူချစ်သူများနှင့် ပတ်သက်ပြီး ရှေးရိုးစွဲနေသော အယူအဆကို တွေ့လိုက်ရပေသည်။ မြန်မာနိုင်ငံတွင်လည်း လိင်တူချစ်သူများ လိုချင်သော အခွင့်အရေး မရသေးသည့်အတွက် သည်ရုပ်ရှင်သည် မြန်မာနိုင်ငံမှ လိင်တူချစ်သူများအပေါ် အကြွင်းမဲ့ သက်ရောက်ပေသည်။

အိုက်ဆက်က ရွာသား။ ထုန်ခန်က မြို့သား။ နှစ်ယောက်သားက လိင်တူချင်း လက်ထပ်ထားကြသည်။ အိုက်ဆက် မှာ ကွယ်လွန်သွားပြီဖြစ်သည့် ဖခင်လက်ထက်ကတည်းက ပေါင်နှံထားခဲ့သော အိမ်နှင့် ဒူးရင်းခြံကြီး ရှိခဲ့သည်။ ထို အိမ်နှင့် ဒူးရင်းခြံကြီးအား ထုန်ခန်က မြို့ပေါ်မှ မိမိပိုင်အိမ်ကို ရောင်းချပြီး ပြန်ရွေးပေးခဲ့ပါသည်။ အကြောင်းက ချစ်ရသူ အိုက်ဆက်နှင့် တသက်တာပတ်လုံး ဒူးရင်းခြံ အတူစိုက်ရင်း အတူနေထိုင်သွားဖို့အတွက်ပဲ ဖြစ်သည်။ ပိုင်ဆိုင်မှု စာချုပ်ပေါ်တွင် အိုက်ဆက်၏နာမည်နှင့်ဖြစ်သည်။ အိုက်ဆက်အဖေ၏ အမွေမို့ အိုက်ဆက်နာမည်နှင့်သာ စာချုပ်ချုပ်ထားရခြင်းဖြစ်သည်။

ကံဆိုးစွာပင် မကြာခင်အချိန်လေးမှာပဲ အိုက်ဆက်သည် ဒူးရင်းပင်ပေါ်ကနေ လိမ့်ကျပြီး ကွယ်လွန်သွားခဲ့သည်။ ဆိုတော့ဖြင့် ထုန်ခန်၏အိမ်ကို ရောင်းချရာမှ ရခဲ့သောငွေနှင့် ပြန်ရွေးပေးထားသော အိုက်ဆက်၏ အိမ်နှင့် ဒူးရင်းခြံကြီးအား ကျန်ရစ်သူ တဦးဦးထံ လက်ဆင့်ကမ်းရလိမ့်မည်။ ဘယ်သူပိုင်ဆိုင်မည်လဲ။ ဝှီးလ်ချဲနှင့် သွားနေရသည့် အိုက်ဆက်၏ အမေလား။ ဒါမှမဟုတ် အိုက်ဆက်နှင့် လက်ထပ်ထားသော ထုန်ခန်လား။ ဒါမှမဟုတ် အိုက်ဆက်အမေ၏ မွေးစားသမီး မို လား။

အိုက်ဆက်၏ အမေကတော့ သားဖြစ်သူ၏ ပိုင်ဆိုင်မှုကို မိခင်ဖြစ်သူကပဲ ပြန်လည်ဆက်ခံခွင့်ရှိသည်ဟု ဆိုသည်။ မိုကလည်း လောဘဇောတက်ပြီး မိခင်သာ ပိုင်ဆိုင်ခွင့်ရှိသည်ဟု ဆိုသည်။

ထုန်ခန်ကတော့ မိမိသည် အိုက်ဆက်နှင့် လက်ထပ်ထားသူလည်းဖြစ်၊ ထို အိမ်နှင့် ဒူးရင်းခြံအား မိမိ၏အိမ်ကို ရောင်းချပြီးမှ ရသောငွေနှင့် ပြန်ရွေးပေးထားသည်လည်း ဖြစ်သောကြောင့် မိမိသာ ပိုင်ဆိုင်သင့်သည်ဆိုပြီး လက်လွှတ် မခံပေ။

သို့ပါသော်လည်း ထုန်ခန်နှင့် အိုက်ဆက်တို့၏ လက်ထပ်စာချုပ်ကား တရားမဝင်ပေ။ အစိုးရက လိင်တူချင်း တရားဝင် လက်ထပ်ခွင့်ဥပဒေ ထုတ်ပေးမထားသေး။ ထို့ကြောင့် နှစ်ဦးနှစ်ဘက် ပိုင်ဆိုင်ခွင့် လုယက်ရင်း တင်းမာနေခဲ့သည်။

ထုန်ခန်ကတော့ ရှေ့နေနှင့် တိုင်ပင်သည်။ သို့ပါသော်လည်း ထုန်ခန့်အတွက် မထူးခဲ့ပေ။ ရှေ့​နေကပင် အပြစ်တင် လွှတ်ခဲ့သေးသည်။ မင်းကိုယ်မင်း အပြစ်တင်လေ၊ ချစ်စိတ်ကြောင့် စုံလုံးကန်းပြီး သေချာမှ မစီစဥ်ခဲ့ဘဲကိုး၊ မင်းတို့လို အတွဲတွေက တခြားသူတွေထက်ကို ပိုပြီး စီစဥ်တတ်ရမှာ၊ မင်းသိလား ငါတို့လို ဘဝတွေက ယောကျ်ားတွေကို အကုန်ပုံအပ်ပစ်လို့ မရဘူးကွ တဲ့။

သည့်ကြောင့် အိုက်ဆက်၏ အိမ်နှင့် ဒူးရင်းခြံမှာ အိုက်ဆက်၏အမေသာ ပိုင်ဆိုင်ခွင့် ရသွားခဲ့သည်။ ထုန်ခန့်အတွက်တော့ ထရပ်ကားစုတ်လေးသာ ကျန်တော့သည်။ တခြား ဘာပိုင်ဆိုင်မှုမှ မရှိတော့။ ရှေ့နေပြောသလို အိုက်ဆက်အပေါ် ချစ်စိတ်တွေကြောင့် စုံလုံးကန်းပြီး ပိုင်ဆိုင်မှုတွေ အကုန် ပုံအပ်ခဲ့မိပြီ။ ထုန်ခန်ကတော့ အိုက်ဆက်အမေအား အကြောင်းစုံ ရှင်းပြပြီး အိမ်နှင့်ခြံကို ပြန်ပေးဖို့ တောင်းပန်သည်။ မိခင်က လက်မခံ။ ဘာလို့ ရှုပ်ထွေးအောင် လုပ်နေရသလဲကွယ်၊ မင်း မပိုင်ဆိုင်ရတော့လည်း ဒီခြံမှာ အလုပ်လုပ်ရင်း အရင်လိုပဲ နေလို့ ရသားပဲကွယ်၊ ဘယ်သူကမှ နှင်မထုတ်ပါဘူးဟု ဆိုသည်။

တကယ်လည်း ထုန်ခန်သည် အိုက်ဆက်အမေပြောသလို ခြံအလုပ်လုပ်ရင်း နေသည်။ မိမိပိုင်ဆိုင်မှုတွေ ရင်းထားခဲ့ရသောခြံကို လက်မလွှတ်နိုင်တာကြောင့်လည်း ပါသည်။ သည့်အပြင် ဒူးရင်းပင်အကြောင်း နားမလည်သော မို၏ လက်ထဲ အပ်ထားလျှင် ဒူးရင်းများ မဖြစ်ထွန်းမည်ကို သိသောကြောင့်လည်း ပါသည်။

ဤသည်ကို အိမ်နှင့်ခြံအား လောဘဇောတက်နေသော မိုက သဘောမကျ။ တနေ့နေ့ တချိန်ချိန်မှာ ထုန်ခန်ဟာ အိမ်နှင့်ခြံကို ပြန်ရအောင် ကြံနေသည်ဟု မြင်သည်။ ဒူးရင်းသီးများ ဖြစ်ထွန်းလျှင် မွေးစားမိခင်က ထုန်ခန့်လက်ထဲ ပြန်အပ်လိမ့်မည်ဟု တွေးသည်။ သည့်ကြောင့် မိမိ၏ မောင်ဖြစ်သူ ဂျင်နာအားခေါ်ပြီး ဒူးရင်းခြံ လုပ်တတ်အောင် သင်ယူစေပြီး ထုန်ခန်ရှိတုန်းမှာ ဒူးရင်းခြံ မဖြစ်ထွန်းအောင် အကောက်ကြံ ဖျက်ဆီးကြသည်။

ထိုဇာတ်ဝင်ခန်းများကို ကြည့်နေရင်းမှာပဲ အထက်ကပြောခဲ့သော ထိုင်းနိုင်ငံတွင်လည်း မြန်မာနိုင်ငံမှာကဲ့သို့ လိင်တူချစ်သူများနှင့် ပတ်သက်ပြီး ရှေးရိုးစွဲနေသော အယူအဆကို တွေ့လိုက်ရပေသည်။ အိုက်ဆက်၏ အမေနှင့် မိုက အိမ်နှင့် ဒူးရင်းခြံကို သိမ်းပိုက်ရုံမက အိုက်ဆက်နှင့် ထုန်ခန်တို့၏ အိပ်ခန်းကိုပါသိမ်းပြီး ထုန်ခန့်ကို အိမ်အောက်ထပ် ခြင်ထောင်မပါသည့်နေရာ အိပ်ခိုင်းသည့်အခါ၊ မိုက ထုန်ခန့်ကို ထွက်သွားစေချင်သဖြင့် အိမ်ထဲ မဝင်နိုင် အောင် အတွင်းဘက်ကနေ သော့ခတ်ပိတ်ထားသည့်အခါ ထုန်ခန်သည် ဒေါသကို မထိန်းနိုင်တော့သည့်အဆုံး ရင်းထောင် ထောင်ကာ အိမ်အပေါ်ထပ်တက်ပြီး အိမ်အတွင်းမှ ရှိသမျှပစ္စည်းများကို ထရပ်ကားစုတ်ပေါ် စုပြုံတင်ပြီး ထွက်သွားမည်လုပ်တော့ မိုက သူခိုးတယောက် အိမ်ကို ဖောက်ထွင်းနေသည်ဆိုပြီး ရဲကို တိုင်ကြားသည်။ ထုန်ခန်က ဂရုမစိုက်။ အပေါ်ထပ်တက်ပြီး အိုက်ဆက်၏လက်စွပ်ကို စွပ်ထားသည့် အိုက်ဆက်အမေ၏ လက်ကနေ ဇွတ်အတင်း ချွတ်ယူစဥ်က အိုက်ဆက်အမေကို အော်ပြောလိုက်သည်။ အကုန် ခများတို့အပိုင် ထင်နေတာလား၊ ဒီလက်စွပ်က ကျုပ်ပိုက်ဆံနဲ့ ဝယ်ထားတာ ကျုပ်အပိုင်။ အဲဒီ ခုတင်ပေါ်ကလည်း ဆင်း၊ အဲဒါ ကျုပ်ခုတင်။ ဟဲ့ နင် သူခိုး၊ အဲဒါ ငါ့သားပိုင်တာဟဲ့၊ နင့်နာခေါင်းမှာ နဖားကြိုးထိုးဖို့ အပေါက်လို ဖောက်ထားလို့ နင်က လူလို အသိစိတ် ကို မရှိတော့တာ၊ နင် အရင်ဘဝ သူများမိန်းမတွေကို ခိုးခဲ့လို့ နင် ဒီလို လူစားဖြစ်နေတာ။ နင်သာ မိန်းကလေးအဖြစ် မွေးလာခဲ့ရင် ငါ့သားလည်း ဒီလိုသေရမှာ မဟုတ်ဘူး၊ အကုန် နင့်အရင်ဘဝက အပြစ်တွေချည်းပဲ။

အိုက်ဆက်အမေပြောသည့် စကားကဲ့သို့ မြန်မာနိုင်ငံတွင်လည်း လိင်တူချစ်သူတယောက်ကိုတွေ့တိုင်း သူဟာ အရင်ဘဝက သူများမိန်းမကို ဖျက်ဆီးခဲ့လို့ ဆိုသည့်အတွေးကို ပြေးသတိရပြီး စွပ်စွဲတတ်ကြသည်။ ဂေးအဖြစ် မွေးဖွားလာခြင်းဟာ အရင်ဘဝက သူများမိန်းမကို ဖျက်ဆီးခဲ့လို့ဆိုလျှင် စထရိတ်အမျိုးသားအဖြစ် မွေးဖွားလာခြင်းဟာ အရင်ဘဝက သူများလင်ကို ဖျက်ဆီးခဲ့လို့ပဲပေါ့။ ဒါဖြင့်ရင် ထို စထရိတ်အမျိုးသားဟာ အရင်ဘဝက ယောကျ်ားချင်းချင်း ပြစ်မှား ဖောက်ပြား ကျူးလွန် ဖျက်ဆီးခဲ့ဖူးသော ဂေးတယောက် ဖြစ်နေတော့မပေါ့။ သူတပါးမယား၊ သူတပါးလင်သားကို ဖျက်ဆီးတာချင်းအတူတူ စထရိတ်အမျိုးသားတွေကျမှ သည်ဘဝမှာ မြင့်မြတ်သော ယောကျ်ားဖြစ်ရပြီး ဂေးတွေကျတော့ နိမ့်ကျသူတွေ ဖြစ်ရသည်တဲ့လား။ ထိုအစွဲကို မြန်မာနိုင်ငံမှာ ချွတ်ရဖို့ အတော့်ကို ခက်ပေဦးမည်။

သည်ရုပ်ရှင်မှာ ပြောချင်တာတော့ များများစားစား မတွေ့ရပါ။ လိင်တူချစ်သူနှစ်ယောက် ဘယ်လောက်ပဲ ချစ်လို့ လက်ထပ်ထား လက်ထပ်ထား အစိုးရက လိင်တူလက်ထပ်ခွင့်ဥပဒေ ထုတ်ပေးမထားသေးလျှင် တရားဝင်လက်ထပ်မှုမမြောက်။ သည့်ကြောင့် တဦးဦး ကွယ်လွန်သွားခဲ့လျှင် သူတို့နှစ်ဦး၏ ပိုင်ဆိုင်မှုများသည် ကျန်ရစ်ခဲ့သူက အလုံးစုံ ပိုင်ဆိုင်ခွင့်မရှိ။ သေဆုံးသူ၏ မိသားစုဝင်ကသာ ပိုင်ဆိုင်ခွင့် ရပေလိမ့်မည် ဆိုသည့်အကြောင်း ဖော်ပြလိုရင်းပဲ ဖြစ်ပေသည်။ မြန်မာနိုင်ငံတွင်လည်း ထိုနည်းလည်းကောင်း ဖြစ်နေဆဲပင်။ လိင်တူလက်ထပ်ခွင့်သာ တရားဝင် ဖြစ်ခဲ့လျှင် ရုပ်ရှင်ထဲကလို ဖြစ်ရပ်ဆိုးများ ကြုံရလိမ့်မည်မဟုတ်။ ရုပ်ရှင်ထဲက ဖြစ်ရပ်ဆိုးများကို ပြောပြရမည်ဆိုလျှင် …

အိုက်ဆက် ဒူးရင်းပင်ပေါ်က လိမ့်ကျတော့ ခွဲစိတ်ခွင့်ရဖို့အတွက် မိသားစုဝင်တဦးဦး၏ ခွင့်ပြုချက် လိုအပ်ခဲ့သည်။ ထုန်ခန်က ခွင့်ပြုပါသော်လည်း မိမိတို့၏ လက်ထပ်မှုသည် တရားမဝင်သောကြောင့် ဆရာဝန်က လက်မခံ။ သည့်ကြောင့် အိုက်ဆက်အမေနှင့် မိုတို့ ရောက်အလာကိုစောင့်ရင်း အချိန်နောက်ကျပြီး အိုက်ဆက် ကွယ်လွန်ခဲ့ရသည်။

တကယ်တော့ မိုက တမင်နောက်ကျအောင် အကောက်ကြံခဲ့ခြင်း။ အဘယ်ကြောင့်မူ မိုသည် အိုက်ဆက်ကို ချစ်နေသူဖြစ်ပြီး အိုက်ဆက်က လုံးဝမချစ်သောကြောင့်။ ထုန်ခန်နှင့် အိုက်ဆက်ကို ကွဲကွာစေလိုရင်းနှင့် အိုက်ဆက်သေလျှင် အိမ်နှင့် ​ဒူးရင်းခြံကို လိုချင်သောကြောင့်ပင်။ မိုက မိမိသည် အိုက်ဆက်နှင့် ချစ်နေကြသူတွေဖြစ်ပြီး အိုက်ဆက်က ထုန်ခန့်ကို မချစ်ကြောင်း၊ အိမ်နှင့်ခြံကို ပြန်ရွေးနိုင်ရန်အတွက် ထုန်ခန့်ကို အသုံးချခဲ့ခြင်းဖြစ်ကြောင်း လီဆယ်ပြောသည်။ ထုန်ခန် ယုံသွားခဲ့သည်။ တဆက်တည်းမှာပဲ ထုန်ခန်သည် မို၏မောင် ဂျင်နာနှင့် ခြံအတူစိုက်ရင်း ချစ်စ်ိတ်ဝင်သွားကြသည်။ မိမိကို အလှည့်စားကြီး လှည့်စားခဲ့သော အိုက်ဆက်ကို လုံးဝ မေ့ပစ်လိုက်သည်။ ထုန်ခန်က မို့အားပြောသည်။ ခြံလိုချင်ရင် ပေးမယ်၊ ငါလည်း ထွက်သွားမယ်၊ နင့်မောင်ကိုတော့ ငါနဲ့ ထည့်ပေးလိုက်ဟု။ သို့ပါသော်လည်း ဂျင်နာကတော့ ထွက်မသွားစေချင်။ သူနှင့်အတူ ခြံကိုသာ အတူလုပ်နေစေချင်သည်။ သည့်ကြောင့်လည်း ထုန်ခန်သည် နေဖြစ်ခဲ့သည်။

ထုန်ခန်နှင့် ဂျင်နာတို့၏ ကြိုးစားချက်ကြောင့် ဒူးရင်းခြံ အောင်မြင်သည့်အခါ မိုက အိုက်ဆက်အမေထံ အိမ်နှင့်ခြံကိုလွှဲပေးဖို့ တောင်းဆိုသည်။ မိုသည် ခြံကို ဘာမှမလုပ်တတ်မှန်း အိုက်ဆက်အမေက သိသဖြင့် မပေး။ သည့်ကြောင့် အိုက်ဆက်အမေကို သေအောင်ကြံစည်ပြီး အိမ်နှင့်ခြံကို အပိုင်ရယူခဲ့သည်။ ပြီးနောက် အစိုးရဝန်ထမ်းတယောက်နှင့် လက်ထပ်သည်။

ထုန်ခန်နှင့် ဂျင်နာက ဒူးရင်းသီးတွေခိုးပြီး ထွက်သွားမည်လုပ်သည့်အခါ မို၏ယောကျ်ားက ဂျင်နာ့ကိုသတ်သည်။ ထုန်ခန်ကလည်း မိုနာ့အား ခြံကို ငါမပိုင်ရလျှင် ငါ့ကလေးအပိုင် ဖြစ်ရမယ်ဆိုပြီး မို့ကို မုဒိမ်းကျင့်ဖို့ ကြံသည်။ သည်တော့မှ မိုက မလုပ်ဖို့ တောင်းပန်ပြီး အိုက်ဆက်က သူ့ကို မချစ်သည့်အကြောင်း၊ ထုန်ခန့်ကိုသာ ချစ်သည့်အကြောင်း အမှန်အတိုင်း ပြောပြလိုက်သည်။ ထုန်ခန်လည်း အမှန်အတိုင်း သိသွားသည့်အခါ ကျိန်စာသင့်သလို ဖြစ်နေသော သည်အိမ်နှင့် ဒူးရင်းခြံထဲကနေ အပြီးအပိုင် ထွက်သွားခဲ့တော့သည်။ မို တယောက်တည်း ကျန်ခဲ့ပြီ။ မို အားလုံး ပိုင်ဆိုင်သွားခဲ့ပြီ။ သို့သော် မို လုံးဝ မပျော်ရွှင်တော့။

သည်ရုပ်ရှင်မှာ ပြောချင်တာ များများစားစား မရှိပေမယ့် ဇာတ်လှည့်ကွက်များနှင့် သရုပ်ဆောင်ချက် ပီပြင်မှုများကြောင့် ရုပ်ရှင်ဟာ အလွန်ကြည့်ကောင်းခဲ့သည်။ ဇာတ်ပို့များ၏ သရုပ်ဆောင်ချက်များက ပိုပီပြင်သည်ဟု စာရေးသူ မြင်သည်။ သည့်ကြောင့်လည်း ရုပ်ရှင်ရုံတင်တော့ ရုံတင်ငွေ အများအပြားရခဲ့ပြီး အောင်မြင်လူကြိုက်များခဲ့သည်။ အိုက်ဆက်နှင့် ထုန်ခန် ဘယ်ကဲ့သို့ တွေ့ဆုံကြသည့် အကြောင်းကလေး မပါဝင်သည်ကိုတော့ စာရေးသူ၏ စိတ်ထဲ လစ်ဟာချက်လို့ မြင်မိသည်။

***

Director: Boss Kuno

Starring: Jeff Satur; Engfa Waraha; Pongsakorn; Keng Harit; Seeda Puapimon