သူမတူအကျဉ်းသား (အခန်း၉)

■ အခန်း(၉)
ထောင်တွင်းစီးပွားရေး
++++++++++

ထောင်ထဲမှာ ရက်သတ္တပတ်ပေါင်းများစွာ ကြာလာတော့ ကျနော်ဟာ အင်းစိန်ထောင်တွင်း စီးပွားရေး လည်ပတ်ပုံတွေကို သတိထားမိလာတယ်။ ထောင်တွင်း စီးပွားရေး ဆိုတာကလည်း မြန်မာပြည်တွင်း စီးပွားရေးတွေနဲ့ မကွာလှဘူး ဆိုတာကို ပိုပြီး သဘောပေါက်လာတယ်။ အုပ်ချုပ်မှုအပိုင်းက ကောင်းကောင်း အလုပ်မလုပ်ဘူး။ အခြေခံ အဆောက်အအုံတွေက ကိုလိုနီခေတ်က ကျန်ခဲ့တာတွေ။ မှောင်ခိုစျေးကွက်မှာ ပိုက်ဆံရှိရင် လိုချင်တာ အားလုံးနီးပါး ရနိုင်တယ်။ အဲဒီအချက်တွေ တူညီတယ်။
.

စိတ်ဝင်စားစရာ အကောင်းဆုံးကတော့ မှောင်ခိုစျေးကွက်ပါ။ ထောင်ကပေးတဲ့ အစားအသောက်က အာဟာရ မပြည့်သလို စားလို့လည်း မကောင်းဘူး ဆိုတာ ကျနော် ရေးပြခဲ့ပြီးပါပြီ။ ဒီတော့ ပုံမှန်အားဖြင့် အစားအသောက်ကိုပဲ အဓိကခိုးသွင်းကြမယ်လို့ ကျနော်က ထင်ထားခဲ့တာ။
.
.
.
အပြင်မှာ ဖြစ်နေတဲ့ စီးပွားရေးလောကကိုလည်း ကျနော် နားစွင့်နေခဲ့ပါတယ်။ ကျနော့်စိတ်ထဲမှာ မြန်မာ့စီးပွားရေး ပြိုလဲစပြုနေပြီ ဆိုတာကို သိနေတယ်။ အထဲကို ဝင်လာတဲ့ ပစ္စည်းစျေးတွေ တက်ပြီးရင်း တက်နေတာကို ကြည့်ပြီး မြန်မာငွေတန်ဖိုး ထိုးကျနေပြီ ဆိုတာကို သိနိုင်တယ်။ နောက်တချက်က ရန်ကုန်လေဆိပ်က ထွက်တဲ့ လေယာဥ်တွေ နည်းနည်းသွားတာကို ကြည့်ရင်းလည်း သိနိုင်တယ်။ ရန်ကုန်လေဆိပ်ရဲ့ ထွက်ခွာလေယာဥ် လမ်းကြောင်းအောက်မှာ အင်းစိန်ထောင် ရှိတယ်။ မြန်မာ့လေကြောင်းလိုင်း စီးပွားရေး အလုပ်ဖြစ်၊ မဖြစ် လေ့လာချင်သူတွေအတွက် ‘နေရာကောင်း’ ပေါ့။
______________________________
ဘာသာပြန် – ​အောင်မိုး ( A K Moe )