အမေရိကန်ရဲ့ ဘားမားအက်(က်) မြန်မာ့ခုခံတွန်းလှန်စစ် မျှော်လင့်ချက် မြင့်လာစေ

“အမေရိကန်ရဲ့ ဘားမားအက်(က်) မြန်မာ့ခုခံတွန်းလှန်စစ် မျှော်လင့်ချက် မြင့်လာစေ”

‘၂၀၂၃ ခုနှစ် NDAA ဥပဒေထဲမှာ မြန်မာနိုင်ငံ အက်ဥပဒေ (Burma Act) ကို ထည့်သွင်းပြဌာန်းလိုက်တာကြောင့် အမေရိကန်ဆီကနေ ကူညီထောက်ပံ့မှုတွေ ကြီးကြီးမားမား ရလာတော့မယ်ဆိုပြီး မြန်မာလူထုကြား မျှော်လင့်ချက်တွေ ပိုမြင့်မားလာပါတယ်။’

(The Diplomat အွန်လိုင်း သတင်းမဂ္ဂဇင်းတွင် ဖေဖော်ဝါရီလ ၁ ရက်နေ့က ဖော်ပြခဲ့သည့် ဆောင်းပါးရှင် ရဲမျိုးဟိန်း၏ ‘US Burma Act Uplifts the Resistance Movement in Myanmar’ ခေါင်းစဥ်ဖြင့် ဆောင်းပါး ကို ကိုနိုင် (မန္တလေး) က The Call ပရိသတ်အတွက် ဘာသာပြန်ဆိုထားပါသည်)

၂၀၂၁ ခုနှစ် ဖေဖော်ဝါရီလမှာ နိုင်ငံအာဏာကို တရားမ၀င် သိမ်းယူခဲ့တဲ့ မြန်မာစစ်အစိုးရကို NDAA က တုန်လှုပ် ချောက်ချားစေခဲ့ပါတယ်။ အတည်ပြုပြဌာန်းဖို့ အချိန်အတော်ကြာ နှောင့်နှေးနေခဲ့တဲ့ မြန်မာနိုင်ငံ အက်ဥပဒေ ထဲမှာ ပါတဲ့အချက်တွေကို ၂၀၂၃ ခုနှစ် NDAA ထဲမှာ ထည့်သွင်းထားပါတယ်။ မြန်မာနိုင်ငံ အက်ဥပဒေ အစော ပိုင်းမူကြမ်းမှာပါခဲ့တဲ့ အဓိကအချက်တချို့ကိုတော့ အထက်လွှတ်တော်အမတ် Mitch McConnell က ၂၀၂၂ ခုနှစ် NDAA ထဲမှာ ထည့်သွင်းခဲ့ပြီးဖြစ်ပါတယ်။ NDAA ထဲမှာ Burma Act ကိုပါ ထည့်သွင်း ပြဌာန်းလိုက် တာကြောင့် မြန်မာ့ ခုခံတွန်းလှန်စစ်ကို ကူညီထောက်ပံ့ရေးဟာ အမေရိကန် ကွန်ဂရက်လွှတ်တော်အတွက် နိုင်ငံတော်လုံခြုံရေးဆိုင်ရာ ဦးစားပေးအရေးကိစ္စ ဖြစ်လာနိုင်ခြေအလားအလာကို ညွှန်ပြနေပါတယ်။

မကြာခနဆိုသလို လျစ်လျူရှုခံထားရတဲ့ သူတို့ရဲ့ ဒီမိုကရေစီရေးလှုပ်ရှားမှုအတွက် အမေရိကန်ရဲ့ ပြတ်သားတဲ့ ထောက်ခံမှုကို ပြသလိုက်တဲ့ ၂၀၂၃ NDAA ကို မြန်မာလူထုက အားတက်သရော ကြိုဆိုခဲ့တာဟာ အံ့သြစရာ တော့ မဟုတ်ပါဘူး။

၂၀၂၁ ခုနှစ် စစ်အာဏာသိမ်းမှုနောက်ပိုင်းမှာ မြန်မာနိုင်ငံဟာ သားသတ်ရုံသဖွယ် ဖြစ်လာပါတယ်။ ရုရှားနဲ့ တရုတ်တို့က အဓိက ပံ့ပိုးပေးထားတဲ့ လေကြောင်းစွမ်းအားတွေ၊ လက်နက်ကြီးတွေနဲ့ စစ်တပ်ဟာ မြန်မာလူထု ကို ရက်ရက်စက်စက် သတ်ဖြတ်နေပါတယ်။ အဲဒီလို အပြင်းထန်ဆုံး ရက်စက်မှုတွေ၊ ခွဲခြားသတ်မှတ်မှုမရှိ သတ်ဖြတ်တာတွေ ကြုံနေရတဲ့ကြားမှာပဲ စစ်အာဏာရှင်လက်အောက်တော့ ပြန်မသွားဘူးဟေ့ဆိုတဲ့ မြန်မာလူထုရဲ့ ခိုင်မာတဲ့သန္နိဌာန်က တစက်ကလေးမှ ယိမ်းယိုင်မသွားခဲ့ပါဘူး။

“အမေရိကန်တော်လှန်ရေးရဲ့ ဖခင်တဦးဖြစ်သူ Samuel Adams က ဗြိတိသျှတို့ရဲ့ဖိနှိပ်မှုတွေဟာ ဗြိတိသျှ အစိုးရ ပြုပြင်ပြောင်းလဲခြင်းနဲ့ အဆုံးသတ်လိမ့်မယ်လို့ မျှော်လင့်ခဲ့ပေမယ့် အဆုံးမှာတော့ လက်နက်ကိုင် တော်လှန်ရေးကသာလျှင် တခုတည်းသော ရွေးချယ်စရာဖြစ်ကြောင်း သဘောပေါက်သွားခဲ့တယ်” လို့ စာရေးဆရာ Pat Williams က ရေးခဲ့ပါတယ်။

အလားတူပါပဲ စစ်တပ်အာဏာသိမ်းတာကို ငြိမ်းချမ်းစွာ ဆန္ဒပြ ပြီးတော့ ပြောင်းလဲပစ်နိုင်မယ်လို့ တော်လှန်ရေးလှုပ်ရှားမှုအစပိုင်းမှာ မြန်မာလူထုက မျှော်လင့်ခဲ့ကြပါတယ်။ စစ်တပ်ရဲ့ ရက်စက်ကြမ်းကြုတ်တဲ့ ဖြိုခွင်း နှိမ်နင်းမှုတွေနဲ့ ဆက်တိုက်ကြုံလာရတဲ့အခါမှာတော့ ကိုယ့်ကိုယ်ကို ခုခံကာကွယ်ဖို့နဲ့ မြန်မာနိုင်ငံမှာ ဒီမိုကရေစီပြန်လည်ထူထောင်ဖို့ လက်နက်ကိုင်တိုက်မှ ဖြစ်မယ်လို့ မြန်မာလူထု က ကောက်ချက်ချခဲ့ကြပါတယ်။

လက်နက်အင်အားမမျှတဲ့အပြင် နိုင်ငံတကာအကူအညီလည်း မရတဲ့ကြားထဲကပဲ လူထုရဲ့ လက်နက်ကိုင် ခုခံတွန်းလှန်မှုဟာ အရှေ့တောင်အာရှမှာ အကြီးဆုံး တပ်မတော်အဖြစ် ရပ်တည်နေတဲ့ မြန်မာစစ်တပ်ကို အောက်ခြေကနေ အပေါ်အထိ ကိုင်လှုပ်လိုက်ပါတယ်။ စစ်အစိုးရရဲ့ ရိုင်းစိုင်းတဲ့လုပ်ရပ်တွေကြောင့် မြန်မာ ပြည်သူအများစုနဲ့ တိုင်းရင်းသားလူနည်းစု အများအပြားဟာ စစ်အာဏာရှင်စနစ် တိုက်ဖျက်ရေးမှာ လက်တွဲပြီး အတူတကွ ရပ်တည်လာကြပါတယ်။

နိုင်ငံတဝန်းက ခုခံတော်လှန်ရေးအင်အားစုတွေနဲ့ ရင်ဆိုင်နေရတဲ့ စစ်တပ်ရဲ့ မြေပြင်တပ်ဖွဲ့တွေဟာ အခုဆိုရင် မနိုင်မနင်းဖြစ်လာ၊ ပတ်ဝိုင်းခံရလာ၊ အကြီးအကျယ် အားအင်ကုန်ခမ်းလာတဲ့အပြင် စိတ်ဓာတ်ပိုင်းမှာလည်း လုံးဝ ပြိုလဲကျနေပါတယ်။ အရူးမီးဝိုင်းဖြစ်နေတဲ့ စစ်အစိုးရဟာ လက်နက်ခဲယမ်း မပြည့်မစုံနဲ့တိုက်နေတဲ့ ခုခံတော်လှန်ရေးအင်အားစုတွေကို နှိမ်နင်းဖို့ လေကြောင်းနဲ့ လက်နက်ကြီးအင်အားတွေကို အဆမတန် အလွန်အကျွံ သုံးစွဲနေရပါတယ်။ ဒါ့အပြင် ခုခံတော်လှန်ရေးအင်အားစုတွေကို ထောက်ပံ့ကူညီတာမျိုး မလုပ်ရဲ အောင် လူထုကိုလည်း ခွဲခြားသတ်မှတ်မှုမရှိ ရက်ရက်စက်စက်ကို လုပ်ပြနေပါတယ်။ စစ်တပ်က အာဏာသိမ်း ပြီး နှစ်နှစ်အတွင်း အရပ်သား ၂,၆၈၅ ယောက်ထက်မနည်း အသတ်ခံခဲ့ကြရပြီး ၁၆,၆၅၁ ယောက် ဖမ်းဆီးခံခဲ့ကြ ရပြီးတော့ အိမ်ခြေပေါင်း ၄၁,၀၀၀ ကျော် မီးရှို့ဖျက်ဆီးခံခဲ့ရပြီးပြီလို့ သိရပါတယ်။ အဲဒီအရေအတွက်တွေဟာ တကယ်တမ်းက အခုထက် အများကြီး ပိုများနိုင်ပါတယ်။

ဒီလို ရက်စက်ကြမ်းကြုတ်တဲ့ တိုက်ခိုက်မှုတွေနဲ့ ကြုံနေရချိန်မှာ သူတို့အပေါ် လျစ်လျူရှုထားတဲ့ နိုင်ငံတကာ အသိုက်အဝန်းကို မြန်မာလူထုက စိတ်ပျက်လာကြပါတယ်။ နေတိုး မဟာမိတ်အဖွဲ့က ယူကရိန်းကို ရက်ရက် ရောရော ပံ့ပိုးကူညီမှုနဲ့ နှိုင်းယှဉ်ရင် မြန်မာ့တော်လှန်ရေးအပေါ် နိုင်ငံတကာအသိုင်းအဝိုင်းက ကူညီထောက်ပံ့ တာ မရှိသလောက်ကို နည်းပါးပါတယ်။ ယူကရိန်းအပေါ် နိုင်ငံတကာ ကူညီထောက်ပံ့မှုရဲ့ ၁% ကို ရရင်တောင်မှ စစ်အစိုးရကိုဖြုတ်ချပြီး ဒီမိုကရေစီ ပြန်လည်ထူထောင်ရေးအတွက် လုံလောက်ပါတယ်လို့ မြန်မာ့ တော်လှန်ရေး လှုပ်ရှားမှုရဲ့ ခေါင်းဆောင်တဦးက ငြီးတွားရေရွတ်ဖူးပါတယ်။

ဒါကြောင့်လည်း မြန်မာနိုင်ငံ အက်ဥပဒေကို ပြဌာန်းလိုက်တာဟာ ဒီမိုကရေစီရေးလိုလားသူတွေကို ပံ့ပိုးကူညီ ရေး တံခါးဖွင့်ပေးတဲ့ အမေရိကန်ပြည်ထောင်စုရဲ့ အားတက်ဖွယ်လုပ်ရပ်အဖြစ် မြန်မာလူထုက ရှုမြင်ကြတာ ဖြစ်ပါတယ်။ ဒီဥပဒေ ပြဌာန်းလိုက်တာကိုကပဲ စစ်အစိုးရပေါ်မှာရော ခုခံတော်လှန်ရေး အင်အားစုတွေပေါ်မှာပါ စိတ်ဓာတ်ပိုင်းအရ ကြီးမားတဲ့သက်ရောက်မှု ဖြစ်လာတာပါ။

စစ်အစိုးရရဲ့စိုးရိမ်ချက်ကို ထင်ဟပ်တဲ့ လုပ်ရပ်တခုအနေနဲ့ NDAA ဟာ မြန်မာ့ပြည်တွင်းရေးကို ဝင်ရောက် စွက်ဖက်တဲ့အပြင် နိုင်ငံအချုပ်အခြာအာဏာကိုပါ ထိပါးတယ်ဆိုတဲ့ စစ်အစိုးရရဲ့ ထုတ်ပြန်ချက်တခု ထွက်လာခဲ့ သလို စစ်အစိုးရ ထောက်ခံသူတွေကလည်း ရန်ကုန်မြို့က အမေရိကန်သံရုံးအပြင်ဘက်မှာ ဆန္ဒပြခဲ့ကြပါတယ်။

မြန်မာ့အရေး အက်ဥပဒေဟာ မြန်မာ့အိမ်နီးချင်း အင်အားကြီး တရုတ်နိုင်ငံကိုလည်း အကြီးအကျယ် စိုးရိမ်စေခဲ့ ပြီး အသစ်ခန့်လိုက်တဲ့ အထူးသံတမန်ကို စစ်အစိုးရအကြီးအကဲနဲ့တွေ့ဖို့ လွှတ်လိုက်တဲ့အထိ ချက်ချင်း တုံ့ပြန်ခဲ့ ပါတယ်။ တဘက်မှာတော့ စစ်အစိုးရကို ခုခံတွန်းလှန်နေကြတဲ့ အကွဲကွဲအပြားပြားသော အင်အားစုတွေကြား ညှိနှိုင်း လုပ်ဆောင်တာမှာ ပိုမိုကောင်းမွန်တဲ့ ပူးပေါင်းဆောင်ရွက်မှုရလာရေး အားဖြည့် လှုံ့ဆော်ပေးလိုက်ပုံရပါတယ်။

အမျိုးသားညီညွတ်ရေးအစိုးရ (NUG) နဲ့ တိုင်းရင်းသားလက်နက်ကိုင်အဖွဲ့အစည်း (EAO) တွေအပါအဝင် တော်လှန်ရေးလှုပ်ရှားမှုမှာ အဓိကပါဝင်နေကြသူတွေ ပူးတွဲပြီးရော သီးခြားစီပါ ထုတ်ပြန်ခဲ့ကြတဲ့ နှစ်သစ်ကူး ကာလ ကြေညာချက်တွေဟာ ပူးပေါင်းဆောင်ရွက်မှု အလားအလာကောင်းနဲ့ စစ်အာဏာရှင်တိုက်ဖျက်ရေး ခိုင်မာတဲ့သန္နိဌာန်တို့ကို ထင်ထင်ရှားရှား ပြသလိုက်တာပဲဖြစ်ပါတယ်။ သို့သော် မြင့်မားလာတဲ့ ဒီမျှော်လင့်ချက် တွေကို ပြည့်မီရေး လက်ဆုပ်လက်ကိုင်ပြနိုင်တဲ့ သက်ရောက်မှု ရလာဖို့အတွက် ဥပဒေကို ထိထိရောက်ရောက် အကောင်အထည်ဖော်ရမှာဖြစ်ပါတယ်။

ရပ်တည်ရေးဆိုင်ရာ ခြိမ်းခြောက်မှုတွေနဲ့ လက်ရှိမှာ ရင်ဆိုင်နေရတဲ့ မြန်မာ့ခုခံတော်လှန်ရေး လှုပ်ရှားမှုအနေနဲ့ နိုင်ငံတကာအသိုင်းအဝိုင်းဆီက နောက်ထပ် အရေးပေါ်အကူအညီကို အရင်ကလိုအပ်တာထက် အခု ပိုပြီး လိုအပ်နေပြီဖြစ်ပါတယ်။ ၂၀၂၃ NDAA ဥပဒေထဲမှာ မြန်မာနိုင်ငံ အက်ဥပဒေကို ထည့်သွင်းပြဌာန်းလိုက်တာ ကြောင့် ဥပဒေထဲမှာ အမည်တပ်ဖော်ပြထားတဲ့ တော်လှန်ရေးအဖွဲ့တွေဆီ အမေရိကန်ရဲ့ ကြီးမားတဲ့ ပံ့ပိုးကူညီမှု တွေ ရောက်လာတော့မယ်ဆိုတဲ့ မျှော်လင့်ချက်ကြီး ပေါ်လာစေပါတယ်။ အကူအညီမပေးတာ ဒါမှမဟုတ် ပေးဖို့ အတွက် အလွန်အကျွံ နှောင့်နှေး ကြန့်ကြာတာဟာ အမေရိကန်အစိုးရ ကြေညာထားတဲ့ ဒီမိုကရေစီရေး ထောက်ခံမှုအပေါ် မြန်မာလူထုရဲ့ယုံကြည်မှု ပျက်ပြားသွားစေနိုင်ပါတယ်။ အဲဒီကတဆင့် လျစ်လျူရှုခံရတယ်လို့ မြင်လာမယ်ဆိုရင်တော့ ခုခံတော်လှန်ရေးအင်အားစုတွေရဲ့ စိတ်ဓာတ်ပိုင်းကို အင်မတန်ဆိုးရွားစွာ ထိခိုက်စေမှာ ပဲဖြစ်ပါတယ်။

ဒါကြောင့် မြန်မာနိုင်ငံ အက်ဥပဒေပါ ကတိကဝတ်တွေကို အလျင်အမြန် ဖြည့်ဆည်းပေးနိုင်ဖို့အတွက် Biden အစိုးရအနေနဲ့ အောက်ပါအချက်တွေကို လုပ်ဆောင်ဖို့ ထည့်သွင်း စဥ်းစားသင့်ပါတယ်။

ပထမအချက်ကတော့ မြန်မာလူထုဟာ ရက်စက် ကြမ်းကြုတ်တဲ့ စစ်အာဏာရှင်စနစ် ပြန်အသက်သွင်းတဲ့အပေါ် ဆန့်ကျင်တဲ့ စစ်ပွဲကို တိုက်နေကြတာဖြစ်တယ်ဆိုတာ အမေရိကန် မူဝါဒချမှတ်သူတွေအနေနဲ့ လူသိရှင်ကြား အသိအမှတ်ပြုသင့်ပါတယ်။ ဥပဒေထဲမှာဖော်ပြထားတဲ့ “အသက်အန္တရာယ် မထိခိုက်သော အကူအညီ” ဆိုတာ မှာ ဆက်သွယ်ရေး၊ အမိန့်ပေးစနစ်နဲ့ ထိန်းချုပ်ရေးစနစ် စတာတွေကို အားကောင်းခိုင်မာအောင် လုပ်ပေးတာမျိုး ပါပါတယ်။ အဲဒီလိုအကူအညီမျိုးဟာ အကြမ်းမဖက်နည်းလမ်းနဲ့ လုပ်ဆောင်နေတဲ့ အဖွဲ့အစည်းတွေအတွက်သာ သီးခြားလျာထားတာမဟုတ်ဘဲ ခုခံတွန်းလှန်ရေးတပ်ဖွဲ့အသီးသီးကို တရားဝင် ပေးနိုင်ပါတယ်။ အမေရိကန် တာဝန်ရှိသူများအနေနဲ့ ဒီအချက်ကို သဘောပေါက် လက်ခံသင့်ပြီး ဒီမိုကရေစီရေး ခုခံတွန်းလှန်မှုကို တစုံလုံး အနေနဲ့ ထောက်ခံပံ့ပိုးရေး ဥပဒေမှာပါရှိတဲ့ မူဝါဒများနဲ့အညီ ခိုင်မာတဲ့စီမံကိန်းတခုကို ရေးဆွဲသင့်ပါတယ်။
မြန်မာနိုင်ငံအက်ဥပဒေကို ပြဌာန်းလိုက်တာဟာ စစ်အာဏာရှင် တော်လှန်ရေးမှာ အဓိကကျတဲ့ အင်အားစု အားလုံးအတွက်၊ အထူးသဖြင့်တော့ NUG နဲ့ သူတို့ရဲ့မဟာမိတ် EAO တွေအတွက် စစ်အစိုးရကို တွန်းလှန်တာ မှာ ပိုပြီး ပူးပေါင်းမှုရှိရှိ လုပ်ဆောင်ရေး ခိုင်မာတဲ့ စေ့ဆော်မှုတရပ် ဖြစ်လာပါတယ်။

အမေရိကန် တာဝန်ရှိသူများအနေနဲ့ NUG နဲ့ EAO ကိုယ်စားလှယ်များအပါအဝင် အဓိကသက်ဆိုင်သူများ အားလုံးအတူတက်ရောက်တဲ့ ဆွေးနွေးပွဲတခုကို ပုံမှန်လုပ်သင့်ပါတယ်။ အမေရိကန်နဲ့ သဘောထားတိုက်ဆိုင်တဲ့ မဟာမိတ်တွေ အလားတူလုပ်ဖို့လည်း တိုက်တွန်းသင့်ပါတယ်။

စစ်အစိုးရအပေါ် ပိုပြီးပြင်းထန်တဲ့ ပိတ်ဆို့အရေးယူမှုတွေချမှတ်ဖို့၊ အထူးသဖြင့် စစ်အစိုးရရဲ့ အဓိက ဝင်ငွေ ရပေါက်ဖြစ်တဲ့ မြန်မာ့ရေနံနဲ့ သဘာဝဓာတ်ငွေ့လုပ်ငန်း (MOGE) အပေါ် ပိတ်ဆို့အရေးယူမှုချမှတ်ဖို့ ဘိုင်ဒန် အစိုးရအနေနဲ့ ထပ်ပြီး တုံ့ဆိုင်းမနေသင့်ပါဘူး။
စစ်တပ်က လေကြောင်းကနေရော၊ လက်နက်ကြီးတွေနဲ့ပါ ခွဲခြားသတ်မှတ်မှုမရှိ တိုက်ခိုက်နေတာကနေ အရပ်သားလူထုကို အကာအကွယ်ပေးဖို့ လူသားစာနာမှု အကူအညီပေးနည်းလမ်းတခုအဖြစ် NUG နဲ့ မဟာမိတ် EAO တွေကို ကြိုတင်သတိပေးစနစ်တွေ တိုက်ရိုက် ကူညီပံ့ပိုးရေး အမေရိကန်အနေနဲ့ စဥ်းစားသင့်ပါတယ်။

နောက်ဆုံးအနေနဲ့ မြန်မာနိုင်ငံတွင်းက လူထုနဲ့ ခုခံတွန်းလှန်ရေးတပ်ဖွဲ့တွေဆီ အကူအညီတွေ ထိထိ ရောက်ရောက်နဲ့ ချက်ခြင်းပေးပို့နိုင်ရေး မြန်မာ့အိမ်နီးချင်းနိုင်ငံတွေဖြစ်တဲ့ ထိုင်း၊ အိန္ဒိယတို့နဲ့ အမေရိကန်အစိုးရ ညှိနှိုင်းဆွေးနွေးသင့်ပါတယ်။

မြန်မာနိုင်ငံဆိုင်ရာ အက်ဥပဒေမှာ ကတိပြုထားတဲ့ ပံ့ပိုးကူညီမှုကို ကြိုးပမ်းမှုအဆင့်တဆင့်လို့ ရှုမြင်ခြင်း မပြု သင့်ဘဲ မြန်မာ့ဒီမိုကရေစီရေးလှုပ်ရှားမှုအတွက် အနာဂါတ်အကူအညီတွေ တဖြည်းဖြည်း ပိုတိုးချဲ့ရေး ခိုင်မာတဲ့ အခြေခံတခု ဖြစ်လာဖို့ NUG၊ EAO နဲ့ အမေရိကန်အစိုးရတို့အကြား နိုင်ငံရေးအရ ထိတွေ့ဆက်ဆံမှုအတွက် အုဋ်မြစ်ချတဲ့ ပထမအဆင့်အဖြစ် ရှုမြင်သင့်ပါတယ်။ အမေရိကန်ဆီကနေ ရုပ်ဝတ္ထုပိုင်း နောက်ထပ်အကူအညီ မရဘဲနဲ့တော့ တရုတ်နဲ့ရုရှားက ကျောထောက်နောက်ခံပေးထားတဲ့ စစ်အစိုးရကို အနိုင်ရဖို့ ခုခံတွန်းလှန်ရေး အင်အားစုတွေ အတော်ရုန်းကန်ကြရပါလိမ့်မယ်။

“ကောင်းမွန်တဲ့ ဥပဒေတရပ်ဟာ ကောင်းမွန်တဲ့ ဂီတတခုလိုပါပဲ” လို့ အမေရိကန်သမ္မတဟောင်း ဘရာ့ခ် အိုဘားမားက ပြောခဲ့ဖူးပါတယ်။

၂၀၂၃ ခုနှစ် NDAA မှာ မြန်မာနိုင်ငံဆိုင်ရာဥပဒေ ထည့်သွင်း အတည်ပြု ပြဌာန်းလိုက်ခြင်းဟာ စစ်အာဏာရှင်တွေရဲ့ ရက်စက်ကြမ်းကြုတ်မှုကို နက်ရှိုင်းစွာ ခံစားနေကြရတဲ့ မြန်မာလူထု ရဲ့ နှလုံးသည်းပွတ်ကို ထိမှန်စေတဲ့ မျှော်လင့်ချက်အသစ် ဆောင်ကျဥ်းလာပါတယ်။ ဒီဥပဒေဟာ ၂၀၂၃ ခုနှစ်မှာ သက်သာရာရစေမယ့် လက်ကမ်းကြိုဆိုဖွယ် လုပ်ဆောင်ချက်တခု ဆောင်ယူလာလိမ့်မယ်လို့ မြန်မာလူထုက စိတ်အားထက်သန်စွာ မျှော်လင့်ထားကြပါတယ်။

(မူရင်းဆောင်းပါး – https://thediplomat.com/…/us-burma-act-uplifts-the…/)