Any Day Now (2012)

ကိုယ် အမှန်အတိုင်း ဝန်ခံရရင် သည်ရုပ်ရှင်ကြည့်ပြီး မသန်စွမ်းသူများအခွင့်အရေး လှုပ်ရှားသူဖြစ်တဲ့၊ မသန်စွမ်းသူလည်းဖြစ်တဲ့ အကိုတယောက်နဲ့ ကိုယ် စကားစမြည် ပြောဖြစ်ခဲ့တာတွေကို ပြေးသတိရမိတယ်။ အကိုပြောမှပဲ မသန်စွမ်း စာရင်းဝင်သူတွေကို ကိုယ် အပြည့်အစုံ သိခွင့်ရခဲ့တယ်။ ဆွံ့အ နားမကြားသူ၊ အကြားအာရုံ ချွတ်ယွင်းသူ၊ ကိုယ်ခန္ဓာ မသန်စွမ်းသူအမျိုးမျိုး၊ ဉာဏ်ရည်မမီသူ၊ စိတ်ရောဂါသည်၊ မျက်မမြင်၊ အမြင်အာရုံ ချွတ်ယွင်းသူ၊ အနံ့အာရုံမရှိသူ၊ လူပုကလေးများ စသဖြင့် နည်းအမျိုးမျိုးနှင့် မသန်စွမ်းသူများ ပါဝင်တယ်ဆိုတာ။ ကိုယ် အစက လူပုကလေးတွေဟာ မသန်စွမ်းစာရင်းထဲ ပါတယ်ဆိုတာ မသိသေးဘူး။ အဲဒီအကိုကပြောတယ် လူပုကလေးတွေက ဘတ်စ်ကားစီးရတာ အလွန့်အလွန် ခက်သတဲ့။ ဟုတ်ပေသားပဲ။ ဘတ်စ်ကားစီးတာမှ မဟုတ် တခြား အကြောင်းအမျိုးမျိုးသော နေရာတွေမှာလည်း လူပုကလေးတွေအတွက် မလွယ်ကူဘူး။

ဒီရုပ်ရှင်ထဲမှာ လူပုကလေးအကြောင်း ပါဝင်နေခဲ့လို့လေ။ အဲ့ဒီလူပုကလေးဟာ ဉာဏ်ရည်လည်း မမီပြန်ဘူး။ ပြီးတော့ ဒီရုပ်ရှင်ထဲမှာ ဂေးတွေ ခွဲခြားခံရတဲ့ အကြောင်းလည်း ပါတယ်။ ကြည့်ရင်း ကြည့်ရင်း ရုပ်ရှင်ရဲ့ ရည်ရွယ်ချက်က မသန်စွမ်းသူလေးတွေအပေါ် စာနာစိတ်ရှိဖို့နဲ့ ဂေးတွေ (LGBT) အပေါ် ခွဲခြားဆက်ဆံခံနေရတဲ့အကြောင်း သိစေလိုရင်းဖြစ်တယ်လို့ ကိုယ်သိလိုက်တယ်။

အဲဒီအကိုက ဆက်ပြောခဲ့ဖူးတယ်။ မသန်သော်လည်း စွမ်းတယ်ဆိုတဲ့ စကားအတိုင်း မသန်စွမ်းသူတွေမှာလည်း သူတို့နဲ့သင့်တော်တဲ့ လုပ်နိုင်စွမ်းတခုခု ရှိတဲ့အတွက် မသန်စွမ်းဖြစ်နေလို့ဆိုပြီး ပစ်ပယ်မထားဘဲ သူနဲ့သင့်တော်တဲ့ အလုပ်တခုခုကို ရှာကြံတွေးတောပေးပြီး နေရာတခုခု ပေးဖို့အတွက် တောင်းဆိုကြတာ အလုပ်တော်တော်တော့ ဖြစ်တယ်ဗျ။ ခင်ဗျားတို့ LGBT တွေကတော့ ဘယ်လောက်ပဲ LGBT အခွင့်အရေးလှုပ်ရှားမှုတွေ လုပ်လုပ် တိုးတက်လာတာလည်း သိပ်မတွေ့ရသလိုပဲနော်။ မြန်မာပြည်မှာ LGBT လို့ ကြားလိုက်ရုံနဲ့ ရွံရှာ ခွဲခြားနေကြသူတွေချည်းပဲတဲ့။

အကိုပြောတာ သိပ်ကို မှန်ကန်ပါပေတယ်။ ဒါဟာ LGBT တွေရဲ့ သဘာဝအကြောင်း လူတွေ သိနားလည်လက်ခံလာအောင် LGBT တွေက ဝါဒဖြန့်တာ သိပ်မထိရောက်တာ၊ နည်းပါးနေတာကြောင့်လည်း ဖြစ်နိုင်သလို လူတွေကိုယ်တိုင်က အသိခေါက်ခက် အဝင်နက်ဆိုသလို သိနားလည်လက်ခံပေးလို့ ရပါလျက်နဲ့ နားလည်နိုင်အောင် မကြိုးစားချင်ကြတာလည်း ဖြစ်နိုင်ပါတယ်။

ဒီရုပ်ရှင်ထဲမှာ LGBT အကြောင်း သိနားလည်လက်ခံနိုင်အောင် မကြိုးစားဘဲ ခွဲခြားရှောင်ဖယ် ဆက်ဆံခဲ့မှုကြောင့် မဆီမဆိုင် လူပုကလေးတွေ၊ ဉာဏ်ရည် မမီသူတွေအပေါ်မှာပါ ခွဲခြားဆက်ဆံခံရသလို ဖြစ်သွားခဲ့ပြီး မလိုလားအပ်တဲ့ အဖြစ်အပျက်ဆိုးတွေ ကြုံခဲ့ရတဲ့အကြောင်းကို သိစေလိုတဲ့ ရည်ရွယ်ချက်ကို တွေ့ရမှာပါ။

ရုပ်ရှင်အကြောင်း အတိုချုံ့ပြောရရင် ၁၉၇၉ ကယ်လီဖိုးနီးယားပြည်နယ်မှာပေါ့။ ရူဒီဒေါင်နက်တဲလိုနဲ့ ပေါလ်ဖလိုက်ဂါတို့က ဂေးစုံတွဲ။ နှစ်ယောက်သားက သိပ်ချစ်ကြပေမယ့် LGBT တွေကို ခွဲခြားရှောင်ဖယ်ကြတဲ့ ကာလမှာမို့ ညီအကိုဝမ်းကွဲလို နေထိုင်ကြရတယ်။ ရူဒီက ခါတိုင်းက ယောကျ်ားလို ဝတ်စားနေထိုင်ပေမယ့် စားဝတ်နေရေးအတွက် ကလပ်တခုမှာ အမျိုးသမီးလို ဝတ်စားဆင်ယင်ပြီး စင်မြင့်ထက်မှာ သီဆို ကပြတဲ့အလုပ်ကို လုပ်တယ်။ ရူဒီ့အလုပ်ကြောင့်ပဲ နှစ်ယောက်သားရဲ့ ဆက်ဆံရေးဟာ ဘူးပေါ်သလို ပေါ်စေခဲ့တာပါ။ အဲဒီတော့ ဂေးစုံတွဲဆိုပြီး လူတွေက ခွဲခြားဆက်ဆံကြပြီပေါ့။

ရူဒီက ဂေးစိတ်ရှိသလို သနားကရုဏာစိတ်လည်း ရှိတယ်။ ဘေးအခန်းမှာနေတဲ့ မာကိုဆိုတဲ့ ၁၄ နှစ်အရွယ်ကောင်လေးကို သားအရင်းလို ချစ်မိတယ်။ မာကိုလးဟာ လူပုကလေးဖြစ်ပြီး ဉာဏ်ရည်လည်း မမီဘူး။ ပြီးတော့ အဝလည်း လွန်နေတယ်။ ခန္ဓာကိုယ်ဖွဲ့စည်းပုံအရ အလုပ်လည်း လုပ်လို့မရဘူး။ အချိန်ပြည့် အေးအေးသက်သာနေမှသာ နေကောင်းကျန်းမာစွာ နေထိုင်နိုင်မယ့် ကလေး။ မာကို့မှာ အဖေမရှိဘူး။ အမေက ဆေးသမား။ ဆေးအမြဲရှုပြီး တွေ့ကရာ ယောကျ်ားတွေ ခေါ်ခေါ်ပြီး လိင်ဆက်ဆံနေကျ။ ဒါ့ကြောင့်လည်း မာကို့မှာ အဖေမပေါ်တာ ဖြစ်နိုင်တယ်။ အဲဒီအခါမျိုးဆို မာကို့ကို ​ရှောင်ခိုင်းလို ရှောင်ခိုင်း၊ အပြင်ထွက်ခိုင်းလို ထွက်ခိုင်းနဲ့။ မာကို့ကို အမြဲလိုလို ပစ်ပယ်ထားတယ်။ ရူဒီက မာကို့ကို အပြင်လမ်းမကြီးပေါ် ခဏခဏ တွေ့နေရတာရော၊ အခန်းအပြင်မှာ ရပ်စောင့်နေစေပြီး မိခင်ဖြစ်သူရဲ့ အခန်းထဲမှာ လိင်ဆက်ဆံသံတွေ ကြားနေရတာရောကြောင့် မာကို့ကို အလွန် သနားကရုဏာ သက်မိသွားတယ်။

တနေ့မှာ မာကို့အမေဟာ ဆေးသုံးလို့ ထောင် ခဏကျသွားတယ်။ မာကိုလေးဟာ စောင့်ရှောက်သူ မဲ့သွားခဲ့ပြီ။ ဆွေမျိုးသားချင်းကလည်း မရှိ။ မိခင်လည်း မရှိတော့ မိဘမဲ့ဂေဟာမှာ အပို့ခံရမယ်။ ဒီတော့ ရူဒီဟာ မာကို့ကို စိတ်ပူသွားတယ်။ မာကိုဟာ ခန္ဓာကိုယ်ဖွဲ့စည်းပုံအရ မိဘမဲ့ကလေးတွေ အများကြီးနဲ့ နေလို့မရ။ ဘယ်အစားအသောက်ကိုမဆို စားလို့မရ။ ဒါ့ကြောင့် မိဘမဲ့ဂေဟာမှာနေရင် မာကို့ကျန်းမာရေးကို ထိခိုက်နိုင်တယ်။ ဒါ့ကြောင့် ချစ်ရသူ ပေါလ်နဲ့တိုင်ပင်ပြီး မာကိုလေးကို မွေးစားကြဖို့ တိုင်ပင်တယ်။ ပေါလ်ကလည်း ရူဒီ့ကို အလွန်ချစ်တာရော မာကိုလေးကို သနားတာရောကြောင့် ထောင်ထဲက မာကိုရဲ့မိခင် ခွင့်ပြုချက်တောင်းခံပြီး ယာယီမွေးစားခွင့် ရသွားခဲ့ပါတယ်။ ပြီးတော့ ပေါလ်ရဲ့အခန်း ပြန်အပ်ပြီး ပေါလ်ရဲ့အိမ်မှာ နေကြတယ်။ မာကိုလေးကလည်း အိမ်သစ်မှာ နွေးထွေးတဲ့ ရူဒီတို့ရဲ့ စောင့်ရှောက်မှုတွေနဲ့ ပျော်လို့ပေါ့။

ကံဆိုးစွာပဲ ရူဒီနဲ့ ပေါလ်တို့ဟာ လိင်တူစုံတွဲတွေမှန်း လူတွေ ရိပ်မိသိရှိသွားခဲ့တဲ့အခါ ခွဲခြားဆက်ဆံခံရပြီး မာကိုလေးကို ယာယီမွေးစားခွင့် ပိတ်ပင်ခံရမလို ဖြစ်သွားခဲ့တယ်။ ဂေးစုံတွဲဖြစ်တဲ့ ရူဒီတို့ကို ခွဲခြားလိုက်ရုံနဲ့ မာကိုလေးအပေါ် မလိုလားအပ်တဲ့ ဖြစ်ရပ်ဆိုးတွေ ဖြစ်သွားခဲ့ရတာ။ ရူဒီတို့အပေါ် ဘယ်လို ခွဲခြားဆက်ဆံကြသလဲ ဆိုတာကို ပြောပြရရင် ဂေးတွေအပေါ် လူတွေက ဘယ်လို ထင်မြင်ယူဆချက်တွေ ရှိတယ်ဆိုတာ တွေ့ရမှာပါ။ ဘယ်လို ထင်မြင်ယူဆသလဲဆိုရင် ဂေးတွေဖြစ်တဲ့ ရူဒီတို့စုံတွဲက မာကိုလေးအပေါ် လိင်ထိပါးနှောင့်ယှက်တာတွေ ဖြစ်နိုင်တယ်ဆိုပြီး ယာယီမွေးစားခွင့်ကနေ ပယ်ဖျက်ဖို့ တရားရုံးမှာ လျှောက်ထားငြင်းခုံမှုတွေ ဖြစ်ကြတယ်။ ရူဒီတို့လည်း အလကားနေရင်း တရားခံတွေဖြစ်ရတယ်။ မခံချိ မခံသာစရာ မေးခွန်းတွေ မေးခံရ၊ စွပ်စွဲခံရတယ်။ မာကို့ရဲ့ ခန္ဓာကိုယ်အနှံ့အပြားကို ပွတ်သပ်သလား၊ မာကို့ရှေ့မှာ လိင်ဆက်ဆံကြသလား၊ မာကို့ရှေ့မှာ ကိုယ်လုံးတီးနဲ့ နေကြသလား။ ထိုသဘောကတော့ ရူဒီတို့လို ဂေးတွေဟာ မိဘစိတ် ရှိလို့မဟုတ်ဘဲ မာကိုလေးအပေါ်ကိုလည်း သားအရင်းလို ချစ်လို့မဟုတ်ဘဲ ဘာမှ မသိတတ်ရှာတဲ့ မာကိုလေးကို လိင်သားကောင်အဖြစ် အသုံးချဖို့ မွေးစားတဲ့သဘော သက်ရောက်နေစေပါတယ်။

မာကို့လို အသက်မပြည့်သေးတဲ့ ကလေးငယ်လေးကို မိန်းမလျာလို ဝတ်ရတဲ့ ရူဒီရဲ့ကလပ်ထဲ ခေါ်သွားတာက ကလေးငယ်လေးကို လိင်တူချစ်သူဖြစ်အောင် သိမ်းသွင်းသလား စသည်ဖြင့် စသည်ဖြင့် တဘက်သားအပေါ် မကောင်းဆိုးရွားလူတယောက်လို ယိုးစွပ်တဲ့ အမေးအမြန်းတွေနဲ့ စစ်မေးခံကြရပါတယ်။ မာကိုလေးကိုလည်း ထိုနည်းလည်းကောင်း မေးမြန်းခံရရာ မာကိုလေးက ဟုတ်တိုင်းမှန်ရာ ဖြေပေးခဲ့ပါတယ်။ ဒါ့အပြင် ရူဒီတို့နဲ့နေရတာ အလွန်ပျော်တဲ့အကြောင်း၊ မိခင်ရင်းနဲ့နေရတာ မပျော်ကြောင်း စသဖြင့်ပါ ပြောပြခဲ့ပါတယ်။ သို့ပါသော်လည်း ရူဒီနဲ့ ပေါလ်တို့ အမှုရှုံးခဲ့ပြီး မာကိုလေးကို လက်လွှတ်ခဲ့ရပါတယ်။ အမှုရှုံးရတဲ့ အကြောင်းပြချက် နှစ်ခုရှိခဲ့လို့ပါ။ ပထမအချက်က မာကိုလေးဟာ နဂိုကတည်းက အရုပ်မလေးကို အလွန်ချစ်ခဲ့တဲ့ အကြောင်းရင်းက ရူဒီဟာ မာကို့ကို မ,သဘာဝဇာတ်ဖြစ်အောင် သိမ်းသွင်းနေပါတယ်ဆိုသော ယိုးစွပ်ချက်ကြောင့်ပဲဖြစ်တယ်။ ဒုတိယအချက်ကတော့ မာကို့အမေဟာ ထောင်က လွတ်လာခဲ့ပြီး မာကိုလေးကို ရူဒီတို့လက်ထဲ မအပ်တော့ဘဲ ပြန်ခေါ်ချင်ပါတယ်လို့ ထွက်ဆိုခဲ့သောကြောင့် ဖြစ်ပါတယ်။

နောက်ဆက်တွဲ ဆိုးကျိုးကတော့ ရူဒီတို့လို ဂေးတွေအပေါ် အကောင်းမြင် လက်ခံမပေးဘဲ အဆိုးမြင်စိတ်တွေနဲ့ ခွဲခြားဆက်ဆံခဲ့တဲ့ အတွက်ကြောင့်ရော မာကို့နှုတ်က ထွက်ဆိုချက်တွေကို လျစ်လျူရှူခဲ့မှုကြောင့်ရော မာကိုလေးဟာ မသေသင့်ဘဲ သေခဲ့ရတယ်။ မာကို့အမေဟာ ခါတိုင်းလိုပဲ ဆေးသုံးပြီး ယောကျ်ားတကာနဲ့ လိင်ဆက်ဆံနေခဲ့တဲ့နောက် မာကို​လေးကို အပြင်ခဏထွက်နေဖို့ နှင်လိုက်တဲ့အခါ မာကိုလေးဟာ ဝမ်းနည်းပက်လက်နဲ့ ရူဒီတို့ကို သတိရပြီး ရူဒီတို့အိမ်ကို လိုက်ရှာနေခဲ့ပါတယ်။ ရူဒီတို့အိမ်ကို မတွေ့ဘဲ သုံးရက်လောက် လမ်းပျောက်နေတဲ့အခါ မာကိုလေးလည်း အစာရေစာ ပြတ်လပ်ပြီး တံတားတခုအောက်မှာ သေဆုံးခဲ့ရပါတယ်။

ဒီရုပ်ရှင် ကြည့်အပြီး ကိုယ်တော့ ခံပြင်းနာကျည်းခံခက်နဲ့ ဖြစ်ခဲ့ရပါတယ်။ ကိုယ်တိုင်က LGBT ဖြစ်နေတာကြောင့်လည်း ဒီလို စီးမျောခံစားရတာ ဖြစ်နိုင် တာပေါ့။ မြန်မာပြည်မှာလည်း ဒီရုပ်ရှင်နဲ့ ခပ်ဆင်ဆင်အဖြစ်အပျက်တခု ကိုယ် အွန်လိုင်းပေါ်မှာ ဖတ်ခဲ့ရဖူးပါတယ်။ ဂေးစုံတွဲနှစ်ယောက်က သားကလေး မွေးစားထားပါတယ်။ ကျောင်းမှာ သားကလေးကို အတန်းဖော်တွေက လှောင်ပြောင်တာခံရလို့ ဂေးစုံတွဲနှစ်ဦးမှာ အလွန်အမင်း စိတ်ထိခိုက်ရတဲ့ အကြောင်းပါ။ သားကလေးကို အတန်းဖော်တွေ လှောင်ပြောင်ကြတာက မင်းမှာ အမေမရှိဘူး၊ မင်းအဖေတွေက အ​ြေ-ာက်နှစ်ယောက်တဲ့လေ။ အဲဒီအတွက် သားကလေးပါ စိတ်ဒဏ်ရာ ရတဲ့အကြောင်းပါ။

လိင်တူချစ်တာက သဘာဝလို့ ဘယ်တော့များမှ မြင်နိုင်ကြမှာလဲ။ လက်ခံကြမှာလဲ။ ဂေးစိတ်ရှိတာကို လက်မခံလို့ ဇနီးယူ၊ သာသမီးမွေးတော့လည်း အ​ြေ-ာက်ကြီးဖြစ်ပြီး အ​ြေ-ာက်လို မနေဘဲ မိန်းမတယောက်ကို ကာဗာယူပြနေတာ၊ အလကား ကိုယ်​ြေ-ာက်တာ လူသိမှာကြောက်လို့ မိန်းကလေးတယောက်ကို အသုံးချတာ စသဖြင့် ပြောခံရပါတယ်။ အဲဒီလို အပြောမခံချင်လို့ လိင်တူချင်း အတူနေပြီး သားသမီးမွေးစားတော့လည်း နည်းအမျိုးမျိုးနဲ့ စိတ်ဒဏ်ရာ ပေးကြပြန်ရော။ ဂေးစိတ်ရှိလို့ ဂေးနှစ်ယောက် အတူနေပြီး မိသားစုလေးတခု ထူထောင်ချင်တဲ့အခါ သားသမီးမရနိုင်ခဲ့တော့ မိဘမဲ့ကလေးတွေ၊ ခိုကိုးရာမဲ့ကလေးတွေကို ကျွေးမွေးပြုစု စောင့်ရှောက်တဲ့သဘောနဲ့ မွေးစားတာ အပြစ်များဖြစ်ရောလား။ ကုသိုလ်ပင် ရပါသေးတယ်။ လောကကြီးမှာ ဘယ်နိုင်ငံမှာမဆို မာကိုလို မိဘမဲ့ကလေးတွေ၊ ခိုကိုးရာမဲ့ကလေးတွေကတော့ ကမ္ဘာတည်သရွေ့ ရှိနေဦးမှာပဲ။ ဒီလိုကလေးတွေအတွက် ရူဒီတို့လို ဂေးစုံတွဲတွေက မျှော်လင့်ချက်ရှင်သန်ရာ ဖြစ်ကောင်းဖြစ်နိုင်ပါတယ်။

နောက်ဆုံးအနေနဲ့ပြောရရင် ရုပ်ရှင်ထဲမှာပေါ့။ ရူဒီတို့စုံတွဲဟာ မာကို့အတွက် လုံခြုံမှု ရှိမရှိ မာကို့ရဲ့ဆရာမကို မေးမြန်းရာမှာ ဆရာမ ဖြောင့်ချက်ပေးတဲ့ စကားတွေပါ။ “ကျမတို့လူသားတွေဟာ ကာမရဲ့ ကျေးကျွန်တွေပဲ ဖြစ်ကြပါတယ်။ ကျမတပည့်တွေရဲ့ မိဘတွေရဲ့ လိင်စိတ်တိမ်းညွတ်မှုက ဘယ်လိုဆိုတာကို ကျမ သိချင်စိတ်မရှိသလို ကျမနဲ့လည်း လုံးဝ မသက်ဆိုင်ပါဘူး။ အဲဒါဟာ သူများရဲ့ ကိုယ်ရေးကိုယ်တာကိစ္စပဲဖြစ်တယ်။ သူများစိတ်အခြေအနေကို စပ်စုတာဟာ အင်မတန်ရိုင်းပျတဲ့ အပြုအမူလို့ ကျမ ထင်မြင်ယူဆပါတယ်။ ကျမကြည့်တာက ကျမတပည့်ရဲ့ အခြေအနေကိုပါ။ ကျမရဲ့တပည့်ဖြစ်သူ မစ္စတာရူဒီ​ဒေါင်နက်တဲလိုတို့နဲ့ ပတ်သက်ပြီးနောက်ပိုင်း အခြေအနေ တိုးတက်လာတယ်လို့ မြင်ပါတယ်။ ဒါ့ကြောင့် မာကို့အတွက် မစ္စတာရူဒီဒေါင်နက်တဲလိုတို့က မိခင်ရင်းဖြစ်သူထက် ပိုလုံခြုံတယ်လို့ ယူဆပါတယ်။”

ထိုဆရာမကဲ့သို့ ပညာတတ်ပီသသော လူသားများစွာ ပေါ်ပေါက်လာစေချင်တယ်လို့ ကိုယ် မျှော်လင့်မိပါတယ်။

Director: Travis Fine

Written: Travis Fine, George Arthur Bloom

Starring: Alan Cumming, Garret Dillahunt, Isaac Leyva