“ ခေါ်သံဟူသည် … “
အယ်ဒီတာ့စကား
တိတ်ဆိတ်ခြင်း၏အသံကား ကျယ်လောင်လှ၏။ ညဉ့်နက်လေ ညအသံကပိုကြီးလေဖြစ်၏။ ဆောင်းချမ်းညများ၊ နွေဦးညများတွင်ကြားရတတ်သော ပုရစ်အော်သံ၊ ပုစဉ်းအော်သံ၊ တောကောင်အော်မြည်သံနှင့် ခြောက်ခြားဖွယ်လေတိုးသံတို့ကား ညဉ့်ယံ၌ အတောမသတ်ချေ။
အာရုဏ်မဦးခင် ညကြမ်းလေကြမ်း ကုတ်ခြစ်သံများကြားက အလှုပ်အရမ်းများသော သမိုင်းဘီး၏ရင်ထိတ်ဖွယ် ကြိတ်ဆွဲသံများတွင် အိုမင်းပြိုပျက်ခဲ့ရသော သက္ကရာဇ်တို့များစွာ ..။
“၈၈” မြန်မာ့ဒီမိုကရေစီအရေးတော်ပုံ၊ ပြည်သူ့အရေးတော်ပုံကြီးတွင် ပါဝင်ခဲ့သော လူထုအင်အား လှိုင်းလုံးကြီးများမှာ ‘ပင်လယ်ကြီးတမျှ’ ဟု စာပေမိခင်ကြီး လူထုဒေါ်အမာ ပြောခဲ့သည်။ လှိုင်းကြမ်းများ၊ ပင်လယ်အော်သံများ ကြားခဲ့ရသည်။ ဖွဲ့စည်းပုံအခြေခံဥပဒေကို ကျော်လွန်၍ စစ်အာဏာသိမ်းမှုကစတင်ခဲ့သော မတရားမှု၊ ဖိနှိပ်မှု၊ အကြမ်းဖက်မှုများကို မခံမရပ်နိုင်ဖြစ်ပြီး အော်ဟစ်ကြွေးကြော်ခဲ့ရာမှ စုစည်းညီညွတ်ကြဖို့၊ ခေါင်းငုံ့မခံဘဲ တွန်းလှန်ကြဖို့၊ အဆုံးထိသွားကြဖို့ တိုက်ပွဲခေါ်သံတို့ ဘဝဂ်ထိညံခဲ့သည်။
လူထုလှိုင်း၊ လူထုအော်သံကား မရပ်မနား။တနည်းအားဖြင့် ငြိမ်းချမ်းစွာဆန္ဒထုတ်ဖော် တောင်းဆိုမှုများမှသည် အညံ့မခံသော ခုခံတွန်းလှန်စစ်သို့ မြင့်တက်ခေါ်ဆောင်ခဲ့ခြင်းဖြစ်သည်။
ဒီမိုကရေစီနှင့် လူ့အခွင့်အရေး ခေါ်သံများ၊ စစ်အာဏာရှင် အမြစ်ဖြတ်ရေး ခေါ်သံများ၊ လွတ်လပ်မှု၊ တရားမျှတမှု၊ တန်းတူညီမျှမှု ခေါ်သံများ၊ ဖက်ဒရယ်ဒီမိုကရေစီ ပြည်ထောင်စုတည်ဆောက်ရေး ခေါ်သံများသည် ကမ္ဘာပတ်ပြီး ရိုက်ခတ်ဟည်းခဲ့လေပြီ။
” အာဏာရှင်မှန်သမျှဟာ ဘယ်တော့မှအရှင်မထွက်ဘူး၊ အသေပဲထွက်တယ်”
အမေလူထုဒေါ်အမာ၏ သမိုင်းအသိကလာသောစကားကို အထပ်ထပ်အဖန်ဖန်ကြားရသည်။ အာဏာရှင်ကြီးများက အစွယ်တဖွေးဖွေးနှင့် အာဏာရှင်မျိုးဆက်တို့ကို မွေးဖွားခဲ့သည်။ သူတို့အာဏာထီးနန်းရှည်ကြာရေး၊ မြို့ရိုးပြဿဒ်မြင့်မားရေးအတွက် တိုင်းပြည်၏ အဖိုးတန် သဘာဝသယံဇာတများနှင့် လူ့စွမ်းအားအရင်းအမြစ်များကို ဝါးမျိုဖျက်ဆီးပစ်ခဲ့ကြသည်။ လူသတ်၊ မီးရှို့လျက် တိုင်းပြည်အနာဂတ်ကို အသက်မဲ့စေခဲ့သည်။ သို့သော် Gen – Z တို့က ကြောက်ခေတ်ကိုမှောက်ပစ်ခဲ့ကြပြီ မဟုတ်လား။ ယခု တိုင်းရင်းသားပြည်သူလူထု၏ တခဲနက်သော တော်လှန်ရေးညီညွတ်မှုသည်လည်း ထိုစစ်အာဏာရှင်လက်ကျန်ကို အမြစ်လှန်ရိုက်ချိုးပစ်ရေးအတွက် နောက်ဆုံးအချိန်အခါကောင်းပင်ဖြစ်သည်။
“အာဏာရှင်စနစ်ဆိုးကို အပြီးတိုင် ရိုက်ချိုးကြလော့”
” အာဏာရှင်စနစ်ဆိုးကို အပြီးတိုင် ရိုက်ချိုးကြလော့”
ကမ္ဘာအရပ်ရပ် ပဲ့တင်ထပ်နေသော ထို “မရဏခေါ်သံ” ကို သွေးပျက်ထိတ်လန့်နေသော စစ်အာဏာရှင်တို့ အကြိမ်တစ်ထောင်ကြားစေ။ အခါတစ်သောင်း ကြားရစေသတည်း။ ။
Be the first to comment