“ဂျင်းထဲ့မင်း (သို့မဟုတ်) လူကြီးလူဟောင်းများ”
ငါးမျဉ်းစောင်း မင်းထိပ်ခေါင် ရေးသည်
”ဟူး….မောပါ့ဗျာ”
ကပ္ပိယကြီးဦးထုံက လက်ထဲက ငါးဆင့်ချိုင့်ကြီးကို ကွပ်ပြစ်ပေါ်အသာတင်လိုက်ရင်း ခေါင်းပေါင်းဖျင်တဘက်ကိုဖြုတ်ကာ နဖူးကချွေးစက်များကို သုတ်လိုက်ပါတယ်။ ဦးထုံက နေ့စဉ် ရွာထဲဆွမ်းချိုင့်လာယူရင်း ရွာလယ်ကွပ်ပြစ် လူစုံရာဝင်လာလေ့ရှိတယ်။
”မောရင်…အကြမ်းရည်လေး သောက်လိုက်၊ ခင်မျှမလဲ ဆွမ်းလေးတချိုင့်ဆွဲရသာများ မောရတယ်လို့”
“အင်း .. (၇၀) ကျော်လာတော့လည်း ငယ်ငယ်ကလိုတော့ ဘယ်ဟုတ်ပါ့မလဲဗျာ”
ငညိုရဲ့မှတ်ချက်စကားကို ရေနွေးမှုတ်သောက်နေတဲ့ ဦးထုံက ခေါင်းခါရင်း . . .
”အသက်အရွယ်ကြောင့်မောတာမဟုတ်ဘူး ငညိုရ၊ မင်းတို့ ဘုန်းကြီးကြောင့်”
”အမ်…ကျုပ်တို့ဘုန်းကြီး မဟုတ်တော့ပါဘူးဗျာ ၊ ခုဆို ခင်မျှ မြောက်ကျောင်းဆရာလော်ကို ကျုပ်တို့ တောင်ပိုင်းက ဆွမ်းတောင်လောင်းတော့တာမဟုတ်ဘူး၊ ပြောစမ်းပါဦး၊ ခင်မျှ ဘုန်းကြီးက ဘာဖြစ်နေတုန်း”
”ကျုပ်ကို စစ်သင်တန်းတက်ခိုင်းနေတယ် ”
”အမ်…ဒီတော့ ခင်ဗျားဘာပြန်ပြောလိုက်လဲ”
”ကျုပ် ၇၀ ကျော်နေပြီ စစ်မတိုက်နိုင်တော့ဘူး ဆိုတော့.. ဖွဲတဆုပ်နိုင်သေးရင် အမျိုးဘာသာသာသနာကို ကာကွယ်နိုင်ရမှာ.. တဲ့”
”ခင်မျှ ဆရာလော်ကြောင့်လည်း ခက်ပါ့ဗျာ ”
”ဟုတ်တယ် ငညိုရေ၊ ငါက ဒီရွာချက်မြှုပ်၊ ကလေးဘဝကတည်းက ဒီရွာမှာပဲ နေလာခဲ့တာ၊ ခုလို နိုင်ငံရေး မတည်ငြိမ်တဲ့အခါ ရွာကတောင်ပိုင်းတမျိုး မြောက်ပိုင်းတဖုံ ဖြစ်နေပေမယ့် ရွာသားအားလုံးဟာ ငါနဲ့ ဆွေရိပ်မကင်း မျိုးရိပ်မကင်းတွေချည်း။ ရွာနီးချုပ်စပ်ကရွာတွေလည်း တူတူပဲ၊ ငါ့ဝမ်းနဲ့လွယ်မမွေးခဲ့ရတာပဲရှိတယ်.. အားလုံး တူလို၊ သားလို ရပ်ဆွေရပ်မျိုးတွေချည်း။ တသက်လုံး တမြေထဲနေ တရေထဲသောက်နေလာ ကြတာ ခုအချင်းချင်း စိတ်ဝမ်းတွေကွဲကုန်ပြီကွ၊ တနေ့တနေ့ စိတ်မောရတာ.. သေချင်စော်ကိုနံကရော”
”အမှန်တော့ ကျုပ်တို့က အလိုလို စိတ်ဝမ်းကွဲတာမဟုတ်ဘူးဗျ ၊ လူယုတ်မာတစုက သူတို့အကျိုးအတွက် အိမ်ကြက်ချင်း အိုးမဲသုတ် ခွပ်ခိုင်းနေတာ”
တချိန်လုံး ဆေးလိပ်ဖွာရင်း ငြိမ်နားထောင်နေတဲ့ ဗိုလ်ခေါင့်စကားကြောင့် အားလုံးရဲ့ စူးစမ်းလိုစိတ်များက ဗိုလ်ခေါင့်ဆီရောက်သွားကြတယ်။
”ခုဖြစ်နေတဲ့ ပဋိပက္ခတွေဟာ သွေးရိုးသားရိုးကိစ္စမဟုတ်ဘူးဗျ၊ အမှောင့်ပယောဂတွေ”
”ဘာလဲ ဗိုလ်ခေါင်ရဲ့၊ ပယောဂဆရာခေါ်ရအုံးမှာလား”
ဦးထုံစကားကြောင့် ဗိုလ်ခေါင်က ပြုံးလိုက်ရင်း…
”ပယောဂဆရာကတော့ ကျုပ်တို့ပြည်သူ အားလုံးပါပဲဗျာ၊ ခင်မျှ တွေးကြည့်လေ ခုလို တပြည်သားချင်း တကျက်ကျက်သာဖြစ်နေတာ၊ အဲ့ … ရွာတွေမီးရှို လုယက် သတ်ဖြတ်နေတဲ့သူတွေဟာ တခြားနိုင်ငံက လာတာ မဟုတ်ဘူးဗျ၊ နမူနာအနေနဲ့ စစ်တပ်ကိုပဲ ကြည့် ကျုပ်တို့ စစ်ကိုင်းတိုင်းဟာ ရှေးပဝေသဏီကတည်းက စစ်သားတွေ၊ စစ်သူကြီးတွေ အများဆုံးထွက်ခဲ့တဲ့နေရာ၊ အဲ့ စစ်သားတွေက ကိုယ့်ဇာတိရွာ ကိုယ်တိုင်မီးပြန်ရှို့ နေကြတာသာ ကြည့်တော့…”
”ကျေးဇူးကန်းနေကြတာ”
”အင်း … သာမာန်တွေးရင်တော့ အဲ့သလိုပေါ့ဗျာ ၊ ခင်မျှကို ကျုပ်တခု မေးကြည့်ချင်တယ်”
”မေးဗျာ…”
”၁၉၉၀ နဲ့ ၂၀၂၀ ရွေးကောက်ပွဲတွေ တောင်ပြိုကမ်းပြို နိုင်ခဲ့တဲ့နေရာမှာ တပ်မတော်သားတွေရဲ့ မဲတွေ ဘယ်လောက်ပါမယ်ထင်သလဲ…”
”အဲ…အဲ…”
”မအဲနဲ့ ဦးထုံ၊ တပ်နယ်မြို့တွေဖြစ်တဲ့ မင်္ဂလာဒုံ၊ ထောက်ကြန့်၊ မှော်ဘီ စတဲ့နေရာတွေမှာ ဘယ်ပါတီ တွေနိုင်ခဲ့သလဲ၊ စစ်တပ်ကျောထောက်နောက်ခံဖြစ်တဲ့ တစညတို့ ကြံ့ဖွံ့တို့ အနိုင်ရခဲ့လား..”
”အမ်….”
”ပြင်ဦးလွင်၊ ဗထူး၊ မိတ္ထီလာ တပ်နယ်တွေရောဗျာ”
ငညိုကပါ ဘေးကဝင်ထောက်လိုက်တော့ ကပ္ပိယကြီး မျက်လုံးလေးကလယ်ကလယ်နဲ့ ဇဝေဇဝါ ဖြစ်သွားပေါ့…
”ဒါဆို … စစ်တပ်လည်း ကျုပ်တို့နဲ့ တစိတ်တဝမ်းထဲပေါ့”
”ဟုတ်တယ်၊ ကျုပ်တို့အားလုံး ဂျင်းထည့်ခံထားရတာ”
”အင်း … ဒါဆို ကျုပ်တို့ဆရာလော်လည်း ဂျင်းအကြီးကြီးမိထားတာပေါ့”
”ဒါပေါ့၊ ခင်မျှ ဆရာလော်က ကုလားကြောက်စိတ် ငယ်ထိပ်ရောက်နေတာ၊ ဒီကြားထဲ သူ့ဆရာတွေဖြစ်တဲ့ ဂူဂူတို့၊ ဝီဝီတို့က တကယ့်ဂျင်း အကြီးစားကြီးတွေဆိုတော့ ပိုဆိုးသွားသာပေါ့”
“မနေ့ညက ဆရာလော်ဟောတဲ့တရား နားထောင်ရင်း ကျုပ်တောင်ရွာလည်သွားတယ်”
ကပ္ပိယကြီးစကားကို အားလုံးစိတ်ဝင်စားပြီး ဝိုင်းမေးလိုက်ကြတယ်..
”ဘာတရားတွေများလည်းဗျ ၊ ပြောပါအုံး …”
”ပုစဉ်းက ပဒတ်လေးတွေအပေါ် ချီးပါချသတဲ့၊ ကျုပ်လည်း ဇိနတ္တပကာသနီတို့ ဓမ္မပဒတို့ ဖတ်ထားတာ ဒီလောက်မညံ့ပါဘူး၊ ဒါတောင် သူ့တရားကျ နားမလည်အောင်ဖြစ်နေ…”
”ဟား..ဟား…၊ အဲဒါ ဇိနတ္တပကာသနီတို့ ဓမ္မပဒတို့ထဲ ဘယ်ပါမလဲဗျ၊ ယူကျုတို့ ဖေ့စဖုတ်တို့ ကြည့်မှ နားလည်မှာ..၊ စစ်တပ်က ရဟတ်ယာဉ်နဲ့ ပီဒီအက်ဖ်တွေကို ဗုံးကြဲတာ ပြောတာဗျ”
”သြော်..ဒီလိုလား”
”ဟုတ်ပဗျာ၊ မနေ့ကတောင် ပီဒီအက်ဖ်တွေကို ထမင်းကြွေးလို့ဆိုပြီး တန့်ဆည်ဘက်ကရွာတရွာ မီးရှို့ခံလိုက်ရသေး”
”ဒီလိုကြေးဆို ခင်မျှဆရာလော်ကို ဆွမ်းလောင်းနေတဲ့ ရွာမြောက်ပိုင်းကို ကျုပ်တို့က မီးတင်ရှို့ရမလို ဖြစ်နေပြီ ။ အင်း … ဂျင်းတွေ … ဂျင်းတွေ …”
.
Be the first to comment