“စစ်ရေးစစ်ရာ တပတ်တာ (၂၃)”
နောင်လူသစ်– ဒီဇင်ဘာလ (၈) ရက်မှ ဒီဇင်ဘာလ (၁၄) ရက်အထိ
☆ ၂၀၂၄ ခုနှစ် ဒီဇင်ဘာလ (၈) ရက်မှ ဒီဇင်ဘာလ (၁၄) ရက်အထိ တပတ်တာအတွင်း မြန်မာနိုင်ငံတဝန်း စစ်ကောင်စီနှင့် တော်လှန်ရေးအင်အားစုများကြား လက်နက်ကိုင်တိုက်ပွဲ ကြီးငယ်ပေါင်း (၇၁) ကြိမ်ထက်မနည်း ဖြစ်ပွားခဲ့သည်။
☆ တပတ်တာအတွင်း စစ်ကောင်စီ၏ လေကြောင်းတိုက်ခိုက်မှု၊ လက်နက်ကြီးဖြင့် ပစ်ခတ်တိုက်ခိုက်မှု၊ စစ်ကြောင်းထိုး ဝင်ရောက် သတ်ဖြတ်မှုများကြောင့် အရပ်သားပြည်သူ (၃၅) ဦးထက်မနည်း သေဆုံးခဲ့ရသည်။
☆ တပတ်တာအတွင်း နိုင်ငံတဝန်းရှိ ပြည်နယ်နှင့် တိုင်းဒေသ (၁၂ ) ခုတွင် တိုက်ပွဲများဖြစ်ပွားခဲ့ပြီး မြို့နယ်အားဖြင့် (၃၁) မြို့နယ်အထိရှိသည်။ ရန်ကုန်တွင် မြို့ပြပြောက်ကျားတိုက်ခိုက်မှု (၃) ကြိမ်ရှိခဲ့သည်။
☆ ရခိုင်ပြည်နယ် ဂွ၊ အမ်းနှင့် တောင်ကုတ်မြို့နယ်တို့တွင် ရက္ခိုင့်တပ်တော်နှင့် စစ်ကောင်စီတပ်များကြား တိုက်ပွဲများ အပြင်းအထန် ဆက်လက်ဖြစ်ပွားလျက်ရှိပြီး မောင်တောမြို့အခြေစိုက် နယ်ခြားစောင့်ရဲတပ်ဖွဲ့စခန်း နခခ (၅) ကို ရက္ခိုင့်တပ်တော် (AA) က သိမ်းပိုက်ပြီးနောက် အမ်းမြို့တွင်ရှိသည့် အနောက်ပိုင်းတိုင်းစစ်ဌာနချုပ် (နပခ) ကို ထိုးဖောက်ဝင်ရောက် တိုက်ခိုက်လျက်ရှိသည်။
☆ ကချင်ပြည်နယ်တွင် KIA/PDF ပူးပေါင်းတပ်များက ဗန်းမော်မြို့သိမ်းတိုက်ပွဲကို အပြင်းအထန် ဆင်နွှဲလျက်ရှိသည်။
☆ စစ်ကိုင်းတိုင်းတွင်လည်း KIA/PDF ပူးပေါင်းတပ်များက အင်းတော်မြို့သိမ်းတိုက်ပွဲ ဖော်ဆောင်လာသည်ကို တွေ့ရသည်။
☆ ချင်းပြည်နယ်တွင် ချင်းတော်လှန်ရေးတပ်များက မင်းတပ်၊ ဖလမ်း မြို့သိမ်းတိုက်ပွဲများ ဖော်ဆောင်လျက်ရှိပြီး စစ်ကောင်စီက နေ့စဉ်ရက်ဆက် လေကြောင်းတိုက်ခိုက်မှုများဖြင့် ခုခံလျက်ရှိသည်။
☆ စစ်ကိုင်း၊ မကွေး၊ မန္တလေး၊ ပဲခူးတိုင်းတို့တွင် တိုက်ပွဲပေါင်း (၂၇) ကြိမ်ထက်မနည်း ဖြစ်ပွားခဲ့သည်။
☆ စစ်ကိုင်းတိုင်း၊ မကွေး၊ ပဲခူးဒေသတို့တွင် တော်လှန်ရေးအင်အားစုများက စစ်ကောင်စီ စစ်ကြောင်းများကို ဖြတ်တောက်တိုက်ခိုက်ခြင်း၊ မိုင်းဆွဲတိုက်ခိုက်ခြင်း၊ ဒရုန်းအသုံးပြုတိုက်ခိုက်ခြင်းနှင့် စီးနင်းတိုက်ခိုက်ခြင်းများကို ဖော်ဆောင်ခဲ့ကြသည်။
☆ စစ်ကိုင်း၊ မန္တလေးနှင့် မကွေးဒေသတို့တွင် စစ်ကောင်စီတပ်များက စစ်ကြောင်းထိုးဝင်ရောက်မှုများ တိုးမြင့်လုပ် ဆောင်လျက်ရှိသည်။ စစ်ကောင်စီက စစ်ကြောင်းထိုးဝင်ရောက်၍ ထိန်းချုပ်နိုင်ခဲ့သည့် ကျေးရွာများထဲမှ မန္တလေးတိုင်း မတ္တရာမြို့နယ် အနောက်ဘက်အခြမ်းရှိ ကျေးရွာ (၃) ရွာထက်မနည်းကို မန္တလေး (MDY-PDF) က ပြန်လည်တိုက်ခိုက်ပြီး ထိန်းချုပ်နိုင်ခဲ့သည်။
☆ သတင်းထုတ်ပြန်မှုများအရ တပတ်တာအတွင်း နိုင်ငံတဝန်း တော်လှန်ရေးအင်အားစုများ၏ တိုက်ခိုက်မှုကြောင့် စစ်ကောင်စီတပ်သား ထိခိုက်ကျဆုံးမှု (၆၈) ဦး ထက်မနည်း ရှိခဲ့သည်။ စစ်ကောင်စီတပ်စခန်း (၄) ခုထက်မနည်းကို တော်လှန်ရေးအင်အားစုများက သိမ်းပိုက်နိုင်ခဲ့သည်။
● ဖော်ပြပါ အချက်အလက်များသည် သတင်းမီဒီယာ (၁၀) ခုမှ သတင်းများကို အခြေခံ ကောက်ယူထားခြင်းဖြစ်သည်။ တိုက်ပွဲနှင့် ထိခိုက်ကျဆုံး အရေအတွက်မှာ ဖော်ပြထားသည်ထက် ပိုမို များပြားနိုင်သည်။
● စက်ဝိုင်း အရွယ်အစားသည် တိုက်ပွဲအရေအတွက်ကို ညွှန်းသည်။ စက်ဝိုင်းအရွယ်ကြီးသည်နှင့်အမျှ တိုက်ပွဲအရေအတွက် ပိုများသည်ဟု ဆိုလိုရင်းဖြစ်သည်။
Be the first to comment