“စစ်အနိုင်တိုက်ရေးနှင့် နိုင်ငံရေးစကားဝိုင်း”
ဆူးနတ်သန်မြန်မာပြည်သူလူထု တရပ်လုံးသည် စစ်မက်ဖြစ်ပွားခြင်းထက် ငြိမ်းချမ်းစွာ အတူယှဉ်တွဲ နေထိုင်လိုသော ဆန္ဒရှိကြသူတွေ ဖြစ်ပါတယ်။ ၂၀၂၁ အာဏာသိမ်းမှု ဖြစ်စဉ်အပြီး ငြိမ်းချမ်းစွာ ဆန္ဒပြတဲ့လူထုကို စစ်တပ်ရဲ့ မတရား ဖိနှိပ် ရက်စက် ကြမ်းကြုတ်မှုတွေကို မခံနိုင်တဲ့အဆုံး လက်နက်ကိုင်လမ်းစဉ်ကို မဖြစ်မနေ ရွေးချယ်ခဲ့ကြရပါတယ်။
စစ်မက်ဖြစ်ပွားခြင်းကို နဖူးတွေ့ ဒူးတွေ့ခဲ့ရတဲ့ ပြည်တွင်းစစ် နှစ်ပေါင်း ၇၀ ကျော် အတွေ့အကြုံဟာ တိုင်းရင်းသား လူထုနှင့် ဗမာလူထုကြားမှာ ခါးသီးတဲ့ အတွေ့အကြုံတွေဆိုတာ သိရှိခဲ့ကြပြီးသားပါ။ ဒါပေမဲ့ ၂၀၂၁ တနိုင်ငံလုံး အတိုင်းအတာ လက်နက်ကိုင်လမ်းစဉ်နဲ့ တော်လှန်ပုန်ကန်တဲ့ အနေအထားဟာ လေးနှစ်ကြာ ဖြတ်သန်း ကြံ့ကြံ့ခံလာခဲ့ကြပါတယ်။ စစ်ဟာ အပြန့်အကား ပိုကြီးထွားလာပါတယ်။
စစ်မက်နဲ့အတူ လူထုဟာလည်း အနိမ့်ကျဆုံး လူနေမှုစနစ်ကို အန်တု ရှင်သန်ခဲ့ကြပါတယ်။ စစ်ဖြစ်ပွားရာ မြို့ရွာဒေသတွေဟာ ပြာပုံထဲက မရုန်းကြွနိုင်သေးခဲ့ပါ။ ၂၀၂၄ ဒီဇင်ဘာ ၂၉ ရက်နေ့ ရက္ခိုင်အမျိုးသားအဖွဲ့ချုပ် ထုတ်ပြန်ချက်မှာ ရခိုင်တပြည်လုံး တိုက်ခိုက် သိမ်းယူပြီးပါက ရခိုင်ပြည်နယ်၏ တိုးတက်ဖွံ့ဖြိုးရေး လိုလားသော နိုင်ငံရေးအဖွဲ့အစည်း မည်သူနဲ့မဆို နိုင်ငံရေး ဆွေးနွေးမည် ဆိုတဲ့အချက် တွေ့ရပါတယ်။
တိုင်းရင်းသား လက်နက်ကိုင် အဖွဲ့အစည်းတွေထဲ ဗမာလက်နက်ကိုင် PDF များနှင့် မဟာမိတ်တပ်တော် AA ၏ နိုင်ငံရေး ရှင်သန်မှုကို အတုယူ အားထားသင့်ပါတယ်။
အလယ်ပိုင်း ပြည်မဒေသဟာ ဗမာလူထု တော်လှန်ရေးတပ်များ စိုးမိုးထားပြီး တိုင်းရင်းသား လက်နက်ကိုင်များနှင့်အတူ ယှဉ်တွဲ စစ်ရေးပုံဖော်နေတဲ့ ဒေသဖြစ်ပါတယ်။ ဥပမာ စစ်ကိုင်းတိုင်းနဲ့ မကွေးတိုင်း၊ မန္တလေးတိုင်းတို့ ဖြစ်ပါတယ်။
အညာဒေသ ပြည်မအတွက် စစ်ကိုင်းတိုင်း၏ စစ်ရေး အဆုတ်အတက်ဟာ အရေးပါလှပါတယ်။ စစ်ကိုင်းတိုင်း အထက်ပိုင်းဟာ ကချင်နဲ့ ပူးတွဲထားပြီး စစ်ကိုင်းတိုင်း အောက်ပိုင်းကို NUG, PDF များရဲ့ ဦးဆောင်မှု အသာစီး ယူထားတာ တွေ့ရပါတယ်။
စစ်ကိုင်းတိုင်းရဲ့ စစ်ဘောင်ဟာ ကျန်တိုင်းတွေထက် ကျယ်ပြန့်တာ တွေ့ရပါတယ်။ စစ်ဘောင် ကျယ်ပြန့်ရခြင်းမှာလည်း တတိုင်းလုံး အနေအထားအရ စစ်ကိုင်းတိုင်းဟာ တော်လှန်ထကြွနေတာပါ။ အလယ်ပိုင်း ပြည်မဒေသ စစ်အနိုင် တိုက်ရေးဟာ စစ်ကိုင်းတိုင်းရဲ့ စစ်နယ်နိမိတ် စိုးမိုးမှုအပေါ် အများကြီး မူတည်နေပါတယ်။ ပြည်မရဲ့ စစ်ရေးဟာ
စစ်ကိုင်းတိုင်းရဲ့ စစ်ရေး အသာစီးရရှိမှုမှာ အထောက်အပံ့ ဖြစ်စေပါလိမ့်မယ်။
စစ်ကို အနိုင်တိုက်ခြင်းဟာ နိုင်ငံရေး အဖြေထွက်ဖို့မဟုတ်ဘဲ စစ်အနိုင်တိုက်ခိုက်ပြီး စစ်ဘောင်ကျဉ်းစေမဲ့ နိုင်ငံရေးစကားဝိုင်းကို ဦးတည်ခြင်းက သင့်လျော်တဲ့အဖြေဖြစ်ပါတယ်။ စစ်တပ်ဟာ အာဏာရှင်စနစ်ကို လက်တွေ့ကျကျ ကျင့်သုံးနေဆဲ ဖြစ်တာကြောင့် မည်သည့် တိုင်းရင်းသား လက်နက်ကိုင်မဆို စစ်အနိုင်တိုက်ခိုက်ပြီး နိုင်ငံရေးအဖြေကို တိတိကျကျ အဖြေရှာကြဖို့ လိုအပ်ပါတယ်။
နိုင်ငံရေးဘောင် ကျဉ်းမြောင်းအောင် လုပ်ပစ်ပြီး စစ်ဘောင်ကျယ်စေခဲ့သော စစ်တပ်ကို အမှန်ကန်ဆုံး နည်းလမ်း ရောက်စေမှာက တတိုင်းပြည်လုံး အနေအထား စစ်အနိုင်တိုက်ခြင်းပါပဲ။ စစ်ရေးအသာစီး ရရှိမှု၊ နိုင်ငံရေးဘောင် ရရှိလာမှု အစရှိသည် ပြုမူ ဆောင်ရွက်ကြပြီး ပင်မ ပန်းတိုင်ဖြစ်တဲ့ ဒီမိုကရေစီလမ်းခရီး Federation ခရီးဟာ
တရွေ့ရွေ့ ခရီးနှင်လို့ ရလာမှာဖြစ်ပါတယ်။
ဗမာလူထုမှာ စစ်တပ်မရှိပါ။ စစ်တပ်မှာပဲ စစ်တပ်ရှိပါတယ်။ ဗမာတွေရဲ့ နိုင်ငံရေးရည်မှန်းချက်ဟာ တိုင်းရင်းသားလူမျိုးစုများရဲ့ နိုင်ငံရေးရည်မှန်းချက်နှင့် ထပ်တူပါပဲ။ စစ်တပ်ပြုတ်ကျရေးနဲ့ ဒီမိုကရေစီ ဖက်ဒရယ်ခရီးသာ ဖြစ်ပါတယ်။
စစ်ကို အနိုင်တိုက်ပြီး နိုင်ငံရေးလမ်းစဉ်ကို အတူတကွ ချီတက်ကြရအောင်လို့ ဆော်ဩလိုက်ရပါတယ်။
Be the first to comment