ပြည်သူတဦး၏ တော်လှန်အသိ၊ တော်လှန်သတိ

ရန်သူဟာ ရန်သူပီသစွာပဲ အပြစ်မဲ့ ပြည်သူတွေရဲ့အသက်ကို အသားစိမ်း၊ ငါးစိမ်းကို ခုတ်ထစ်သလို အပိုင်းပိုင်းအတစ်တစ် ခုတ်ထစ် သတ်ပစ်နေတဲ့အချိန်မှာ ကျနော်တို့ ပြည်သူတွေဟာဆိုရင်လည်း အရင်ကထက်ပိုတဲ့ တော်လှန်အသိ၊ တော်လှန်သတိရှိကြဖို့ လိုပါတယ်။ အာဏာသိမ်းပြီးနောက် (၁. ၂. ၂၀၂၁ မှ ၂၄. ၁၀. ၂၀၂၄) အတွင်း အကြမ်းဖက်စစ်အုပ်စုရဲ့ သတ်ဖြတ်မှုကြောင့် ကျဆုံးခဲ့ရသော အရပ်သားပြည်သူပေါင်း ၆,၀၀၀ + နီးပါး ရှိခဲ့ပြီဖြစ်ပြီး အပြစ်မဲ့ ဖမ်းဆီးခံထားရသူ အရေအတွက်ဟာ ၂၈,၀၀၀ နီးနီး ရှိခဲ့ပြီဖြစ်ပါတယ်။ ပြည်သူတွေအတွက် အသက်ရင်းပြီး တိုက်ခိုက်ပေးနေတဲ့ ပြည်သူ့တော်လှန်ရေး တပ်ဖွဲ့ဝင်တွေရဲ့ အမေ့အိမ်ပြန်ခရီးဟာ ပိုပြီးနီးကပ်လာလေ မိဘပြည်သူတွေအနေနဲ့ဟာလည်း တော်လှန်အသိ၊ တော်လှန်သတိကပ်ကာ အမြဲစောင့်ကြည့်ပြီး နေထိုင်ကြဖို့ရာ အရေးကြီးလှပါတယ်။

နောက်ထပ် အပြစ်မဲ့ပြည်သူတွေ မဆုံးရှုံးဖို့၊ ပြည်သူ့စစ်သားကောင်းရဲ့ အသက်တွေ ထပ်မရင်းရဖို့ဟာ ကျနော်တို့ ပြည်သူတွေမှာလည်း တာဝန်ရှိလှပါတယ်။ ပြည်သူကနေ မွေးထုတ်ပေးလိုက်တဲ့ ပြည်သူ့စစ်သားတွေဟာ စစ်သားတာဝန် ကျေပွန်အောင် ကြိုးစားနေကြသလို ပြည်သူဟာလည်း ပြည်သူပီသစွာ ပြည်သူရဲ့ တော်လှန်သတိကပ်လျက် နေသင့်ပါတယ်။ အာရုံလွဲစရာ များလှတဲ့ကာလမှာ တော်လှန်းရေးအပေါ် မျက်ခြေမပျက် စောင့်ကြည့်ခြင်းဟာ လည်း တခုအပါအဝင် ဖြစ်ပါတယ်။

တော်လှန်အသိ၊ တော်လှန်သတိဟာ နေ့စဥ်ဆောင်ရွက်နေကျ မနက်စာ စားသကဲ့သို့ နိစ္စဓူဝ ကိစ္စတခုဖြစ်နေဖို့ လိုပါတယ်။ တော်လှန်အသိရှိဖို့ တော်လှန်ရေးနဲ့ပတ်သက်ပြီး အချိန်နှင့်အမျှ တင်ပြပေးနေသော သတင်း၊ မီဒီယာများအား follow လုပ်ခြင်း၊ online campaign များတွင် ပါဝင်ခြင်းများနှင့်အတူ တချိန်တည်းမှာပဲ မိမိတို့ရဲ့ လုံခြုံရေးအတွက် ပြည်သူကို လျစ်လျူရှုထားသော အကြမ်းဖက်အလိုတော်ရိ အသုံးခံများကိုလည်း ဘေးပတ်ဝန်းကျင်မှာ သတိထားပြီး သတိနဲ့ ဖယ်ကြဥ်ထားဖို့ရာ လိုအပ်ပါတယ်။

ပြည်သူအချင်းချင်း ရုပ်ပိုင်းဆိုင်ရာသာမက စိတ်ပိုင်းဆိုင်ရာ ကူညီစောင့်ရှောက်မှုဟာလည်း အရေးကြီးတဲ့ကဏ္ဍမှာ ပါဝင်ပါတယ်။ ယခုဆိုလျှင် အများစုသော လူငယ်များဟာ အတင်းအမ္မ စစ်မှုထမ်းရန်အတွက် စစ်သားစုဆောင်းခံရတာဟာ အနီးပတ်ဝန်းကျင်မှာ နေ့စဥ်နဲ့အမျှ ကြုံတွေ့နေရသော ကိစ္စတခု ဖြစ်လာပါတယ်။ အနီးပတ်ဝန်းကျင်ရှိ ထိုကဲ့သို့ မိသားစုများ၊ အကျဥ်းကျ ဖမ်းဆီးခံပြည်သူများ၏ ကျန် မိသားစုများအပေါ်မှာလည်း ရုပ်ပိုင်းဆိုင်ရာသာမက စိတ်ပိုင်းဆိုင်ရာ ကူညီစောင့်ရှောက်မှုများ လိုအပ်လှပါတယ်။

ထို့အပြင် ဘေးပတ်ဝန်းကျင်မှ CDM ဝန်ထမ်းများအား ကူညီစောင့်ရှောက်ခြင်းဟာလည်း တော်လှန်ပြည်သူအချင်းချင်း ကာကွယ်စောင့်ရှောက်မှုတခု ဖြစ်ပါတယ်။ ဥပမာ CDM ဝန်ထမ်းတဦး၏ တနိုင်တပိုင် လုပ်ငန်းများအား အားပေးခြင်းဖြင့်လည်း တော်လှန်ရေးမှာ ပါဝင်နိုင်ပါတယ်။ ပြည်သူအချင်းချင်း စောင့်ရှောက်နိုင်ဖို့ မိဘပြည်သူများအနေဖြင့် မိမိကိုယ်တိုင် စိတ်ရောကိုယ်ပါ တော်လှန်အသိ၊ တော်လှန်သတိကပ်ကာ အချင်းချင်း ဖေးမရင်း တော်လှန်ရေးကာလကို ဖြတ်သန်းကြဖို့ လိုအပ်လှပါတယ်။