ရာဇဝင်အူပေါက် ဇာတ်တော်အူပေါက်

“ရာဇဝင်အူပေါက် ဇာတ်တော်အူပေါက်”

ဘဒ္ဒ

ဝေဿန္တရာမင်းကြီး ပြည်နှင်ဒဏ်ခံရတုန်းက မဟာပထဝီမြေကြီးက အိုးထိမ်းစက်ပမာ ချာချာလည်တာ သုံးကြိမ် တောင်တဲ့။ နောက်တော့ မင်းကြီးက စိတ်ဖြတ်လိုက်မှ ခရီးဆက်လို့ရသတဲ့။ ဇာတ်တော်ကြီးဆယ်ဘွဲ့မှာ နောက်ဆုံးဘဝကို စိတ်ထဲ ခိုးလိုးခုလုဖြစ်မိတယ်။တိုင်းပြည်ပိုင်တဲ့ ဆင်ဖြူတော် ကိုယ်ပိုင်ပစ္စည်းလိုသဘောထားပြီး သူများတိုင်းပြည်ကို လှူသကိုးးး။အလှူအတန်း တယ်ရက်ရောလွန်းတော့ အခွင့်ကောင်းယူသူတွေလည်း ရှိတာပေါ့။

ဒါဖြင့် နေပါဦး ပြည်သူပိုင် တိုင်းပြည်ပိုင်ဆင်ဖြူတော်လေ။ သူပိုင်လည်းမဟုတ်။ ဆင်ဖြူတော်ဆိုတာကလည်း အလွန်ရှားလို့ ရတနာလို့တောင် တင်စားရမဟုတ်လား။

ခုခေတ်လို ခရုသင်းစွဲ ဆင်ဖြူတော်ဖြစ်ရတာ လွယ်မှတ်လို့။

ကြံအင်လက္ခဏာဆိုတာက ရှိသေးတယ်။ ဖြူတူတူဖြဲတဲတဲဖြစ်တိုင်း ဆင်ဖြူတော်လို့ သမုတ်လို့မရဘူး။
ဆင်ဖြူတော်ဆိုတာ လျှာနီ အာနီ လက်ဖဝါးနီ ရှိရသတဲ့၊ ဒါက အကြမ်းဖျင်းပြောပြတာ။ ခြေသည်းလက်သည်းကအစ ကြံအင်လက္ခဏာ ညီရသဗျ။ ခညားတို့ဆင်နဲ့ တူသလား၊ တန်သလား။ သို့သော်ငြား ဆင်ဆိုသည်မှာ တိရစ္ဆာန်ပေတည်း။ ခြုံပြောရရင် ဆင်ဆိုတာ တိရစ္ဆာန်။
ဆင်ကြီး ထိုင်ရှိခိုးရင် ငှဲ ငှဲ •••

ဝေဿရာမင်းကြီးရဲ့ စွန့်ခြင်းကြီးကလည်း အံ့မခမ်း၊ ဪ သူက ဘုရားလောင်းကိုးဗျ။ သူ့ဦးခေါင်း နှလုံးသည်းပွတ်တောင် ထုတ်လှူဖို့အထိ သဒ္ဒါအားကြီးလွန်းတော့ အတွေးအကြံနဲ့တင် မဟာပထဝီမြေကြီးက မြေငလျင် တုန်ဟီးရပေတယ် မဟုတ်ပါလား။ ဇနီးတောင် လှူဦးမလို့။ ဘုရားဖြစ်ဖို့ပါရမီထဲ စွန့်ခြင်းကြီး ၅ ပါးက ပါသကိုး။ ရတနသုတ်အကျယ် ပြန်စဥ်းစားကြည့်။

ဒါတောင် သိကြားမင်းသဘောကောင်းလို့ မိဖုရားမှာ ချမ်းသာရာရရှာတာ။ သနားစရာ။ အဲဒီတုန်းက အမျိုးသမီးအခွင့်အရေးတွေ ဘာတွေကလည်း မရှိဘူးနဲ့တူရဲ့။ ဒါတောင် ကလေးတွေ လှူလိုက်သေးတာ။ ကိုယ့်ရင်ကဖြစ်တဲ့ သားသမီးဆိုတိုင်း ကိုယ့်မယားဆိုတိုင်း ငါ့အပိုင်ဆိုတဲ့ မင်းကြီးကျင့် မင်းကြီးကြံ သက်ဦးဆံပိုင်ခေတ်ကိုးဗျ။

စူစကာပုဏ္ဏား လှူတာအကုန်စားလို့ စားပိုးနင့်သေပေလို့။
လူ့အခွင့်အရေးဆိုတဲ့ စကားလုံးမျိုးတွေ မရှိဘူးနဲ့တူပါ့။ကလေးသူငယ်အခွင့်အရေး အဝေးကြီးနေမှာ။ ဟိုတုန်းက ဒီမိုကရေစီတွေဘာတွေ မပြောကြပေမယ့် ဟစ်တိုင်သွားအော်ရင် ညီလာခံမှာတင်ပြပေးပြီး အဆင်ပြေအောင် ဆောင်ရွက်တော်မူသတဲ့လေ။အယ်ဒီတာထံပေးစာထက် နိပ်နေပြန်ရော။

အခုခေတ်လို သံချပ်ထိုးစရာမလို။ ခွင့်ပြုမိန့် တောင်းစရာမလို။ ပုဒ်မတပ် ထောင်ချစရာမလို။ ဒီခေတ်လိုသာဆိုထောင်တောင်ဆန့်မှာမဟုတ်။ ဟိုတုန်းကဘုရင်တွေက ရုပ်ဖျက်ပြီး ပြည်သူကြားထဲဝင်ပြီး စနည်းနာသေးဆိုတော့ ပြည်သူက အတင်းပြောသမျှ ဘုရင့်နားနဲ့ ဆတ်ဆတ်ကြားရတော့ ကြားထဲက ထောက်လှမ်းရေးလိုလို ဒလန်သတင်းပေး နှစ်လုံပြူးမလိုဟာတွေဝင်ပြီး ချောပစ် ဂုံးတိုက်လို့လည်းမရ။ တယ်ဟန်ကျ။ အဆင်ကို ချောနေတာပဲ။ ဖေ့စဘုတ်လည်းမရှိ။ ၅၀၅ တွေ ဘာတွေမရှိ။ ဖွတာတို့ သတင်းမှားတွေ အခွင့်ကောင်းယူ တင်စရာမရှိ။ အတော်ဟုတ်တာ။

တရားတဘောင်စီရင်တာ မဟုတ်ရင်လည်း ကယ်မယ့် ထီးချက်စောင့်နတ်သမီးက အဆင်သင့်။ အလွန်ဟန်ကျတာပဲ။ ဘာစီမံကိန်းညာစီမံကိန်းတွေမရှိ။ ဘတ်ဂျက်တွေ ဘာတွေ တင်စရာလည်းမလို။ အခွန်တွေဘာတွေတော့ ကောက်တာရှိတယ်။ ဒါလည်း ကြည်ကြည်ဖြူဖြူ ပေးနိုင်ကမ်းနိုင်ကြတယ်။ ပြေလည်ကြသကိုး။ မင်းနဲ့ပြည်သူ တကယ် ကြည်ဖြူကြတယ်လေ။

လိုင်းကြေး သွားမတောင်းလေနဲ့ တယောက်တဝက်ဆိုပြီး ကြည်နူးနေလို့မရ။ ကြိမ်ဒဏ်သာ ပေးတော်မူပါဘုရားနဲ့ တွေ့သွားမယ်။

အင်း ••• ခုများတော့ — အို ပြောရဲပါဘူး။
ခေတ်ကြီးက သိတယ်ဟုတ်လား။ ဘာမဆိုလုပ်ရဲတယ်ဆိုတဲ့ခေတ်။ ရန်လေးတို့အုပ်စုထဲကထင်ပါရဲ့။