အဝါရောင်တိမ်တွေနဲ့ နေ့

ပြတင်းတံခါးကို ဖွင့်ပြီးတော့ ကောင်းကင်ဆီကို မော့ကြည့်လိုက်တဲ့အခါ ပြေးနေတဲ့တိမ်တွေဟာ အဝါရောင်တွေဖြစ်နေတာကို မြင်ရရဲ့။ တကယ်က ကွန်ပျူတာစခရင်ကြည့်‌နေရင်း မောသွားတဲ့ အချိန်တွေခဏ။ အတွေးတိမ်တောင်များဝေ့ဝဲနေစဉ်ခဏ။ သက်ပြင်းနွမ်းလျများ အနည်းငယ်မျှ တိုးလျော့သက်သာစေချင်တဲ့ ခဏ။ ဒီလိုခဏငယ်များကြောင့် ပြတင်းတံခါးကို တွန်းဖွင့်လိုက်မိတာပေါ့။ ဒါပေမဲ့ ကျ​နော်ဆက်လက်ပြီး တွန်းဖွင့်မိတဲ့ တံခါးက အိမ်ရှေ့ဝဆီက တံခါးချပ်များ မဟုတ်။ ခန်းစီးစများ လွင့်ခါနေသော ပြတင်းချပ်ကလေးများ မဟုတ်။ တိုင်ဝမ်နိုင်ငံကလေးဆီက ရုပ်ရှင်တံခါးချပ်များဆီ။

တိုင်ဝမ်ရုပ်ရှင်တွေဟာ ကျွန်တော်တို့ကို မျက်ဖြူလန်ပြီး အံ့အားသင့်တုန်လှုပ်စေတာ အမှန်ပဲ။ ကျ‌နော်တို့ တုန်လှုပ်စေတယ်ဆိုတာက ပြောရရင် ရှက်စရာကောင်းလှပါတယ်။ ခုလို အင်တာနက်တွေ ပွင့်လန်းတဲ့ အချိန်အခါတွေနဲ့ ကြုံကြိုက်ရခဲ့လို့သာ ဒီလို လက်ရာတွေ ရုပ်ရှင်တွေ အကြောင်းကို သိခဲ့ရတာပါ။ ကမ္ဘာ့ရုပ်ရှင်ဘိုးအေတိုင်းပြည်တွေ ဖြစ်ကြတဲ့ ဟောလိဝုဒ်၊ ပြင်သစ်၊ ဂျပန် စတဲ့ တိုင်းပြည်တွေအထိ တိုင်ဝမ်က ရုပ်ရှင်လက်ရာတွေက 1980 ကျော်မှာကတည်းက အံ့ဩဘနန်း ဖြစ်စေခဲ့ပြီးပါပြီ။ ကမ္ဘာ့ရုပ်ရှင်ရပ်ဝန်းက ထင်ရှားတဲ့ ရုပ်ရှင်အရွေ့တွေ ဖြစ်ကြတဲ့ ပြင်သစ်ရုပ်ရှင်လှိုင်းသစ်၊ အီတလီ ရုပ်ရှင် လှိုင်းသစ်၊ ချက်က ရုပ်ရှင်လှိုင်းသစ် အရွေ့၊ ရုရှားက ရုပ်ရှင်အရွေ့၊ ဟောလိဝုဒ်၊ ဂျပန် အရွေ့ စလို့ မှတ်ကျောက်ပြုကြရချိန်‌တွေမှာ တိုင်ဝမ်ရဲ့ 80 ကျော်ကာလ‌ကနေ ထွက်ရှိတဲ့ လှိုင်းသစ် ရုပ်ရှင်အရွေ့ရဲ့ လက်ရာတွေကလည်း သူတို့တွေနဲ့ တတန်းတည်း ထားလို့ရလောက်အောင်အထိ ပြောင်မြောက်လတ်ဆတ်လို့ နေခဲ့တာပါ။

ဂျပန်တွေသိမ်းပိုက်ခြင်း ခံရတာကနေ ဂျပန်တွေလက်က လွတ်ပြန်တော့ တရုတ်ပြည်မကြီးရဲ့ လောင်းရိပ်ကနေပါ တဖန် ထပ်မံပြီးတော့ လွတ်မြောက်ဖို့ ရုန်းကန် အားထုတ်ခဲ့ရတဲ့ တိုင်ဝမ်တိုင်းပြည်ကလေးက လက်ရှိအချိန်အထိ အနုပညာရှင်အမိုက်စားတွေ ရုပ်ရှင်အကောင်းစားတွေ စသဖြင့် မှတ်ကျောက်ပြု ခံရအောင် ဆင့်ကဲ ထွက်ပေါ်လာခဲ့ကြတယ်။ Edward Yang ၊ Hou Hsiao-Hsien တို့ကနေ ပြောင်းလဲသွားတဲ့ ရုပ်ရှင်စီးကြောင်းမှာ ဥရောပဘက်က ရုပ်ရှင်ဟန်တွေနဲ့ မိမိတို့ဆီက ရှိရင်းစွဲဖြစ်ပျက်မှုတွေကို အကောင်းဆုံးပေါင်းစပ်ရင်း တိုင်ဝမ်ရဲ့ ကိုယ်ပိုင် ရုပ်ရှင်သင်္ကေတ ပုံသဏ္ဍာန် ထုထည်ကို ဖော်ပြနိုင်ခဲ့ကြတယ်။ သူရို့အုပ်စုတွေကနေ ညီညီညွှတ်ညွှတ်နဲ့ ပေါင်းစပ်ရိုက်ကူးခဲ့ကြတဲ့ အနုပညာမျိုးစေ့ စစ်မှန်အားကောင်းမှုတွေကနေတဆင့် ယခုအချိန်မှာတော့ တိုင်ဝမ်ရဲ့ ရုပ်ရှင် အနုပညာလုပ်ငန်းက ကမ္ဘာ့အလယ်မှာ ပွဲလယ်တင့်စွာနဲ့ပဲ ရပ်တည်စီးဆင်းလို့နေခဲ့ပါပြီ။

ယခု ကျ‌နော် ပြောပြချင်တဲ့ ရုပ်ရှင်ဆိုတာကလည်း တိုင်ဝမ်ရုပ်ရှင် လောကရဲ့ ရွှေသားစစ်စစ်အနုပညာတွေ အကြောင်းကို ဖော်ပြတဲ့ လက်ရာမှာ အချိုးအကွေ့ အဖြစ် ရှိနေတဲ့ ရုပ်ရှင်ကား တကား ဖြစ်ပါတယ်။ ကဗျာဆန်စွာ ခိုင်းနှိုင်းရမယ် ဆိုရင် “A Brighter Summer Day” (1991) ရုပ်ရှင်ဟာ အဝါရောင်တိမ်တွေရဲ့

အကြောင်းပါပဲ။ သူတို့ဆီက ပြောင်းလဲစ တိုင်ဝမ်ရဲ့ 61 ခုနှစ်များဆီက ပြည်မဘက်က ရွှေ့ပြောင်းအခြေချ ပြဿနာတွေ။ အဆင်မပြေဖြစ်နေတဲ့ အခြေခံပညာရေးအကြောင်းတွေ။ ဂျပန်အငွေ့အသက်မကုန်သေးတဲ့ တိုင်ဝမ်အိမ်ယာတွေ။ လမ်းပျောက်နေကြတဲ့ ဆယ်ကျော်သက်လူငယ်တွေရဲ့ အမိုက်စားရန်ပွဲတွေ။ ဒါတွေဟာ ဒါရိုက်တာ Yang ကျော်ဖြတ်ခဲ့ပြီးသား ငယ်ဘဝပုံရိပ်တွေကို ရုပ်ရှင်ပညာနဲ့ ပြန်လည်အသက်သွင်းခြင်းလို့လည်း ဆိုနိုင်ပါရဲ့။ တိုင်ဝမ်အကောင်းဆုံးရုပ်ရှင်အကြောင်းတွေပြောမယ်ဆိုရင် ဒီရုပ်ရှင်ဟာ ထိပ်ဆုံးမှာ ရှိနေမှာ အသေအချာပဲပေါ့။

ကျွန်တော်တို့ဆီက အာဏာရှင်တွေရဲ့လက်မည်းကြီးများအောက်က ပညာရေးနဲ့ကြီးပြင်းမှုတွေဟာလည်း စဉ်းစားကြည့်ရင် ရင်နာစရာကောင်းတဲ့ညတွေပဲ။ မီးမလာလိုက်၊ ပျက်လိုက်ဖြစ်နေတဲ့ ညလမ်းတွေမှာ တရုတ်ဆိုင်ကယ်တွေကိုယ်စီနဲ့ ဘာတွေလုပ်ကြမှန်းမသိ။ ဘယ်အရာကဘဝအဓိပ္ပါယ်ဆိုတာလဲကို ရှာဖွေနေကြတဲ့လူငယ်ဘဝတွေ။ ဆိုင်ကယ်ထောင်စီးတာဟာ ပျော်ရွှင်စိတ်လှု ပ်ရှားဖွယ်ရာလား။ အုပ်စုလိုက် ချိန်းရိုက်ကြနှက်ကြတာတွေဟာ အဓိပ္ပါယ်ရှိတဲ့ ဘဝနေ့ရက်များလား။ ခေတ်ဟာ အရာရာကို ပိတ်ဆို့ထားတယ်။ အခွေဆိုင်က မှိုတောင်စွဲနေတဲ့ 80 ကျော်ခေတ်က ဟောလိဝုဒ်အညှီအဟောက်တိတ်ခွေတွေကိုပဲ အောက်စက်ဟက်ကို အရက်ပြန်နဲ့ပွတ်ပြီး ပြန်ကြည့်ခဲ့ရတဲ့ နေ့တွေပေါ့။

ဒီလိုညတွေနေ့ထဲမှာ မခင်နှင်းဆီလို မိန်းကလေးတွေအကြောင်းပါမယ်။ ခုနစ်ဆောင်တိုက်ခန်းက တို့ထိပိုင်ခွင့်မရှိတဲ့ တော်ဝင်မိန်းမလှတွေအကြောင်းလည်း ရှိခဲ့မယ်။ ထိုနည်းတူစွာပဲ ဘူတာပျက်တွေဘေးက ရုပ်အဆင်းအရမ်းလှသလောက် ဆင်းရဲမွဲတေတဲ့ဖိအားနဲ့ ပျက်စီးသွားခဲ့တဲ့ မိန်းကလေးတွေအကြောင်းလည်း ပါခဲ့ကြပါတယ်။ ပြီးတော့လည်း ခဏတဖြု တ်ပါဆိုပြီး အိမ်တံခါးခေါက်ခေါ်သွားလို့ ဘယ်တော့မှပြန်မလာတော့တဲ့ အိမ်ထောင်ဦးစီးဖခင်တွေအကြောင်း… စလို့ ဘဝတွေဟာ အမှောင်အတိကျခဲ့မှုတွေချည်းပဲပေါ့။

ခုရုပ်ရှင်ကလည်း အဲဒီလို တိုင်ဝမ်အမှောင်ခေတ်တွေရဲ့အကြောင်းတွေကို တလုံးတဝကြီး ရှုမြင်ရတဲ့ ဇာတ်အိမ်ကြီးတခုဖြစ်ပါတယ်။ လေးနာရီလောက်ကြာမြင့်တဲ့ရုပ်ရှင်မှာ ရာချီပါတဲ့ တခါမှသရုပ်မဆောင်ဖူးတဲ့ လူငယ်ပေါက်စလေးတွေကို နိုင်နင်းစွာ ထားသိုတင်ဆက်ထားပါတယ်။ ဒါကြောင့်လည်း Edward Yangဆိုရင် မေ့ထားလို့မရတဲ့ အကောင်းဆုံး ဒါရိုက်တာကြီးတယောက်အဖြစ် မှတ်ကျောက်ပြု ကြရတာပဲ။

ဇာတ်ကောင်တွေအများကြီးပါပေမယ့် Si’r ဆိုတဲ့ ကောင်လေးက ဒီရုပ်ရှင်မှာ အဓိကကျတဲ့နေရာကဖြစ်တယ်။ သူ့အဖေက ပြည်မကြီးဘက်ကနေ ပြောင်းလာတဲ့ ခေတ်ပညာတတ်။ ရိုးရိုးအေးအေးနဲ့ ကျရာတာဝန်ကိုပဲ တာဝန်ကျေအောင်လုပ်တတ်တဲ့ အစိုးရဝန်ထမ်းကြီး။ မိသားစုတွေနဲ့အတူ ခြိုးခြိုးခြံခြံနဲ့နေတတ်တယ်။ အိမ်မှာရေဒီယိုအစုတ်ကြီးတလုံးရှိတာတောင် အသစ်မဝယ်နိုင်ရှာဘူး။ဒါကြီးပဲ လက်နဲ့ပုတ်လိုက်။ နားထောင်လိုက်လုပ်ရတယ်။ သားနှစ်ယောက် သမီးနှစ်ယောက်နဲ့အတူ အိမ်ထောင်မှု တာဝန်ကိုကျေပွန်ရှာတဲ့ ဇနီးကောင်းတယောက်နဲ့အတူ ဘဝကိုဖြတ်သန်းနေသူပေါ့။ သူ့ရဲ့သားသမီးတွေအပေါ်လည်း ညင်ညင်သာသာနဲ့ပဲ ပြောဆိုဆက်ဆံလေ့ရှိတာမို့ သားသမီးတွေကလည်း သူ့ကို ချစ်ခင်လေးစားကြပါတယ်။

Si’r မှာခုတော့ နေ့ကျောင်းမှာစာမေးပွဲကျလို့ ညကျောင်းပြောင်းတက်ရဖို့ ဖြစ်လာတယ်။ ညကျောင်းကို မသွားချင်ကြဘူးလေ။ ညကျောင်းမှာ အထက်တန်းအဆင့်ဆိုပေမယ့် လူမိုက်ပေါက်စတွေ။ အပြင်လောကက လူရမ်းကားတွေ။ လူမိုက်ဂိုဏ်းတွေနဲ့ ပေါင်းပြီး ပေတေဆိုးသွမ်းနေတဲ့ ကျောင်းသားတွေအများကြီးရှိတယ်။ Si’r မှာ ညကျောင်းကိုရောက်တော့ Cat ဆိုတဲ့ လူကောင်ခပ်သေးသေးနဲ့ ပရက်စလေသီချင်းတွေကို ဟန်ကျပန်ကျ ဆိုတတ်တဲ့ ကျောင်းသားလေးနဲ့ စပြီးခင်ရတယ်။ ညကျောင်းမှာ ထုံးစံအတိုင်း ဟိုဘက် ဒီဘက်က ကျောင်းသားတွေ တဝုန်းဝုန်းတရုန်းရုန်းနဲ့ ရန်တွေဖြစ်ကြတယ်။ ရိုက်ကြနှက်ကြတယ်။

အပြင်မှာက The Little Park Boys အဖွဲ့နဲ့ 217s ဆိုတဲ့ လူမိုက်အဖွဲ့နှစ်ဖွဲ့ရှိတယ်။ The Little Park Boysမှာ Honey ဆိုတဲ့ ရုပ်ခပ်ဖြောင့်ဖြောင့်နဲ့ လက်သံပြောင်တဲ့ ငနဲတယောက်က ခေါင်းဆောင်ဖြစ်တယ်။ 217s အဖွဲ့မှာတော့ ဘိလိယက်ခုံလို လောင်းကစားရုံတွေကို ထူထောင်ထားပြီး မိုက်ကြေးခွဲနေကြတဲ့ လူတွေရှိတယ်။ သူတို့တွေကို အထင်တကြီးပေါင်းနေတဲ့ ကျောင်းသားတွေက နောက်လိုက်အဖွဲ့ဝင်ပေါ့။

Si’r တို့လို လူငယ်ပေါက်စလေးတွေဟာ အဲဒီအဖွဲ့နှစ်ခုကြားမှာ ရောဝင်ပါသွားခဲ့တယ်။ သူတို့ခေတ်မှာ အရာရာချို့ချို့တဲ့တဲ့ဆိုဦးတောင် ဂီတကိုဝါသနာပါလိုက်စားတဲ့ Cat တို့လို လူငယ်လေးတွေကို ပြထားတယ်။ Western Pop Culture အငွေ့အသက်တွေမှာ တိုင်ဝမ်မှာလည်း လွှမ်းခြုံနေပြီ။ လူငယ်တွေဟာ ရှိတဲ့စက်ပစ္စည်းတွေနဲ့ ပရက်စလေသီချင်းတွေနဲ့ Hit ဖြစ်တဲ့ အခြားသီချင်းတွေကို စားသောက်ဆိုင်တွေမှာ သီကြွေးဆိုညည်းကြတယ်။ လူမိုက်တွေကလည်း ဒီစားသောက်ဆိုင်မျိုးတွေက ဝင်ငွေတွေရမှန်းသိတော့ ကြီးစိုးချင်တာမျိုးတွေ။ ပဋိပက္ခတွေကို တွေ့နိုင်ပါတယ်။

နောက်ထပ်ပြဿနာတခုဖြစ်လာတာကတော့ Ming ဆိုတဲ့ လှတပတနဲ့ ကျောင်းသူကလေးဟာ Si’r တို့လို လူငယ်ပေါက်စတွေအကြား၊ လူမိုက် Honey တို့လို နောက် Honey တို့ရဲ့အခြာတဖက်က ရန်ဖက်တွေဖြစ်တဲ့ Jadeတို့လို လူမိုက်တွေ၊ ပြီးတော့ လူကုံတန်မိသားစုဝင်သား Ma ။ နောက် ကျောင်းနားက ဆရာဝန် စလို့ သူတို့တွေအကြားမှာ အင်မတန်ထက်ရှတဲ့ အဆိပ်ကလေးတချောင်းဖြစ်လာခဲ့တယ်။

ဒါရိုက်တာကြီး Yang ဟာ လေးနာရီလောက်ကြာမြင့်တဲ့ ဒီရုပ်ရှင်ဇာတ်အိမ်ကြီးကို ဟသွားတာ ။ လစ်လပ်သွားတာမျိုး လုံးဝမရှိအောင် ခေတ်ကြီးတခုကို ဆွဲခေါ်သွားနိုင်ခဲ့တယ်။ လူငယ်တွေဟာ လူငယ်တွေအတိုင်းပဲ သွေးစွန်းတာမျိုးကို ဂုဏ်ယူစရာအဖြစ်ထင်နေတာတွေ။ Si’r ဆိုတဲ့ကောင်လေးကနေ စိတ်ကူးယဉ်တတ်လာတဲ့ ချစ်ခြင်းမေတ္တာတရားတွေကိုပါ ထည့်ပြတယ်။ သူကြိုက်သွားတာက အင်မတန်မှ အန္တရာယ်များလှတဲ့ လူမိုက်ခေါင်းဆောင်။ လူသတ်တာ၊ မိမိကိုယ်ကိုယ်နာကျင်တာကအစ အရေးမစိုက်တဲ့ Honey ရဲ့ ရည်းစားကိုမှသွားငြိနေမိတာမျိုး။ ဒါပေမဲ့လည်း Honey ဟာ လူမိုက်သာဖြစ်နေပေမယ့် 217s ကကောင်တွေလို နောက်လိုက်အားကိုးနဲ့ စွာတဲ့ လူမိုက်မျိုးမဟုတ်။ စာတွေပေတွေဖတ်တယ်။ စကားတခွန်းတိုင်း တခွန်းတိုင်း လေးနက်စွာပြောတတ်တယ်။ အရွယ်နဲ့မလိုက်အောင် ရင့်ကျက်တည်ငြိမ်တဲ့ပုံစံ။ ဒါကြောင့်လည်း နောက်လိုက်လူမိုက်တွေကအစ သူသေဆိုသေ၊ သတ်ဆိုသတ်မယ့်အနေအထားတွေ။ ဒီလိုရှိပေမယ့် သူချစ်သူကောင်မလေး Yangကို ကြိုက်နေတဲ့ Si’r ဆိုတဲ့ချာတိတ်ကို နွေးနွေးထွေးထွေးနဲ့ပဲ စကားပြောတယ်။ ရန်ပြုတာမျိုးမရှိဘူး ။Honey ဟာ ခုရုပ်ရှင်ထဲမှာ လုပ်ကွက်နည်းပေမယ့် ကျန်ရစ်ထင်ကျန်ခဲ့ရတဲ့ ဇာတ်ကောင်တခုဖြစ်ပါတယ်။

ယခုရုပ်ရှင်ထဲက တောက်ပလွန်း ပူလောင်လွန်း တဦးတဖက်သားစီတိုင်းကို ကျွမ်းမြပြာကျစေအောင် စွမ်းဆောင်နိုင်လွန်းတဲ့ နွေလယ်ညနေ့ရက်တွေဟာ ဘယ်အရာတွေဖြစ်မှာပါလဲ။ Mingဆိုတဲ့ မိန်းမလှလေးပဲပေါ့။ကောင်မလေးရဲ့ဘဝက ရုပ်ကလေးတင့်တယ်သလောက် ဘဝပေးအခြေအနေက ဆင်းရဲနုံချာလှတယ်။ အိမ်ဖော်လို အလုပ်တွေကို လိုက်လံလုပ်ကိုင်ရင်း ကျောင်းတဖက်| အလုပ်တဖက်နဲ့ ဖြတ်သန်းနေရတယ်။ ဒီနောက်မှာ သူ့အချစ်တွေဟာ တနံတလျားစာ ကျယ်ပြန့်လာတယ်။ Honey ကိုလည်း ချစ်သေးတယ်။ Si’r ကိုလည်း သံယောဇဉ်အရိပ်တွေပြသေးတယ်။ ပြီးတော့လည်း ဆရာဝန်တယောက်နဲ့လည်း ငြိစွန်းပျော်ပါးခဲ့သလိုလို နာမည်ထွက်သေးတယ်။ ဒီကောင်မလေးရဲ့အချစ်အပေါ်လက်ခံသက်ဆင်းမှုဟာ ဘယ်သဘောလဲဆိုတာကို Si’r တို့မှာ မစောကြောနိုင်ဘူး။ ဒါပေမဲ့လည်း Si’r ဆိုတဲ့ကောင်လေးဟာ သူကလေးရဲ့ဘဝကို အရိပ်လိုမိုးထားပေးချင်တယ်။ သူပျော်နေတာလေးပဲ မြင်ချင်တယ်။ ပြီးတော့ အတွေးထဲမှာ သူချည်းပဲရှိနေစေချင်တယ်။ အချစ်ဆိုတဲ့အရာက မြင့်တက်လာတဲ့ နွေနေမင်းလိုပဲပေ့ါ။ Si’rမှာ ခုလိုပိုမိုချစ်မိလာလေ ချစ်ခြင်းမေတ္တာတရားရဲ့ သောကအပူဇောကို ပိုခံလာရလေပဲ။

Ming ကို အတတ်နိုင်ဆုံး လူတွေပါ့စပ်ဖျားမှာ ကောင်းသတင်းတွေပဲ ရှိနေစေချင်တာမျိုး။ ဒါပေမဲ့လည်း သူကလေးက သူမျှော်လင့်သလိုမှ ဖြစ်မလာခဲ့တော့ အသည်းကွဲနာကျင်ခဲ့ရပြီပေါ့။

ညကျောင်းတက်နေတဲ့ အမှောင်ညများဟာ ပိုလို့ မဟူရာရိပ်တွေကဲလာတယ်။ Sir ရဲ့ လူရိုးလူအေးဖခင်ကြီးကို လျှို့ဝှက်ရဲအဖွဲ့ဆိုသူတွေက မေးစရာရှိလို့ဆိုပြီး ခေါ်သွားတယ်။ ရက်အတန်ကြာပြီး ပြန်လာတော့ ဖခင်ကြီးဟာ ကယောင်ချောက်ချား ဖြစ်လာတယ်။ အိမ်ထဲမှာ လူသူမရှိပေမဲ့လည်း သူ့ကိုလုပ်ကြံဖို့ လူရှိနေတယ်ဆိုပြီး တုတ်တချောင်းနဲ့ ထရှာတာမျိုး။အိပ်နေရာကနေလည်း ဆတ်ခနဲ နိုးလာပြီး ငူငူကြီးထိုင်နေတတ်တာမျိုး။ နောက်တော့ ဖခင်ကြီးနဲ့မိခင်ကြီးဟာစကားတွေများကြတယ်။ ငိုကြယိုကြတယ်။

အလိုလိုနေရင်းမှ ပညာရေး အချစ်ရေးမှာလည်း အဆင်မပြေ။ အိမ်ပြန်လာတော့လည်း သူတို့ချစ်ရတဲ့ဖခင်ကြီးဟာ အရင်လိုမဟုတ်တော့။ အလုပ်ကပါပြုတ်သွားတော့ အိမ်စီးပွားရေးဟာလည်း အခြေအနေဆိုးဝါးသွားခဲ့ပြီ။ ဒါတွေကိုမြင်ရင်း ဒဏ်ရာရသတ္တဝါတကောင်လို ဖြစ်လာတဲ့ Si’r ဆိုတဲ့ကောင်လေးဟာ ရှေ့ဆက်ပြီး ဘယ်လိုခရီးနှင်တော့မလဲ။

ကျွန်တော်တို့ဟာ လေးနာရီလုံးလုံး မိမိတို့လက်တွေ့ဘဝကို မေ့သွားခဲ့ရပြီးတော့ အဲဒီခေတ်ကြီးထဲကို ပြုတ်ကျသွားခဲ့ရတယ်။ ရုပ်ရှင်ပြီးသွားတော့လည်း ရုန်းမထွက်နိုင်သေး။ Si’r လိုကောင်လေးမျိုးက ကျနော်တို့ကမ္ဘာထဲမှာ ကျတော်တို့နိုင်ငံထဲမှာ ဘယ်လောက်ထိအောင် များပြားခဲ့ပြီလဲဆိုတာကို တွေးနေမိတယ်။ အမှောင်ထဲမှာ ပြုတ်ကျရင်း ဘယ်တော့မှပြန်တက်မလာနိုင် တော့တဲ့လူငယ်တွေ။ ဘဝအဓိပ္ပါယ်ရှာရင်း လမ်းပျောက်သွားကြတဲ့ လူငယ်တွေ။ ပြန်မလာကြတော့တဲ့လူတွေ။ ဒီဘက်ခေတ်ဆိုးကြီးထဲမှာ ဘယ်မျှအထိ နစ်မြုပ်ပျောက်ဆုံးခဲ့ပြီလဲ မသိနိုင်။

ဒါကြောင့် မွန်းကျပ်တာသက်သာရာရမလားဆိုပြီး အပြင်ကိုထွက်ကြည့်တော့လည်း ကောင်းကင်ကပြေးနေတဲ့တိမ်တွေဟာ အဝါရောင်တွေချည်းသာ ဖြစ်နေပြန်တယ်။ တိမ်တစ်စထဲမှာ Mingရဲ့ အပြုံးတွေကို ငေးကြည့်ရင်း ပျော်ရွှင်စိတ်ကြည်နူးနေပုံရတဲ့ Si’r တို့နှစ်ဦးသားကို မြင်နေရတယ်။ ကျ​နော့်နှလုံးသားထဲကို ငုံ့ကြည့်လိုက်မိတဲ့အခါမှာလည်း ပေါက်ပြဲသွားပေမဲ့ မိုးရေတွေစီးမကျလာတဲ့ အဝါရောင်တိမ်တိုက်အုပ်ကလေးတခု ပြေးနေတာကိုလည်း မြင်လိုက်ရပါတယ်။

ရုပ်ရှင်ကြည့်ပြီးသွားတဲ့ ယခုဆောင်းရက်နှောင်းနေ့စွဲများဟာ အံ့အားသင့်ဖွယ်ကောင်းအောင် ပူလောင်သွေ့ခြောက်နေခဲ့ပါတယ်။

ရုပ်ရှင်ရည်ညွှန်း – A Brighter Summer Day (1991)