“အမှားတွေကြုံတိုင်း အပြစ်ဖို့ရမှာက ကိုယ့်အချင်းချင်း မဟုတ်ဘူး”
Simonဒီစာကိုရေးရတာ ကျနော့်အတွက် အနည်းငယ်တော့ ဖိအားရှိတယ်။ ဘယ်လိုဖိအားလဲဆိုတော့ ကျနော့်အပေါ်ဘယ်လိုအမြင်တွေရှိပြီး ဝေဖန်ကြမလဲဆိုတဲ့ ဖိအားပါ။ ဒါပေမယ့်လည်း နဂိုအကျင့်အတိုင်း ဝေဖန်တော့ရော ၄ ဖြစ်လားဆိုပြီး တော်လှန်လူငယ်တယောက်ရဲ့ ခပ်မာမာ အကြောအတိုင်း ကိုယ်လုပ်ချင်တာလုပ်ပြီး ကိုယ်ရေးချင် တာရေးဖို့ကိုပဲ ဆုံးဖြတ်လိုက်ပါတယ်။
ပြီးခဲ့တဲ့ရက်ပိုင်းက “NUG” ထဲက တာ၀န်ရှိတဲ့သူဖြစ်တဲ့ “ဦးလွင်ကိုလတ်” ပေါ့ဗျာ (ဦးလွင်ကိုလတ်လို့ခေါ်တာ သူနဲ့ကျနော်က အသက် အများကြီး ကွာတာကြောင့်ပါ)။ သူက စစ်ကိုင်းထဲမှာ NUG ဌာနချုပ်ဖွင့်ပြီး ရုံးထိုင်မယ်လို့ပြောပါတယ်။ သူပြောပြီး မကြာခင်မှာပဲ စစ်ကိုင်းတိုင်းထဲက NUG ရုံးဖွင့်မယ်လို့ ထင်တဲ့နေရာတချို့ကို စကစဘက်က AS လုပ်ခဲ့ပါတယ်။
ဒီအတွက် တချို့က သူ့ကိုတိုက်ခိုက်ကြတယ်၊ အပြစ်ဖို့ကြတယ်။ လူငယ်စကားနဲ့ပြောရရင် ခင်ဗျားအာချောင်လို့ ခုလို AS လုပ်ခံရတာပေါ့ ဆိုတာမျိုးပါ။
ကျနော့်အမြင်ကတော့ ဦးလွင်ကိုလတ်ပြောလို့ စကစဘက်က AS လုပ်လိုက်တယ်ဆိုပြီး လက်ညိုးထိုးစရာ ဖြစ်တာတော့ မှန်တယ် ။သို့သော် သူ့ကြောင့် AS လုပ်ခံရတယ် ဆိုတာကြီးကိုတော့ ၁၀၀ ရာခိုင်နှုန်း မထောက်ခံချင်ပါဘူး။
ဒီလိုပြောလို့ ဦးလွင်ကိုလတ်ကြီးဘက်က လိုက်ဖာပေးနေတာ မဟုတ်သလို သူ့ကို ဖားစရာ ဘာစောက်ကြောင်းမှလည်း မရှိဘူး။ ပေါ်တင်ပြောရရင် ကျနော်ကိုယ်တိုင်လည်း “NUG” ကို လုံးဝကြီး ကြိုက်နေတာ မဟုတ်သလို “ပသုံးလုံး” တွေကိုလည်း ဒီတိုင်းပါပဲ။ မြန်မာပြည်အလယ်ပိုင်းမှာ “ပသုံးလုံး” တွေ ကျုးလွန်ထားတဲ့ ဥပဒေမဲ့လုပ်ရပ်တွေကြောင့်လည်း တချို့အရာတွေကို မကြိုက်တာပါတယ် (ဒါတော့ ဒဲ့ပြောတာ)။
ဒါဆို “NUG” ကို ပြန်တော်လှန်ပြီး “ပသုံးလုံး၊ ပကဖ” တွေကို ပြန်လည် တိုက်ခိုက်မလားဆိုတော့လည်း ကျနော် ဒါမျိုး ဘယ်တော့မှ လုပ်မှာမဟုတ်ဘူး။ ဘာကြောင့်လဲဆိုတော့ လက်ရှိ ကျနော်တို့နိုင်ငံရေး အခင်းအကျင်းမှာ NUG ကို ပစ်ပယ်ထားလို့မရသလို ပသုံးလုံးနဲ့ ပကဖတွေကလည်း လိုအပ်တယ်။ လူတစု၊ တဖွဲ့ မကောင်းတာတခုနဲ့တင် အဖွဲ့အစည်းကြီးတခုလုံးကို မြောင်းထဲရောက်သွားအောင် လုပ်မယ်ဆိုရင် သေချာတယ်၊ ကျနော်တို့ ကိုယ်တိုင်လည်း ဘာကောင်တွေဖြစ်မှန်းမသိ ဖြစ်နေတဲ့ Third party လို ဖြစ်သွားလိမ့်မယ်။
ဒီတော့ စာကိုပြန်ဆက်ရရင် ဦးလွင်ကိုလတ်ပြောတဲ့ NUG ရုံးတွေ ပြည်တွင်းမှာ ပြန်စိုက်မယ်ဆိုတာကို ကျနော်တို့ ကြိုဆိုတယ်။ ဒါပေမယ့် စစ်ကိုင်းမှာ ရုံးထိုင်မယ်လို့ ပြောတာကိုတော့ အံ့သြမိတယ်။ တကယ်ဆို ကျနော်တို့တွေ ပြည်တွင်းမှာ ရုံးထိုင်ဖို့ရှိတယ်ဆိုရင် ရပြီလို့ထင်တယ်။ သူ့ဟာသူ ကရင်မှာထိုင်ထိုင်၊ ပဲခူးမှာထိုင်ထိုင်၊ ကချင်မှာထိုင် ထိုင် ထိုင်ချင်တဲ့နေရာမှာထိုင်၊ တခုပဲ စစ်ကိုင်းဆိုတဲ့နေရာကို ဘာကြောင့် ထည့်ပြောလဲဆိုတာကိုတော့ နားမလည် ဘူး။
ဒါကြောင့်လည်း သူအာချောင်လို့ AS လုပ်ခံရပါတယ်ဆိုပြီး တချို့က လက်ညှိုးထိုးကြတာ။ ဒီနေရာမှာ သူပြောလိုက် လို့ AS လုပ်ခံရတယ်ဆိုတာကို ပြန်စဥ်းစားကြည့်ရင် လက်ရှိ အကြမ်းဖက်စစ်တပ်ဟာ တနိုင်ငံလုံးမှာ သူဆုံးရှုံးလိုက်ရတဲ့ ဘယ်ဒေသကိုမဆို ဘယ်နေရာကိုမဆို သူဗုံးကြဲချင် ကြဲမှာပဲဖြစ်တယ်။ စကစဘက်က တိုက်ပွဲဖြစ်ပွားခြင်းမရှိတဲ့ ဒေသတွေတောင် သူကြဲချင် ကြဲနေကြတာကိုလည်း လူတိုင်းက သိကြပါတယ်။
ဒီတော့ ဦးလွင်ကိုလတ်အနေနဲ့ NUG ရုံးတွေ စစ်ကိုင်းမှာထိုင်မယ်လို့ ပြော ပြော မပြောပြော အခု ဗုံးကြဲခံလိုက်ရတဲ့ နေရာကို စကစဘက်က တချိန်မဟုတ် တချိန်၊ တကွေ့မဟုတ် တကွေ့ ဗုံးကြဲမှာက ကြဲမှာပါပဲ။
ပြီးခဲ့တဲ့နှစ်က “နိုဗန်ထူး” ကရင်နီကိုသွားတယ်၊ ပြီးတော့ သူ့ပုံတွေတင်တယ်။ ဒီတော့ တချို့ကပြောကြတယ်။ ကရင်နီမှာ ဖျင်သွားယားလို့ ဟိုက လေယာဥ်တွေနဲ့ ဗုံးကြဲတာ၊ မင်းတို့လို ဆယ်လီတွေကြောင့် ဆိုတဲ့အသံတွေ ထွက်လာရော။ ဒါဆို တေဇာဆန်း မန္တလေးမြို့ပေါ်ကိုတက်ပြီး ဆန္ဒ လာပြသွားတာကြတော့ စကစဘက်က ဘာကြောင့် လေယာဥ်နဲ့ AS မလုပ်ခဲ့လဲ။
ပြောချင်တာ ကရင်နီကို AS လုပ်ခြင်းဟာ နိုဗန်ကြောင့်မ ဟုတ်သလို နိုဗန်နဲ့လည်း မဆိုင်ဘူး။ ဒီလို တေဇာဆန်း မန္တလေးမြို့ပေါ်ထိတက်ပြီး ဆန္ဒပြပေမယ့် မန္တလေးကို ဗုံးမကြဲတာကလည်း စကစဘက်က တေဇာဆန်းကို သေမှာစိုးလို့လည်း မဟုတ်ဘူး။ စစ်တပ်ဟာ သူလက်လွှတ်လိုက်ရတဲ့ ဘယ်ဒေသကိုမဆို အချိန်မရွေး သူကြဲချင်ကြဲမယ်၊ ကြဲချင်သလိုကြဲမယ် အဖြေက ဒါပဲ။
ဒါပေမယ့် ကျနော့် opinion အရ ဦးလွင်ကိုလတ် မှန်တယ်လို့လည်း မပြောပါဘူး။ ဒါပေသည့် သူ့ကိုအပြစ်ဖို့ပြီး လက်ညှိုးထိုးမယ်ဆိုရင် ဗုံးတကယ်လာကြဲသွားတဲ့ စကစကို ကျနော်တို့က ပိုပြီး အပြစ်ဖို့သင့်တာ မဟုတ်ဘူးလား။ AS လုပ်တာ ဦးလွင်ကိုလတ် မဟုတ်သလို NUG လည်း မဟုတ်ဘူး။ သူအာချောင်လိုက်လို့ AS လုပ်ခံရတယ်ဆိုရင် တောင် တကယ်တမ်း လာကြဲသွားတာက စကစပါ။ ဒီတော့ ကျနော်တို့တွေ အပြစ်ဖို့သင့်တာ ဘယ်သူ့ကိုလဲ။ ကျနော်တို့တွေ အပြစ်တင်တာ လမ်းလွဲနေတာကို ပြောချင်တာပါ။
တချို့ကလည်းပြောတယ်။ တော်လှန်ရေးလုပ်နေတာပဲ ၄ နှစ်လောက်ရှိနေပြီ၊ ခုထိ စောက်တလွဲက လုပ်နေကြတုန်းလားတဲ့။ လက်ရှိ ကျနော်တို့ရဲ့ တော်လှန်ရေးမှာ ပါဝင်သူတွေ၊ ဦးဆောင်နေသူတွေ အားလုံးနီးပါးက အသက် ၁၅ နှစ်၊ ၁၆ နှစ်လောက်ကတည်းက စစ်တပ်ထဲ ဝင်လာကြတဲ့သူတွေ မဟုတ်သလို တချို့ဆို အနုပညာသမားတွေတောင် ပါသေးတယ်။
ဒီတော့ သူတို့တွေ ခုထိ မှားနေတာ၊ လွဲနေတာက လက်ရှိကျနော်တို့ရနေတဲ့ အောင်မြင်မှုနဲ့ ချိန်ထိုးကြည့်ရင် အများကြီး တော်ပါသေးတယ်။ တကယ်တမ်း စောက်သုံးမကျတာက စစ်သက်နှစ်ပေါင်း ၄၀ လောက်ရှိပြီး ကြည်း၊ ရေ၊ လေ ကို သူလုပ်ခိုင်းချင်သလို လုပ်ခိုင်းလို့ရနေတဲ့ မင်းအောင်လှိုင်ကမှ ပိုပြီး စောက်သုံးမကျတာ။ ဒီတော့ ပြောရမယ်ဆိုရင် မှားတာချင်းယှဥ်ရင်တောင် ကျနော်တို့လူတွေ မှားတာက အများကြီး ဖြည့်တွေးလို့ရသေးတယ်။
လူပဲဗျာ အမှားတော့ရှိမှာပေါ့။ အလုပ် လုပ်နေတဲ့သူက မလုပ်တဲ့သူထက် ပိုမှားမယ်။
ကျနော့်အဖေက ပြောဖူးတယ်။ “မှားမှာကြောက်လို့ ဘာမှ မလုပ်ဘဲနေရင် မင်း ဘယ်တော့မှ အမှန်တရားကိုလည်း
တွေ့မှာ မဟုတ်ဘူးတဲ့။”
ဘဝမှာ အရှုံးတွေနဲ့ ရင်ဆိုင်ရတိုင်း ရသင့်တာက နောင်တမဟုတ်ပါဘူး သင်ခန်းစာတွေပါ။ အောင်မြင်မှု ကြီးကြီးမားမား ရယူဖို့အတွက် တခါတရံမှာ ဆုံးရှုံးမှု ကြီးကြီးမားမားကိုလည်း လက်ခံရပါလိမ့်မယ်။
ဒီတော့ ကျနော့်စာကို အက်ဒီဆင်ရဲ့စကားနဲ့ အဆုံးသတ်ရရင် –
“အကြိမ်တထောင်လုံး ကြိုးစားတာ မအောင်မြင်ဘူးလို့ ကျုပ်တော့ မပြောဘူး၊ ရှုံးနိမ့်စေနိုင်တဲ့ အကြောင်းရင်းပေါင်း တထောင်ကို ကျုပ် တွေ့ရှိလိုက်ပြီလို့ပဲ ပြောမယ်တဲ့”
ဒီတော်လှန်ရေးမှာ ကျနော်တို့တွေ ရှေ့လျှောက် အောင်မြင်မှုတွေ ရလာဦးမှာဖြစ်သလို အမှားတွေ၊ ဆုံရှုံးမှုတွေလည်း ကြုံလာရဦးမှာပါ။ သို့သော် ဒီလိုအမှားတွေ ကြုံလာခဲ့ရင်တောင် ကျနော်တို့အမှားတွေအတွက် အပြစ်ဖို့ရမှာက ကိုယ့်အချင်းချင်း မဟုတ်ဘူး ဆိုတာပါပဲ။
Be the first to comment