ကိုယ်တိုင်ရုန်းထွက်မှ ရမယ့်အခြေအနေ

◼️Simon

ကမ္ဘာပေါ်မှာ စစ်မှုမထမ်းမနေရဆိုပြီး ဥပဒေပြဌာန်းထားတဲ့ နိုင်ငံတွေရှိတယ်။ ဒါပေမယ့် ကျနော်တို့နိုင်ငံက စစ်ကောင်စီပြဌာန်းလိုက်တဲ့ စစ်မှုထမ်းဥပဒေက သူများနိုင်ငံတွေနဲ့ မတူသလို အခြေအနေခြင်းလည်း မတူဘူး။

သူများနိုင်ငံတွေရဲ့ စစ်မှုမထမ်းမနေရ ဆိုတဲ့နေရာမှာ ပြည်သူတွေကိုယ်တိုင်က လိုလိုလားလားနဲ့ ဝင်ရောက်ပြီး ထမ်းဆောင်ကြတာဖြစ်သလို ပြည်ပနိုင်ငံတွေရဲ့ ကျူးကျော်မှုကို ကာကွယ်ဖို့လိုတာကြောင့် စစ်မှုထမ်းကြတာလည်းဖြစ်တယ်။

ဥပမာ … ယူကရိန်းနဲ့ ရုရှားစစ်ပွဲမှာဆိုရင် ကမ္ဘာအရပ်ရပ်က ယူကရိန်းပြည်သူတွေကိုယ်တိုင်က သူ့နိုင်ငံကို ပြန်လာကြပြီး စစ်မှုထမ်းကြသလို တောင်ကိုရီးယားမှာဆိုရင်လည်း မြောက်ကိုရီးယားရဲ့ ရန်ကြောင့် လူတိုင်းက စစ်မှုထမ်းဆောင်ကြရတယ်။ ဒီလိုပဲ အစ္စရေးလ်မှာဆိုရင်လည်း အာရပ်နိုင်ငံတွေရဲ့ ရန်ကြောင့် အစ္စရေးလ်ပြည်သူတွေဟာ စစ်တပ်မှာ တာ၀န်ထမ်းဆောင်ကြတယ်။

ကျနော်တို့နိုင်ငံမှာတော့ မတူဘူး။

စစ်တပ်ကို ဆန့်ကျင်တော်လှန်နေကြတဲ့ တော်လှန်ပြည်သူတွေနဲ့ PDF တပ်ဖွဲ့တွေ၊ တိုင်းရင်းသား လက်နက်ကိုင်အဖွဲ့အစည်းတွေရှိတဲ့ ကျနော်တို့လို နိုင်ငံမှာ စစ်ကောင်စီရဲ့ စစ်မှုမထမ်းမနေရဥပဒေ ထုတ်ပြန်ခြင်းဟာ စစ်တပ်က ပြည်သူနဲ့ပြည်သူ အချင်းချင်း သတ်ဖြတ်ဖို့အတွက် ထိပ်တိုက်ပေးတွေ့ပြီး အိမ်ကြက်ခြင်း အိုးမဲသုတ် ခွပ်ခိုင်းလိုက်တာပါပဲ။

အခုဆို ပြည်သူ့စစ်မှုထမ်း အပတ်စဥ် (၁) က သင်တန်းသားတွေကို စစ်ဖြစ်နေတဲ့ ရှမ်းမြောက်၊ ကချင်၊ ချင်းနဲ့ ကရင်နီဒေသဆီ သူတို့မိသားစုဝင်တွေ မသိအောင် ပို့လိုက်ကြပြီ။

ဒီနေရာမှာ စစ်သင်တန်းပြီးတာနဲ့ ကိုယ့်ဒေသမှာ ကိုယ်ပြန်ပြီး တာ၀န်ထမ်းရမှာပါ၊ ဘယ်သူ့ကိုမှ သင်တန်းပြီးတာနဲ့ လိုက်ခဲ့ဆိုပြီး ရှေ့တန်းမပို့ပါဘူးလို့ပြောခဲ့တဲ့ စစ်ကောင်စီဘက်က လော်ဘီတွေနဲ့ ဇော်မည်းလုံးကိုယ်တိုင် ဒီကိစ္စကို တချက်တောင် မပြောကြဘဲ ရေငုံ နှုတ်ပိတ်နေကြပါတယ်။

စစ်မှုထမ်းဥပဒေ စစခြင်းကတည်းက စစ်တပ်ဟာ စစ်အင်အားယုတ်လျော့လာတဲ့အတွက် ပြည်သူတွေကို တော်လှန်ရေးတပ်တွေနဲ့ကြားမှာ ဒိုင်းကာအဖြစ် အသုံးပြုဖို့ လုပ်မှာဖြစ်တဲ့အကြောင်း ကျနော်တို့တွေ ပြောခဲ့ဖူးပါတယ်။ အခု ကျနော်တို့ပြောသလို ဖြစ်လာပါပြီ။ လက်ရှိ သင်တန်းဆင်းတွေဟာ ရှေ့တန်းမှာ ဒိုင်းကာအဖြစ် အသုံးချခံရမယ့် ပေါ်တာသာသာလို့ပဲ ပြောရင်လည်း ရပါတယ်။

လက်ရှိမှာဆိုရင်လည်း စစ်ကောင်စီရဲ့ စစ်မှုထမ်းဥပဒေကြောင့် စစ်မှုထမ်းတာကို ရှောင်ဖို့အတွက် ငွေကြေးသုံးစွဲမှုတွေနဲ့ black market ကြီးကြီးတခုခုလည်း ဖြစ်လာခဲ့ပြီ။ စစ်မှုထမ်းတာကို ရှောင်ရှားဖို့အတွက် ပိုက်ဆံရှိတဲ့ မိသားစုတွေဟာ သူတို့သားသမီးတွေ စစ်မှုထမ်းတဲ့အထဲ မပါအောင် လာဘ်ထိုးတာတွေ လုပ်လာကြသလို ပေါ်ပေါ်ထင်ထင် ငွေကြေးတောင်းခံပြီး လူအစားထိုးတဲ့ ကိစ္စတွေကအစ ဖြစ်လာကြပြီ။

ဒီတော့ အောက်ခြေ ကျောမွဲတွေဘ၀ကတော့ မတွေးရဲစရာပါပဲ။ အထူးသဖြင့် ၁၈ နှစ်ပြည့်ခါစ လူငယ် ယောကျ်ားလေးတွေနဲ့ အမျိုးသမီးငယ်လေးတွေကတော့ ပိုပြီး ရင်လေးစရာပါပဲ။

ဥပဒေ ခိုင်ခိုင်မာမာရှိတဲ့ နိုင်ငံကြီးတွေမှာတောင် စစ်မှုမထမ်းမနေရဥပဒေကြောင့် စစ်မှုထမ်းရတဲ့ လူငယ်တွေကို တပ်ထဲမှာ အနိုင်ကျင့် နှိပ်စက်တာတွေ၊ လိင်ပိုင်းဆိုင်ရာ နှောင့်ယှက်မှု စတာတွေက အနည်းနဲ့အများ ရှိကြတာဆိုတော့ မြန်မာစစ်တပ်ထဲမှာ စစ်မှုထမ်းရမယ့် လူငယ်တွေရဲ့ ဘဝကို တွေးကြည့်။

အထူးသဖြင့် လူငယ် အမျိုးသား၊ အမျိုးသမီးတွေအတွက်ကတော့ သင်တန်းကာလမှာ လိင်ပိုင်းဆိုင်ရာ နှောင့်ယှက်ခြင်းခံရနိုင်သလို ရှေ့တန်းမှာလည်း သေမလား၊ ပြတ်မလား၊ ဖမ်းတာခံရမလားဆိုတာ အသေအချာ မပြောနိုင်ပါဘူး။

တကယ်တော့ အခုလို စစ်မှုထမ်းဥပဒေ ဖြစ်လာနိုင်မယ်ဆိုတာကို နိုင်ငံရေးလေ့လာသူတွေက ကြိုတင်တွက်ဆထားသလို တော်လှန်ရေးအင်အားစုဘက် ကလည်း ပြောသင့်သလောက် ပြောခဲ့ဖူးပါတယ်။ သို့သော် ကိုယ်နဲ့မဆိုင်သလို အသံတိတ်၊ လက်ပိုက်ပြီး တော်လှန်ရေးကို မသိကျိုးကျွံပြုပြီး ဂရုမစိုက်ခဲ့ကြတဲ့သူတွေက များတဲ့အတွက် အခုတော့ ဒီလူတွေကို စစ်တပ်က ကျောကော့အောင် ရိုက်နေပါပြီ။

မတရားမှုကို လက်ပိုက်ကြည့်နေရင် တချိန်မှာ မတရားမှုက ကိုယ့်အိမ်တံခါးကို လာခေါက်လိမ့်မယ် ဆိုတဲ့စကားကို ကျနော်တို့ဘက်က အကြိမ်ကြိမ်အခါခါ ပြောခဲ့ကြပါတယ်။ အခုတော့ ဒီမတရားမှုက ခင်ဗျားတို့ အိမ်ရှေ့တံခါးကို လာခေါက်ကြသလို ခင်ဗျားတို့တင်မကဘဲ ခင်ဗျားတို့ သားသမီးတွေဆီပါ ရောက် လာခဲ့ပြီ။

ဒီနေရာမှာ ကလပ်တက်၊ ဘားသွားပြီး ပျော်နေကြတဲ့ဟာတွေ၊ ဘောမနေတဲ့ လူ့ငနွားတွေကိုတော့ ဘာမှ ထူးပြီးမပြောချင်ဘူး။ မင်းတို့ ရွေးချယ်တဲ့ဘ၀နဲ့ မင်းတို့ပဲ ဆိုပေမယ့် အခုမှ ဆယ်ကျော်သက်အရွယ် ကလေးတွေအတွက်ကတော့ စိတ်မကောင်းဖြစ်ရတယ်။ စစ်တပ်ဟာ သူအာဏာတည်မြဲဖို့၊ ပလ္လင် ပေါ်က မဆင်းရဖို့အတွက် နောက်ဆုံးသော သူ့ရဲ့အကွက်ကို ထုတ်သုံးနေပြီ။ ဒီလိုအချိန်ထိ စစ်တပ်ကို တော်လှန်ပုန်ကန်ခြင်း မလုပ်ဘဲ ကြက်ခြံထဲက ကြက်တွေလို၊ ဝက်ခြံထဲက ဝက်တွေလို တကောင်ခြင်း ရိုက်သတ်လို့ကုန်တဲ့အထိ ငါ့အလှည့် မရောက်မချင်း မဆိုင်သလိုစိတ်နဲ့နေပြီး စောင့်နေမယ်ဆိုရင် လည်း ဒါဟာ ခင်ဗျားတို့ရဲ့ ရွေးချယ်မှုနဲ့ ခင်ဗျားတို့ သားသမီးတွေရဲ့ အနာဂတ်ပဲ။

သေချာတာကတော့ စစ်တပ်ဟာ စစ်မှုမထမ်းမနေရ ဥပဒေကို ထုတ်ပြန်လိုက်ပေမယ့် သူတို့ရဲ့ သားသမီးတွေကိုတော့ ခင်ဗျားတို့ရဲ့ သားသမီးတွေလို ရှေ့တန်းပို့မှာ မဟုတ်ဘူးဆိုတာပဲ။

အခုအခြေအနေက ဘယ်သူလာကယ်တာကို စောင့်နေရမယ့်အချိန် မဟုတ်တော့ဘဲ ကိုယ်တိုင်ရုန်းထွက်မှ လွတ်မြောက်မယ့် အခြေအနေဆိုတာကို ခင်ဗျားတို့ သိကိုသိရမယ့် အချိန်တခုကို ရောက်လာပြီလို့ပဲ ပြောချင်တော့တယ်။