2
ခွန်းနီ
‘စစ်ကြီးပြီးတဲ့အခါ သေသူတွေကိုတွေ့ရပါလိမ့်မယ် မာရီနာ’
ခွန်းနီအိပ်ယာကျဥ်းကျဥ်းလေးကနေ
အတွေးအကျယ်ကြီးကို
ကိုယ်ဖြတ်ကူးနေမိတယ် မာရီနာ။
အိပ်ယာဆိုတာထက်
အိပ်စရာနေရာပါ
မြေကြီးနံ့နဲ့ယမ်းနံ့တွေ
တခါတလေသွေးညှီနံ့တွေနဲ့
ဝေါဟာရ အရတော့အိပ်ယာပေါ့
ပျော်တာမပျော်တာအကြောင်းမပြချင်ဘူး
မျက်လုံးခဏမှိတ်ထားဖို့နေရာဆိုရင်
ပိုသင့်တော်ပါတယ် မာရီနာ ။
မပျော်ရတော့တဲ့ကမ္ဘာမှာ
မျှော်လင့်စရာကနည်းလာတယ်
သေလုမြောပါးနေ့တွေထဲ
ဖုန်းတစ်ကောလ်လောက်
စာတစ်ကြောင်းလောက်
ဘာလွဲမှားမှုမှမရှိတဲ့မိန်းကလေးတစ်ယောက်ရဲ့
ဓာတ်ပုံလေးတစ်ပုံလောက်
ကိုယ့်ထံရောက်လာဖို့
သေမလောက်မျှော်ဖူးတယ် ။
မင်းကအကောင်းတိုင်းကျန်နေပြီး
ကိုယ်ကသဲကြိုးပျက်သွားတဲ့ဖိနပ်ပါ
ဆက်စီးလို့မရတော့တဲ့အခါ
အတူတူလှမ်းကြမဲ့ခြေလှမ်းများအား
အနူးအညွှတ်တောင်းပန်ရုံပါ မာရီနာ။
ကိုယ့်ဆန္ဒနဲ့ကိုယ်
လိုလိုချင်ချင်ဝေးခဲ့ကြတော့
မင်းကိုလဲမငြိုညင်ပါဘူး
ခေတ်ကိုလဲအပြစ်မဆိုသာ
ဆိုးဝါးလှတဲ့စနစ်ကိုသာအပြစ်ဖို့ကြစို့ မာရီနာ
ကိုယ်တို့မချစ်လို့ဝေးကြတာမှမဟုတ်တာ
စနစ်ကြောင့်ဝေးရတာ။
ကိုယ်အဆာလောင်ဆုံးနဲ့
အမွတ်သိပ်ဆုံးက အချစ်ဖြစ်ပြီး
ကိုယ်အရွံရှာဆုံးနဲ့
အစက်ဆုပ်ဆုံးက စစ်ဖြစ်တယ်
အခုတော့ကိုယ်သိပ်မုန်းတဲ့စစ်ကြီးထဲ
မီးကိုရှာသလိုတိုးခဲ့မိပြီ
ကျေနပ်စွာလောင်မြိုက်ခဲ့မိပြီ။
လက်ဖက်ရည်ကြိုက်တယ်
အရက်ကြိုက်တယ်
ဆေးလိပ်ကြိုက်တယ်
အနုပညာကြိုက်တယ်
သွေးသားဆန္ဒမပါတဲ့ချစ်ခြင်းကို
ကြိုက်ချင်ဟန်ဆောင်ပြီး
တကယ်တော့မကြိုက်ပါဘူး
မင်းဆိုတဲ့ဆန့်ကျင်ဘက်လိင်ကိုကြိုက်တယ်
စကားကိုတိုးတိုးပြောပြီး
သီချင်းအကျယ်ကြီးဆိုရတာကြိုက်တယ်
ဇိမ်ခံရတာမကြိုက်ဘူး
(ဇိမ်ခံစရာဘာမှမရှိတော့လို့ )
ငြိမ်းချမ်းရေးကိုကြိုက်ပေမဲ့
အခုထိရေရေရာရာမသိတဲ့
ငယ်ဘဝအိမ်မက်လိုကြိုက်မိတာ
စစ်ကိုမကြိုက်ဘူး
ဒါပေမဲ့ချစ်နေမိပြီ မာရီနာ။
ကြိုက်တယ် မကြိုက်ဘူးဆိုတာ
ရတယ် မရဘူးနဲ့ဆိုင်တော့
ဟန်လုပ်ပြီးရေးခဲ့တာပါ
ခေတ်အပျက်ကြီးထဲ
ရွေးချယ်စရာဘာများရှိလို့လဲ
(ဦးနှောက်နဲ့နှလုံးသားပါရင်)
ဘာမှမရှိတော့သလို
စစ်ကိုပဲရွေးခဲ့ရတာ မာရီနာ။
ဒါတွေထားပါတော့လေ
တစ်ယောက်နဲ့တစ်ယောက်
မသေမပျောက်ရှိနေသေးတာကိုက
လောကဓံကိုစျေးဆစ်ရကျိုးနပ်လှပါပြီ
မင်းကိုအကောင်းတိုင်းလေးရှိစေချင်တာ
တကိုယ်ရည်အတ္တလို့ဆိုချင်ဆို
ဒီ့ထက်တော့မပိုဘူး မာရီနာ။
မပျော်ရမှတော့
အသက်ရှည်ရတာပျင်းစရာကောင်းတယ်
မင်းကရှင်သန်နေပေမဲ့
ကိုယ့်မှာသေလူလိုပဲ
အခါခါသေခဲ့ပြီးပါပြီ
ဘဝမှာ
ဘဝတွေမှာ
ဘဝတွေများစွာမှာ
ဘာမှမရှိတော့အောင်
စစ်ကဝါးမြိုခဲ့ပြီဆိုတော့
သေလူပါပဲ ။
အသက်ရှင်လျက်ပြန်တွေ့တဲ့အခါ
ဒီစစ်ကြီးပြီးဆုံးသွားတဲ့အခါ
အသက်ရှုနေတဲ့သေသူတွေကို
မင်းတွေ့ရပါလိမ့်မယ် မာရီနာ ။
ကံမကောင်းလို့မသေခဲ့တဲ့
သေသူတွေကိုတွေ့ရပါလိမ့်မယ်
တကယ်မသေခဲ့ရလို့
သေလောက်အောင်စိတ်ပျက်နေတဲ့
သေသူတွေကိုတွေ့ရပါလိမ့်မယ်
ရှင်ခြင်းရဲ့အကြောင်းသွားမပြောမိစေနဲ့
မင်းပါသေလောက်အောင်နာကျဥ်သွားမယ်
လုံးဝ မပြောမိစေနဲ့ မာရီနာ။
Have any thoughts?
Share your reaction or leave a quick response — we’d love to hear what you think!
-
0
-
0
-
0
-
0
-
0
-
0
