“ဖာခေါင်းလုပ်တဲ့ ပြည့်တန်ဆာ ပပျောက်ရေး”
Simon“အာဏာရှင်လုပ်တဲ့ ဒီမိုကရေစီ အပြောင်းအလဲဆိုတာ ဖာခေါင်းကလုပ်တဲ့ ပြည့်တန်ဆာ ပပျောက်ရေးလိုပဲ ဖြစ်လိမ့်မယ်”
ဒီစကားက မြန်မာ့နိုင်ငံရေးလောကထဲမှာ အထင်ကရပုဂ္ဂိုလ်ဖြစ်တဲ့ သခင်စိုးက ပြောခဲ့တာဖြစ်တယ်။ သူ့စကားကို သေချာတွေးကြည့်လေ လက်ရှိ မင်းအောင်လှိုင် လုပ်ပေးမယ်ဆိုတဲ့ ရွေးကောက်ပွဲဆိုတာကြီးကို မျက်လုံးထဲ ပြေးမြင်လေပဲ။
မင်းအောင်လှိုင်လုပ်ပေးမယ့် ရွေးကောက်ပွဲဆိုတာ အလိမ်အညာကြီးဖြစ်တဲ့အပြင် ထွက်ပေါက်ပိတ်နေတဲ့ စစ်တပ်အတွက် ခွေးတိုးပေါက်တခုပဲဖြစ်တယ်။ လက်ရှိမှာ နိုင်ငံရေးထွက်ပေါက်ပိတ်နေတဲ့ စစ်တပ်အတွက် ရွေးကောက်ပွဲဟာ သူ့ရဲ့ဂယ်ပေါက်ဆိုရင်လည်း မမှားဘူး။
အာဏာသိမ်းပြီးရင် လက်နက်မရှိတဲ့ ပြည်သူက သူ့ကို မလှန်ရဲပါဘူး ဆိုတဲ့အတွေးနဲ့ ရှေ့က ဆရာ့ဆရာကြီးတွေလို အေးအေးဆေးဆေး နေရမယ်ထင်ပြီး အာဏာသိမ်းလိုက်တဲ့နောက်မှာတော့ မင်းအောင်လှိုင်အတွက် အိပ်မက်ဆိုးတခုက လူထုရဲ့ဆန့်ကျင်မှုနဲ့ စစ်တပ်ကို တော်လှန်တိုက်ခိုက်ဖို့ ဖြစ်လာမယ့် PDF တွေရဲ့အင်အားကို ထည့်မတွက်မိလိုက်တာပါပဲ။
မင်းအောင်လှိုင်ရဲ့ တွက်ကိန်းက ဒီတခုတင်မဟုတ်ဘဲ တိုင်းရင်းသားလက်နက်ကိုင်အဖွဲ့တွေကိုလည်း လျှော့တွက်ပြီး တွက်ကိန်းမှားခဲ့တယ်။ မင်းအောင်လှိုင်တွက်တာက “အမေစု” တို့ကို ဖြုတ်ချပြီး အာဏာသိမ်းလည်း သူ့စီးပွားရေးသူလုပ်နေတဲ့ တိုင်းရင်းသားအဖွဲ့တွေက ပိုနေမြဲ၊ ကျားနေမြဲအတိုင်း အရင်လို အခွင့်အရေးတွေ၊ ဖြေလျော့မှုတွေ၊ ညှိနှိုင်းမှုတွေ လုပ်လိုက်ရင် ထိန်းသိမ်းလို့ရမယ်ဆိုပြီး ထင်ခဲ့တယ်။
(ဒါပေမဲ့ မင်းအောင်လှိုင်ရဲ့ တွက်ဆမှုက မှားခဲ့တယ်)
ဒါ့အပြင် ပြည်သူတွေကိုလည်း သေနတ်လေး တချက်လောက်ဖောက်၊ တယောက်လောက် သတ်ပြလိုက်ရင် ကြောက်ပြီး ငြိမ်သွားမယ်လို့လည်း မင်းအောင်လှိုင်က တွေးခဲ့တယ်။ (အရင်တုန်းက အရေးတော်ပုံတွေမှာလည်း စစ်တပ်က ပြည်သူကို အခုလို အကြမ်းဖက်ပြလိုက်ရင် ငြိမ်သွားခဲ့တာကိုး)
အဆိုးဆုံး လွဲချော်မှုတခုကတော့ နောက်တက်လာတဲ့ GenZ မျိုးဆက်သစ်လူငယ်တွေကို အထင်မကြီးခဲ့တာပါဘဲ။ လူငယ်တွေဟာ ဂိမ်းဆော့၊ အပျော်အပါးလောက်ပဲ မက်တယ်လို့ ထင်ခဲ့ပြီး လူငယ်တွေကို လျှော့တွက်မိခဲ့အတွက် ဒရုန်းဆိုတဲ့အရာတွေ ပေါ်လာခဲ့ပြီး ခေတ်သစ်စစ်ပွဲတခု အသွင်ပြောင်းခဲ့တာ အားလုံးမျက်မြင်ပဲ။
တကယ်တော့ မင်းအောင်လှိုင်တို့ မျက်ခြေပြတ်သွားခဲ့တာက ခုခေတ်လူငယ်တွေဆိုတာ နည်းပညာတွေ၊ နိုင်ငံတကာနဲ့ချိတ်ဆက်ပြီး အလုပ်တွေ လုပ်နေကြတယ်ဆိုတာကို မင်းအောင်လှိုင်တို့က မသိသလို မင်းအောင်လှိုင်တို့လိုက်မမီတဲ့ အသိဉာဏ်နဲ့ တွေးခေါ်မှုတွေက လူငယ်တွေရဲ့ခေါင်းထဲမှာ တပြုံတခဲကြီး ရှိနေတာပါပဲ။
ဒီလို ခေတ်မီပြီး နိုင်ငံရေးဗဟုသုတကြွယ်နေတဲ့ လူငယ်တွေကို သွားထိလိုက်တဲ့အခါ မင်းအောင်လှိုင်တို့တသက်မှာ တခါမှ မကြုံဖူးတဲ့ ပြဿနာတွေနဲ့ ရင်ဆိုင်လိုက်ရပြီး ငါးပါးတင်မက သံဃာစင်ပါ မှောက်တော့တာပဲ။
ဒီတော့ ဘာဖြစ်လဲ … အာဏာသိမ်းပြီးရင် ပြီးပြီဆိုတဲ့ မင်းအောင်လှိုင်ရဲ့အခြေအနေက ပြောင်းပြန်ဖြစ်သွားပြီး အာဏာကိုပြန်ပေးဖို့ နောက်တက်လာမယ့် လူကို အသည်းအသန် လိုက်ရှာရတော့တာပဲ။
ဒီတော့ သူသိမ်းထားတဲ့အာဏာကို ပြန်ပေးဖို့က ရွေးကောက်ပွဲလုပ်ပေးမှပဲရမယ်။ ရွေးကောက်ပွဲမလုပ်ဘဲ သူ့အနေနဲ့ အာဏာကို စစ်တပ်ထဲက သူ့ရဲ့ဂျူနီယာတွေလက်ထဲ မပေးရဲဘူး။ သူ့လူသူ မယုံကြည်တဲ့အပြင် သူ့အာဏာကို တခြားလူလက်ထဲသာ အပ်လိုက်ရင် သူ့အနေနဲ့ နေဝင်းလို လူမသိ၊ သူမသိနဲ့ အေးအေးချမ်းချမ်းတောင် သေရမှာမဟုတ်ဘူးဆိုတာကို မင်းအောင်လှိုင်က သိတယ်။
ဒါကြောင့် ရွေးကောက်ပွဲလုပ်ပြီး အနိုင်ရပါတီကို အာဏာအပ်ဖို့ကြံတာ။ ဒါမှ ရွေးကောက်ပွဲကတက်လာမယ့် ပါတီကိုလည်း သူ့အနေနဲ့ နောက်ကွယ်ကနေ ပြန်ပြီး ကြိုးကိုင်လို့ရမှာဖြစ်တယ်။
ဒါကြောင့် မင်းအောင်လှိုင်လုပ်ပေးမယ်ဆိုတဲ့ ရွေးကောက်ပွဲဆိုတာ အတုယောင်မှ အတုအယောင်အစစ်လို့ ကျနော်တို့က ပြောနေတာဖြစ်တယ်။ သူ့အနေနဲ့ ရွေးကောက်ပွဲ ကျင်းပပြီးနောက်ပိုင်း နိုင်ငံရေးစင်မြင့်ကနေ အသာလေး လူမသိသူမသိနဲ့ ရှောင်ထွက်ပြီး ပြေးဖို့အတွက် ရွေးကောက်ပွဲကို မဖြစ်ဖြစ်အောင် လုပ်ဖို့ ကြိုးစားနေတာဖြစ်တယ်။
သို့သော် သူ့အနေနဲ့ နောက်ကြောင်းအေးအောင် သန်းရွှေအဆင်း၊ သိန်းစိန်အတက် လုပ်ခဲ့သလို နောက်တက်လာမယ့် ပါတီကိုလည်း သူယုံကြည်ပြီး စိတ်ချရမယ့် အဖွဲ့အစည်းတခုခုလက်ထဲကို ထည့်ပေးပြီးမှ သွားချင်တာဖြစ်တယ်။
ဒီတော့ စာကို အဆုံးသတ်ရမယ်ဆိုရင် သခင်စိုးရဲ့စကားကိုပဲ အစပြန်ကောက်ရမယ်။ မင်းအောင်လှိုင်လုပ်ပေးမယ်ဆိုတဲ့ ရွေးကောက်ပွဲဟာ တကယ့်ကိုမှ “ဖာခေါင်းကလုပ်တဲ့ ပြည့်တန်ဆာ ပပျောက်ရေး” ပဲ။
အာဏာကို ဘောင်းဘီဝတ်ပြီး မကိုင်ဘူး၊ ပုဆိုးလဲပြီး ပြောင်းကိုင်မယ်ဆိုတဲ့သဘော၊ နိုင်ငံရေးစင်မြင့်ပေါ်ကနေ အယောင်ပြဆင်းပြပြီး နိုင်ငံတကာမှာ မြန်မာပြည်ကြီး ဒီမိုကရေစီလမ်းကြောင်းပေါ် ပြန်သွားနေသယောင် လုပ်ပြမှာဖြစ်သလို စစ်တပ်ရဲ့အားနဲ့ပဲ မင်းအောင်လှိုင်က နောက်ကွယ်ကနေပဲ ထိန်းချုပ်ဖို့ လုပ်မှာဖြစ်တယ်။
ဒါကြောင့် ကျနော်တို့က ဒီရွေးကောက်ပွဲဆိုတာ အတုအယောင် ရွေးကောက်ပွဲဆိုပြီး ပြောနေတာဖြစ်သလို ဒီရွေးကောက်ပွဲမဖြစ်အောင် ကျနော်တို့က ကြိုးစားရမှာဖြစ်တယ်။
အကယ်၍ ရွေးကောက်ပွဲသာဖြစ်ခဲ့ပြီး ဒီကောင်တွေ စစ်တပ်က စိတ်ကြိုက် ကြိုးကိုင်လို့ရမယ့် ရုပ်သေးအစိုးရ တခါသာ ထပ်ပေါ်လာရင် ကျနော်တို့နိုင်ငံရဲ့ အနာဂတ်ဟာ ဇာတ်မျောကြီးဖြစ်ပြီး မင်းအောင်လှိုင်လည်း အသက်ရှင်မယ်၊ စစ်တပ်လည်း သက်ဆိုးရှည်နေတာကလွဲရင် ဘာတခုမှ သွေးကြေးကို ပြန်ယူဖို့ မလွယ်တော့ဘူး ဆိုတာပါပဲ။
Be the first to comment