“လက်တုန့်ပြန်ချင်ရင် တော်လှန်ရေးမှာ အနိုင်ရအောင်လုပ်”
Simonပြီးခဲ့တဲ့တပတ်ကထင်တယ်၊ အကယ်ဒမီမင်းသမီးရဲ့ မောင်ဖြစ်သူက သူ့မိန်းမနဲ့အတူ လူတယောက်ကို သိန်း ၁,၀၀၀ လောက် ကုန်ကျတဲ့ဗီဇာနဲ့ ထိုင်းကိုလာလည်တဲ့ Vlog ကိုရိုက်ပြီး လိုင်းပေါ်တင်လိုက်တယ်။
ကျနော်ကိုယ်တိုင်လည်း YT မှာ ကိုယ်တတ်သလောက် ဗီဒီယိုလေးတွေ လုပ်နေတာဆိုတော့ သူတို့လင်မယားရဲ့ ဗီဒီယိုကို မြင်ပြီး ကြည့်လိုက်မိတယ်။
ကြည့်ပြီး ဘာကိုတွေးမိလဲဆိုရင် လက်ရှိ ကျနော်တို့နိုင်ငံရဲ့ အခြေအနေအရ သာမန်ပြည်သူတွေဟာ နိုင်ငံခြားတိုင်းပြည်ကို ထွက်ခွာဖို့ ခက်ခက်ခဲခဲ ကြိုးစားနေရသလို ထိုင်းလို ဘေးချင်းကပ်နိုင်ငံကို သွားဖို့တောင် ငွေကုန်ကြေးကျခံပြီး ဟိုလူ့ကို မျက်နှာငယ်လေးနဲ့ လုပ်ပြလိုက်၊ ဒီလူ့ကို မျက်နှာချိုသွေးလိုက်နဲ့ တကယ်ကိုမှ စိတ်ပျက်ဖို့ကောင်းတဲ့ အခြေအနေတခုကို ကြုံတွေ့နေရတယ်။
ဒါပေမယ့် အတန်းလွှာတခုက ပုဂ္ဂိုလ်တွေကတော့ ထိုင်းမှမဟုတ်ဘူး ဘယ်နိုင်ငံကိုသွားမလဲ ကြိုက်တဲ့နိုင်ငံကိုသွား၊ သူတို့နာမည်ကို ဆန်ရှင်ထုတ်ထားတဲ့ တိုင်းပြည်ကလွဲရင် ကြိုက်တဲ့နေရာကို သွားနိုင်တယ်။ ဒါတောင် ဒီမင်းသမီးမောင် လင်မယားက ငယ်ငယ်ကတည်းက ကျိကျိတက် ချမ်းသာလာကြတဲ့ သူတွေမဟုတ်ဘူး။ ဒီလိုလူတွေတောင် ဒီလောက်သွားနိုင်ပြီး သုံးနိုင်၊ ဖြုန်းနိုင်ရင် တကယ့်ဧရာမ ခရိုနီကြီးတွေ၊ အခုလက်ရှိ တိုင်းပြည်ကို မတရား အုပ်ချုပ် နေတဲ့သူတွေနဲ့ သူတို့မိသားစုတွေဆို ဘယ်လောက်တောင် ချမ်းသာကြမလဲ။
ဆီးရီးယားက အာဆတ်ထွက်ပြေးချိန်မှာ ဒေါ်လာတွေနဲ့ အတွင်းပစ္စည်းတွေကို ရုရှားထိ သယ်သွားတယ်။ ရှရှားမှာ သေသည်အထိ အလုပ်လုပ်စရာမလိုဘဲ ထိုင်စားကြမယ်။ မင်းအောင်လှိုင်တို့ မိသားစုလည်း ဒီတိုင်းပဲ။ ဒီကောင်တွေ အလုံးစုံရှုံးတာနဲ့ ထွက်ပြေးကြဖို့ ပြင်ဆင်ထားပြီးသား။
နောက်ဆုံးမှာ ပြာပုံအတိကျန်မယ့် မြို့တွေပေါ်က ပြည်သူတွေပဲ ရုန်းကန်ကြရမှာ။
တကယ်တော့ စစ်ဖြစ်တာမကောင်းဘူး၊ ပြည်သူပဲ နစ်နာကြတာမှန်ပေမယ့် ဒီလို စစ်ဖြစ်အောင် ဘယ်သူတွေက အစ ဆွဲထုတ်သွားခဲ့တာလဲ။
ကျနော်တို့ လက်နက်ကိုင်တယ်ဆိုတာ အပျင်းပြေဆော့ဖို့အတွက် မဟုတ်ဘူး၊ တကယ်လိုအပ်လို့ကို ကိုင်လိုက်ရတာ။ ဒီလို ကျနော်တို့ လက်နက်ကိုင်တဲ့အချိန်ထိတောင် ဘောမတွေက စစ်ကိုမခေါ်နဲ့ စစ်ကိုခေါ်ရင် စစ်လာမယ်ဆိုပြီး ခြိမ်းခြောက်ခဲ့သေးတယ်။ တကယ် စစ်လာပြီး ဒီကောင်တွေရှုံးတော့မှ ပြည်ထောင်စုကို ဖြိုခွဲနေကြတယ်၊ လိုချင်တာကို လက်နက်ကိုင်ပြီး မတောင်းရဘူးဆိုတာ မသိဘူးလားဆိုပြီး လေသံတွေ ပြောင်းလာကြတယ်။
တကယ်တမ်း လက်နက်ကိုင်တာကို မဖြစ်စေချင်ရင် အစကတည်းက ပြည်သူတောင်းဆိုတာကို ညှိလို့ရတယ်၊ လိုက်လျောလို့ရတယ်။ သို့သော် ဒီလိုမျိုးတော့ မလုပ်ခဲ့ဘဲ ခုကြမှ လက်နက်တွေစွန့်ပြီး ဆွေးနွေးရအောင်ဆိုတော့ ကျနော်တို့ကရော အရူးလား။
ဒီကောင်တွေကိုယ်တိုင် စစ်ရဲ့ဆိုးမွေးတချို့ကို ပါးပါးလေးထိလာတော့မှ စစ်ပွဲတွေ မလိုချင်ဘူး ဆိုတဲ့အသံတွေ ထွက်လာကြတယ်။ မျက်စိရှေ့တင် ပြည်သူတွေ ဆင်းရဲဒုက္ခရောက်ချိန်မှာ စစ်တပ်ထောက်ခံသူတွေဘက်က ပွဲအမျိုးအမျိုးကျင်းပပြီး ပျော်ရွှင်မြဲ ပျော်ရွှင်ပြသလို နိုင်ငံခြားထွက်ပြီး အပန်းဖြေကြတဲ့ သူတွေနဲ့၊ စျေးဝယ်ထွက်ကြတဲ့သူတွေနဲ့ အခုချိန်ထိ ရှိတယ်။
စိတ်ရင်းအတိုင်းပြောရရင် ကျနော်တို့ပြည်သူတွေ ပင်ပန်းဆင်းရဲချိန်မှာ အမျိုးမျိုးသော သာယာမှုတွေကို ခံစားနေတဲ့ ဘောမတွေကို မနာလိုဘူး။ သူတို့တွေကို ကျနော်တို့က အမြဲမှတ်ထားဖို့လိုတယ်။ မှတ်ထားပြီး လက်တုန့်ပြန်နိုင်ဖို့အတွက် ဒီတော်လှန်ရေးကြီးကို အနိုင်ရအောင် တိုက်ဖို့လည်းလိုတယ်။
AA တပ်တော်က သူ့ရခိုင်လူမျိုးအချင်းချင်း သစ္စာဖောက်ပြီး အကြမ်းဖက်စစ်တပ်နဲ့ ပေါင်းခဲ့တဲ့ ဦးကျောက်တောင်ဆိုတဲ့ ပုဂ္ဂိုလ်ကြီးရဲ့ ပိုင်ဆိုင်မှုတွေကို အကုန်လုံး သိမ်းပစ်လိုက်တယ်။ ဒီသတင်းကိုမြင်တော့ ကျနော် တော်တော်လေး အားကျမိတယ်။
ကျနော့်လိုပဲ တော်လှန်ပြည်သူတွေနဲ့ တော်လှန်ရေးဘက်တော်သားတွေလည်း အားကျကြမှာပဲ။ ဒါဆို ဒီလိုမျိုးအားကျနေတဲ့ ဘ၀ကနေ ကိုယ်တိုင်လုပ်နိုင်ဖို့အတွက် ကျနော်တို့မှာ လုပ်စရာက တခုပဲရှိတယ်။
အဲဒါ “ဒီတော်လှန်ရေးကြီးကို အနိုင်ရအောင်တိုက်ဖို့ပဲ။”
စစ်တပ်ကို မကျေနပ်ဘူး။
ဒါဆို တော်လှန်ရေးမှာ အနိုင်ရအောင်လုပ်။
ဒီကောင်တွေ ယုတ်မာခဲ့သမျှကို တရားဥပဒေအရ လက်တုန့်ပြန်ချင်တယ်။
ဒါဆို တော်လှန်ရေးမှာ အနိုင်ရအောင်လုပ်။
အမေစုကို ကယ်ချင်တယ်၊ အကျဥ်းကျနေတဲ့ ရဲဘော်တွေကို လွတ်မြောက်စေချင်တယ်။
ဒါဆို တော်လှန်ရေးမှာ အနိုင်ရအောင်လုပ်။
ကျနော်တို့အတွက် လုပ်စရာအလုပ်က ဒီတခုတည်းပဲ။ တိုင်းရင်းသားတပ်ဖွဲ့တွေရဲ့ စုစည်းမှုနဲ့ နည်းစနစ်တွေအတိုင်း ကျနော်တို့တွေလည်း စုစုစည်းစည်းနဲ့ တညီတညွတ်တည်း ရုန်းကန်နိုင်ရင် ရပြီ။ ကျနော်တို့ နှစ်နဲ့ချီပြီး ပင်ပန်းခဲ့ကြပြီးပြီ၊ ဒီလိုပင်ပန်းမှုတွေနဲ့တန်တဲ့ အောင်မြင်မှုကိုပဲ လိုချင်တယ်။ စားပွဲဝိုင်းပေါ်က ငြင်းခုံမှုတွေနဲ့ တဦးပေါ်တဦး အပြစ်ဖို့ လက်ညိုးထိုးနေတဲ့ မီတင်တွေကနေ တကယ့် အထွေအထွေထိုးစစ်ကြီး စနိုင်ဖို့အတွက် လိုအပ်လာပြီ။
ဒီအတွက် ဦးဆောင်မယ့်သူတွေနဲ့အတူ တိုက်ပွဲဝင်ကြမယ့် ရဲဘော်တွေ အသင့်ရှိသလို ရတဲ့ဘက်ကနေ ရတဲ့နည်းနဲ့ ဒီတော်လှန်ရေးကြီးမှာ တစိတ်တဒေသပါဝင်ထောက်ပံ့နေကြတဲ့ ကျနော်တို့လို ပြည်သူတွေကလည်း အသင့်ရှိတယ်။
ဒါကြောင့် ဦးဆောင်မယ့်သူတွေအနေနဲ့ စစ်ကို နိုင်အောင်တိုက်ဖို့ကိုသာ အာရုံထားပါ။
Be the first to comment