ဓမ္မသတ်ပုံပြင်များ

“စာအုပ်တန်းမှာလမ်းလျှောက်ခြင်း”

စာအုပ်အမည်။ ဓမ္မသတ်ပုံပြင်များ
ရေးသူ။ ဦးသော်ဇင်
ထုတ်ဝေ။ ဥယျာဉ်မှူးစာပေ၊ ၁၀၅၊ ဟံသာဝတီလမ်း
၆-ရပ်ကွက်၊ တောင်ဥက္ကလာပ
ဖြန့်ချိ။ စာပလွေစာအုပ်တိုက်
အမှတ်၁၁၆၊ ၇-ရန်ကင်း၊ ရန်ကုန်မြို့
ပထမအကြိမ် အုပ်ရေ ၂၀၀၀၊ (၁-၇-၆၉)

■ နောက်ဖုံး
‘နိဗ္ဗာန်’ ဆိုတာ ဘယ်လိုလဲ၊
ထင်ထင်ရှားရှိပါသလား၊
ဝိုးဝိုးဝင်းဝင်း ထွန်းလင်းနေသလား၊
မကြံနိုင်တဲ့ ဘုံဗိမာန်နဲ့လား၊
အခုမျက်မှောက် ရောက်နိုင်သလား၊
နိဗ္ဗာန်သွားသူများ ထင်ရှားရှိသလား၊
တကယ်ပင် ငြိမ်းချမ်းသာယာသလား၊
သူတို့ ချမ်းသာပျော်ရွှင်နေကြသလား၊
ဝေဟင်က လေအသွင် ရွှင်နေကြသလား၊
ရုပ်လား-နာမ်လား-သုညလား-ဘာလား၊
မဟာယာန နိဗ္ဗာန်က တမျိုးတစားလား၊
ဟီနဘာန နိဗ္ဗာန်နဲ့ အတူတူဘဲလား၊
ဤသို့စကားပြဿနာတွေကို ဆရာဦးသော်ဇင်က မြန်မာ သီဟိုဠ် ယိုးဒယား တိဘက် ဂျပန် အိန္ဒိယ- အစရှိတဲ့ တောင်ပိုင်း-မြောက်ပိုင်း ပိဋိကစာပေသမိုင်းတို့နဲ့ ဖြေဆိုထားလို့ ဟိမဝန္တာ တောင်ပေါ်က တက်ကြည့်သလို မြင်ရပါမည်။ အဖိုး ၅ ကျပ်နဲ့ ရှေ့လမှာ ထွက်ပါမည်။
– စာပလွေစာပေတိုက်

■ သရုပ်ပြမာတိကာ
● ဖြတ်ထုံးအစီအရင်
ဓမ္မသတ်တို့၏ဘိုးအေ မနု၏ အကြောင်းအရာမျိုးစုံတို့ဖြင့် ပါဠိနှင့် သက္ကတဘာသာတို့မှ မနုဓမ္မသတ် မူရင်းအစစ်အမှန်ကို တွေ့ရမည်။

● ဓမ္မဝိလာသဖြတ်ထုံး
ရှေးအကျဆုံး မြန်မာအသုံးအနှုံး စကားလုံးတို့နှင့်ဖြစ်ပါ၍ ရှေးမြန်မာကြီးတို့နှင့် ရင်းနှီးစွာ တွေ့ဆုံဆွေးနွေးရသကဲ့သို့ဖြစ်ပါသည်။

● သုဓမ္မစာရီဖြတ်ထုံး
အင်္ဂလိပ် ပြင်သစ်စသော ဘာသာအရပ်ရပ်သို့ ပြန်ဆိုပြီးဖြစ်သော မြန်မာဓမ္မသတ်စစ်စစ်ဖြစ်ပါ၍ မျက်ခြေပြတ်ရန်မသင့်ပါ။

● အမတ်ဒိန်ဖြတ်ထုံး
မုံ့အိုးကင်းကပ်သယ်တယောက် ရွှေလက်ကောက်ပျောက်သောအမှုက ဓမ္မသတ် မဟုတ်၊ ရှေးလူနေမှု သမိုင်းကိုပါ ပြောပြနေ၏။

● မဟာပညာကျော်ဖြတ်ထုံး
စုံထောက်ဝတ္ထု ပြုစုရန် အကြံဉာဏ် အချက်အလက်များကိုလည်း ရနိုင်၍ ရခိုင်တိုင်းသမိုင်းအနှစ်-သာရကိုလည်း လေ့လာရပါမည်။

● ခုံတော်မောင်ကျဘမ်းဖြတ်ထုံး
မသိသူကျော်သွား သိသူများဖော်စားဆိုသည်မှာ အတော်များလှပြီ။ မိမိသည်လည်း တပွဲတလမ်း အကဲစမ်းလိုက စမ်းနိုင်ပါသေးသည်။

● ဇာတကဖြတ်ထုံး
ဖြတ်ထုံးစာရင်းတို့မှာ မပါဝင်သော်လည်း ဖြတ်ထုံးတို့ကို ဘယ်တော့မျှ လေးလေးနက်နက် ကျေးဇူးပြုခဲ့ကြောင်း ကောင်းစွာတွေ့မြင်ရမည်။

● ကြမ္မာဒိုက်မင်းကြီးဖြတ်ထုံး
ကမ္ဘာပေါ်ရှိ တိုင်းပြည်အရပ်ရပ်တွင် လှည့်ပတ်နေသော ဓမ္မသတ်တို့ဖြစ်ရာ ဤဖြတ်ထုံးနှင့်ပတ်သက်၍ အထူးပြောစရာ မလိုတော့ပါ။

● လက်ဝဲသုန္ဒရဖြတ်ထုံး
ဓမ္မသတ်ထုံးဖြတ် ပုံစံတပုဒ် သတ်စပ်ညီ ကာရန်တို့ဖြင့် ကဗျာလင်္ကာစပ်ဆိုထားသဖြင့် ကဗျာအတွက် နှစ်သက်ဖွယ် ကောင်းလှပါ၏။

■ အဖွင့်
မျိုးနွယ်လေးဖြင့်…
ဗိုလ်လှေးအထု၊ လူရေးမှုကြောင့်
မနုနော၊ ရှင်စောမုနိ
ဣသိမိုးယံ၊ တန်ခိုးပျံတို့
နန်းစံကမ္ဘာ၊ တည်းဦးစွာက
မဟာသမတ်၊ နေနတ်နွယ်မှူး
ဘေးတော်ဦးအား၊ ကျေးဇူးများစေ
ဆက်သွင်ပေသည့်၊ ရွှေစာကျမ်းမြတ်
ဓမ္မသတ်တိ၊ ဆုံးဖြတ် ခွဲခြမ်း
နန်းစဉ်ကျမ်းနှင့်၊ နုကြမ်းနှိုင်းဆ
ဖြတ်ထုံးစသား၊ ကမ္ဘာ့လက်သုံး
ကျမ်းအားလုံးကို၊ သိမ်းကျုံးညက်စေ
လေ့ကျက်ချေ၍၊ ဗိုလ်ခြေနောင်လာ
များစွာတို့အား၊ မှတ်သားလွယ်မှု
ကြည်ရှုလွယ်ကြောင်း၊ ရုံးပေါင်းစုလတ်
နဝရတ်ကိုးလီ၊ မျက်စုံစီသို့
လောကီပညာ၊ ကြီးကျယ်စွာသား…
(မာဃဒေဝ)

■ စာမြည်း
သက္ကတဘာသာ၌ ဓမ္မသတ်ကို မာနဝ ဓမ္မသတ္ထ ဟုခေါ်ပေရာ မြန်မာလို လူမှုရေးကျမ်းဟု ဆိုနိုင်၏။ ပြည်သူပြည်သား လူအများတို့ တရားမျှတစွာနေရေးအတွက် ပညာရှိတို့စီရင်သော ကျမ်းတို့ပင်ဖြစ်၏။ သက္ကတစာပေအရ ဆိုရပါလျှင် မာနဝ ဓမ္မသတ်တို့မှာ ၂၈ ကျမ်းမှ၊ ၅၆ ကျမ်းအထိရှိ၏။ သို့ရာတွင် ထင်ရှားသော ဓမ္မသတ်တို့မှာ မနု၊ ယညဝလကျ၊ အတြိ၊ ဝိသဏု၊ ဟာရိတ၊ ဥသနသ၊ အင်္ဂိရာ၊ ယမ၊ ကစ္စာယန၊ ဗြိဟပ္ပတိ၊ ပါရာသရ၊ ဗျာသ၊ ဒက္ခ၊ ဂေါတမ၊ ဝသိဠ၊ နာရဒ၊ ဘဂု၊ သင်္ခနှင့် လိခိတတို့ ဖြစ်ကုန်၏။
အနုဓမ္မသတ်ကို မနု သမိတိ၊ ယညဝလကျ ဓမ္မသတ်ကို ယညဝလကျ သမိတိအစရှိသည်ဖြင့် ခေါ်ကြ၍ ထိုသမိတိကျမ်းအလုံးစုံကိုမူ ခြုံ၍ ဓမ္မသတ္ထ ဟုခေါ်ကြ၏။ ဆိုလိုသည်မှာ မနုစသောအမည်နာမ ဝိသေသနှင့် တွဲဖက်လေက သမိတိဟု ခေါ်ဆို၍ မနုစသော အမည်နာမမပါဘဲ သာမန်အားဖြင့်ကား ဓမ္မသတ္တ ဟုခေါ်သည်။ ဓမ္မသတ်နှင့်ပတ်သက်၍ ဣန္ဒိယနိုင်ငံသားတို့၏ ရာဇဝင်အကျဉ်းချုပ်၌ မစ္စတာဟန်တာ Hun Ter က ဤသို့ဆို၏။
“ဗြာဟ္မဏတို့သည် ဓမ္မသတ်ကို မိမိတို့သာသနာသို့ အဝင်ပြု၏။ လူတို့ မှတ်သားအပ်သော ဂြိတျသုတ္တ Grihya Suras သည် တရားနှင့်ဆိုင်သော ဥပဒေစာ အဟောင်းဆုံးဖြစ်လေသည်။ ၎င်းကျမ်းသည် ခရစ်ယန်မပေါ်မီ နှစ်ပေါင်း ၇၀၀ လောက်ကပင် ရှိနှင့်လေသည်။
ခရစ်ယန်မပေါ်မီ နှစ်ပေါင်း ၄၀၀ ခန့်ကာလက ဣန္ဒိယမြောက်ပိုင်းရှိ ဗြာဟ္မဏတို့ ဓလေ့ထုံးစံကို ပေါင်းစု၍ မနုဓမ္မသတ် စီရင်ပြုလုပ်၏။
ထို့နောက် ကျော်ဇော ကိတ္တိရှိသော ယာဇနဝါကျ Yajna Valkya ဓမ္မသတ်ကျမ်းတစောင်ကို ထုတ်နှုတ်စီရင် ပြုလုပ်သည်မှာ ခရစ်ယာန်မပေါ်မီ အနှစ် ၂၀၀ လောက်ကဟု အထင်ရောက်၏။”
(“ဖြတ်ထုံးအစီအရင်” မှ ထုတ်နှုတ်ချက်)