“အကယ်ဒမီ”
Simonတနေ့က FB မှာ အကယ်ဒမီနဲ့ပတ်သက်တဲ့ တချို့အင်တာဗျူးတွေ တက်တက်လာတာကို မြင်လိုက်ရတယ်။ ပြောရမယ်ဆိုရင် အာဏာသိမ်းပြီးကာလကတည်းက အကယ်ဒမီပေးပွဲဆိုတာ ကျနော့်အတွက်တော့ ဘာတန်ဖိုးမှမရှိတဲ့ ရေပေါ်ဆီတွေရဲ့ ပွဲလို့ပဲ သတ်မှတ်ထားတယ်။
ဒီတော့ သူ့ဟာသူ ဘယ်သူရရ ဝမ်းလည်းမသာဘူး၊ အားလည်းမပေးဘူး၊ တခုပဲ နှိပ်ကွပ်ဖို့ရှိလာရင်တော့ ပွဲဆူနေတဲ့ရေပေါ်ဆီတွေနဲ့ရောပြီး ဝင်ကြိတ်တာတော့ရှိတယ်။
နောက်ပြီး ဒီစာကိုရေးမှပဲ သေချာပြန်တွေးမိနေတာ ငါ့ဘ၀မှာ အကယ်ဒမီပေးပွဲတွေနဲ့ ပတ်သက်ပြီး ဘာများ မှတ်မှတ်ရရ ရှိခဲ့လဲပေါ့။ မှတ်မိတာဆိုရင် သူ့ကျွန်မခံပြီ ဇာတ်ကားနဲ့ ညွန့်ဝင်း အကယ်ဒမီရတော့ စင်ပေါ်ကနေ ပေါတောတောနဲ့ “သူ့ကျွန်မခံပြီ” ဆိုတာကြီးကို သုံးခေါက်လောက် ထအော်ပြီး ရှေ့ကနေ တိုင်ပေးတာကို မှတ်မိတယ်။ သူကသာ ရှေ့ကအော်ပြီး တိုင်ပေးနေတာ သူ့နောက်က ဘယ်သူမှလည်း လိုက်မအော်ကြဘူး။
အဲ့သည့်တုန်းက ကိုယ်တွေက ကလေးပဲရှိသေးတယ်။ ဒါတောင် စင်ပေါ်က သူ့ကျွန်မခံပြီ ဆိုတာကြီးကို အော်ပြနေတဲ့ ညွန့်ဝင်းကိုကြည့်ပြီး မဆီမဆိုင် သူ့အစား ကိုယ်ကတောင် ရှက်လိုက်မိသေးတယ်။
နောက်တခုက ကိုသားကြီး (ဒွေး)။
သူက အမေ့ခြေရာဇာတ်ကားနဲ့ အကယ်ဒမီရတော့ စင်ပေါ်ကနေ ကျေးဇူးတင်စကား ပြောတဲ့အချိန်မှာ ခင်ဗျားတို့၊ ခင်ဗျားတို့၊ ခင်ဗျားတို့ဆိုတာချည်း လှိုင်လှိုင်သုံးသွားတဲ့အတွက် သူ့ကို ဂျာနယ်ထဲမှာ စာအရှည်ကြီးတွေရေးပြီး ခင်ဗျားဋီကာ ချဲ့ပြတာကိုပါ ခံလိုက်ရသေးတယ်။
ကျနော်လူပျိုပေါက် ၉ တန်း၊ ၁၀ တန်းတုန်းက ရုပ်ရှင်ကို တန်းတန်းစွဲ ကြည့်မိတဲ့ကာလလို့ ပြောရမယ်။ အဲ့သည့်တုန်းက ကျောင်းအရမ်းပြေးတဲ့ကာလဆိုတော့ ကျောင်းပြေးတာနဲ့ မနက်ဆို ရုပ်ရှင်ရုံကိုရောက်ပြီ။ အဲ့သည့်အချိန်တုန်းက ရုပ်ရှင်ရုံမှာ ၇၅ ကျပ်တန်းတွေလည်း ရှိသေးတယ်။ ကျနော်တို့က ဗိုလ်တထောင်မှာ ကျောင်းတက်ကြတာဆိုတော့ ရုပ်ရှင်ရုံတွေနဲ့ကလည်း နီးနီးလေး။ ဒီတော့ ကျောင်းပြေးတာနဲ့ ရုပ်ရှင်ရုံကိုရောက်နေပြီ။
ဒီလို ရုပ်ရှင်ကို တန်းတန်းစွဲ ကြည့်မိတဲ့ကာလမှာတုန်းက သဘောကျခဲ့ရတဲ့ မင်းသားဆိုရင်လည်း လွင်မိုးနဲ့ မင်းမော်ကွန်းပဲ၊ ဒွေးကို မကြိုက်ဘူး။ သူက Drama king ဆိုတော့ သူတို့တူ၀ရီး သရုပ်ဆောင်တာကို ကြည့်ရတာ ဘောလိဝုဒ်မင်းသားတွေကို ကြည့်နေရသလိုပဲ။ အဲ့ဒါကြောင့် မကြိုက်တာ။
ဒါပေမယ့်လည်း အဲ့သည့်ကာလတုန်းက ကျနော်ကြိုက်တဲ့ မင်းသမီးက အိန္ဒြာကျော်ဇင်ဆိုတော့ ဒွေးကိုမကြိုက်ပေမယ့်လည်း ဒွေးပါတဲ့ကားတိုင်းနီးပါး မအူဝဲကပါတော့ အူဝဲကိုကြိုက်တဲ့ ကျနော်တို့ဘော်ဒါတွေက မင်းသားကို မကြိုက်ပေမယ့်လည်း သွားကြည့်ရတာပဲ။
အကယ်ဒမီနဲ့ပတ်သက်ပြီး ပထမဆုံး ပျော်ရတာက ကိုကျော်ရတဲ့ နှစ်ပဲ။ မင်းမော်ကွန်း နှလုံးလှလူမိုက်နဲ့ အကယ်ဒမီရတုန်းကဆို ကျနော်တို့ကောင်တွေပါ လိုက်ပြီး ပျော်ခဲ့ကြဖူးတယ်။ Drama ဆိုမကြည့်ဖြစ်တဲ့ ကျနော်က နှလုံးလှလူမိုက်ဇာတ်ကားမှာ ကိုကျော်ပါလို့ သွားကြည့်ပြီး သူ့ကို အကယ်ဒမီရစေချင်ခဲ့တာ။ တကယ်တမ်းရတော့ ပျော်တာပေါ့။
နောက်ပြီး မင်းသမီးထဲမှာ မှတ်မှတ်ရရရှိတဲ့ နောက်တယောက်ဆိုရင် ပိုင်ဖြိုးသု။ သုသုကို စပြီးကြည့်ဖူးတာက စိုင်းစိုင်းကိုချစ်တဲ့ ကောင်မလေး ဆိုတဲ့ ဗီဒီယိုကားနဲ့ စသိတာ။ ဒါကလည်း ကျနော့်ဘော်ဒါက သုသုကို ကုလားဆင် လေးနဲ့ ချစ်စရာလေးဆိုပြီး လာပြောလို့ ငှားကြည့်မိရာကနေ သုသုကို စသဘောကျတာ။ နောက်ပိုင်း ကျနော်လည်း နိုင်ငံခြားထွက် ၁၀ နှစ်လောက်ကြာတော့ ပြန်ရောက်တဲ့အချိန် သုသုက အကယ်ဒမီတောင် ရပြီးနေပြီ။
သုသုတို့ အကယ်ဒမီရတဲ့နှစ်က အရပ်သားအစိုးရစစ်စစ် ပြောင်းတဲ့ကာလဆိုတော့ အနုပညာရှင်တွေနဲ့ အစိုးရကြားမှာ ပိုပြီး ရင်းရင်းနှီးနှီးရှိလာသလို ရုပ်ရှင်ဘက်မှာလည်း ဆင်ဆာကိစ္စတွေနဲ့ အပြောင်းအလဲတွေ အများကြီး လုပ်လာခဲ့ကြတယ်။ အကယ်ဒမီပေးပွဲဆိုရင်လည်း အမေစုကိုယ်တိုင် ရှားရှားပါးပါး တက်ရောက်ချီးမြှင့်ခဲ့သလို အဲ့သည့်နှစ်ကရတဲ့ အကယ်ဒမီဆိုတာကလည်း ပရိသတ်နဲ့ တသားတည်းဖြစ်ပြီး ပရိသတ်ရစေချင်တဲ့ အနုပညာသမားတွေပဲ ရခဲ့တာဖြစ်တယ်။
နောက်ပိုင်းနှစ်တွေမှာတောင် အကယ်ဒမီရဲ့ ထုံးစံအတိုင်း ကပျက်ကချော်တွေ ဖြစ်ခဲ့သေးတဲ့အတွက် သုသုတို့ ရတဲ့နှစ်ကတော့ ပရိသတ်နဲ့ တသားတည်းကျပြီး ပရိတ်သတ်က ပေးတဲ့ဆုလို့ ပြောရမယ်ဆိုရင်တောင် မမှားဘူး။ ပြီးခဲ့တဲ့နှစ်တွေကဆို အကယ်ဒမီရဲ့ ရုပ်ပေါက်ချက်က ရန်အောင်နဲ့ စိုးမြတ်သူဇာလိုဟာတွေကို ပေးလိုက်တာပဲ။
တကယ်တမ်းပြောရရင် လက်ရှိ အာဏာသိမ်းပြီးကာလနောက်ပိုင်း အကယ်ဒမီရဲ့ အနှစ်သာရဆိုတာ တချိန်က န၀တ၊ နအဖ ခေတ်တုန်းကလိုပါပဲ။ စစ်တပ်နဲ့ ပလဲနံသင့်ပြီး အဘတို့နဲ့ရင်းတဲ့သူ၊ လူကြီးတွေနဲ့ အဆင်ပြေတဲ့သူတွေသာ ရဖို့များတဲ့ ကာလတခုကို ပြန်ရောက်သွားတာကို မြင်နေရတယ်။ ဒီတော့ အကယ်ဒမီဆိုတာ ဘောမနိုင်တဲ့ သူတွေအတွက်ပဲ ရနိုင်မယ့် ဆုတခုလို၊ ဘယ်လောက်တော်တော် ငါတို့ပေးချင်တဲ့သူပဲ ပေးမယ်ဆိုတာမျိုး ပြန်ဖြစ်လာတယ်။
ဒါကိုလည်း တချို့က မာနမရှိဘဲ ပြည်သူတွေ မျက်ရည်ပေါက်ကြီးငယ်ကျတဲ့ ကာလတခုမှာ အဘတွေ သဘောကျ ပေးမယ့် အကယ်ဒမီကို ငမ်းငမ်းတက် ပြန်ပြီးလိုချင်လို့ ဖားနေကြတာကိုပါ မြင်နေရတယ်။ (ဒီထဲမှာ တချိန်က ရဲရဲတောက် လက်သုံးချောင်း ထောင်ခဲ့သူတွေလည်း ပါတယ်)
အာဏာသိမ်းခါစက ရောယောင်ပြီးပါလာတဲ့ ရေပေါ်ဆီတသိုက်ဆိုလည်း ခုချိန်မှာ အကယ်ဒမီရဖို့ကို သူတို့ထုတ်လုပ်သူတွေကတဆင့် လုံးပန်းနေကြတာကို မြင်နေရတော့ စိတ်ထဲမှာ သံဝေဂတောင် ရမိတယ်။
စကားစပ်လို့ပြောရရင် အကယ်ဒမီရတိုင်း အနုပညာရှင်တွေပြောကြတဲ့ စကားတခွန်းရှိတယ်။ ဘာလဲဆိုတော့ အကယ်ဒမီဆိုတာ ပရိသတ်က ပေးတဲ့ဆုပါ၊ ဒါကြောင့်လည်း ပရိသတ်အတွက် ပိုပြီး ကြိုးစားသွားပါမယ်တို့ ဘာညာပေါ့ဗျာ။ ဒါပေမယ့် တကယ်တမ်း အာဏာသိမ်းဖြစ်စဥ် ဖြစ်တဲ့အချိန်မှာတော့ တချိန်က ပရိသတ်ကြီးအတွက်၊ ပြည်သူအတွက် ဆိုပြီးပြောခဲ့တဲ့ အနုပညာရှင် တော်တော်များများက အစပိုင်းလောက်မှာ လက်သီး၊ လက်မောင်းတန်းခဲ့ပြီး တကယ်တမ်း စစ်တပ်က ပြည်သူကို မတရားဖိနှိပ်တဲ့ အချိန်လည်းရောက်ရော ပြည်သူတွေဘာဖြစ်ဖြစ် ငါတို့နဲ့ မဆိုင်တော့ဘူးဆိုပြီး အသံတိတ်၊ နှုတ်ဆိတ်နေလိုက်ကြတယ်။
ဒီနေရာမှာ ကျနော်တို့အတွက် အားပေးရကျိုးနပ်တာကတော့ တော်လှန်ရေးကို ဟိုးအစကတည်းကနေ ခုချိန်ထိပါလာတဲ့ အနုပညာရှင်တွေပါပဲ။ ဒီထဲမှာမှ လူသိထင်ရှားဖြစ်တဲ့ အကယ်ဒမီဆုရှင် မင်းမော်ကွန်းနဲ့ ပိုင်ဖြိုးသုတို့ နှစ်ယောက် ပါလာခြင်းကလည်း ကျနော်တို့ တော်လှန်ပြည်သူတွေအတွက် အားဖြစ်စေခဲ့တယ်။ ဒီအတွက်လည်း ကိုကျော်နဲ့ သုသုတို့အပြင် တခြား အနုပညာရှင်တွေကိုလည်း ဒီနေရာကနေ အထူးကျေးဇူးတင်ပါတယ်။
အခုဆို သုသုက အကယ်ဒမီရုပ်ကမ်ပိန်းဆိုပြီး လုပ်နေတာရှိတယ်။ ဒါကလည်း ပြည်သူကပေးတဲ့ အကယ်ဒမီနဲ့ ပြည်သူကို ပြန်ပြီး အကျိုးပြုချင်တာရယ်၊ ပြည်သူနဲ့အတူ တော်လှန်ရေးမှာ လိုအပ်တဲ့အရာတွေအတွက် ပြန်လည် ဖြည့်ဆည်းပေးချင်တာတွေအတွက် သူတတ်နိုင်တဲ့ဘက်ကနေ ကြိုးစားနေတာ။
သုသုရဲ့ ဒီလို အကယ်ဒမီရုပ်ကမ်ပိန်း ဆိုတာကိုမြင်ပြီး ကျနော် ဘာကိုတွေးမိလဲဆိုတော့ ပြည်သူပေးတဲ့ဆုကို ရတာခြင်းအတူတူ တချို့ရတဲ့ အကယ်ဒမီဆိုတာ ငါကြိုးစားလို့ ငါရတာ ပြည်သူဘာဖြစ်ဖြစ် အချိန်တန် သူ့ဟာသူ ပြီးသွားမှာပဲဆိုပြီး ပြည်သူ ဒုက္ခရောက်ချိန်မှာ မျက်နှာလွှဲလိုက်တဲ့ အနုပညာသမားတွေနဲ့ ပြည်သူကို စိတ်မပျက်စေရပါဘူးဆိုတဲ့ စကားကိုပြောပြီး တကယ်တမ်း ပြည်သူ အတိဒုက္ခရောက်နေချိန်မှာ ပြည်သူ့ဘက်ကို မျက်နှာမူပြီး ရရှိထားတဲ့ အကယ်ဒမီနဲ့ထိုက်တန်အောင် ပြည်သူ့အကျိုးအတွက် ပြန်ကူမယ်ဆိုတဲ့ အနုပညာသမားတွေရဲ့ ကွာခြားချက်ပါပဲ။
ကျနော်တို့အတွက်ကတော့ ပြည်သူကိုမျက်နှာမူခဲ့တဲ့ တော်လှန်အနုပညာရှင်တိုင်းဟာ ကျနော်တို့ရင်ဘတ်ထဲက ပေးတဲ့ အကယ်ဒမီကို တသက်လုံး ရရှိထားပြီးကြပြီ ဆိုတာကို ပြောချင်တယ်။
အနုပညာရှင်တိုင်း ပြည်သူအားပေးရကျိုးနပ်အောင် မလုပ်နိုင်တဲ့ ခေတ်ကာလတခုမှာ တော်လှန်အနုပညာရှင်တွေကတော့ ကျနော်တို့ တန်ဖိုးထားပြီး အားပေးရကျိုးနပ်တဲ့ ပြည်သူပေးတဲ့ အကယ်ဒမီရှင်တွေပါပဲ။
Be the first to comment